Ko Hono ʻIlo Fakapapau ʻa e Lotu Moʻoní
Vahe 22
Ko Hono ʻIlo Fakapapau ʻa e Lotu Moʻoní
1. Ko hai naʻa nau fai ʻa e lotu moʻoní ʻi he ʻuluaki senitulí?
ʻOKU ʻIKAI ha veiveiua ʻo fekauʻaki mo e faʻahinga naʻa nau fai ʻa e lotu moʻoní ʻi he ʻuluaki senitulí. Ko e kau muimui ʻo Sīsū Kalaisí. Naʻa nau kau kotoa ki he kautaha Kalisitiane pē taha. ʻOku fēfē ʻa e ʻahó ni? ʻOku anga-fēfē ke ʻilo fakapapau ʻa e faʻahinga ʻoku nau fai ʻa e lotu moʻoní?
2. ʻOku malava fēfē ke ʻilo fakapapau ʻa e faʻahinga ʻoku nau fai ʻa e lotu moʻoní?
2 ʻI hono fakamatalaʻi ʻa e founga ke tau fai ai ení, naʻe pehē ʻe Sīsū: “Ko honau ngāhi fua te mou ʻilo lelei ai kinautolu. . . . ʻIlonga ha ʻakau lelei ʻoku ne fua ʻaonga: ka ʻilonga ha ʻakau tamaki ʻoku fua kovi. . . . ʻAua, ko honau ngāhi fua te mou ʻilo lelei ai kinautolu.” (Mātiu 7:16-20) Ko e hā ʻa e ngaahi fua lelei te ke fakatuʻotuʻa atu ke fakatupu mai ʻe he kau lotu moʻoni ki he ʻOtuá? Ko e hā ʻoku totonu ke nau leaʻakí mo fai he taimí ní?
KO HONO FAKATAPUHĀ ʻA E HUAFA ʻO E ʻOTUÁ
3, 4. (a) Ko e hā ʻa e ʻuluaki kole ʻi he Sīpinga Lotu ʻa Sīsuú? (e) Naʻe anga-fēfē hono fakatapuhaaʻi ʻe Sīsū ʻa e huafa ʻo e ʻOtuá?
3 ʻE ngāue ʻa e kau lotu moʻoni ki he ʻOtuá ʻo fehoanaki mo e Sīpinga Lotu naʻe ʻoange ʻe Sīsū ki hono kau muimuí. Ko e ʻuluaki meʻa naʻe lave ki ai ʻa Sīsuú naʻe pehé ni: “Ko ʻemau Tamai ʻoku ʻi hevani, ke tapuhā ho huafa.” ʻOku pehé ni hono ʻai ia ʻa e ngaahi leá ni ʻe ha paaki Tohitapu ʻe taha: “Ke toputapu ho huafa.” (Mātiu 6:9, Jerusalem Bible) ʻOku ʻuhinga ki he hā ʻa e pehē ke fakatapuhaaʻi, pe ke toputapu ʻa e huafa ʻo e ʻOtuá? Naʻe anga-fēfē hono fai eni ʻe Sīsuú?
4 Naʻe fakahaaʻi ʻe Sīsū ʻa e founga naʻá ne fai ai ení ʻi he taimi naʻá ne lotu ai ki heʻene Tamaí: “Kuou fakailo ho huafa ki he kau tagata naa ke foaki kiate au mei mamani.” (Sione 17:6, PM) ʻIo, naʻe ʻai ʻe Sīsū ʻa e huafa ʻo e ʻOtuá, ko Sihova, ke ʻiloa ki he niʻihi kehé. Naʻe ʻikai te ne taʻengāueʻaki ʻa e huafa ko iá. Naʻe ʻiloʻi ʻe Sīsū ko e taumuʻa ʻa ʻene Tamaí ki Hono huafá ke fakalāngilangiʻi ʻi māmani kātoa. Ko ia naʻá ne fokotuʻu ʻa e faʻifaʻitakiʻanga ki hono fanongonongo ʻa e huafa ko iá pea mo hono ʻai ia ke toputapú.—Sione 12:28; ʻAisea 12:4, 5.
