VAHE 37

ʻOku Totonu Ke U Papitaiso?

Fakaʻilongaʻi pe ʻoku moʻoni pe loi ʻa e ngaahi fakamatala ko ení:

Ko e papitaisó ko ha fiemaʻu pau ia ki he kau Kalisitiané.

□ Moʻoni

□ Loi

Ko e taumuʻa tefito ʻo e papitaisó ke maluʻi koe mei he tō ki he angahalá.

□ Moʻoni

□ Loi

Ko e papitaisó ʻokú ne ʻai koe ke ke malava ʻo maʻu ʻa e fakamoʻuí.

□ Moʻoni

□ Loi

Kapau ʻoku ʻikai ke ke papitaiso, heʻikai ke ke fai ha fakamatala ki he ʻOtuá ki hoʻo ngaahi tōʻongá.

□ Moʻoni

□ Loi

Kapau ʻoku papitaiso ho ngaahi kaungāmeʻá, ʻoku ʻuhinga iá ʻokú ke mateuteu foki mo koe ke ke papitaiso.

□ Moʻoni

□ Loi

KAPAU ʻokú ke moʻui ʻo fehoanaki mo e ngaahi tuʻunga ʻa e ʻOtuá, fakatupulekina ʻa e kaumeʻa mo e ʻOtuá, pea talanoa ki he niʻihi kehé fekauʻaki mo hoʻo tuí, ʻe fakanatula pē ke ke fakakaukau fekauʻaki mo e papitaisó. Ka ʻoku anga-fēfē hoʻo ʻilo pe ʻokú ke mateuteu ke fou ʻi he sitepu ko iá? Ke tali ʻa e fehuʻi ko iá, tau lāulea angé ki he ngaahi fakamatala moʻoni pe loi ʻi ʻolungá.

● Ko e papitaisó ko ha fiemaʻu pau ia ki he kau Kalisitiané.

Moʻoni. Naʻe fiemaʻu ʻe Sīsū ke papitaiso ʻene kau ākongá. (Mātiu 28:19, 20) Ko hono moʻoní, ko Sīsū naʻá ne loto-lelei ke papitaiso. Ke muimui kia Kalaisí, ʻoku fiemaʻu ke ke papitaiso ʻi he taimi ʻokú ke matuʻotuʻa feʻunga ai ke fai ʻa e fili ko iá pea maʻu mo e holi loto-moʻoni ke fai ia.

● Ko e taumuʻa tefito ʻo e papitaisó ke maluʻi koe mei he tō ki he angahalá.

Loi. Ko e papitaisó ko ha fakaʻilonga fakahāhā ia hoʻo fakatapui kia Sihová. Ko hoʻo fakatapuí ʻoku ʻikai ko ha foʻi aleapau pē ia ʻokú ke fai ke ne taʻofi koe mei hono fai fakapulipuli ʻa e ngaahi meʻa ʻokú ke saiʻia ke faí. ʻI hono kehé, ʻokú ke fakatapui hoʻo moʻuí kia Sihová koeʻuhí ʻokú ke loto ke moʻuiʻaki ʻene ngaahi tuʻungá.

● Ko e papitaisó ʻokú ne ʻai koe ke ke malava ʻo maʻu ʻa e fakamoʻuí.

Moʻoni. ʻOku pehē ʻe he Tohi Tapú ko e papitaisó ko ha sitepu mahuʻinga ia ki hono maʻu ʻa e fakamoʻuí. (1 Pita 3:​21) Ka ʻoku ʻikai hangē ia ha tohi fakamoʻoni maluʻi ʻokú ke fakatau ke ne maluʻi koe ʻo ka faifai ange pea tō ha fakatamaki. ʻOkú ke papitaisó koeʻuhí ʻokú ke ʻofa kia Sihova pea loto ke tauhi kiate ia ʻaki ho lotó kotoa ʻo taʻengata.​—Maʻake 12:29, 30.

