Vahe 6

Sīsū Kalaisi—Naʻe Fekau Mai ʻe he ʻOtuá?

1, 2. (a) Ko e hā ʻa e fakamoʻoni ko ha tokotaha moʻoni ʻa Sīsū Kalaisi? (e) Ko e hā ʻa e ngaahi fehuʻi ʻoku malanga hake ʻo fekauʻaki mo Sīsū?

 KUO FANONGO ʻa e meimei tokotaha kotoa pē he ʻahó ni ʻo fekauʻaki mo Sīsū Kalaisi. Kuo mahulu ange ʻa ʻene uesia ʻa e hisitōliá ʻi ha toe tangata kehe. Ko e moʻoni, ko e tohimāhina ʻoku ngāueʻaki ʻi he ngaahi konga lahi taha ʻo e māmani̇́ ʻoku fakatuʻunga ia ʻi he taʻu ʻoku pehē naʻe ʻaloʻi ai iá! Hangē ko ia ʻoku pehē ʻe he The World Book Encyclopedia: “Ko e ngaahi ʻaho ki muʻa ʻi he taʻu ko iá ʻoku hiki ko e K.M., pe ki muʻa ʻia Kalaisi. Ko e ngaahi ʻaho ki mui ʻi he taʻu ko ia ʻoku hiki ko e T.S., (A.D., anno Domini, ʻi he taʻu ʻo hotau ʻEiki) pe taʻu ʻo Sīsū.”

² Ko ia ko Sīsuú naʻe ʻikai ko ha tokotaha ʻi he fakakaukau pē. Naʻá ne moʻui moʻoni ko ha tangata ʻi he māmaní. ʻOku fakahā ʻe he Encyclopædia Britannica: “Naʻa mo e kau fakafepaki ki he lotu faka-Kalisitiané ʻi he kuonga muʻá naʻe ʻikai ʻaupito haʻanau veiveiua ki he [ʻi ai moʻoni] ʻa Sīsū.” Ko ia ko hai ʻa Sīsū? ʻOku moʻoni naʻe fekau mai ia ʻe he ʻOtuá? Ko e hā hono ʻuhinga ʻoku fuʻu ʻiloa ai iá?

NAʻÁ NE MOʻUI KI MUʻA

3. (a) Fakatatau ki he lea ʻa e ʻāngeló, ʻe fāʻeleʻi ʻe Mele ʻa e ʻalo ʻo hai? (e) Naʻe malava fēfē ʻe he tāupoʻou ko Melé ke ne maʻu ʻa Sīsū?

³ Naʻe ʻaloʻi mai ʻa Sīsū ʻe ha tāupoʻou, ʻo kehe ia mei ha toe tangata. Ko e hingoa ʻo e tāupoʻoú ko Mele. Naʻe lea ha ʻāngelo kiate ia ʻo kau ki heʻene tamá: “ʻE hoko ko e lahi ʻa e toko taha ko ia; pea ʻe lau ia ko e ʻAlo ʻo e ʻEiki Taupotu.” (Luke 1:​28-33; Mātiu 1:​20-25) Ka naʻe malava fēfē ʻe ha fefine naʻe teʻeki ke ne fai ʻa e fehokotaki fakasino mo ha tangata ke maʻu ha tama? Naʻe lava eni ʻi he ngāue ʻa e laumālie māʻoniʻoni ʻo e ʻOtuá. Naʻe hiki hifo mei hēvani ʻe Sihova ʻa e moʻui ʻa hono ʻAlo māfimafi laumālié ki he manava ʻo e tāupoʻou ko Melé. Ko ha mana ia! Tā ko e Tokotaha naʻá ne ngaohi ʻa e ʻuluaki fefiné fakataha mo e mafai fakaofo ke fanaú ʻoku malava ke ne ʻai ha fefine ke ne maʻu ha tama taʻekau ai ha tamai fakaetangata. ʻOku fakamatalaʻi ʻe he Tohitapú: “Ka  ʻi he hokosia leva ʻa e fakakakato ʻo e taimi, naʻe fekau atu ʻe he ʻOtua hono ʻAlo oʻona, ʻa ia ne tupu mei ha fefine.”​—Kalētia 4:4.