5. (a) ʻOku anga-fēfē ʻa e fekauʻaki ʻa e fakatahaʻanga Kalisitiané mo e huafa ʻo e ʻOtuá? (e) Ko e hā kuo pau ke tau fai ka tau maʻu ʻa e fakamoʻuí?
5 ʻOku fakahaaʻi ʻe he Tohitapú ko e ʻi ai ʻa e fakatahaʻanga Kalisitiane moʻoní ʻoku fekauʻaki mo e huafa ʻo e ʻOtuá. Naʻe fakamatala ʻa e ʻapositolo ko Pitá naʻe “aʻahi mai” ʻa e ʻOtuá “ke toʻo mei he Senitaile ha kakai ke kau ki hono huafa.” (Ngāue 15:14) Ko ia kuo pau ke ʻai ʻe he kakai moʻoni ʻa e ʻOtuá hono huafá ke toputapu pea ʻai ia ke ʻiloa atu ʻi māmani. Ko hono moʻoní, ko e ʻiloʻi ʻo e huafa ko iá ʻoku pau ai ki he fakamoʻuí, ʻo hangē ko ia ʻoku pehē ʻe he Tohitapú: “Ko ia kotoa pē ʻoku ui ki he huafa ʻo Sihová ʻe fakamoʻui.”—Loma 10:13, 14, NW.
6. (a) ʻOku ʻai ke toputapu ʻe he ngaahi siasi lahi ʻa e huafa ʻo e ʻOtuá? (e) ʻOku ʻi ai ha niʻihi ʻoku nau fai fakamoʻoni ʻo fekauʻaki mo e huafa ʻo e ʻOtuá?
6 Sai, ko hai ʻi he ʻahó ni ʻokú ne ʻai ʻa e huafa ʻo e ʻOtuá ke toputapú pea ʻai ia ke ʻiloa atu ʻi he māmaní kātoá? ʻOku fakaʻehiʻehi ʻa e ngaahi siasi lahi mei hono ngāueʻaki ʻa e huafa Sihová. Kuo aʻu ʻo toʻo ia ʻe he niʻihi mei heʻenau ngaahi paaki Tohitapú. Kaekehe, kapau te ke talanoa ki ho ngaahi kaungāʻapí pea faʻa lave kia Sihova, ʻo ngāueʻaki hono huafá, ko e hā ʻa e kautaha ʻokú ke fakakaukau te nau pehē ʻokú ke kau ki aí? Fekauʻaki mo e meʻá ni, ʻoku taha pē ʻa e kakai ʻoku mātuʻaki muimui ki he faʻifaʻitakiʻanga ʻa Sīsuú. Ko ʻenau tefitoʻi taumuʻa ʻi he moʻuí ke tauhi ʻa e ʻOtuá pea fai fakamoʻoni ʻo fekauʻaki mo hono huafá, ʻo hangē pē ko ia naʻe fai ʻe Sīsuú. Ko ia kuo nau ʻai ʻa e hingoa faka-Tohitapu ko e “Kau Fakamoʻoni ʻa Sihova.”—ʻAisea 43:10-12.
KO HONO FANONGONONGO ʻA E PULEʻANGA ʻO E ʻOTUÁ
7. Naʻe anga-fēfē ʻa hono fakahaaʻi ʻe Sīsū ʻa e mahuʻinga ʻo e puleʻanga ʻo e ʻOtuá?
7 ʻI he Sīpinga Lotu naʻe ʻomai ʻe Sīsuú, naʻá ne toe fakahaaʻi ai ʻa e mahuʻinga ʻo e puleʻanga ʻo e ʻOtuá. Naʻá ne akoʻi ʻa e kakai ke lotu: “Ke hoko hoʻo pule [puleʻanga, NW].” (Mātiu 6:10) Naʻe toutou fakamamafaʻi maʻu pē ʻe Sīsū ko e Puleʻangá ko e founga pē ia ʻe taha te ne toʻo atu ʻa e ngaahi faingataʻa ʻo e faʻahinga ʻo e tangatá. Naʻá ne fai eni mo ʻene kau ʻapositoló ʻi heʻenau malanga ki he kakaí ʻo fekauʻaki mo e puleʻanga ko iá ‘mei he kolo ki he kolo’ pea ‘mei he fale ki he fale.’ (Luke 8:1; Ngāue 5:42; 20:20) Ko e kaveinga ʻo ʻenau malangá mo ʻenau faiakó ko e puleʻanga ʻo e ʻOtuá.
