Ko e Hoko ko ha Tokotaha ʻi he Malumalu ʻo e Founga-Pule ʻa e ʻOtuá
Vahe 15
Ko e Hoko ko ha Tokotaha ʻi he Malumalu ʻo e Founga-Pule ʻa e ʻOtuá
1, 2. Ko e hā ʻoku fiemaʻu kae hoko ko ha taha ʻi he malumalu ʻo e founga-pule ʻa e ʻOtuá?
ʻOKÚ KE FIE moʻui taʻengata ʻi he māmaní he malumalu ʻo e founga-pule ʻa e ʻOtuá? ʻE tali ʻe ha taha ʻoku fakakaukau totonú, ʻIo! ʻE ʻi ai ʻa e ngaahi ʻaonga maʻongoʻonga. Ka ke maʻu ʻa e ngaahi meʻa ko iá heʻikai ke ke hiki pē ho nimá mo ke pehē: ‘ʻOku ou fie hoko ko ha taha ʻi he malumalu ʻo e founga-pule ʻa e ʻOtuá.’ ʻOku lahi ange ʻa e meʻa ʻoku fiemaʻú.
2 Ko e fakatātā, tau pehē ʻokú ke fie hoko ko ha tangataʻifonua ʻo ha fonua kehe. Ke hoko iá, kuo pau ke ke aʻusia ʻa e ngaahi fiemaʻu ʻoku fokotuʻu ʻe he kau pule ʻo e puleʻanga ʻi he fonua ko iá. Ka ki muʻa ke ke fai ení, kuo pau ke ke ako ke ʻilo pe ko e hā ʻa e ngaahi fiemaʻu ko ení. ʻI ha founga meimei tatau pē, ʻoku fiemaʻu ke ke ako ke ʻiloʻi ʻa e ngaahi fiemaʻu ʻa e ʻOtuá kiate kinautolu ʻoku nau fie hoko ko e faʻahinga ʻi he malumalu ʻo ʻene founga-pulé. Pea toki fiemaʻu leva ke ke aʻusia ʻa e ngaahi fiemaʻu ko ení.
ʻOKU FIEMAʻU ʻA E ʻILO
3. Ko e hā ʻa e fiemaʻu ʻe taha kae hoko ko ha taha ʻi he malumalu ʻo e founga-pule ʻa e ʻOtuá?
3 Ko ha fiemaʻu mahuʻinga ʻaupito ke hoko ko ha taha ʻi he malumalu ʻo e founga-pule ʻa e ʻOtuá ko e maʻu ʻa e ʻilo ki he “lea” ʻa e founga-pule ko iá. Ko hono moʻoní ʻoku ʻuhinga totonu eni. ʻOku fiemaʻu foki ʻe he ngaahi founga-pule fakaetangata ʻe niʻihi ke malava ʻa e kau tangataʻifonua foʻoú ʻo lea ʻi he lea ʻa e fonua ko iá. Ko ia ai, ko e hā ʻa e “lea” kuo pau ke ako ʻe he faʻahinga te nau maʻu ʻa e moʻui ʻi he malumalu ʻo e founga-pule ʻa e ʻOtuá?
4. Ko e hā ʻa e “lea maa” kuo pau ke ako ʻe he kakai ʻa e ʻOtuá?
4 Fakatokangaʻi ʻa e lau ʻa Sihova ʻo fekauʻaki mo e meʻá ni ʻi heʻene Folofolá, ko e Tohitapú: “Bea hili ia teu omi ae lea maa ki he kakai, koeuhi ke nau ui kotoabe ki he huafa o Jihova, ke tauhi kiate ia i he uouagataha.” (Sēfanaia 3:9, PM) Ko e “lea maa” ko ení ko e moʻoni ʻo e ʻOtuá ʻa ia ʻoku maʻu ʻi he Tohitapú. Tautefito, ko e moʻoni ia ʻo fekauʻaki mo e founga-pule Puleʻanga-fakatuʻi ʻo e ʻOtuá. Ko ia ke hoko ko ha taha ʻi he malumalu ʻo e founga-pule ʻa e ʻOtuá, kuo pau ke ke ako ʻa e “lea” ni ʻaki hono maʻu ʻa e ʻilo ʻo fekauʻaki mo Sihova mo ʻene fokotuʻutuʻu ki he Puleʻangá.—Kolose 1:9, 10; Palōvepi 2:1-5.