4. (a) Ko e hā ʻa e faʻahinga moʻui naʻe ʻi ai ʻa Sīsū ki muʻa pea toki ʻaloʻi mai ia ko ha tamá? (e) Ko e hā naʻe leaʻaki ʻe Sīsū ke fakahā naʻá ne moʻui ki muʻa ʻi hēvani?

⁴ Ko ia ki muʻa ke ʻaloʻi ʻi māmani ko ha tangatá naʻe ʻi hēvani ʻa Sīsū ko ha tokotaha laumālie māfimafi. Naʻá ne maʻu ha sino fakalaumālie ʻo taʻehāmai ki he tangatá, ʻo hangē ko ia ʻoku maʻu ʻe he ʻOtuá. (Sione 4:24) Naʻe faʻa lea tonu ʻaki ʻe Sīsū ʻo fekauʻaki mo e tuʻunga māʻolunga naʻá ne maʻu ʻi hēvaní. Naʻá ne lotu ʻi ha taimi ʻo pehē: “ʻAlā Tamai, ke ke fakalangilangiʻi au ʻe koe, he fakataha mo e ʻAfiona, ʻaki ʻa e langilangi naʻa ku maʻu ʻi he teʻeki ke tuʻu ʻa mamani ʻi heʻeku feangai mo koe.” (Sione 17:5) Naʻá ne toe pehē foki ki heʻene kau fanongó: “Ko kimoutolu ʻoku mou mei lalo: ko au ʻoku ou mei ʻolunga.” “Huanoa ʻoka mou ka siofia ʻa e Fanautama ʻa tangata ʻoku ne ʻalu hake ki he potu naʻa ne ʻi ai muʻa.” “Teʻeki ke fanauʻi ʻa Epalahame, ʻoku ou ʻi ai pē.”​—Sione 8:23; 6:62; 8:58; 3:13; 6:51.

5. (a) Ko e hā naʻe ui ai ʻa Sīsū ko “Folofola,” “Uluaki fakatubu” pea mo e “tofu-pe-taha-ne-fakatupu”? (e) Ko e hā ʻa e ngāue naʻe kau ai ʻa Sīsū mo e ʻOtuá?

⁵ Ki muʻa pea toki haʻu ʻa Sīsū ki māmaní naʻe ui ia ko e Folofola ʻa e ʻOtuá. ʻOku fakahā ʻe he hingoa fakalakangá ni naʻá ne fai fatongia ʻi hēvani ko e tokotaha naʻe lea maʻá e ʻOtuá. ʻOku toe ui ia ko e “Uluaki Fakatubu” ʻa e ʻOtuá, pea toe pehē ko hono ʻAlo “tofu-pe-taha-ne-fakatupu.” (Sione 1:14; 3:16; Hepelū 1:6, PM) ʻOku ʻuhinga ení naʻe fakatupu ia ki muʻa ʻi he ngaahi foha fakalaumālie kehe kotoa pē ʻo e ʻOtuá, pea ko ia tokotaha pē naʻe fakatupu fakahangatonu ʻe he ʻOtuá. ʻOku fakamatalaʻi ʻe he Tohitapú ko e ʻAlo ‘ʻuluaki  fakatupu’ ko ení naʻe kau ia mo Sihova ʻi hono fakatupu ʻo e ngaahi meʻa kehe kotoa. (Kolose 1:​15, 16) Ko ia ʻi he pehē ʻe he ʻOtuá, “Ta ngaohi tangata ʻi hota ʻīmisi,” ko ʻene lea ia ki he ʻAlo ko ení. ʻIo, naʻe kau ki hono fakatupu ʻo e ngaahi meʻa kotoa pē ʻa e tokotaha tonu naʻe haʻu ki mui ki māmani pea naʻe ʻaloʻi mai ia ʻe ha fefine! Naʻe ʻosi moʻui ia ʻi hēvani mo ʻene Tamaí ʻi he ngaahi taʻu taʻealaʻiloa!​—Sēnesi 1:​26, NW; Palōvepi 8:​22, 30; Sione 1:3.

KO ʻENE MOʻUI ʻI MĀMANÍ

6. (a) Ko e hā ʻa e ngaahi meʻa naʻe hoko ki muʻa siʻi mo e hili ʻa e ʻaloʻi ʻo Sīsuú? (e) Naʻe ʻaloʻi ʻa Sīsū ʻi fē pea naʻe tupu hake ia ʻi fē?