8. Naʻe anga-fēfē ʻa hono fakahaaʻi ʻe Sīsū ʻa e meʻa ʻe hoko ko e pōpoaki tefito ʻa hono kau muimui moʻoní ʻi he “ngaahi ʻaho fakaʻosi” ni?
8 Fēfē hotau kuongá ni? Ko e hā ʻa e tefitoʻi akonaki ʻa e kautaha Kalisitiane moʻoni ʻa e ʻOtuá? ʻI he kikite ʻo fekauʻaki mo e “ngaahi ʻaho fakaʻosi” ni, naʻe pehē ʻe Sīsū: “Bea koe ogoogolelei ni oe buleaga e malaga aki i mamani kotoabe, koe mea fakamooni ki he buleaga kotoabe, bea e toki hoko mai ae ikuaga.” (Mātiu 24:14, PM) Ko ia kuo pau ke hoko ʻa e Puleʻangá ko e pōpoaki tefito ʻa e kakai ʻa e ʻOtuá he ʻahó ni.
9. Ko hai ʻa e kakai he ʻahó ni ʻoku nau malangaʻi ʻa e pōpoaki ʻo fekauʻaki mo e Puleʻangá?
9 ʻEke hifo kiate koe: Kapau ʻe haʻu ha taha ki ho matapaá peá ne lea ʻo fekauʻaki mo e puleʻanga ʻo e ʻOtuá ko e ʻamanaki moʻoni ia ki he faʻahinga ʻo e tangatá, ko e hā ʻa e kautaha ʻokú ke pehē ʻokú ne kau ki aí? Tukukehe ʻa e Kau Fakamoʻoni ʻa Sihová, kuo ʻi ai ha kakai ʻi ha faʻahinga lotu kehe pē kuo nau talanoa atu kiate koe ʻo fekauʻaki mo e puleʻanga ʻo e ʻOtuá? Tā ko e tokosiʻi ʻaupito pē ʻo kinautolu ʻoku nau ʻilo pe ko e hā iá! ʻOku nau fakalongo pē ʻi he fekauʻaki mo e founga-pule ʻa e ʻOtuá. Ka ko e ongoongo ʻo fekauʻaki mo e founga-pule ko iá ʻokú ne luluʻi ʻa e māmaní. Naʻe kikiteʻi ʻe he palōfita ko Tānielá ʻo pehē ko e puleʻangá ni ‘te ne laiki mo fakangata ʻa e ngaahi founga-pule kehe kotoa pē pea ʻe pule tāfataha pē ia ki he māmaní.’—Tāniela 2:44.
ʻAPASIA KI HE FOLOFOLA ʻA E ʻOTUÁ
10. Naʻe anga-fēfē hono fakahaaʻi ʻe Sīsū ʻa e ʻapasia ki he Folofola ʻa e ʻOtuá?
10 Ko e founga ʻe taha ʻe lava ke ʻilo fakapapau ai ʻa e faʻahinga ʻoku nau fai ʻa e lotu moʻoní ko ʻenau fakakaukau ʻo fekauʻaki mo e Tohitapú. Naʻe fakahaaʻi ʻe Sīsū ʻa e ʻapasia ki he Folofola ʻa e ʻOtuá ʻi he taimi kotoa pē. Naʻá ne toutou lave maʻu pē ki ai ko e mafai fakaʻosi ʻi ha meʻa. (Mātiu 4:4, 7, 10; 19:4-6) Naʻe toe fakahaaʻi ʻe Sīsū ʻene ʻapasia ki he Tohitapú ʻaki ʻene moʻui ʻo fakatatau ki hono ngaahi akonakí. Naʻe ʻikai te ne teitei fakamāʻulaloʻi ʻa e Tohitapú. Ka naʻá ne fakahalaiaʻi ʻa e faʻahinga naʻe ʻikai te nau faiako ʻo fehoanaki mo e Tohitapú pea naʻa nau feinga ke fakavaivaiʻi ʻa e mālohi ʻo hono ngaahi akonakí ʻaki ʻenau hākeakiʻi ʻenau ngaahi fakakaukau pē ʻanautolu.—Maʻake 7:9-13.
