Vahe 7

ʻUhinga ʻOku Tau ʻi Heni Aí

1. Ko e hā ʻa e fakamulituku kuo aʻusia ʻe he faʻahinga mohu fakakaukaú?

 KUO FUOLOA MAI ʻa e fifili ʻa e kakaí ʻo fekauʻaki mo e taumuʻa ʻo e moʻui ʻi he māmaní. Kuo nau vakai ki he langi kāfakafa ʻoku fonu ʻi he fetuʻú. Kuo nau fakaʻofoʻofaʻia ʻi he ngaahi lanu kehekehe ʻo e fakatōtō hifo ʻa e laʻaá pea mo e fakaʻofoʻofa ʻo e matafonuá. Kuo fakaʻuhingaʻi ʻe he faʻahinga mohu fakakaukaú ʻo pehē kuo pau pē ʻoku ʻi ai ha taumuʻa lahi ki he ngaahi meʻá ni kotoa. Ka kuo nau faʻa fifili pe ʻoku nau kaunga fēfē ki ai.​—Sāme 8:​3, 4.

2. Ko e hā ʻa e ngaahi fehuʻi kuo fehuʻia ʻe he kakaí?

² ʻOku fehuʻia ʻe he kakai tokolahi ʻi ha taimi ʻi heʻenau moʻuí: Ko kitautolú ke moʻui pē ʻi ha kiʻi taimi nounou, ʻo maʻu ʻa e meʻa ʻoku tau malava ʻi heʻetau moʻuí, pea tau mate leva? Ko ʻetau ʻalu koā ki fē? ʻE lava ke tau ʻamanekina ha meʻa lahi ange ʻi he takai nounou ʻa e fanauʻí,  moʻuí pea mo e maté? (Siope 14:​1, 2) Ko e meʻa te ne tokoniʻi ʻa kitautolu ke mahino ʻa e meʻá ni ko e tali ki he fehuʻí ni: Naʻe founga fēfē ʻa ʻetau hoko mai ki hení?

TUPUTUPU MĀMĀLIE PE FAKATUPU?

3. Ko e hā ʻa e akonaki ʻo fekauʻaki mo e tuputupu māmālié?

³ ʻI he ngaahi feituʻu ʻe niʻihi ʻoku akoʻi lahi ai ko e meʻa kotoa pē ʻoku tau mamata ki ai naʻe hoko mai ia ʻiate ia pē, ʻa ia naʻe hokonoa mai pē pe ʻi ha foʻi ngāue matuʻutāmaki. ʻOku pehē tokua, ʻi he faai mai ʻa e ngaahi taʻu ʻe laui miliona, naʻe tuputupu māmālie pe faai hake ʻa e moʻuí mei he faʻahinga māʻulalo ange ʻo faai mai pē ʻo ʻi ai ʻa e faʻahinga ʻo e tangatá. Ko e lau fakafuofua ko eni ki he tuputupu māmālié ʻoku akoʻi ia ʻi he ngaahi feituʻu lahi ʻo māmani ko ha foʻi moʻoniʻi meʻa. Ka ʻoku moʻoni ko ʻetau haʻu mei ha manu ʻo hangē ha ngeli naʻe moʻui ʻi he ngaahi taʻu ʻe laui miliona he kuo hilí? Naʻe hoko mai ʻa e ʻuniveesi lahí ni ʻi ha foʻi ngāue matuʻutāmaki pē?

