Ko e Toe Foki Mai ʻa Kalaisí–ʻE Mamata Fēfē ki Ai?
Vahe 17
Ko e Toe Foki Mai ʻa Kalaisí–ʻE Mamata Fēfē ki Ai?
1. (a) Ko e hā ʻa e talaʻofa naʻe fai ʻe Kalaisí? (e) Ko e hā ʻa e fiemaʻu ʻoku ʻi ai ki he toe foki mai ʻa Kalaisí?
“ʻOKU OU TOE HAʻU.” (Sione 14:3) Naʻe fai ʻe Sīsū Kalaisi ʻa e talaʻofá ni ki heʻene kau ʻapositoló ʻi heʻene ʻi ai mo kinautolu ʻi he pō ki muʻa peá ne pekiá. Mahalo pē te ke loto-tatau ʻi he pehē kuo ʻikai ʻaupito ha toe taimi ʻo hangē ko e taimi ko ení ʻa hono fiemaʻu ʻa e melino, moʻui lelei mo e moʻui ʻa ia ʻe ʻomai ki he faʻahinga ʻo e tangatá ʻe he foki mai ʻa Kalaisi ʻi he mafai faka-Puleʻangá. Ka ʻoku anga-fēfē ʻa e toe foki mai ʻa Kalaisí? Ko hai ʻe mamata ki aí, pea ʻi he founga fē?
2. (a) ʻI he toe foki mai ʻa Kalaisí, ʻokú ne ʻave ke moʻui ʻi fē ʻa ʻene kau muimui paní, pea pehē ki heʻene kau ʻapositoló? (e) Ko e faʻahinga sino fēfē te nau maʻu ʻi aí?
2 ʻOku ʻikai haʻu ʻa Kalaisi ke nofo ʻi māmani ʻi heʻene toe foki maí. Ka ko e faʻahinga te nau pule ko e ngaahi tuʻi fakataha mo iá ʻoku ʻave kinautolu ke nofo fakataha mo ia ʻi hēvani. Naʻe tala ange ʻe Sīsū ki heʻene kau ʻapositoló: “ʻOku ou toe haʻu pe, pea te u maʻu kimoutolu kiate au; koeʻuhi ko e potu ʻoku ou ʻi ai, ke mou ʻi ai foki.” (Sione 14:3) Ko ia ʻi he toe foki mai ʻa Kalaisí, ko e faʻahinga ʻoku ʻave ki hēvaní ʻoku nau hoko ko e kau laumālie, pea ʻoku nau mamata kia Kalaisi ʻi hono sino fakalaumālie kuo fakalāngilangiʻi. (1 Kolinitō 15:44) Ka ʻoku mamata kia Kalaisi ʻi heʻene toe foki maí ʻa e toenga ʻo e faʻahinga ʻo e tangatá, ʻa ia ʻoku ʻikai te nau ō ki hēvaní?
KO E ʻUHINGA HEʻIKAI LAVA KE NE TOE FOKI MAI AI KO HA TANGATÁ
3. Ko e hā ʻa e fakamoʻoni faka-Tohitapu ʻokú ne fakahaaʻi heʻikai ʻaupito toe sio ʻa e faʻahinga ʻo e tangatá kia Kalaisi?
3 ʻI he pō tatau pē naʻe hoko atu ai ʻa e lea ʻa Sīsū ki heʻene kau ʻapositoló: “ʻOku toe siʻi pea ʻikai kei sio kiate au ʻa māmani.” (Sione 14:19) ʻOku ʻuhinga ʻa e “māmani” ki he faʻahinga ʻo e tangatá. Ko ia naʻe lea mahino heni ʻa Sīsū heʻikai toe mamata kiate ia ʻa e kakai ʻi he māmaní hili ʻene ʻalu hake ki hēvaní. Naʻe tohi ʻe he ʻapositolo ko Paulá: “Neongo kuo mau laveʻi ʻa Kalaisi ʻo fakaetangata, ka ʻoku ʻikai te mau kei laveʻi pehe.”—2 Kolinitō 5:16.
