Vahe 50

Teuteu ke Fehangahangai mo e Fakatangá

ʻI HE hili ʻa hono fakahinohino ki heʻene kau ʻaposetoló ʻa e ngaahi founga ke fakahoko ai ʻa e ngāue fakamalangá, naʻe fakatokanga ʻa Sīsū kiate kinautolu fekauʻaki mo e kau fakafepakí. Naʻá ne pehē: “Vakai! ʻOku ou tuku atu kimoutolu ke mou hangē ko e fanga sipi ʻi he lotolotonga ʻo e fanga ulofi . . . Ka mou lamalama telia ʻa e kakaí; he te nau fakaʻilo kimoutolu ki he ngaahi fakamāuʻanga, pea te nau haha kimoutolu ʻi honau ngaahi falelotú. ʻIo, ʻe ʻave kimoutolu ki he ngaahi kovana, mo e ngaahi tuʻi, koeʻuhí ko au.”

Neongo ʻa e fakatanga kakaha ʻe fehangahangai mo hono kau muimuí, naʻe fai ʻe Sīsū ʻa e talaʻofa fakafiemālie: “Ka nau ka fakaʻilo kimoutolu, ʻoua te mou lotomoʻua pe fēfē haʻamou tali, pe ki ha meʻa te mou leaʻaki; he ʻe ʻatu kiate kimoutolu ʻi he taimi ko iá ha meʻa ke mou leaʻaki, he ʻoku ʻikai ko kimoutolu ʻe leá, ka ko e laumālie ʻo hoʻomou Tamaí ʻe lea ʻiate kimoutolú.”

“Pea,” naʻe hoko atu ʻe Sīsū, “ʻe tuku atu ʻe he tangatá hono tokouá ki he mate, mo e tamaí ʻene tamá, pea ʻe tuʻu hake ʻa e fānaú ki he mātuʻá pea te nau tāmateʻi kinautolu.” Naʻá ne tānaki atu: “Te mou hoko ko e fehiʻanekina ʻe he kakai kotoa pē koeʻuhi ko hoku hingoá; ka ko ia te ne kītaki ʻo aʻu ki he ikuʻangá, ko e tokotaha ko iá ʻe moʻui.”

ʻOku mahuʻinga tefito ʻa e ngāue fakamalangá. ʻI he ʻuhinga ko ʻení, naʻe fakamamafaʻi ai ʻe Sīsū ʻa e fiemaʻu ke fakapotopotó koeʻuhi ke tau kei tauʻatāina ke fakahoko ʻa e ngāué. “Pea ka nau ka fakatangaʻi kimoutolu ʻi he kolo ko é, mou hola ki he kolo ko é,” ko ʻene leá ia, “he ko au ē ʻoku ou tala atu, ʻI he teʻeki ke mou ʻosiki ʻa e ngaahi kolo ʻo ʻIsilelí, kuo haʻu ʻa e Fanautama ʻa tangatá.”

Ko e moʻoni ia naʻe ʻoange ʻe Sīsū ʻa e fakahinohino, fakatokanga, mo e fakalototoʻa ko ʻení ki heʻene kau ʻaposetolo ʻe toko 12, ka naʻe toe ʻuhinga foki ia ki he faʻahinga ko ia te nau kau ʻi he ngāue fakamalanga ʻi māmani lahí ʻi he hili ʻa ʻene pekia mo toetuʻú. ʻOku fakahaaʻi ia ʻe heʻene lea ko ia ʻo pehē ko ʻene kau ākongá ʻe ‘fehiʻanekina ʻe he kakai kotoa pē,’ ʻo ʻikai ko e kau ʻIsilelí pē ʻa ia naʻe fekau atu ki ai ʻa e kau ʻaposetoló ke malanga ki aí. ʻIkai ngata aí, ʻoku hā mahino naʻe ʻikai ke ʻave ʻa e kau ʻaposetoló ki ha kau kōvana mo ha ngaahi tuʻi ʻi he taimi naʻe fekau atu ai kinautolu ʻe Sīsū ʻi heʻenau feingangāue fakamalanga taimi nounoú. ʻIkai ko ia pē, naʻe ʻikai tuku atu ki he maté ʻa e kau tuí ʻe he ngaahi mēmipa ʻo e fāmilí.

Ko ia ʻi he pehē ko ia ko ʻene kau ākongá ʻe ʻikai te nau ʻosiki honau feituʻu ngāue fakamalangá “kuo haʻu ʻa e Fanautama ʻa tangatá,” naʻe talamai fakaekikite ai ʻe Sīsū kiate kitautolu ko ʻene kau ākongá ʻe ʻikai ʻosiki ʻa e feituʻu ʻo e māmani fakakātoa ʻoku nofoʻí ʻaki ʻa e ngāue fakaemalanga fekauʻaki mo e Puleʻanga ʻo e ʻOtuá kuo fokotuʻú ki muʻa pea aʻu mai ʻa e Tuʻi kuo fakalāngilangiʻi ko Sīsū Kalaisí ʻi hono tuʻunga ko e ʻōfisa fakaefakaʻauha ʻi ʻĀmaketoné.