4. Ko e hā ʻoku malava ai ke tau tui “naʻe fakatupu ʻe he ʻOtua ʻa e ngaahi langi mo mamani”?

⁴ ʻOku pehē ʻe he Tohitapú: “I he kamataʻanga naʻe fakatupu ʻe he ʻOtua ʻa e ngaahi langi mo mamani.” (Sēnesi 1:1) Pea ʻoku fetāiaki ia mo e ngaahi moʻoniʻi meʻa fakasaienisi, naʻe ʻi ai ha kamataʻanga ʻo e ngaahi langí, fakataha mo honau ngaahi fetuʻu ʻe laui pilioná, pea mo hotau māmaní. Naʻe fakatupu ʻa kinautolu. ʻOku fuʻu pau ʻaupito ʻa e ngaʻunu ʻa e ngaahi fetuʻú mo e ngaahi palanité, ʻo lava ke fakapapauʻi tonu ʻaupito honau tuʻuʻangá ʻi ha ngaahi taʻu ki muʻa. ʻOku ngaʻunu ʻa e ngaahi fetuʻú mo e ngaahi palanité ʻi he ʻuniveesí ʻo fakatatau ki he  ngaahi lao mo e ngaahi tefitoʻi moʻoni ʻo e matematiká. Ko ha palōfesa matematika mei he ʻUnivesiti ʻo Cambridge, ko P. Dirac, naʻá ne pehē ʻi he makasini Scientific American: “ʻOku malava nai ke te fakamatalaʻi ʻa e tuʻungá ni ʻaki ʻete pehē ko ha tokotaha matematika ʻa e ʻOtuá ʻi ha faʻahinga tuʻunga māʻolunga ʻaupito, pea naʻá Ne ngāueʻaki ha ngaahi matematika fihi ʻaupito ʻi hono faʻu ʻo e ʻuniveesí.”

5. ʻOku fakahā fēfē ʻe hotau sino fakakakanó naʻe fakatupu ʻa kitautolu kae ʻikai ko ha fua ʻo e tuputupu māmālie?

⁵ ʻOku fakahā ʻe he Tohitapú: “Mou ilo ko Jihova ko ia be koe Otua: ko ia be naa ne gaohi akitautolu, ka nae ikai te tau gaohi akitautolu.” (Sāme 100:​3, PM) ʻOku fakahā ʻe hotau sinó ʻa e faʻahinga faʻunga fakaofo lahi fau ʻa ia naʻá ne ueʻi ʻa e tokotaha-tohi Tohitapu ʻe taha ke ne pehē ki he ʻOtuá: “Te u fakafetaʻi kiate koe; hono kuo fakangeingei mo fakaofo hoku ngaohi e. . . . Naʻe ʻikai puli meiate koe hoku kano sino, ʻi he taimi naʻe ngaohi ai au ʻi he lilo: . . . Ko ho ongo foʻi fofonga naʻe sio kiate au ko e konga toto pe, pea naʻe tuʻu ʻi hoʻo tohi kotoa pe ʻa e ngaahi memipa.” (Sāme 139:​14-16) ʻOku fakaofo ʻa e founga ʻo e tupu ʻa e kiʻi pēpeé ʻi loto ʻi heʻene faʻeé. Fekauʻaki mo e meʻá ni naʻe pehē ʻe he makasini Newsweek: “Ko ha mana tofu pē ia.” Pea ne toe tānaki atu: “ʻOku ʻikai ha founga ʻe lava ke ne fakapapauʻi ʻa e taimi māfatukituki ʻo e tuʻituʻiá. ʻOku ʻikai ha faisaienisi te ne lava ʻo fakahā ʻa e ngaahi mālohi fakaofo ʻokú ne puleʻi ke tupu ʻa e ngaahi ʻōkani mo e ngaahi neave ʻe laui mano ʻo ha tama teʻeki kakato ʻi manava.”