4. Ko e hā ʻokú ne fakahaaʻi ʻoku toe foki mai ʻa Kalaisi ko ha tokotaha laumālie māfimafi taʻehāmai?
4 ʻOku tui ʻa e faʻahinga tokolahi ʻe toe foki mai ʻa Kalaisi ʻi hono sino fakaetangata tatau pē mo ia naʻá ne pekiaʻakí, pea ʻe mamata kiate ia ʻa e kotoa ʻo kinautolu ʻoku nofo ʻi he māmaní. Kaekehe, ʻoku pehē ʻe he Tohitapú ʻoku toe foki mai ʻa Kalaisi ʻi he lāngilangi fakataha mo e kau ʻāngeló kotoa, pea ʻokú ne nofo “ʻi hono taloni langilangiʻia.” (Mātiu 25:31) Kapau ko e haʻu ʻa Sīsū ke nofo ko ha tangata ʻi ha taloni fakaemāmani, ʻe māʻulalo ange hono tuʻungá ʻi he kau ʻāngeló. Ka ʻokú ne haʻu ko e māfimafi lahi taha mo lāngilangiʻia lahi taha ʻo e ngaahi foha fakalaumālie kotoa ko eni ʻo e ʻOtuá pea ko ia ai, ʻoku taʻehāmai ia, ʻo hangē pē ko kinautolú.—Filipai 2:8-11.
5. Ko e hā heʻikai malava ai ke toe foki mai ʻa Kalaisi ʻi ha sino fakaetangatá?
5 ʻI he tafaʻaki ʻe tahá, laka hake he taʻu ʻe 1,900 kuo maliu atú naʻe pau ai kia Sīsū ke ne fakamāʻulaloʻi ia pea hoko ko ha tangata. Naʻe fiemaʻu ke ne foaki ʻene moʻui haohaoa fakaetangatá ko ha huhuʻi maʻatautolu. Naʻe fakamatalaʻi ʻa e meʻá ni ʻe Sīsū ʻo pehé ni: “Ko e mā foki te u ʻatu ko hoku kakano ia, koeʻuhiā ko e moʻui ʻa māmani.” (Sione 6:51) Ko ia naʻe foaki ʻe Sīsū hono sino fakaekakanó ʻi he feilaulau maʻá e faʻahinga ʻo e tangatá. Ko e hā hono fuoloa ʻo e ʻaonga ʻo e feilaulau ko iá? ʻOku tali ʻe he ʻapositolo ko Paulá: “Kuo ʻosi tapui kitautolu, ko e meʻa ʻi he ʻoatu ʻo e sino ʻo Kalaisi ke ta tuʻo taha pe.” (Hepelū 10:10) ʻI hono foaki ʻe Kalaisi hono kakanó koeʻuhi ko e moʻui ʻa e māmaní, heʻikai ʻaupito te ne toe lava ke maʻu ia pea toe hoko ko ha tangata. ʻI he ʻuhinga tefito ko ení heʻikai ʻaupito malava ke ne toe foki mai ʻi he sino fakaetangata ʻa ia naʻá ne feilaulauʻi tā tuʻo tahá.