⁶ Naʻe fakamaʻu ʻa Mele mo Siosefa ke na mali. Ka ʻi heʻene ʻilo kuo feitama ʻa Melé naʻá ne tui kuó ne fai ʻa e fehokotaki fakasino mo ha tangata kehe, pea ko ia ai, heʻikai te ne mali mo ia. Kaekehe, ʻi hono fakahā kiate ia ʻe Sihova ko e tuʻituʻia ʻo e tamá naʻe faiʻaki ia Hono laumālie māʻoniʻoní, naʻe ʻave leva ʻe Siosefa ʻa Mele ko hono uaifi. (Mātiu 1:​18-20, 24, 25) Ki mui, he lolotonga ʻo ʻena ʻaʻahi ki he kolo ko Pētelihemá, naʻe ʻaloʻi ai ʻa Sīsū. (Luke 2:​1-7; Maika 5:2) ʻI he kei pēpē ʻa Sīsuú, naʻe feinga ʻa e Tuʻi ko Hēlotá ke fakapoongi ia. Ka naʻe fakatokanga ʻa Sihova kia Siosefa ke ne ʻave hono fāmilí pea nau hola ki ʻIsipite. Hili ʻa e pekia ʻa e Tuʻi ko Hēlotá, naʻe foki ʻa Siosefa mo Mele fakataha mo Sīsū ki he kolo ko Nāsaleti ʻi Kāleli. Naʻá ne tupu hake heni.​—Mātiu 2:​13-15, 19-23.

7. (a) Ko e hā ʻa e meʻa naʻe hoko ʻi he taʻu 12 ʻa Sīsuú? (e) Ko e hā ʻa e ngāue naʻe ako ʻa Sīsū ke fai ʻi heʻene tupu haké?

⁷ ʻI he taʻu 12 ʻa Sīsuú naʻá ne fononga fakataha mo hono fāmilí ki Selusalema ke maʻu ʻa e kātoanga makehe naʻe ui ko e Laka-atu. Lolotonga ʻenau ʻi aí naʻá ne nofo ʻo ʻaho tolu ʻi he temipalé ke fanongo ki he kau faiakó mo fai ha ngaahi fehuʻi kiate kinautolu. Naʻe ofo ʻa e kakai kotoa pē naʻa nau fanongo kiate iá ʻi he lahi ʻo e meʻa naʻá ne ʻiló. (Luke 2:​41-52) ʻI he tupu hake ʻa Sīsū ʻi Nāsaletí, naʻá ne ako ke hoko ko ha tufunga. Naʻe akoʻi nai ia ʻe heʻene tamai naʻá ne ohi iá, ko Siosefa, ke ne fai ʻa e ngāué ni he ko e tufunga foki mo ia.​—Maʻake 6:3; Mātiu 13:55.

8. Ko e hā naʻe hoko ʻi he taʻu 30 ʻa Sīsuú?

⁸ Naʻe hoko ha liliu lahi ʻi he moʻui ʻa Sīsuú ʻi heʻene taʻu 30. Naʻá ne ʻalu kia Sione Papitaiso ʻo kole ke papitaiso, ke tuku hifo kakato ia ke puli ʻi he vai ʻo e Vaitafe Sioataní. ʻOku pehē ʻe he Tohitapú: “Pea kuo papitaiso ʻa Sisu, naʻa ne ʻalu hake leva mei he vai; pea vakai, naʻe matangaki ʻa e langi kiate ia, pea ne mamata ki he laumalie ʻo e ʻOtua  ʻoku ʻalu hifo ʻi he tatau ʻo ha lupe, ʻo ne aʻu kiate ia. Pea ʻiloange, naʻe ai ha leʻo mei he langi naʻe pehe mai, Ko hoku ʻAlo pele ʻena, ʻa ia kuo u hōifua ai.” (Mātiu 3:​16, 17) Naʻe ʻikai ha veiveiua ʻi he fakakaukau ʻa Sioné naʻe fekau mai ʻe he ʻOtuá ʻa Sīsū.

9. (a) Ko hono moʻoní, naʻe hoko fakakū ʻa Sīsū ko e Kalaisí, pea ko e hā ʻa e ʻuhinga naʻe hoko ai ʻi he taimi ko iá? (e) ʻI hono papitaiso iá, ko e hā naʻe foaki ʻe Sīsū ʻa ia tonu ke ne faí?