6. Ko e hā ʻoku ʻuhinga lelei ai kiate kitautolu ke tau tui ki he fakatupú kae ʻikai ko e tuputupu māmālié?

⁶ Fakakaukau ange ki hotau ʻuniveesi lahí ni, pea pehē ki hotau sino ʻotautolú mo hono faʻunga fakaofó. ʻOku totonu ke fakahā kiate kitautolu ʻe heʻetau fakakaukau leleí naʻe ʻikai ke tuputupu māmālie pē pe hoko mai ʻiate kinautolu pē ʻa e ngaahi meʻá ni. Naʻe pau ke ʻi ai honau Tokotaha-faʻu, ko ha Tokotaha-fakatupu. Fakakaukau ki he ngaahi meʻa kehe ʻoku tau mamata ki aí. ʻI hoʻo ʻi ho falé, fehuʻi kiate koe: Naʻe tuputupu māmālie mai ʻeku tesí, maamá, mohengá, seá, tēpilé, ngaahi holisí, pea pehē ki he falé? Pe naʻe fiemaʻu ki ai ha tokotaha-ngaohi? ʻOku moʻoni naʻe pau ke ngaohi ʻa kinautolu ʻe ha faʻahinga poto! Ko ia ʻoku lava fēfē ke taku naʻe ʻikai fiemaʻu ha tokotaha-ngaohi ki hotau ʻuniveesi fihi lahi angé pea mo kitautolu tonu? Pea kapau kuo tuku mai ʻa kitautolu ki heni ʻe he ʻOtuá, tā kuo pau naʻe ʻi ai haʻane ʻuhinga ki heʻene fai peheé.

7. (a) Naʻe anga-fēfē hono fakahaaʻi ʻe Sīsū naʻá ne tui ki he fakatupú? (e) Ko e hā ha toe fakamoʻoni ko ha tokotaha moʻoni ʻa ʻĀtama?

⁷ Naʻe lea ʻa Sīsū tonu ʻo kau ki he ʻuluaki tangatá mo e fefiné: “Ko ia naa ne fakatubu ae kakai i he kamataaga, naa ne fakatubu akinaua  koe tagata moe fefine, o ne behe, Koe mea eni e tuku ai e he tagata ene tamai mo ene faʻe, kae bikitai ki hono unoho: bea e hoko akinaua koe kakano be taha.” (Mātiu 19:​4, 5, PM) Ko e hiki eni ʻe Sīsū meia Sēnesi 1:27 mo e 2:24 ʻo fekauʻaki mo hono fakatupu ʻo ʻĀtama mo ʻIví. Ko ia ai, naʻá ne tuhu ki he fakamatala faka-Tohitapú ni ko e moʻoní. (Sione 17:17) ʻIkai ngata ai, ʻoku ui ʻe he Tohitapú ʻa ʻĪnoke “ko hono toko fitu meia Atama.” (Siutasi 14) Kapau naʻe ʻikai ko ha tokotaha moʻoni ʻa ʻĀtama, heʻikai ke fakaʻilongaʻi ia ʻe he Tohitapú ʻi he founga papau ko ení.​—Luke 3:​37, 38.

8. Ko e hā ʻa e vakai ki he kamataʻanga ʻo e tangatá ʻoku ʻikai akoʻi ʻe he Tohitapú?

⁸ ʻOku pehē ʻe he faʻahinga ʻe niʻihi naʻe ngāueʻaki ʻe he ʻOtuá ʻa e founga tuputupu māmālié ke fakatupu ʻaki ʻa e tangatá. ʻOku nau taku naʻe tuku ʻe he ʻOtuá ʻa e tangatá ke tuputupu māmālie pē, pea ʻi heʻene aʻu ki ha tuʻunga ʻe taha naʻá Ne ʻai ki loto kiate ia ha soulu. a Ka ʻoku hala ʻatā ke hā ʻa e fakakaukaú ni ʻi he Tohitapú. Kaekehe, ʻoku pehē ʻe he Tohitapú ko e ʻakaú mo e fanga manú naʻe fakatupu “ʻo taki taha ʻi hono faʻahinga.” (Sēnesi 1:​11, 21, 24) Pea ʻoku fakahā ʻe he ngaahi moʻoniʻi meʻa ʻoku ʻikai ke liliu ha faʻahinga ʻe taha ʻo e ʻakaú pe fanga manú ki ha faʻahinga kehe ʻi he faai mai ʻa e taimí. Ko ha fakamatala lahi ange ke fakamoʻoniʻi ʻoku ʻikai ko ha fua ʻa kitautolu ʻo e tuputupu māmālié ʻoku malava ke maʻu ia ʻi he tohi Life​—How Did It Get Here? By Evolution or by Creation?