NAʻE ʻIKAI ʻAVE ʻA E SINO FAKAKAKANÓ KI HĒVANI
6. Ko e hā ʻoku tui ai ʻa e kakai tokolahi naʻe ʻalu ʻa Kalaisi mo hono sino fakakakanó ki hēvani?
6 Kaekehe, ʻoku tui ʻa e kakai tokolahi naʻe ʻalu ʻa Kalaisi mo hono sino fakakakanó ki hēvani. ʻOku nau lave ki he moʻoniʻi meʻa ʻo pehē ʻi hono fokotuʻu ʻa Kalaisi mei he pekiá, naʻe ʻikai ke kei ʻi he faʻitoká hono sino fakakakanó. (Maʻake 16:5-7) Pehē foki, hili ʻa e pekia ʻa Sīsuú naʻá ne hā ki heʻene kau ākongá ʻi ha sino fakakakano ke fakahā kiate kinautolu ʻokú ne moʻui. ʻI he taimi ʻe taha naʻá Ne ʻai ʻa e ʻapositolo ko Tōmasí ke ne ʻai hono nimá ki he mata kafo ʻi Hono tafaʻakí koeʻuhi ke tui ʻa Tōmasi kuó Ne toetuʻu moʻoni. (Sione 20:24-27) ʻIkai ʻoku fakamoʻoniʻi ʻe he meʻá ni naʻe fokotuʻu moʻui hake ʻa Kalaisi ʻi he sino tatau pē ko ia naʻá ne pekiaʻakí?
7. Ko e hā ʻokú ne fakamoʻoniʻi naʻe ʻalu ʻa Kalaisi ki hēvani ko ha tokotaha laumālie?
7 ʻIkai, ʻoku ʻikai fakamoʻoniʻi ai. ʻOku mahino ʻaupito ʻa e Tohitapú ʻi heʻene pehē: “Naʻe pekia tā tuʻo taha ʻa Kalaisi fekauʻaki mo e angahala . . . , ʻo ne pekia ʻi he kakano, kae moʻui hake ʻi he laumālie.” (1 Pita 3:18, NW) ʻOku ʻikai malava ke moʻui ʻi hēvani ʻa e faʻahinga ʻo e tangatá ʻa ia ʻoku sino kakano-mo-e-totó. Fekauʻaki mo e toetuʻu ki he moʻui fakahēvaní, ʻoku pehē ʻe he Tohitapú: “ʻOku to ko e sino fakakakano, ʻe fokotuʻu ko e sino fakalaumalie. . . . ʻOku ʻikai lava ʻe he kakano mo e toto ke hokosi noa pe ʻa e puleʻanga ʻo e ʻOtua.” (1 Kolinitō 15:44-50) Ko e kau laumālie pē ʻoku sino fakalaumālié ʻoku malava ke moʻui ʻi hēvaní.
8. Ko e hā naʻe hoko ki he sino fakaetangata ʻo Kalaisí?
8 Ko ia, ko e hā leva naʻe hoko ki he sino fakakakano ʻo Sīsuú? ʻIkai naʻe ʻilo ʻe he kau ākongá naʻe ʻikai ha meʻa ʻi hono fonualotó? Naʻe pehē, koeʻuhi naʻe toʻo ʻe he ʻOtuá ʻa e sino ʻo Sīsuú. Ko e hā naʻe fai ai ʻe he ʻOtuá ʻa e meʻá ni? Ko hono fakahoko ia ʻo e meʻa naʻe tohi ʻi he Tohitapú. (Sāme 16:10; Ngāue 2:31) Ko ia naʻe hā lelei kia Sihova ke toʻo ʻa e sino ʻo Sīsuú, ʻo hangē pē ko ia naʻá ne fai ki muʻa ki he sino ʻo Mōsesé. (Teutalōnome 34:5, 6) ʻIkai ngata aí, kapau naʻe tuku ʻa e sinó ʻi he faʻitoká, heʻikai malava ke mahino ki he kau ākonga ʻa Sīsuú kuó ne toetuʻu mei he maté, koeʻuhi naʻe ʻikai ke mahino kakato kiate kinautolu ʻa e ngaahi meʻa fakalaumālié ʻi he taimi ko iá.