● Kapau ʻoku ʻikai ke ke papitaiso, heʻikai ke ke fai ha fakamatala ki he ʻOtuá ki hoʻo ngaahi tōʻongá.

Loi. ʻOku pehē ʻi he Sēmisi 4:​17: “Kapau ʻoku ʻilo ʻe ha taha ʻa e meʻa ʻoku totonu ke ne faí kae ʻikai te ne fai ia, ʻokú ne faiangahala ai”​—pe ʻokú ne papitaiso pe ʻikai. Ko ia kapau ʻokú ke ʻiloʻi ʻa e meʻa ʻoku totonú pea ʻokú ke matuʻotuʻa feʻunga ke fai ha fili mahuʻinga ʻi hoʻo moʻuí, mahalo ko e taimi eni ke talanoa ki ai mo ha taha ʻi hoʻo ongo mātuʻá pe ko ha Kalisitiane matuʻotuʻa. ʻI he founga ko iá, te ke ako ai ki he founga ke fakalakalaka ai ki he papitaisó.

● Kapau ʻoku papitaiso ho ngaahi kaungāmeʻá, ʻoku ʻuhinga iá ʻokú ke mateuteu foki mo koe ke ke papitaiso.

Loi. Ko hoʻo fili ke papitaisó ʻoku fiemaʻu ke haʻu ia mei ho lotó tonu. (Saame 110:3) ʻOku totonu ke ke toki papitaiso ʻi hoʻo lāuʻilo kakato ki he meʻa ʻoku kaunga ki he hoko ko ha taha ʻo e Kau Fakamoʻoni ʻa Sihová pea ʻi hoʻo fakapapauʻi ʻokú ke mateuteu ke fua ʻa e fatongia ko ení.​—Tangata Malanga 5:​4, 5.

Ko ha Sitepu Liliu Moʻui

Ko e papitaisó ko ha sitepu liliu moʻui ia ʻoku taki atu ki he ngaahi tāpuaki lahi. ʻI he taimi tatau, ʻoku haʻu ia mo ha fatongia mafatukituki​—ko e moʻui ʻo fehoanaki mo e fakatapui fakafoʻituitui naʻá ke fai kia Sihová.

ʻOkú ke mateuteu ki he tuʻunga ko iá? Kapau ko ia, ʻokú ke maʻu ha ʻuhinga lelei ke fiefia ai. Ko e meʻa ʻoku hanga mei muʻa kiate koé ko e monū lahi tahá ia​—ko e tauhi kia Sihova ʻaki ho lotó kotoa pea moʻui ʻi ha founga ʻoku fakahaaʻi ai ʻokú ke fakatapui moʻoni kiate ia.​—Mātiu 22:36, 37.

KONGA TOHI TAPU TEFITO

“ʻOatu homou sinó ko ha feilaulau ʻoku moʻui, toputapu pea mo fakahōifua ki he ʻOtuá, ko ha ngāue toputapu ʻo ngāueʻaki hoʻomou mafai fakaefakaʻuhingá.”​—Loma 12:1.

FOKOTUʻU

ʻI he tokoni ʻa hoʻo ongo mātuʻá, kumi ha taha ʻi he fakatahaʻangá ʻe lava ke ne tokoniʻi koe ke ke fakalakalaka fakalaumālie.​—Ngāue 16:​1-3.

NAʻÁ KE ʻILOʻI . . . ?

Ko e papitaisó ko ha konga mātuʻaki mahuʻinga ia ʻo e “fakaʻilonga” ʻa ia ʻokú ne fakaʻilongaʻi koe ki he fakamoʻuí.​—ʻIsikeli 9:​4-6.

PALANI ʻO E MEʻA KE FAÍ!

Ke fakalakalaka ki he papitaisó, te u fakalahi ʻeku ʻilo ki he ngaahi akonaki Fakatohitapu ko ení: ․․․․․

Ko e meʻa te u ʻeke ki heʻeku (ongo) mātuʻá fekauʻaki mo e kaveinga ko ení ․․․․․

KO E HĀ HOʻO FAKAKAUKAÚ?