FOUNGA HONO FAKATUPU ʻO E TANGATÁ ʻE HE ʻOTUÁ

9. (a) ʻOku fakamatalaʻi fēfē ʻe he Tohitapú ʻa e fakatupu ʻo e tangatá? (e) Ko e hā naʻe hoko ʻi hono hō ʻe he ʻOtuá ki he avaʻi ihu ʻo e tangatá ʻa e “mānava ʻo e moʻui”?

⁹ Naʻe fakatupu ʻe he ʻOtuá ʻa e tangatá mei he kelekelé ke nofo ʻi he māmaní, ʻo hangē ko e lau ʻa e Tohitapú: “Naʻe ngaohi ʻe he ʻOtua ko Sihová ʻa e tangatá mei he efu ʻo e kelekelé pea hō ki hono avaʻi ihú ʻa e mānava ʻo e moʻuí, pea naʻe hoko ʻa e tangatá ko ha soulu moʻui.” (Sēnesi 2:7, NW) Mei he meʻá ni ʻoku malava ke tau ʻilo ai ko e tangatá ko ha fakatupu fakahangatonu ʻa e ʻOtuá. ʻI ha ngāue fakaefakatupu makehe, naʻe ngaohi ai ʻe he ʻOtuá ʻa e tangatá ko ha tokotaha kakato fakaʻaufuli. ʻI he hō ʻe he ʻOtuá ʻa e “mānava ʻo e moʻuí” ki he avaʻi ihu ʻo e tangatá, naʻe fakafonu leva ʻa e maʻamaʻa ʻo e tangatá ʻaki ʻa e ʻea. Ka naʻe fakahoko ʻa e meʻa lahi ange ʻi he meʻa ko iá. ʻI aí naʻe foaki ʻe he ʻOtua ʻa e moʻuí ki he sino ʻo e tangatá. ʻOku fakatolonga pe ʻai ke hoko atu ʻa e ivi-moʻui ko ení ʻaki ʻa e mānava.

10. Ko e hā ʻa e soulu fakaetangatá, pea naʻe anga-fēfē ʻa hono fakatupu iá?

 ¹⁰ Kaekehe, fakatokangaʻi ʻoku ʻikai pehē ʻe he Tohitapú naʻe foaki ʻe he ʻOtuá ki he tangatá ha soulu. Ka ʻokú ne pehē ʻi he hili hono kamataʻi ʻe he ʻOtuá ʻa e tangatá ke mānavá “naʻe hoko ʻa e tangata ko ha soulu moʻui.” Ko ia ko e tangata naʻe ngaohí ko e soulú ia, ʻo hangē pē ko ha tangata ʻokú ne hoko ko ha toketā ko e toketaá ia. (1 Kolinitō 15:45) Ko e “efu ʻo e kelekelé,” ʻa ia ʻoku ngaohi mei ai ʻa e sino fakakakanó, ʻoku ʻikai ko e soulú ia. Pea ʻoku ʻikai pehē ʻe he Tohitapú ko e “mānava ʻo e moʻuí” ko e soulú ia. Ka ʻoku fakahaaʻi ʻe he Tohitapú ko hono ʻai fakataha ʻa e ongo meʻá ni ʻe ua ʻoku iku ai ʻo ‘hoko ʻa e tangata ko ha soulu moʻui.’

11. Ko e hā ʻa e ngaahi moʻoniʻi meʻa faka-Tohitapu ʻo fekauʻaki mo e soulu fakaetangatá ʻoku hā ai ʻoku ʻikai ko ha ʻataʻi meʻa pē ia ʻoku malava ke moʻui mavahe mei ha tokotaha?