11. Ko e hā ʻa e fakakaukau ʻoku faʻa fakahā ʻe he ngaahi siasí ki he Folofola ʻa e ʻOtuá?
11 Fekauʻaki mo e meʻá ni, ʻoku anga-fēfē hono fakahoa atu ʻa e ngaahi siasi ʻo Puleʻanga-Haʻa-Kalisitiané ki he faʻifaʻitakiʻanga ʻa Kalaisí? ʻOku nau ʻapasia loloto ki he Tohitapú? ʻOku ʻikai tui ʻa e haʻa faifekau tokolahi he ʻahó ni ki he ngaahi fakamatala ʻa e Tohitapú ʻo fekauʻaki mo e tō ʻa ʻĀtama ki he angahalá, ko e lōmaki ʻi he ʻaho ʻo Noá, ko Siona mo e fuʻu iká, mo e niʻihi kehe. ʻOku nau toe pehē naʻe hoko mai ʻa e tangatá ʻi he tuputupu māmālie, kae ʻikai ʻi he fakatupu fakahangatonu ʻa e ʻOtuá. ʻOku nau fakalototoʻaʻi ai ha ʻapasia ki he Folofola ʻa e ʻOtuá ʻi heʻenau fai peheé? Pehē foki, ʻoku kikihi ʻa e kau taki lotu ʻe niʻihi ʻoku ʻikai hala ʻa e fehokotaki fakasino mo ha taha ʻi he teʻeki ke malí, pea naʻa mo e fehokotaki fakasino pē ha tangata mo ha tangata pe mali tokolahí ʻe malava pē ke totonu. Te ke pehē ʻoku nau fakalototoʻaʻi ʻa e kakaí ke ngāueʻaki ʻa e Tohitapú ko honau tataki? ʻOku pau ʻoku ʻikai te nau muimui ʻi he faʻifaʻitakiʻanga ʻa e ʻAlo ʻo e ʻOtuá mo ʻene kau ʻapositoló.—Mātiu 15:18, 19; Loma 1:24-27.
12. (a) Ko e hā ʻoku ʻikai fakahōifua ai ki he ʻOtuá ʻa e founga lotu ʻa e tokolahi, neongo ʻoku nau maʻu ʻa e Tohitapú? (e) Ko e hā kuo pau ke tau fakamulitukuʻaki ʻo kapau ʻoku kei ʻi ha tuʻunga lelei pē ʻi ha siasi ʻa e kau faihala loto-fiefaí?
12 ʻOku ʻi ai ʻa e kau mēmipa fakalotu kuo nau maʻu ʻa e Tohitapú pea aʻu ʻo ako ia, ka ʻoku fakahaaʻi ʻe he founga ʻoku nau moʻui aí ʻoku ʻikai te nau muimui ki ai. ʻOku pehē ʻe he Tohitapú ʻo kau ki he faʻahinga peheé: “ʻOku nau lau ʻoku nau ʻilo ʻa e ʻOtua, ka ʻi heʻenau ngaahi ngaue ʻoku nau fakaʻikaiʻi ia.” (Taitusi 1:16; 2 Tīmote 3:5) Ko e hā ʻoku fakahaaʻi ʻe he meʻá ni ʻo kapau ʻoku kei ʻi he tuʻunga lelei pē ʻi he siasí ʻa e kau mēmipa fakalotu ʻoku nau pele-paʻangá, faʻa konā pe fai ha ngaahi hala kehe? Ko e fakamoʻoni ia ʻoku ʻikai hōifua ʻa e ʻOtuá ki he kautaha lotu ʻoku nau kau ki aí.—1 Kolinitō 5:11-13.