5. (a) Ko e hā ʻoku totonu ke tau ʻilo ʻo fekauʻaki mo e founga-pule ʻa e ʻOtuá? (e) Ko e hā ʻa e ʻilo ʻoku fiemaʻu kiate kitautolú kae lava ke maʻu ʻa e moʻui taʻengatá?
5 ʻI he ʻahó ni ʻoku fiemaʻu ʻe he ngaahi founga-pule fakaetangata ʻe niʻihi mei he faʻahinga te nau hoko ko ha tangataʻifonuá ke nau ʻilo ʻo fekauʻaki mo e hisitōlia ʻo e founga-pule ko iá, pea pehē ki he ngaahi moʻoniʻi meʻa ʻo fekauʻaki mo hono fakalele ʻo e founga-pule ko iá. ʻOku pehē pē, ʻoku totonu ke ke ʻilo ʻa e ngaahi meʻa pehē ʻo fekauʻaki mo e founga-pule ʻa e ʻOtuá ʻo kapau te ke hoko ko ha taha ʻi hono malumalú. Ko e ʻilo ko ení ʻoku malava ke taki atu ki he moʻui taʻengatá. Naʻe pehē ʻe Sīsū ʻi heʻene lotu ki heʻene Tamaí: “Pea ko eni ia ʻa e moʻui taʻengata, ke nau fai ke ʻilo koe ko e ʻOtua moʻonia pe taha, pea mo Sisu ne ke fekau mai ko e Misaia.”—Sione 17:3.
6. (a) Ko e hā ʻa e ngaahi fehuʻi ʻoku totonu ke malava ke tali ʻe he faʻahinga ʻi he malumalu ʻo e founga-pule ʻa e ʻOtuá? (e) Te ke lava ʻo tali ia?
6 Kapau kuó ke ʻosi ako ʻa e ngaahi vahe ki muʻa ʻo e tohí ni kuo ke maʻu ʻa e konga lahi ʻo e ʻilo mātuʻaki mahuʻingá ni. Kuó ke maʻu ia? Te ke lava ʻo fakahā kuó ke maʻu iá ʻaki hoʻo tali ʻa e ngaahi fehuʻi ko ení: Ko fē ʻa e taimi naʻe fuofua fakahā ai ʻe he ʻOtua ʻa ʻene taumuʻa ki ha founga-pule Puleʻanga-fakatuʻí? Ko hai ʻa e niʻihi ʻo e kau sevāniti ʻa e ʻOtuá naʻa nau fakatuʻotuʻa ke hoko ko e faʻahinga ʻe ʻi māmani he malumalu ʻo iá? ʻOku toko fiha ʻa e kau pule, pe ngaahi tuʻi, ʻe ʻi he founga-pule ʻa e ʻOtuá? ʻE pule mei fē ʻa e ngaahi tuʻi ko ení? Ko hai ʻa e ʻuluaki faʻahinga naʻe fili ke hoko ko e ngaahi tuʻi ʻi he founga-pule ʻa e ʻOtuá? Naʻe fēfē hono fakamoʻoniʻi ʻe Sīsū te ne hoko ko ha tuʻi leleí? Ka, ke hoko ko ha taha ʻi he malumalu ʻo e founga-pule ʻa e ʻOtuá, ʻoku lahi ange ʻa e meʻa ʻoku fiemaʻú ʻi hono maʻu ha ʻilo pē ʻo fekauʻaki mo ia.