● Ko e hā ko ha sitepu mahuʻinga ai ʻa e papitaisó?

● Ko e hā te ne ʻai nai ha toʻutupu ke ne fou fakavave ʻi he sitepu ki he papitaisó?

● Ko e hā ʻa e ʻuhinga ʻe toumoua nai ai ha toʻutupu ke fakatapui pea papitaisó?

[Fakamatala]

ʻI hono ʻiloʻi naʻá ku papitaisó naʻe tokoniʻi ai au ke fai ʻa e ngaahi fili fakapotopoto pea ʻikai ke fou ʻi he ngaahi hala naʻe mei taki atu ai au ki he ngaahi nunuʻa kovi.’’​—Holly

[Puha/​Fakatātā]

Ngaahi Fehuʻi ʻOku Faʻa ʻEke Fekauʻaki mo e Papitaisó

Ko e hā ʻoku fakaʻilongaʻi ʻe he papitaisó? Ko e fakauku mo e fokotuʻu haké ʻoku ʻuhingá kuó ke mate ki hoʻo ʻalunga moʻui siokitá pea moʻui he taimí ni ke fai ʻa e finangalo ʻo Sihová.

ʻOku ʻuhinga ki he hā ʻa e fakatapui hoʻo moʻuí kia Sihová? ʻOku ʻuhinga iá ke tuku atu hoʻo moʻuí ki he ʻOtuá, ʻo palōmesi te ke fakamuʻomuʻa ʻa hono fai hono finangaló ʻi ha toe meʻa pē. (Mātiu 16:24) ʻOku feʻungamālie ke ke fai ha fakatapui ʻi he lotu kia Sihova ʻi ha taimi ki muʻa ke ke papitaisó.

Ko e hā ʻoku totonu ke ke fai ʻaki hoʻo moʻuí ki muʻa ʻi he papitaisó? ʻOku totonu ke ke moʻui ʻo fehoanaki mo e Folofola ʻa e ʻOtuá pea talanoa ki he niʻihi kehé fekauʻaki mo hoʻo tuí. ʻOku totonu ke ke fakatupulekina ʻa e kaumeʻa mo e ʻOtuá fakafou ʻi he lotu mo e ako ʻa ʻene Folofolá. ʻOku totonu ke ke tauhi kia Sihová koeʻuhí ʻokú ke fili ke fai ia​—ʻo ʻikai koeʻuhí ʻoku tenge koe ʻe ha niʻihi ke fai ia.

ʻOku ʻi ai ha taʻu pau ʻoku totonu ke ke papitaiso ai? Ko e taʻú ʻoku ʻikai ko e meʻa tefitó ia. Neongo ia, ʻoku totonu ke ke taʻumotuʻa feʻunga​—pea matuʻotuʻa feʻunga​—ke mahinoʻi ʻa e ʻuhinga ʻo e fakatapuí.

Kae fēfē kapau ʻokú ke loto ke papitaiso ka ʻoku tala atu ʻe hoʻo ongo mātuʻá ʻoku totonu ke ke tatali? Mahalo ʻokú na saiʻia ke ke maʻu ha taukei lahi ange ʻi he moʻui faka-Kalisitiané. Fakamahuʻingaʻi ʻena faleʻí, pea ngāueʻaki ʻa e taimi ko ení ke fakatupulekina hoʻo kaumeʻa mo Sihová.​—1 Sāmiuela 2:26.

[Puha]

Pepa Ngāue

ʻOkú ke Fakakaukau ke Papitaiso?

Vakaiʻi hoʻo fakalakalaká ʻaki ʻa e fakakaukau ki he ngaahi fehuʻi mo e fakamatala ʻi laló. Fakapapauʻi ke ke sio ki he ngaahi konga Tohi Tapu ʻoku haá ki muʻa ke ke hiki hoʻo ngaahi talí.