13. Ko e hā ʻa e fili māfatukituki kuo pau ke fai ʻe ha taha ʻo kapau kuó ne ʻilo ʻoku ʻikai ke fehoanaki ʻa e ngaahi akonaki kotoa ʻa e siasi ʻoku kau ki aí mo e Tohitapú?
13 Kapau kuó ke fakakaukau ki he ngaahi vahe ki muʻa ʻo e tohí ni, ʻo fakakaukau atu ki he ngaahi konga Tohitapu ʻoku hā aí, kuó ke hoko ʻo ʻilo ʻa e ngaahi akonaki tefito ʻa e Folofola ʻa e ʻOtuá. Kae fēfē ʻo kapau ʻoku ʻikai fehoanaki ʻa e ngaahi akonaki ia ʻa e kautaha lotu ʻokú ke kau ki aí mo e Folofola ʻa e ʻOtuá? Tā ʻoku ʻi ai haʻo palopalema māfatukituki. Ko e palopalema ia fekauʻaki mo e fili pe te ke tali ʻa e moʻoni ʻo e Tohitapú pe siʻaki ia koeʻuhi ko e ngaahi akonaki ʻoku ʻikai poupouʻi ʻe he Tohitapú. Ko ia, kuo pau ko e fili pē ʻaʻau ʻa e meʻa ke faí. Kaekehe, ʻoku totonu ke ke fakaʻutoʻuta lelei. ʻOku peheé koeʻuhi ko e fili te ke faí te ne uesia ho tuʻunga mo e ʻOtuá pea mo hoʻo ʻamanaki ki he moʻui taʻengata ʻi he palataisi he māmaní.
TUʻU MAʻU ʻI HE MAVAHE MEI HE MĀMANÍ
14. (a) Ko e hā ʻa e toe fakaʻilonga ʻilo fakapapau ʻe taha ʻo e lotu moʻoní? (e) Ko e hā ʻoku mātuʻaki mahuʻinga ai ke aʻusia ʻe he kau lotu moʻoní ʻa e fiemaʻú ni?
14 Ko ha toe fakaʻilonga ʻilo fakapapau ʻe taha ʻo e faʻahinga ʻoku nau fai ʻa e lotu moʻoní ko e meʻa ko ia naʻe leaʻaki ʻe Sīsū, “ʻoku ʻikai te nau ʻo māmāni.” (Sione 17:14) ʻOku ʻuhinga ení ʻoku tuʻu maʻu ʻa e kau lotu moʻoní ʻi he mavahe mei he māmani fulikivanú mo hono ngaahi tōʻongá. Naʻe fakafisi ʻa Sīsū Kalaisi ke hoko ko ha taki fakapolitikale. (Sione 6:15) ʻOku malava ke mahino kiate koe ʻa e ʻuhinga ʻoku mātuʻaki mahuʻinga ai ke tuʻu maʻu ʻi he mavahe mei he māmaní ʻi hoʻo manatuʻi ʻa e lau ʻa e Tohitapú ʻo pehē ko Sētane ko e Tēvoló ko e pule ia ʻo e māmaní. (Sione 12:31; 2 Kolinitō 4:4) ʻOku toe lava ke ʻilo ko e meʻa māfatukituki ení mei he fakamatala ʻa e Tohitapú: “ʻIlonga ʻa ia ʻoku loto ke takaua mo mamani ʻoku ne nofo ai ko e fili ʻo e ʻOtua.”—Sēmisi 4:4.
15. (a) ʻOku mātuʻaki “ikai oe mamani” ʻa e ngaahi siasi ʻokú ke maheni mo iá? (e) ʻOkú ke ʻilo ha kautaha lotu ʻoku nau aʻusia ʻa e fiemaʻú ni?