ʻOKU FIEMAʻU ʻA E ʻULUNGAANGA MĀʻONIʻONI
7. Fekauʻaki mo e ngaahi founga-pule fakaetangatá, ʻoku anga-fēfē ʻa e kehekehe ʻo e ngaahi fiemaʻu ki he hoko ko ha tangataʻifonuá?
7 ʻOku fiemaʻu ʻe he ngaahi founga-pule he ʻaho ní ʻa e kau tangataʻifonua foʻoú ke nau aʻusia ha tuʻunga pau ʻo e ʻulungaangá. Ko e fakatātā, ʻoku nau pehē nai ke maʻu ʻe ha tangata ha uaifi pē taha pea ke maʻu ʻe ha fefine ha husepāniti pē taha. Ka ʻoku kehe ʻa e ngaahi lao ia ʻa e ngaahi founga-pule kehe ʻe niʻihi. ʻOku nau fakangofua honau kau tangataʻifonua ke maʻu ha hoa mali lahi hake he tahá. Ko e hā ʻa e ʻulungaanga ʻoku totonu ke ʻi he faʻahinga ʻoku nau fie hoko ko ha faʻahinga ʻi he malumalu ʻo e founga-pule ʻa e ʻOtuá? Ko e hā ʻoku fakahā ʻe he ʻOtuá ʻoku totonu ʻo fekauʻaki mo e nofo malí?
8. (a) Ko e hā ʻa e tuʻunga ʻa e ʻOtua ki he nofo malí? (e) Ko e hā ʻa e tonó, pea ko e hā ʻa e lau ʻa e Otuá ʻo fekauʻaki mo iá?
8 Naʻe fokotuʻu ʻe Sihova ʻi he kamataʻangá ʻa e tuʻunga ki he nofo malí ʻi heʻene foaki kia ʻĀtama ʻa e uaifi pē taha. Naʻe pehē ʻe he ʻOtuá: “Ko ia ʻe tukuange ʻe he tangata ʻene tamai mo ʻene faʻe, kae pikitai ki hono uaifi: pea te na hoko ko e kakano pe taha.” (Sēnesi 2:21-24) Naʻe fakamatalaʻi ʻe Sīsū ko e tuʻunga totonu ʻeni ki he kau Kalisitiané. (Mātiu 19:4-6) Koeʻuhi ko e ongo meʻa malí kuó na hoko ko e “kakano pe taha,” ʻokú na fakaongoongokoviʻi ʻa e malí ʻo kapau te na fai ʻa e fehokotaki fakasinó mo ha tokotaha kehe. ʻOku ui ʻa e faingāmeʻa ko ení ko e tono, pea ʻoku pehē ʻe he ʻOtuá te ne tauteaʻi ʻa e kau tonó.—Hepelū 13:4; Malakai 3:5.
9. (a) Ko e hā ʻa e vakai ʻa e ʻOtuá ki he faʻahinga ʻoku nau fai ʻa e fehokotaki fakasino mo ha taha ka ʻoku ʻikai ke mali mo ia? (e) Ko e hā ʻa e feʻauakí?
9 ʻI he tafaʻaki ʻe tahá, ʻoku lahi ʻa e ngaahi ongo meʻa ʻokú na nofo fakataha ʻo na fai ʻa e fehokotaki fakasinó, ka ʻoku ʻikai te na mali. Kaekehe, naʻe ʻikai taumuʻa ʻa e ʻOtuá ki he felāveʻi vāofi ko eni ʻi he vā ʻo e tangatá mo e fefiné ke ʻi ha tuʻunga ko hano ʻahiʻahiʻi pē. Ko ia ke nofo fakataha kae ʻikai mali ko ha angahala ia ki he ʻOtuá, ʻa ia naʻá ne faʻu ʻa e fokotuʻutuʻu ki he nofo malí. ʻOku ui ia ko e feʻauaki. Ko e feʻauakí ko haʻo fai ʻa e fehokotaki fakasino mo ha taha pē ʻoku ʻikai te ke mali mo ia. Pea ʻoku pehē ʻe he Tohitapú: “He ko eni ʻa e finangalo ʻo e ʻOtua . . . ke mou fakaʻehiʻehi mei he feʻauaki.” (1 Tesalonaika 4:3-5) Ko ia ai, ʻoku hala ke fai ʻa e fehokotaki fakasinó ʻe ha taha teʻeki mali mo ha taha pē.