9. Naʻe malava fēfē ʻe Tōmasi ke ʻai hono nimá ki he mata kafo ʻi he sino liliu ʻo Sīsū kuo toetuʻu?
9 Ka koeʻuhi naʻe malava ʻe he ʻapositolo ko Tōmasí ke ʻai hono nimá ki he mata kafo ʻi he vakavaka ʻo Sīsuú, ʻikai ʻoku hā ai naʻe fokotuʻu hake ʻa Sīsū mei he pekiá ʻi he sino tatau pē mo ia naʻe tutukiʻaki ʻi he ʻakaú? ʻIkai, koeʻuhi naʻe liliusino pē ʻa Sīsū pe ʻai ha sino fakakakano, ʻo hangē ko ia naʻe fai ʻe he kau ʻāngeló ʻi he kuo hilí. Ke ʻai ke tui pau ʻa Tōmasi pe ko hai Iá, naʻa Ne ngāueʻaki ha sino ʻoku ʻi ai ha mata kafo. Naʻá ne hā hangehangē tofu pē ko ha tangata, ʻo malava ke kai mo inu, ʻo hangē pē ko ia naʻe fai ʻe he kau ʻāngelo naʻe talitali lelei ʻe ʻĒpalahamé.—Sēnesi 18:8; Hepelū 13:2.
10. Ko e hā ʻokú ne fakahaaʻi ne ʻai ʻe Sīsū ʻa e ngaahi sino fakakakano kehekehe?
10 Neongo naʻe hā ʻa Sīsū kia Tōmasi ʻi ha sino meimei tatau mo ia naʻá Ne pekiaʻakí, naʻá Ne toe ʻai mo ha ngaahi sino kehe ʻi heʻene hā ki Hono kau muimuí. Ko ia ai, naʻe tomuʻa fakakaukau ai ʻa Mele Makitaline ko ha tauhi-ngoue ʻa Sīsū. ʻI he taimi ʻe niʻihi naʻe ʻikai tomuʻa ʻilo ia ʻe heʻene kau ākongá. ʻI he ngaahi taimi kehekehé ni naʻe ʻikai tokoni ʻa ʻene hā fakafōtungá ke ʻiloʻi ai ia, ka naʻa nau ʻiloʻi ia ʻi he ngaahi lea pe ngāue.—Sione 20:14-16; 21:6, 7; Luke 24:30, 31.
11, 12. (a) Ko e hā ʻa e anga naʻe mavaheʻaki ʻe Kalaisi mei māmaní? (e) Ko ia ko e hā ʻa e anga ʻoku totonu ke tau ʻamanekina ai ʻa e toe foki mai ʻa Kalaisí?
11 Lolotonga ʻa e ʻaho ʻe 40 hili ʻene toetuʻú, naʻe hā tā tuʻo lahi ai ʻa Sīsū ʻi ha sino fakakakano ki heʻene kau ākongá. (Ngāue 1:3) Hili iá naʻá ne mavahe leva ki hēvani. Ka ʻe ʻeke nai ʻe ha niʻihi: ‘ʻIkai naʻe tala ʻe he ongo ʻāngelo naʻe ʻi aí ki he kau ʻapositoló ʻo fekauʻaki mo Kalaisi “te ne toe haʻu; pea ʻe hangē tofu pe hono anga pea mo ʻene haʻele ki langi kuo mou mamata ki ai”?’ (Ngāue 1:11) ʻIo, naʻá na lea pehē. Kae fakatokangaʻi ange naʻá na pehē “ʻe hangē tofu pe hono anga,” ka naʻe ʻikai te na pehē, ʻi he sino tatau. Pea ko e hā ʻa e anga ʻo e mavahe ʻa Sīsuú? Naʻe lōngonoa ia, ʻo ʻikai fai ʻi ha haʻohaʻonga tokolahi. Ko ʻene kau ʻapositoló pē naʻa nau ʻilo ki aí. Naʻe ʻikai ʻilo ki ai ʻa e māmaní.
12 Fakakaukau ki hono fakamatalaʻi ʻe he Tohitapú ʻa e anga ʻo e mavahe ʻa e sino ʻo Sīsū mei heʻene kau ʻapositoló ʻi heʻene ʻalu ki hēvaní: “Lolotonga ʻenau siofia ia, naʻe ʻave ia ki ʻolunga; pea naʻe kilala hake ia ʻe ha ʻao, ʻo fakapuli meiate kinautolu.” (Ngāue 1:9) Ko ia ʻi he kamata ke ʻalu hake ʻa Sīsū ʻi he langí, naʻe fakapuliki ia ʻe ha konga ʻao mei he mamata ʻa ʻene kau ʻapositoló. Ko ia ai, naʻe hoko ʻo taʻehāmai kiate kinautolu ʻa Sīsū he lolotonga ʻo ʻene mavahé. Naʻe ʻikai lava ke nau mamata kiate ia. Pea naʻe toki ʻalu hake ia ʻi hono sino fakalaumālié ki hēvani. (1 Pita 3:18) Ko ia ai, ko ʻene toe foki maí ʻe taʻehāmai, ʻe ʻi ha sino fakalaumālie.