15 ʻOku fakahā ʻe he ngaahi meʻa ʻoku fai ʻe he ngaahi siasi ʻi ho fonuá ʻoku nau fai ki he meʻá ni? ʻOku mātuʻaki “ikai . . . oe mamani” ʻa e haʻa faifekaú pea pehē ki he kau mēmipa ʻo e ngaahi lotú? Pe ʻoku nau kau fakaʻaufuli kinautolu ʻi he mamahiʻi fonuá, meʻa fakapolitikalé mo e fefāingaʻaki fakaefaʻahinga ʻo e māmaní? ʻOku ʻikai faingataʻa ke tali ʻa e ngaahi fehuʻí ni, koeʻuhi ʻoku ʻilolahia ʻa e ngaahi ngāue ʻa e ngaahi siasí. ʻI he tafaʻaki ʻe tahá, ʻoku toe faingofua ke vakaiʻi ʻa e ngaahi ngāue ʻa e Kau Fakamoʻoni ʻa Sihová. ʻI he fai pehē, te ke ʻilo ai ʻoku nau mātuʻaki muimui ki he faʻifaʻitakiʻanga ʻa Kalaisí pea mo hono muʻaki kau muimuí ʻi he tuʻu maʻu ʻi he mavahe mei he māmaní, mei hono ngaahi meʻa fakapolitikalé, mo hono ngaahi founga siokitá, taʻetaau mo fakamālohí.—1 Sione 2:15-17, PM.
ʻOFA ʻI HONAU LOTOLOTONGÁ
16. Ko e hā ha founga mahuʻinga ʻoku malava ke ʻilo fakapapau ai ʻa e kau ākonga moʻoni ʻa Kalaisí?
16 Ko ha founga mahuʻinga lahi ʻa ia ʻoku malava ke ʻilo fakapapau ai ʻa e kau ākonga moʻoni ʻa Kalaisí ko e ʻofa ʻi honau lotolotongá. Naʻe pehē ʻe Sīsū: “Ko e meʻa ko é ʻe ʻilo ai ʻe he kakai kotoa pē ko e kau ako kimoutolu aʻaku, ʻo kapau ʻe ai haʻamou feʻofaʻaki.” (Sione 13:35) ʻOku maʻu ʻa e ʻofá ni ʻe he ngaahi kautaha lotu ʻokú ke maheni mo iá? Ko e fakatātā, ko e hā ʻa e meʻa ʻoku nau fai ʻi he taimi ʻoku ʻalu ai ʻa e ngaahi fonua ʻoku nau nofo aí ʻo fetauʻakí?
17. ʻOku fēfē ʻa e ngaahi kautaha lotú mo honau kau mēmipá ʻi hono fakatatauʻi ki he fiemaʻu ke fakahā ʻa e ʻofá ʻi honau lotolotonga?
17 ʻOkú ke ʻiloʻi ʻa e meʻa ʻoku faʻa hokó. ʻOku ʻalu atu ʻa e kau mēmipa ʻo e ngaahi kautaha lotu kehekehe ki he malaʻe taú ʻo tāmateʻi honau kaungātui mei he fonua ʻe tahá, ʻi hono fekauʻi ʻe he kau tangata fakaemāmaní. Ko ia ʻoku tāmateʻi ʻe he Katolika ʻa e Katolika, tāmateʻi ʻe he Palōtisani ʻa e Palōtisani pea tāmateʻi ʻe he Mosilemi ʻa e Mosilemi. ʻOkú ke fakakaukau ʻoku fakatatau ki he Folofola ʻa e ʻOtuá ha ʻalunga pehē peá ne mātuʻaki fakahaaʻi ʻa e laumālie ʻo e ʻOtuá?—1 Sione 3:10-12.
18. ʻOku fēfē ʻa e Kau Fakamoʻoni ʻa Sihová ʻi hono fakatatauʻi ki he meʻa ko ení ʻo fekauʻaki mo hono fakahā ʻa e feʻofaʻakí?