10. Ko e hā ʻa e ngaahi faingāmeʻa kehe ʻo e fehokotaki fakasinó ʻoku fepaki mo e ngaahi lao ʻa e ʻOtuá?
10 ʻI he ʻahó ni ʻoku tokolahi ʻa e kau tangata mo e kau fefine ʻoku nau fai ʻa e fehokotaki fakasinó mo honau faʻahingá pē—ʻo tangata pē mo e tangata pea fefine mo e fefine. ʻOku ui ʻa e faʻahinga peheé ko e kau fakasōtoma. ʻOku ui he taimi ʻe niʻihi ʻa e kau fefine fakasōtomá ko e kau Lesbians. Ka ʻoku pehē ʻe he Folofola ʻa e ʻOtuá ko e meʻa ʻoku nau faí ʻoku hala, ʻa ia ʻoku “fakalielia.” (Loma 1:26, 27) Pea ʻoku fepaki foki mo e lao ʻa e ʻOtuá ke fai ʻa e fehokotaki fakasinó ʻe ha taha mo ha manu. (Livitikō 18:23) ʻOku fiemaʻu ke fakaʻehiʻehi mei he ngaahi tōʻonga taʻetaaú ni ha taha pē ʻoku fie moʻui ʻi he malumalu ʻo e founga-pule ʻa e ʻOtuá.
11. (a) Ko e hā ʻa e vakai ʻa e ʻOtuá ki hono ngāueʻaki ʻo e ngaahi inu ʻolokaholó? (e) Ko e faʻahinga ko ia ʻoku nau fiemaʻu ke nau ʻi he malumalu ʻo e founga-pule ʻa e ʻOtuá, kuo pau ke nau fakamamaʻo mei he ngaahi tōʻonga fē ʻa ia ʻoku fakatuʻutāmaki ki he moʻuí?
11 Ko hono inu ʻo e uainé, piá pe kava mālohí ʻo fakafuofua pē ʻoku ʻikai fepaki mo e lao ʻa e ʻOtuá. Ko hono moʻoní, ʻoku fakahā ʻe he Tohitapú ko e meʻi uaine siʻisiʻí ʻoku lava ke lelei ki he moʻui ʻa ha taha. (Sāme 104:15; 1 Tīmote 5:23) Ka ʻoku fepaki mo e lao ʻa e ʻOtuá ke konā, pe kau ki he ngaahi paati taʻemapuleʻi ʻa ia ʻoku fai ai ʻe he kakaí ʻa e ʻulungaanga taʻetaaú. (ʻEfesō 5:18; 1 Pita 4:3, 4) Tānaki ki hono ngāueʻaki ʻo e ngaahi inu ʻolokaholó ke konā pe ongoʻi fiemālié, ʻoku ngāueʻaki ʻe he faʻahinga tokolahi he ʻahó ni ʻa e ngaahi faitoʻo kona tapu kehekehe ki he taumuʻa tatau pē. Pehē foki, ke ongoʻi fiefia, ʻoku nau ifi nai ʻa e malisuaná pe tapaká, pea lamu nai ʻe he niʻihi ʻa e betel nut pe laʻi coca. Ka ʻoku ʻai ʻe he ngaahi meʻá ni ʻa honau sinó ke taʻemaʻa pea ʻoku kaunga-kovi ki heʻenau moʻuí. Ko ia kapau ʻokú ke fie hoko ko ha taha ʻi he malumalu ʻo e founga-pule ʻa e ʻOtuá, kuo pau ke ke fakamamaʻo mei he ngaahi meʻa fakatupu-koví ni.—2 Kolinitō 6:19, [2 Kolinitō 7:1, PM].