⁹ ʻI hono huaʻi hifo Hono laumālie māʻoniʻoní kia Sīsuú, ko hono pani ia pe fakanofo ia ʻe Sihova ke hoko ko e tuʻi ʻo Hono puleʻanga ka hoko maí. ʻI hono pani pehē ʻaki ʻa e laumālié, naʻe hoko leva ʻa Sīsū ko e “Misaia,” pe ko e “Kalaisi,” ʻa ia ʻoku ʻuhinga ʻa e ongo foʻi leá ni ʻi he lea faka-Hepeluú mo e faka-Kalisí ko e “Tokotaha-pani.” Ko ia ai, ko hono moʻoní, naʻá ne hoko ai ko Sīsū Kalaisi, pe Sīsū ko e Tokotaha-pani. Ko ia naʻe lea ʻa ʻene ʻapositolo ko Pitá ʻo fekauʻaki mo “Sisū​—ʻa ia mei Nāsaleti—​ʻa hono pani ia ʻe he Otua ʻaki ʻa e laumālie maʻoniʻoni, mo e mafai.” (Ngāue 10:38) Pehē foki, ʻi hono papitaiso ia ʻi he vaí naʻe foaki ai ʻe Sīsū ʻa ia tonu ki he ʻOtuá ke fakahoko ʻa e ngāue naʻe fekau mai ai ia ʻe he ʻOtuá ki māmaní. Ko e hā ʻa e ngāue mahuʻinga ko iá?

ʻUHINGA NAʻÁ NE HAʻU AI KI MĀMANÍ

10. Ko e hā ʻa e ngaahi moʻoni naʻe haʻu ʻa Sīsū ki māmani ke ne fakahaá?

¹⁰ ʻI heʻene fakamatala ki he ʻuhinga naʻá ne haʻu ai ki māmaní, naʻe tala ange ʻe Sīsū ki he kōvana Loma ko Ponitiusi Pailató: “Ko e meʻa ko ia naʻe fanauʻi ai au, pea ko e meʻa [taumuʻa] ko ia kuo u haʻu ai ki māmani, koeʻuhi ke u fakahāʻi ʻa e moʻoni.” (Sione 18:37) Ka ko e hā ʻa e ngaahi moʻoni naʻe fekau mai ai ʻa Sīsū ki māmani ke ne ʻai ke ʻiloá? ʻUluakí, ko e ngaahi moʻoni ʻo fekauʻaki mo ʻene Tamai fakahēvaní. Naʻá ne akoʻi hono kau muimuí ke nau lotu ke “tapuhā,” pe ke māʻoniʻoni ʻa e huafa ʻo ʻene Tamaí. (Mātiu 6:​9) Pea naʻá ne lotu: “Kuo u fakamahino ho huafa ki he kakai naʻa ke foaki kiate au.” (Sione 17:6) Naʻá ne pehē foki: “Kuo pau ke u ʻave ʻa e ongoongolelei . . . ʻa e puleʻanga ʻo e ʻOtua; he naʻe fekau mai au ki he meʻa ko ia.”​—Luke 4:43.

11. (a) Ko e hā naʻe fakakaukau ai ʻa Sīsū ʻoku mahuʻinga fau ʻa ʻene ngāué? (e) Ko e hā ʻa e meʻa naʻe ʻikai ʻaupito fakatoupīkoi ʻa Sīsū mei hono faí? Ko ia ko e hā ʻoku totonu ke tau faí?