FOUNGA ʻOKU MAMATA AI ʻA E MATA KOTOA PĒ
13. ʻOku anga-fēfē ʻa e mahino kiate kitautolu ʻa e lea ko ia ʻoku pehē “e mamata ae mata kotoabe” kia Kalaisi ʻi heʻene hoko mai mo e ngaahi ʻaó?
13 Ko ia, ʻoku anga-fēfē ʻa e mahino kiate kitautolu ʻa e ngaahi lea ʻo e Fakahā 1:7? ʻOku tohi ai ʻe he ʻapositolo ko Sioné: “Vakai, oku haele mai ia moe gaahi ao; bea e mamata kiate ia ae mata kotoabe, io, mo kinautolu naa nau hokaʻi ia; bea e tagi mamahi ae gaahi faahiga kotoabe o mamani koeuhi ko ia.” (PM) ʻOku lea heni ʻa e Tohitapú ʻo fekauʻaki mo e mamata, ʻo ʻikai ʻaki ʻa e ngaahi mata fakaesinó, ka ʻi he ʻuhinga ki he ʻilo pe mahino. Ko hono moʻoní, ʻoku lea ʻa e Tohitapú ʻo fekauʻaki mo e “ngaahi mata ʻo hoʻo mahino.” (ʻEfesō 1:18, King James Version) Ko ia ko e kupuʻi lea ʻoku pehē “e mamata kiate ia ae mata kotoabe” ʻoku ʻuhingá ko e tokotaha kotoa pē ʻe mahino pe ʻilo ki ai ʻoku ʻi aí ni ʻa Kalaisi.
14. (a) Ko hai ʻoku ʻuhinga ki ai ʻa e pehē “mo kinautolu naʻa nau hokaʻi ia”? (e) Ko e hā ʻe hoko ai ha tangi mamahi lahi ʻi he ʻiloʻi ʻe he tokotaha kotoa pē ʻa e ʻi aí ni ʻa Kalaisi?
14 Ko e faʻahinga ko ia naʻa nau “hokaʻi” ʻa Sīsuú ʻoku ʻikai te nau kei moʻui ʻi māmani. Ko ia ʻoku nau fakatātaaʻi ʻa e faʻahinga ʻoku faʻifaʻitaki ki he ʻulungaanga ʻo e kau tangata ʻo e ʻuluaki senitulí ʻaki ʻenau fakamamahiʻi ʻa e kau muimui ʻi onopooni ʻo Kalaisí. (Mātiu 25:40, 45) ʻOku vavé ni ke hoko ʻa e taimi ke fakaʻauha ai ʻe Kalaisi ʻa e faʻahinga anga-fulikivanu peheé. Kuo ʻosi fakatokangaʻi ʻa kinautolu ki muʻa ʻo kau ki he meʻá ni. ʻI he hoko ʻa e fakaʻauhá ni, te nau “mamata” pe ʻiloʻi ʻa e meʻa ʻoku hokó. Pea ʻe lahi moʻoni ʻenau tangi mamahí!
ʻE TOE FOKI MAI ʻA KALAISI KI MĀMANI?
15. ʻI he founga fē ʻoku faʻa ngāueʻaki ai ʻa e foʻi lea “toe foki”?