12. (a) Ko e hā ha ngaahi tōʻonga taʻefaitotonu ʻoku fepaki mo e ngaahi lao ʻa e ʻOtuá? (e) ʻE anga-fēfē ke maʻu ʻa e hōifua ʻa e ʻOtuá ʻe ha taha ʻokú ne kau ki he ngaahi tōʻongá ni?
12 ʻOku hā mahino ʻoku ʻikai fiemaʻu ʻe he ngaahi founga-pule fakaetangatá ʻa e kau faihiá ke hoko ko ha kau tangataʻifonua foʻou. Pea ʻoku toe māʻolunga ange ʻa e ngaahi tuʻunga ia ʻa Sihová. ʻOkú ne fiemaʻu ʻa kitautolu “ke tau faitotonu ʻi he meʻa kotoa pē.” (Hepelū 13:18, NW) Kapau ʻoku ʻikai tauhi ʻe ha faʻahinga ʻa e ngaahi lao ʻa e ʻOtuá, heʻikai fakangofua ʻa kinautolu ke moʻui ʻi he malumalu ʻo hono puleʻangá. ʻOku faʻa fakangalingali faitotonu ʻa e kakaí he ʻahó ni, ka ʻoku nau maumauʻi ʻa e ngaahi lao lahi. Kaekehe, ʻoku malava ke mātā ʻe he ʻOtuá ʻa e ngaahi meʻa kotoa pē. ʻOku ʻikai malava ʻe ha taha ke kākaaʻi ia. (Hepelū 4:13; Palōvepi 15:3; Kalētia 6:7, 8) Ko ia ʻe fakapapauʻi ʻe Sihova ko e faʻahinga ko ia ʻoku nau maumauʻi ʻa ʻene ngaahi laó, ʻo hangē ko e ngaahi lao ʻo fekauʻaki mo e loí mo e kaihaʻá, heʻikai ke nau hoko ko ha faʻahinga ʻi he malumalu ʻo ʻene founga-pulé. (ʻEfesō 4:25, 28; Fakahā 21:8) Ka ʻoku anga-kātaki mo faʻa fakamolemole ʻa e ʻOtuá. Ko ia kapau ʻe liʻaki ʻe ha tokotaha faihala ʻene ngaahi tōʻonga koví pea tafoki ʻo fai lelei, ʻe tali ia ʻe he ʻOtuá.—ʻAisea 55:7.
13. ʻOku totonu ke fēfē ʻa e vakai ʻa e kau sevāniti ʻa e ʻOtuá ki he ngaahi lao ʻa e ngaahi founga-pule fakaetangatá?
13 Kae fēfē hono tauhi ʻa e ngaahi lao ʻo e ngaahi founga-pule fakaetangatá? Lolotonga ʻa e ʻi aí ni ʻa e ngaahi founga-pule ʻa e tangatá, ʻoku fiemaʻu ʻe he ʻOtuá ʻa ʻene kau sevānití ke nau anganofo ki he “ngaahi pule ʻoku maʻolunga” ko ení. ʻOku totonu ke totongi ʻa e ngaahi tukuhaú kiate kinautolu, neongo ʻoku mamafa mo taʻeloto nai ha taha ki he founga ʻoku ngāueʻaki ki ai ʻa e paʻanga tukuhaú. ʻIkai ngata aí, ʻoku totonu ke talangofua ki he ngaahi lao ʻa e founga-pule ko iá. (Loma 13:1, 7; Taitusi 3:1) Ko e taimi pē ʻe kehe ai ení ʻo kapau ʻe fakatupunga ha taha ʻe he talangofua ki he laó ke ne talangataʻa ki he lao ʻa e ʻOtuá. ʻI he tuʻunga ko ení, ʻo hangē pē ko ia naʻe pehē ʻe Pita mo e kau ʻapositolo kehé, “Oku totonu e mau talagofua ki he Otua i he tagata.”—Ngāue 5:29, PM.