¹¹ Naʻe mahuʻinga fēfē kia Sīsū ʻa e ngāue ko eni ko hono ʻai ke ʻiloa ʻa e huafa mo e puleʻanga ʻo ʻene Tamaí? Naʻá ne pehē ki heʻene kau ākongá: “Ko ʻeku meʻakai e, ko e tuli ke fai ʻa e finangalo ʻo ia naʻa ne fekau mai au, pea ke fakaʻosi haʻana ngaue.” (Sione 4:34) Ko e hā naʻe fakakaukau ai ʻa Sīsū ʻoku mahuʻinga ʻa e ngāue ʻa e ʻOtuá ʻo hangē ha meʻakaí? Koeʻuhi ko e Puleʻangá ko e founga ia ʻe fakahoko mai ai ʻe he  ʻOtuá ʻa ʻene ngaahi taumuʻa fakaofó ki he faʻahinga ʻo e tangatá. Ko e puleʻanga eni te ne fakaʻauha ʻa e tuʻunga fulikivanu kotoa pē pea te ne fakaʻatā ʻa e huafa ʻo Sihová mei he tukuakiʻi loi kuo fai ki aí. (Tāniela 2:44; Fakahā 21:​3, 4) Ko ia naʻe ʻikai ʻaupito ke fakatoupīkoi ʻa Sīsū mei hono ʻai ke ʻiloa ʻa e huafa mo e puleʻanga ʻo e ʻOtuá. (Mātiu 4:17; Luke 8:1; Sione 17:26; Hepelū 2:12) Naʻá ne leaʻaki maʻu pē ʻa e moʻoní, tatau ai pē pe ʻe manakoa pe ʻikai. Ko ia naʻá ne tokonaki ai ha faʻifaʻitakiʻanga ʻoku totonu ke tau muimui ai ʻo kapau ʻoku tau fiemaʻu ke tau fakahōifuaʻi ʻa e ʻOtuá.​—1 Pita 2:21.

12. Ko e hā ʻa e toe ʻuhinga mahuʻinga naʻe haʻu ai ʻa Sīsū ki māmaní?

¹² Ka ke tau malava ʻo maʻu ʻa e moʻui taʻengatá he malumalu ʻo e pule ʻa e puleʻanga ʻo e ʻOtuá, naʻe fiemaʻu ke lilingi ʻe Sīsū hono taʻataʻa-moʻuí ʻi heʻene pekia. Hangē ko ia naʻe pehē ʻe he ongo ʻapositolo ʻa Sīsū: “Kuo tau maʻu ʻeni ʻa e fakatonuhia ʻi hono taʻataʻa.” “Ko e taʻataʻa ʻo Sisu . . . ʻAlo [ʻo e ʻOtua] ʻoku ne fakamaʻa kitautolu mei he angahala kotoa pe.” (Loma 5:9; 1 Sione 1:7) Ko ia ko ha ʻuhinga mahuʻinga naʻe haʻu ai ʻa Sīsū ki māmaní ke ne pekia maʻatautolu. Naʻá ne pehē: “Ko e Fanautama ʻa tangata naʻe ʻikai te ne haʻu ke maʻu sevaniti, ka ke sevaniti pe ʻe ia, pea ke tuku ʻene moʻui ke huhuʻiʻaki ha tokolahi, heʻene fetongi kinautolu.” (Mātiu 20:28) Ka ko e hā hono ʻuhinga ʻo e pehē naʻe foaki ʻe Kalaisi ʻa ʻene moʻuí ‘ko ha huhuʻi’? Ko e hā naʻe pau ai ke lilingi hono taʻataʻa-moʻuí ʻi he pekia ke tau maʻu ʻa e fakamoʻuí?

NAʻÁ NE FOAKI ʻA ʻENE MOʻUÍ KO HA HUHUʻI

13. (a) Ko e hā ha huhuʻi? (e) Ko e hā ʻa e totongi huhuʻi naʻe totongi ʻe Sīsū ke tukuange kitautolu mei he angahalá mo e maté?

¹³ ʻOku faʻa ngāueʻaki ʻa e foʻi lea “huhuʻi” ʻi he ʻi ai ha kaihaʻasi fakamālohi ʻo ha taha. Hili hano puke ʻe ha tokotaha kaihaʻa fakamālohi ha taha, ʻokú ne pehē nai te ne fakafoki ʻa e tokotaha ko iá ʻo kapau ʻe totongi ange ha paʻanga ko ha huhuʻi. Ko ia ko e huhuʻí ko ha meʻa ʻokú ne fakahoko ʻa e fakatauʻatāina ʻo ha taha ʻoku puke pōpula. Ko ha meʻa ia ʻoku totongi koeʻuhi ke ʻoua naʻa mole ʻene moʻuí. Naʻe foaki ʻa e moʻui haohaoa fakaetangata ʻa Sīsuú kae maʻu ʻa e tukuange ʻo e faʻahinga ʻo e tangatá mei he haʻi ʻo e angahalá mo e maté. (1 Pita 1:​18, 19; ʻEfesō 1:7) Ko e hā naʻe fiemaʻu ai ha faʻahinga tukuange peheé?