15 ʻOku ʻikai ke ʻuhinga maʻu pē ʻa e toe fokí ki ha ʻalu ʻa ha taha ki ha feituʻu. Ko ia ko e faʻahinga ʻoku puké ʻoku pehē ʻoku ‘toe foki ʻo moʻui lelei.’ ʻE lava ke pehē nai kuo ‘toe foki ʻo maʻu mafai’ ha tokotaha-pule ki muʻa. ʻI ha founga meimei tatau, naʻe tala ʻe he ʻOtuá kia ʻĒpalahame: “Te u foki mai kiate koe ʻi hono taimi kuo u tuʻutuʻuni ʻi he taʻu kahaʻu, pea ʻe maʻu ʻe Sela ha tama.” (Sēnesi 18:14; 21:1) Naʻe ʻuhinga ʻa e toe foki ʻa Sihová ki he fakahanga ʻene tokangá kia Sela ke fai ʻa e meʻa naʻá ne talaʻofaʻakí, kae ʻikai ko ha toe foki moʻoni.
16. (a) ʻI he founga fēfē ʻoku toe foki mai ai ʻa Kalaisi ki māmaní? (e) Naʻe toe foki mai ʻa Kalaisi ʻanefē, pea ko e hā leva naʻe hokó?
16 ʻI he founga tatau pē, ʻoku ʻikai ʻuhinga ʻa e toe foki mai ʻa Kalaisí ko haʻane toe foki moʻoni mai ki he māmani ko ení. Ka ʻoku ʻuhingá ʻokú ne maʻu ʻa e mafai faka-Puleʻanga ki he māmani ko ení pea ʻoku fakahanga mai ʻene tokangá ki ai. ʻOku ʻikai fiemaʻu ke ne liʻaki hono taloni fakahēvaní kae hifo ki māmani ke fai ʻa e meʻá ni. Hangē ko ia kuo tau vakai ki ai ʻi he vahe ki muʻá, ʻoku fakahaaʻi ʻe he fakamoʻoni faka-Tohitapú naʻe hokosia ʻi he taʻu 1914 T.S. ʻa e taimi ʻa e ʻOtuá ke toe foki mo kamata pule ai ʻa Kalaisi. Naʻe ongona leva ai ha kalanga ʻi hēvani ʻo pehē: “Kuo hoko ʻeni ʻa e fakamoʻui, mo e malohi, mo e puleʻanga ʻo hotau ʻOtua, pea mo e pule ʻa ʻEne Kalaisi.”—Fakahā 12:10.
17. Koeʻuhi ʻoku taʻehāmai ʻa e toe foki mai ʻa Kalaisí, ko e hā naʻá ne foaki koeʻuhi ke tau malava ke tau ʻiloʻi kuó ne toe foki mai?
17 Koeʻuhi ʻoku taʻehāmai ʻa e toe foki mai ʻa Kalaisí, ʻoku ʻi ai ha founga ke fakapapauʻi ai kuo ʻosi hoko moʻoni ia? ʻIo, ʻoku ʻi ai. Naʻe foaki mai ʻe Kalaisi tonu ha “fakaʻilonga” hāmai ʻa ia ke tau ʻilo ai ʻa ʻene ʻi ai taʻehāmaí pea mo e panaki ʻa e ngataʻanga ʻo e māmaní. Tau vakaiʻi lelei leva ʻa e “fakaʻilonga” ko iá.
[Fehuʻi ki he Ako]
[Fakatātā ʻi he peesi 142]
Naʻe foaki atu ʻe Kalaisi hono sinó ko ha feilaulau. Heʻikai ʻaupito te ne toe lava ʻo maʻu ia pea toe hoko ko ha tangata
[Fakatātā ʻi he peesi 144, 145]
Ko e hā naʻe maʻuhala ai ʻe Mele Makitaline ko ha tauhi-ngoue ʻa Sīsū he hili ʻa ʻene toetuʻú?
Ko e hā ʻa e sino fakakakano naʻe tala ange ʻe Sīsū heʻene toetuʻú kia Tōmasi ke ʻai ki ai hono nimá?
[Fakatātā ʻi he peesi 147]
ʻOku toe foki mai ʻa Kalaisi ʻi he anga tatau mo ia naʻá ne mavaheʻaki mei māmaní. Naʻe fēfē ʻa e anga ʻo ʻene mavahé?