14. ʻE anga-fēfē ʻa ʻetau fakahā ʻoku tau maʻu ʻa e vakai tatau mo e ʻOtuá ki he mahuʻinga ʻo e moʻuí?
14 ʻOku fakamahuʻingaʻi māʻolunga ʻe he ʻOtuá ʻa e moʻuí. Kuo pau ke mahino eni kiate kinautolu ʻoku nau fie hoko ko ha faʻahinga ʻi he malumalu ʻo ʻene founga-pulé. ʻOku hā mahino, ʻoku fepaki ʻa e fakapoó mo e lao ʻa e ʻOtuá. Ka ʻoku faʻa iku ʻa e tāufehiʻá ki he fakapō, pea kapau ʻoku hokohoko atu ʻa e tāufehiʻa ʻa ha taha ki hono kaungātangatá heʻikai malava ke ne hoko ko ha taha ʻi he malumalu ʻo e founga-pule ʻa e ʻOtuá. (1 Sione 3:15) Ko ia ai, ʻoku mahuʻinga ʻaupito ke fai ki he meʻa ʻoku lau ʻi he Tohitapú ʻia ʻAisea 2:4 ʻo kau ki he ʻoua ʻe ngāueʻaki ʻa e ngaahi meʻataú ke tāmateʻiʻaki hotau ngaahi kaungāʻapí. ʻOku fakahā ʻe he Folofola ʻa e ʻOtuá naʻa mo e tama teʻeki fanauʻí ʻa ia ʻoku ʻi he manava ʻo ʻene faʻeé ʻoku mahuʻinga kia Sihova. (ʻEkisoto 21:22, 23; Sāme 127:3) Ka ʻoku fai ʻa e fakatōtama ʻe laui miliona ʻi he taʻu taki taha. ʻOku fepaki mo e lao ʻa e ʻOtuá ʻa hono fakaʻauha ko eni ʻo e moʻuí, koeʻuhi ko e tokotaha ʻoku ʻi loto ʻi heʻene faʻeé ko ha tokotaha moʻui ia pea ʻoku totonu ke ʻoua ʻe fakaʻauha ia.
15. Ko e hā ʻa e ngaahi fekau ʻa e Tuʻi ʻa e ʻOtuá kuo pau ke tauhi ʻe he faʻahinga kotoa ʻi he malumalu ʻo e Puleʻangá?
15 Ka ʻoku toe lahi ange ʻa e meʻa ʻoku fiemaʻu meiate kinautolu te nau hoko ko e faʻahinga ʻi he malumalu ʻo e founga-pule ʻa e ʻOtuá, ʻo ʻikai ngata pē ʻi hono ʻikai fai ʻa e meʻa ʻoku halá pe taʻetaaú. Kuo pau foki ke nau fai ha feinga moʻoni ke fai ʻa e ngaahi meʻa anga-ʻofa mo taʻesiokitá ki he niʻihi kehé. Kuo pau ke nau moʻui ʻo fakatatau ki he lao fakaʻotua kuo ʻomai ʻe he Tuʻi, ko Sīsū Kalaisí: “Ko ia ʻilonga ha meʻa ʻoku mou loto ke fai ʻe he kakai kiate kimoutolu, fai pehe foki kiate kinautolu.” (Mātiu 7:12) Naʻe fokotuʻu ʻe Kalaisi ʻa e faʻifaʻitakiʻanga ki hono fakahā ʻa e ʻofa ki he niʻihi kehé. Naʻe aʻu ki heʻene foaki ʻene moʻuí koeʻuhi ko e faʻahinga ʻo e tangatá, pea naʻá ne fekau ki hono kau muimuí: “Ke mou feʻofaʻaki: hange ā ko ʻeku ʻofaʻi kimoutolu.” (Sione 13:34; 1 Sione 3:16) Ko e faʻahinga ʻofa taʻesiokita eni mo e tokanga ki he niʻihi kehé te ne ʻai ʻa e moʻuí ko ha fiefiaʻanga moʻoni ʻi he malumalu ʻo e pule ʻa e puleʻanga ʻo e ʻOtuá.—Sēmisi 2:8.