¹¹ Koeʻuhi ko e soulu fakaetangatá ko e tangatá tonu pē ia, heʻikai lava leva ke pehē ko ha ʻataʻi meʻa pē ia ʻoku nofo ʻi loto ʻi he sinó pe ʻoku malava ke mavahe mei he sinó. Ko hono ʻai mahinó, ʻoku akoʻi ʻe he Tohitapú ko ho soulú ko koe. Hangē ko ení, ʻoku lave ʻa e Tohitapú ʻo fekauʻaki mo e fiemaʻu ʻa e soulú ke kai meʻakai fakamatelie, ʻo pehē: “ʻOku holi ho soulú ke kai kakano.” (Teutalōnome 12:​20, NW) ʻOkú ne toe pehē ʻoku maʻu ʻe he ngaahi soulú ʻa e toto ʻoku fetāfeaki ʻi honau ngaahi kālavá, he ʻokú ne lave ki he “toto ʻo e ngaahi soulu ʻo e faʻahinga masiva taʻehalaia.”​—Selemaia 2:34, NW.

ʻUHINGA NAʻE TUKU AI ʻE HE ʻOTUÁ ʻA E TANGATÁ ʻI HENÍ

12. Ko e hā naʻe taumuʻa ki ai ʻa e ʻOtuá ki he faʻahinga ʻo e tangatá ʻi he māmaní?

¹² Naʻe ʻikai ko e taumuʻa ia ʻa e ʻOtuá kia ʻĀtama mo ʻIví ke na moʻui taimi siʻi pē peá na mate ʻo moʻui ʻi ha feituʻu kehe. Ko e taumuʻá ke na nofo heni ʻo tokangaʻi ʻa e māmaní mo hono meʻa moʻui kotoa pē. Hangē ko ia ʻoku pehē ʻe he Tohitapú: “Naʻe tapuakiʻi ʻakinaua ʻe he ʻOtua, pea naʻe folofola kiate kinaua ʻe he ʻOtua, ʻo pehē, Mo fakatupu, mo fakatokolahi, mo fakafonu ʻa mamani, pea ikuna ia: pea mo pule ki he ika ʻo e tahi, mo e manupuna ʻo e langi, pea mo e meʻa moʻui kotoa pe ʻoku totolo ʻi he fonua.” (Sēnesi 1:28; 2:15) Naʻe mei malava ke fiefia ʻi he māmaní ʻo taʻengata ʻa ʻĀtama mo ʻIvi pea pehē ki he fānau kotoa te na maʻú, ʻi hano fai ʻa e ngaahi meʻa naʻe fiemaʻu ʻe he ʻOtuá ke nau faí.

13. (a) ʻOku malava fēfē ke tau fiefia? (e) Ko e hā te ne ʻomai ʻa e taumuʻa moʻoni ki heʻetau moʻuí?

¹³ Fakatokangaʻi “naʻe tapuakiʻi ʻakinaua ʻe he ʻOtua.” Naʻá ne mātuʻaki tokanga ki heʻene fānau fakaemāmaní. Koeʻuhi ko ha Tamai ʻofa ia naʻá ne foaki ai kiate kinaua ʻa e ngaahi fakahinohino ki haʻana lelei pē. Kapau naʻá na talangofua ki ai te na maʻu ʻa e fiefiá. Naʻe ʻiloʻi eni ʻe Sīsū peá ne toki pehē ki mui: “ʻOku fiefia ʻa kinautolu ʻoku fanongo ki he  folofola ʻa e ʻOtuá pea fai ki ai!” (Luke 11:​28, NW) Ko e folofola ʻa e ʻOtuá naʻe fai ki ai ʻa Sīsū. Naʻá ne pehē: “ʻOku ou fai maʻuaipē ʻa e ngaahi meʻa ʻoku ne hōhōʻia ai.” (Sione 8:29) ʻOku tokoni eni ke tau ʻilo ʻa e ʻuhinga tefito ʻoku tau ʻi heni aí. Ko e maʻu ʻa e moʻui fiefia kakato ʻaki ʻa e moʻui ʻo fehoanaki mo e finangalo ʻo e ʻOtuá. Te ne ʻomai ʻa e taumuʻa moʻoni ki heʻetau moʻui he taimi ní ke tauhi ʻa Sihova. Pea ʻi heʻetau fai peheé te tau ʻai ai kitautolu ʻi he hala ke maʻu ʻa e moʻui taʻengata he Palataisi ʻi he māmaní.​—Sāme 37:​11, 29.