ʻI he ngaahi founga fē ʻokú ke lolotonga fakahāhā ai ʻa e falala pau kia Sihová?​—Saame 71:5. ․․․․․

Kuo anga-fēfē hoʻo fakahāhā ko hoʻo ngaahi mafai ʻilo meʻá kuo akoʻi ke ne fakafaikehekeheʻi ʻa e tonú mei he halá?​—Hepelū 5:​14. ․․․․․

ʻOkú ke lotu tuʻo fiha? ․․․․․

ʻOkú ke lave ki he ngaahi meʻa pau ʻi hoʻo lotú, pea ʻoku fakahaaʻi fēfē mai ʻi hoʻo lotú hoʻo ʻofa kia Sihová?​—Saame 17:6. ․․․․․

Lisi ʻi lalo ha taumuʻa te ke saiʻia ke fokotuʻu fekauʻaki mo hoʻo ngaahi lotú. ․․․․․

ʻOkú ke fai maʻu pē hoʻo ako Tohi Tapu fakafoʻituituí?​—Siosiua 1:8. ․․․․․

Ko e hā ʻokú ke fakakau ʻi hoʻo ako fakafoʻituituí? ․․․․․

Lisi ʻi lalo ha taumuʻa te ke saiʻia ke fokotuʻu fekauʻaki mo hoʻo ako fakafoʻituituí. ․․․․․

ʻOku mohu ʻuhinga hoʻo kau ki he ngāue fakafaifekaú? (Fakatātā: ʻOku lava ke ke fakamatalaʻi ʻa e ngaahi akonaki Fakatohitapu tefitó ki he niʻihi kehé? ʻOkú ke toe ʻaʻahi ki he faʻahinga mahuʻingaʻiá? ʻOkú ke feinga ke fakahoko ha ako Tohi Tapu ʻi ʻapi?)

□ ʻIo □ ʻIkai

ʻOkú ke kau ki he ngāue fakafaifekaú neongo kapau ʻoku ʻikai ke kau ki ai hoʻo ongo mātuʻá?​—Ngāue 5:​42.

□ ʻIo □ ʻIkai

Lisi ʻi lalo ha taumuʻa te ke saiʻia ke fokotuʻu fekauʻaki mo hoʻo ngāue fakafaifekaú.​—2 Tīmote 2:​15. ․․․․․

Te ke pehē ʻokú ke maʻu maʻu pē ʻa e fakatahá pe ʻoku tōmokosi?​—Hepelū 10:25. ․․․․․

ʻI he ngaahi founga fē ʻokú ke kau ai ki he fakatahá? ․․․․․

ʻOkú ke maʻu ʻa e fakatahá ʻi he ʻikai lava ki ai hoʻo ongo mātuʻá (kapau ʻokú na fakangofua koe ke fai pehē)?

□ ʻIo □ ʻIkai

ʻOkú ke pehē ko ho mamaná ia ke fai ʻa e finangalo ʻo e ʻOtuá?​—Saame 40:8.

□ ʻIo □ ʻIkai

ʻE lava ke ke lisi ha taimi pau naʻá ke talitekeʻi ai ʻa e tenge mei he toʻumeʻá?​—Loma 12:2. ․․․․․

ʻOku anga-fēfē hoʻo palani ke tauhi hoʻo ʻofa kia Sihová ke mālohí?​—Sute 20, 21. ․․․․․

Te ke tauhi kia Sihova neongo kapau ʻoku ʻikai toe fai pehē ʻa hoʻo ongo mātuʻá mo e kaungāmeʻá?​—Mātiu 10:36, 37.

□ ʻIo □ ʻIkai

[Fakatātā]

Hangē ko e nofo malí, ko e papitaisó ko ha sitepu liliu moʻui​—ʻoku ʻikai totonu ke fakamaʻamaʻaʻi