16, 17. (a) Ko e hā ʻa e ngaahi ʻuhinga lelei ki hono fai ha ngaahi liliu ʻi heʻetau moʻuí kae lava ke aʻusia ʻa e ngaahi fiemaʻu ʻa e ʻOtuá? (e) Ko e hā ʻoku tau ʻilo pau ai ʻoku malava ke tau fai ha ngaahi liliu ʻoku fiemaʻú?
16 ʻOku fakahā ʻe he Tohitapú kuo pau ke fai ʻe he kakai ʻa e ngaahi liliu ʻi heʻenau moʻuí kae lava ke nau aʻusia ʻa e ngaahi fiemaʻu ke hoko ko ha faʻahinga ʻi he malumalu ʻo e founga-pule ʻa e ʻOtuá. (ʻEfesō 4:20-24) ʻOkú ke ngāue ke fai ʻa e ngaahi liliú ni? Ko hono moʻoní ʻoku ʻaonga ʻa e feinga kotoa ke fai pehē! Ko e hā hono ʻuhingá? ʻE ʻikai ʻuhinga ia te ke maʻu pē ha moʻui lelei ange ʻi ha ngaahi taʻu siʻi ʻi he malumalu ʻo ha founga-pule fakaetangata. ʻIkai, ka te ke maʻu ʻa e moʻui taʻengata ʻi he moʻui haohaoa ʻi ha māmani palataisi ʻi he malumalu ʻo ha founga-pule ʻoku puleʻi ʻe he ʻOtuá!
17 Naʻa mo e taimí ni, ʻi hono aʻusia ʻa e ngaahi fiemaʻu ʻa e ʻOtuá, te ke maʻu ha moʻui fiefia ange. Ka ʻoku fiemaʻu nai ke ke fai ha ngaahi liliu. ʻOku tokolahi ʻaupito ʻa e faʻahinga naʻa nau anga-tāufehiʻa pe mānumanu kuo nau liliu. Pehē foki, naʻe ʻi ai ʻa e kau feʻauaki, tono, fakasōtoma, konā, fakapō, kaihaʻa mo kinautolu naʻe maʻu ʻe he faitoʻo kona tapu pea mo kinautolu naʻa nau ngāueʻaki ʻa e tapaká kuo nau liliu ʻa ʻenau founga moʻuí. Kuo nau fai pehē ʻaki ʻa e feinga moʻoni fakataha mo e tokoni ʻa e ʻOtuá. (1 Kolinitō 6:9-11; Kolose 3:5-9) Ko ia kapau ʻoku ʻi ai ha ngaahi liliu faingataʻa ke ke fai kae lava ke aʻusia ʻa e ngaahi fiemaʻu ʻa e ʻOtuá, ʻoua ʻe foʻi. Te ke lava pē ʻo fai ia!
ʻOFA-MATEAKI KI HE FOUNGA-PULE ʻA E ʻOTUÁ
18. Ko e hā ʻa e founga makehe ʻoku fiemaʻu mai ʻe he ʻOtuá ke tau fakahā ai ʻetau poupou ʻofa-mateaki maʻa hono puleʻangá?