ʻUHINGA ʻOKU TAU TUPU ʻO MOTUʻA PEA MATÉ

14. ʻI he talangataʻa ki he fekau ʻa e ʻOtuá, ko e hā naʻe fai ʻe ʻĀtama mo ʻIví?

¹⁴ Ka ʻi he taimí ni ʻoku tau tupu kotoa ʻo motuʻa pea mate. Ko e hā hono ʻuhingá? Hangē ko ia naʻe hā ʻi he vahe ki muʻá, ʻoku hoko eni koeʻuhi ko e angatuʻu ʻa ʻĀtama mo ʻIví. Naʻe tuku ʻe Sihova kiate kinaua ha ʻahiʻahi ke fakahaaʻi ʻa e fiemaʻu ʻo ʻena talangofua ki he ʻOtuá. Naʻá ne pehē kia ʻĀtama: “ʻE lelei ʻaupito hoʻo kai mei he ngahi ʻakau kehekehe ʻo e ngoue; ka ko e ʻakau ʻo e ʻilo-ʻo-e-lelei-mo-e-kovi ʻe ʻikai te ke kai mei ai: he ko e ʻaho te ke kai mei ai kuo pau te ke mate.” (Sēnesi 2:​16, 17) ʻI heʻena kai mei he ʻakau ko ení, naʻe sītuʻa ai ʻa ʻĀtama mo ʻIvi ki heʻena Tamai fakahēvaní mo siʻaki ʻa ʻene tatakí. Naʻá na talangataʻa peá na toʻo ʻa e meʻa naʻe ʻikai ʻanaua. Naʻá na mei moʻui fiefia taʻengata ʻi ha palataisi ʻo ʻikai ha masiva pe faingataʻaʻia, ka naʻá na ʻomai kiate kinaua ʻa e tautea ʻo e angahalá. Ko e tauteá ni ko e taʻehaohaoa mo e mate.​—Loma 6:23.

15. Naʻe anga-fēfē ʻetau maʻu ʻa e angahalá meia ʻĀtamá?

¹⁵ ʻOkú ke ʻilo pe naʻe anga-fēfē ʻetau maʻu ʻa e angahalá meia ʻĀtamá? Hili ʻa e hoko ʻa ʻĀtama ʻo taʻehaohaoá, naʻá ne tuku atu ki heʻene fānaú kotoa ʻa e taʻehaohaoa ko iá mo e maté. (Siope 14:4; Loma 5:12) Ko ha tokoni ke mahino ai kiate koe ʻa e tuʻungá ni, fakakaukau atu ki he meʻa ʻe hoko ʻi hano taʻo ʻe ha tokotaha-taʻomā ha foʻi mā ʻi ha kapa ʻoku makoko. ʻE hā ha fakaʻilonga ʻi he foʻi mā kotoa pē ʻoku taʻo ʻi he kapa ko iá. Naʻe hoko ʻa ʻĀtama ʻo hangē ko e kapa ko iá, pea ʻoku hangē kitautolu ko e foʻi mā. Naʻá ne hoko ʻo taʻehaohaoa ʻi heʻene maumauʻi ʻa e lao ʻa e ʻOtuá. Naʻe hangē ia ko haʻane maʻu ha makoko pe ko ha fakaʻilonga kovi. Ko ia ʻi heʻene maʻu ʻa e fānaú naʻe maʻu kotoa ʻe kinautolu ʻa e fakaʻilonga tatau ko eni ko e angahalá pe taʻehaohaoá.

16, 17. ʻOku anga-fēfē hono fakahaaʻi ʻe ha taha ʻo e ngaahi mana ʻa Sīsuú kuo hoko ʻa e mahamahakí ki he fāmili ʻo e tangatá koeʻuhi ko e angahalá?