ʻI he hokohoko atu ʻa ʻene ngaahi fakahinohino fekauʻaki mo e ngāue fakamalangá, naʻe pehē ʻe Sīsū: “Talaʻehai ʻoku mahili ʻa e tama akó ʻi he faiakó, ʻumaʻā ʻa e pōpulá ʻi heʻene ʻeikí.” Ko ia, naʻe pau ke ʻamanekina ʻe he kau muimui ʻo Sīsuú te nau maʻu ʻa e ngaohikoviʻi mo e fakatanga tatau ʻo hangē ko ia naʻá ne maʻu koeʻuhi ko hono malangaʻi ʻa e Puleʻanga ʻo e ʻOtuá. Ka naʻá ne akonaki mai: “ʻOua te mou momoʻi manavahē kiate kinautolu ʻoku tāmateʻi ʻa e sinó pē, ka ko e soulú ʻoku ʻikai te nau lava ke tāmateʻi; ka ke mou manavahē tuʻu kiate ia ʻoku mafai ke fakaʻauha ʻi Kīhena ʻa e soulú mo e sinó fakatouʻosi.”

Naʻe teu ke fokotuʻu ʻe Sīsū ʻa e faʻifaʻitakiʻanga ʻi he meʻá ni. Te ne kātakiʻi taʻemanavahē ange ʻa e pekiá ʻi haʻane fakangaloku ʻa ʻene mateaki ki he Tokotaha ʻoku ʻi ai ʻa e mafai kotoa, ko Sihova ko e ʻOtuá. ʻIo, ko Sihova ia ʻoku malava ke ne fakaʻauha ha “soulu” ʻo ha taha (ʻoku ʻuhinga hení ko e ʻamanaki ʻa ha taha ki he kahaʻú ko ha soulu moʻui) pe ko e malava ke fokotuʻu mai mei he maté ko ha tokotaha ke fiefia ʻi he moʻui taʻengatá. Ko ha Tamai fakahēvani ʻofa mo manavaʻofa ē ko Sihova!

Ko hono hokó, naʻe fakalototoʻaʻi ʻe Sīsū ʻa ʻene kau ākongá ʻaki ha talanoa fakatātā naʻe fakaeʻa ai ʻa e tokanga ʻofa ʻa Sihova kiate kinautolú. “ʻIkai ʻoku fakatau ha ongo kiʻi misi ʻe toko ua ki ha konga sēniti pē?” ko ʻene fehuʻí ia. “Ka ʻe ʻikai patū ki he kelekelé ha taha ʻo kinaua ʻo ʻikai ʻilo ki ai ʻa hoʻomou Tamaí. Ka ko e meʻa kiate kimoutolú, ko homou ngaahi tuʻoni louʻulú kuo ʻosi lau fakalautelau. Ko ia ʻoua te mou manavahē: ʻoku mou mahuʻinga kimoutolu ʻi ha fanga misi tokolahi.”

Ko e pōpoaki ʻo e Puleʻangá naʻe fekauʻi ʻe Sīsū ki heʻene kau ākongá ke nau fanongonongó, te ne fakamavahevahe ha ngaahi fāmili, he ʻe tali ia ʻe he ngaahi mēmipa ʻe niʻihi ʻo e fāmilí kae fakataleʻi ia ʻe he niʻihi. “ʻOua te mou fakakaukau naʻá ku haʻu ke tuku ha melino ki he fonuá,” ko ʻene fakamatalá ia. “Naʻe ʻikai te u haʻú ke tuku ha melino, ka ko ha heletā.” Ko ia, ke maʻu ʻe ha mēmipa ʻo ha fāmili ʻa e moʻoni ʻo e Tohitapú, naʻe fiemaʻu ki ai ʻa e loto-toʻa. “Ko ia ʻoku lahi ʻene ʻofa ki heʻene tamaí, pe ko ʻene faʻeé, ʻi heʻene ʻofa kiate aú, ʻoku ʻikai taau ia mo au,” ko e vakai ia ʻa Sīsuú, “pea ko ia ʻoku lahi ʻene ʻofa ki hono fohá, pe ko hono ʻofefiné, ʻi heʻene ʻofa kiate aú, ʻoku ʻikai taau ia mo au.”

ʻI hono fakamulituku ʻa ʻene ngaahi fakahinohinó, naʻe fakamatala ai ʻa Sīsū ʻo pehē ko e faʻahinga ko ia ʻoku nau tali ʻa ʻene kau ākongá ʻoku nau tali foki ia. “ʻIo, ko ia te ne ʻange ha inu ki ha taha ʻi siʻi fānaú ni, koeʻuhi pē ko e toko taha ia ʻi heʻeku kau ākongá, neongo ko ha huʻa vai momoko pē, ko au ē, ʻoku tala atu, ʻe ʻikai ʻaupito mole ʻene totongi ʻaʻaná.” Mātiu 10:​16-42.

▪ Ko e hā ʻa e ngaahi fakatokanga naʻe tokonaki mai ʻe Sīsū ki heʻene kau ākongá?

▪ Ko e hā ʻa e fakalototoʻa mo e fakafiemālie naʻá ne ʻoange kiate kinautolú?

▪ Ko e hā naʻe toe kaunga ai ʻa e ngaahi fakahinohino ʻa Sīsuú ki he kau Kalisitiane ʻi onopōní?

▪ ʻI he founga fē ʻoku ʻikai laka hake ai ha ākonga ʻa Sīsū ʻi heʻene tokotaha faiakó?