18 ʻOku ʻikai totonu ke tau ofo ʻi he fiemaʻu ʻe he ʻOtua ko Sihová ʻa e poupou ʻofa-mateaki mei heʻene faʻahinga ʻi he malumalu ʻo ʻene founga-pule Puleʻanga-fakatuʻí. Ko e meʻa tatau pē ʻoku fiemaʻu ʻe he ngaahi founga-pule ʻa e tangatá mei honau kakaí. Ka ko e hā ʻa e founga makehe ʻoku ʻamanaki mai ʻe he ʻOtuá ke tau fai ai ʻa e poupou ʻofa-mateakí? ʻI ha toʻo meʻatau ʻa ʻene faʻahingá ke faitau maʻa hono puleʻangá? ʻIkai. Kae hangē ko Sīsū Kalaisi mo hono muʻaki kau muimuí, kuo pau ke nau hoko ko e kau tangata lea pe kau fanongonongo mateaki ʻo e puleʻanga ʻo e ʻOtuá. (Mātiu 4:17; 10:5-7; 24:14) Ko e finangalo ia ʻo Sihová ke lava ʻo ʻiloʻi ʻe he tokotaha kotoa pē pe ko e hā ʻa hono puleʻangá pea mo e founga te ne fakaleleiʻi ai ʻa e ngaahi palopalema ʻa e faʻahinga ʻo e tangatá. Kuó ke fakahā atu ʻa e ngaahi meʻa kuó ke ako mei he Folofola ʻa e ʻOtuá ki he ngaahi kāingá, kaungāmeʻá pea mo e niʻihi kehé? Ko e finangalo ia ʻo e ʻOtuá ke ke fai pehē.—Loma 10:10; 1 Pita 3:15.
19. (a) Ko e hā ke tau fakatuʻotuʻa ai ki ha fakafepaki ʻi heʻetau talanoa ki he niʻihi kehé ʻo fekauʻaki mo e puleʻanga ʻo e ʻOtuá? (e) Ko e hā ʻa e ngaahi fehuʻi kuo pau ke ke talí?
19 Naʻe fiemaʻu kia Kalaisi mo hono muʻaki kau muimuí ʻa e lototoʻá ke talanoa ki he niʻihi kehé ʻo fekauʻaki mo e Puleʻangá, he naʻa nau faʻa fehangahangai mo e fakafepaki. (Ngāue 5:41, 42) ʻOku pehē foki ʻi he ʻahó ni. Ko e māmani ko ení ʻoku puleʻi ʻe he Tēvoló ʻoku ʻikai te nau fiemaʻu ke malangaʻi ʻa e ongoongo lelei ʻo e Puleʻangá. Ko ia ko e ngaahi fehuʻí ʻoku pehē: ʻOkú ke kau ki fē? Te ke poupou ʻofa-mateaki ki he Puleʻanga ʻo e ʻOtuá? Ko hono finangaló ke fai ha fakamoʻoni lahi ʻo fekauʻaki mo e Puleʻangá ki muʻa pea hoko mai ʻa e ngataʻanga. Te ke kau ki hono fai iá?
[Fehuʻi ki he Ako]
[Fakatātā ʻi he peesi 128]
Ko kinautolu ʻoku nau hoko ko e faʻahinga ʻi he malumalu ʻo e founga-pule ʻa e ʻOtuá kuo pau ke nau maʻu ha ʻilo ʻo fekauʻaki mo ia
[Fakatātā ʻi he peesi 131]
Ko e faʻahinga ʻi he malumalu ʻo e founga-pule ʻa e ʻOtuá kuo pau ke nau fakaʻehiʻehi mei he ngaahi tōʻonga ʻoku fakahalaiaʻi ʻe he ʻOtuá
[Fakatātā ʻi he peesi 133]
Ko e faʻahinga ʻi he malumalu ʻo e founga-pule ʻa e ʻOtuá kuo pau ke nau tala ki he niʻihi kehé ʻo fekauʻaki mo ia