¹⁶ ʻOku tau puke mo tupu ʻo motuʻa he taimí ni koeʻuhi ko e angahala kuo maʻu ʻe kitautolu kotoa meia ʻĀtamá. ʻOku fakahā eni ʻe ha taha ʻo e ngaahi mana naʻe fai ʻe Sīsuú. Lolotonga ʻa e faiako ʻa Sīsū ʻi he ʻapi naʻá ne nofo aí, naʻe fakatahataha ki ai ha fuʻu kakai tokolahi pea ʻikai toe lava ha taha kehe ke hū ki he lokí. ʻI hono ʻomai ʻe ha kau tangata ʻe  toko fā ha tangata mamatea ʻi ha meʻafata, naʻa nau sio heʻikai lava ke nau hū ki loto. Ko ia naʻa nau kaka ki he ʻató, ʻo ʻai ha foʻi ava ai, pea tuku hifo ai ʻa e meʻafatá mo e tangata mamateá ki he tafaʻaki ʻo Sīsuú.

¹⁷ ʻI he vakai atu ʻa Sīsū ki he lahi ʻo e tui ʻoku nau maʻú, naʻá ne pehē ki he tangata mamateá: “Kuo fakamolemole hoʻo ngāhi angahala.” Ka ko e niʻihi ʻo e kakai naʻe ʻi aí naʻa nau fakakaukau ʻoku ʻikai lava ʻe Sīsū ke fakamolemole ʻa e ngaahi angahalá. Ko ia naʻe pehē ʻe Sīsū: “Ka koeʻuhi ke mou ʻilo, ʻoku mafai ʻe he Fanautama ʻa tangata ke fakamolemole angahala ʻi māmani, (pea hanga ia ʻo lea ki he tangata mamatea) ʻOku ou tala kiate koe, Tuʻu, toʻo ho mohenga, pea mole ki ho ʻapi. Pea tuʻu ia, ʻo ne toʻo leva hono mohenga, ʻo ne ʻalu atu mei ai ʻi he ʻao ʻo e kakai kotoa pē.”​—Maʻake 2:​1-12.

18. Ko e hā ʻa e faʻahinga kahaʻu ʻoku fakatuʻotuʻa ki ai ʻa e kau sevāniti ʻa e ʻOtuá?

¹⁸ Fakakaukau ange ki he meʻa ʻe lava ke fai maʻatautolu ʻe he mālohi ko eni ʻo Sīsuú! ʻI he malumalu ʻo e pule ʻa e puleʻanga ʻo e ʻOtuá, ʻe malava ai ʻe Kalaisi ke fakamolemoleʻi ʻa e ngaahi angahala ʻa e faʻahinga kotoa pē ʻoku ʻofa mo tauhi ki he ʻOtuá. ʻOku ʻuhinga ení ko e kotoa ʻo e ngaahi langa mo e ngaahi felāngaaki mo e ngaahi mahakí ʻe toʻo atu ia. ʻE ʻikai toe ʻi ai ha taha ʻe tupu ʻo motuʻa pea mate! Tā ko ha toki ʻamanaki fakaofo eni ki he kahaʻú! ʻIo, ʻoku ʻi ai moʻoni ʻa e meʻa lahi ange ʻoku lava ke tau ʻamanekina kae ʻikai ko e fanauʻi pē, ʻo moʻui pē ʻi ha kiʻi taimi nounou pea mate leva. ʻI he hokohoko atu ke ako ʻo fekauʻaki mo e ʻOtuá pea tauhi kiate iá, ʻe malava moʻoni ke tau moʻui taʻengata he Palataisi ʻi he māmaní.

[Fakamatala ʻi lalo]

[Fehuʻi ki he Ako]

[Fakatātā ʻi he peesi 69]

ʻOku fifili ʻa e tokolahi ʻo kau ki he taumuʻa ʻo e moʻui̇́

[Fakatātā ʻi he peesi 70]

Naʻe tuputupu māmālie ʻa e ngaahi meʻá ni pe naʻe ngaohi ʻa kinautolu?

[Fakatātā ʻi he peesi 75]

ʻOku fakahā ʻe he fakamatala faka-Tohitapu ʻo fekauʻaki mo e fakamoʻui ʻe Sīsū ʻa e tokotaha mamateá, ʻoku puke ʻa e kakaí koeʻuhi ko e angahala ʻa ʻĀtamá