18 ʻOku fēfē ʻa e Kau Fakamoʻoni ʻa Sihová ʻi hono fakatatauʻi ki he meʻa ko eni ʻo fekauʻaki mo hono fakahā ʻo e feʻofaʻakí? ʻOku ʻikai te nau muimui ʻi he ʻalunga ʻo e ngaahi lotu ʻi he māmaní. ʻOku ʻikai te nau tāmateʻi ʻa e kaungātuí ʻi ha malaʻe tau. Kuo ʻikai te nau halaia ʻi ha loi ʻaki ha pehē, “ʻOku ou ʻofa ki he ʻOtua,” lolotonga iá ʻoku nau fehiʻa ki honau tokoua mei ha fonua, matakali pe mei ha faʻahinga kehe. (1 Sione 4:20, 21) Ka ʻoku nau toe fakahaaʻi ʻa e ʻofá ʻi he ngaahi founga kehe. ʻO anga-fēfē? ʻI he founga ʻoku nau feangai ai mo honau ngaahi kaungāʻapí pea ʻi heʻenau ngaahi feinga ʻofa ke tokoniʻi ʻa e niʻihi kehé ke ako ʻo fekauʻaki mo e ʻOtuá.—Kalētia 6:10.
LOTU MOʻONI PĒ TAHA
19. Ko e hā ʻoku fakatou fakakaukau lelei ai mo faka-Tohitapu ke pehē ʻoku taha pē ʻa e lotu moʻoní?
19 ʻOku fakakaukau lelei ʻa e pehē ʻoku ʻi ai ʻa e lotu moʻoni pē ʻe taha. ʻOku fehoanaki eni mo e moʻoniʻi meʻa ko e ʻOtua moʻoní ko ha ʻOtua, “ʻoku ʻikai ko e fakatupu maveuveu, ka ko e fakatupu melino.” (1 Kolinitō 14:33) ʻOku pehē ʻe he Tohitapú ʻoku “taha ʻa e tui.” (ʻEfesō 4:5) Ko ia, ko hai ʻa e faʻahinga ʻoku faʻuʻaki ʻa e kau lotu moʻoní he ʻaho ní?
20. (a) ʻI he hā mahino mai ʻa e fakamoʻoní, ko hai ʻoku tuhu ki ai ʻa e tohí ni ko e kau lotu moʻoni he ʻaho ní? (e) Ko e meʻa ia ʻokú ke tui ki aí? (f) Ko e hā ʻa e founga lelei taha te ke maheni lelei ai mo e Kau Fakamoʻoni ʻa Sihová?
20 ʻOku ʻikai te mau toumoua ke pehē ko kinautolu ko e Kau Fakamoʻoni ʻa Sihová. Ke ke tui pau ki he meʻá ni ʻoku mau fakaafeʻi koe ke hoko ʻo maheni lelei ange mo kinautolu. Ko e founga lelei taha ki hoʻo fai ení ko hoʻo maʻu ʻenau ngaahi fakataha ʻi he Kingdom Hall ʻo e Kau Fakamoʻoni ʻa Sihová. Koeʻuhi ʻoku fakahā ʻe he Tohitapú ko hono fai ʻa e lotu moʻoní ʻokú ne ʻomai ʻa e fiemālie lahi he taimí ni peá ne fakaʻatā ʻa e hala ke maʻu ai ʻa e moʻui taʻengata he palataisi ʻi he māmaní, ʻoku pau ke ʻaonga lahi kiate koe ʻa hoʻo fai ha fekumi pehē. (Teutalōnome 30:19, 20) ʻOkú ke maʻu ʻemau fakaafe loto-māfaná ke fai pehē. Ko e hā ʻoku ʻikai te ke fekumi ai he taimí ní?
[Fehuʻi ki he Ako]
[Fakatātā ʻi he peesi 185]
Kapau te ke talanoa ki ha taha ʻo fekauʻaki mo Sihova mo hono puleʻangá, ko e hā ʻa e kautaha lotu ʻe pehē ʻe he kakaí ʻokú ke kau ki aí?
[Fakatātā ʻi he peesi 186]
ʻOku ʻapasia ha taha ki he Folofola ʻa e ʻOtuá ʻo kapau ʻoku ʻikai te ne moʻuiʻaki ia?
[Fakatātā ʻi he peesi 188, 189]
Naʻe fakafisi ʻa Sīsū ke hoko ko ha taki fakapolitikale
[Fakatātā ʻi he peesi 190]
ʻOku fakaafeʻi loto-māfana koe ke kau ki he ngaahi fakataha ʻa e Kau Fakamoʻoni ʻa Sihová