14. Ko e hā naʻe fiemaʻu ai ʻa e huhuʻi naʻe fai ʻe Sīsuú?

¹⁴ Naʻe fiemaʻu ení koeʻuhi ko ʻĀtama, ko e tupuʻanga ʻo kitautolu kotoa, naʻá ne angatuʻu ki he ʻOtuá. Ko ia naʻe ʻai ia ʻe heʻene ngāue maumaulaó ko ha tokotaha angahala, koeʻuhi he ʻoku fakamatalaʻi ʻe he Tohitapú ko e “angahala ko e maumau lao ia.” (1 Sione 3:4; 5:17) Ko ia ai, naʻe  ʻikai te ne taau ai ke maʻu ʻa e meʻaʻofa ʻa e ʻOtuá ko e moʻui taʻengatá. (Loma 6:23) Ko ia naʻe mole meia ʻĀtama ʻa e moʻui haohaoa fakaetangata ʻi ha māmani ko ha palataisi. Naʻe toe mole ʻa e ʻamanaki fakaofo ko ení mei he fānau kotoa te ne maʻú. Te ke ʻeke nai: ‘Ka ko e hā naʻe pau ai ke mate kotoa ʻa ʻene fānaú, hili ia ko ʻĀtama pē naʻe fai angahalá?’

15. Koeʻuhi ko ʻĀtama naʻe faiangahalá, ko e hā naʻe pau ai ke faingataʻaʻia mo mate ʻa ʻene fānaú?

¹⁵ Koeʻuhi ko ʻĀtama, ʻi heʻene hoko ko ha tokotaha angahalá, naʻá ne tuku mai ai ʻa e angahalá mo e maté ki heʻene fānaú, kau ai ʻa e faʻahinga kotoa ʻo e tangatá ʻoku lolotonga moʻuí. (Siope 14:4; Loma 5:12) “He kuo fai angahala kotoa pe, pea ʻoku ʻikai te nau aʻusia ʻa e hōifua ʻa e ʻOtua,” ko e lau ia ʻa e Tohitapú. (Loma 3:23; 1 Tuʻi 8:46) Naʻa mo e tokotaha anga-fakaʻotua ko Tēvitá naʻá ne pehē: “Naʻe fanauʻi au mo e hia; ʻIo naʻe tuʻituʻia ʻeku faʻe ʻiate au ko e meʻa angahala.” (Sāme 51:5) Ko ia ai, kuo mate ʻa e kakaí koeʻuhi ko e angahala naʻe tukufakaholo meia ʻĀtamá. Ko ia, naʻe malava fēfē ʻe he feilaulauʻi ʻo e moʻui ʻa Sīsuú ke fakatauʻatāinaʻi ʻa e kakai kotoa mei he haʻi ʻo e angahalá mo e maté?

16. (a) ʻI hono tokonaki ʻo e huhuʻí, naʻe anga-fēfē hono fakahā ʻe he ʻOtuá ʻa ʻene tokanga ki heʻene lao ʻoku pehē ko e ‘moʻui ke foaki maʻá e moʻui’? (e) Ko e hā hono ʻuhinga ko Sīsū pē ʻa e tangata naʻe malava ke ne totongi ʻa e huhuʻí?

¹⁶ ʻOku kau ki he meʻá ni ha tefitoʻi moʻoni fakalao ʻi he lao ʻa e ʻOtuá ki he puleʻanga ʻIsilelí. ʻOku pehē ai ko e ‘moʻui ke foaki maʻá e moʻui.’ (ʻEkisoto 21:23; Teutalōnome 19:21) ʻI he talangataʻá, naʻe mole ai mei he tangata haohaoa ko ʻĀtamá mo ʻene fānaú kotoa ʻa e moʻui haohaoa ʻi ha māmani ko ha palataisí. Naʻe foaki ʻe Sīsū Kalaisi ʻa ʻene moʻui haohaoa ʻaʻaná ke totongi fakafoki mai ʻa e meʻa naʻe mole meia ʻĀtamá. ʻIo, ko Sīsū “naʻa ne foaki ia ʻe ia ko e fetongi huhuʻi [huhuʻi fehoanakimālie, NW] ʻo e kakai kotoa pe.” (1 Tīmote 2:​5, 6) Koeʻuhi ko ha tangata haohaoa ia, pea naʻe pehē foki mo ʻĀtama, ʻoku ui ai ʻa Sīsū ko e “Atama ki mui.” (1 Kolinitō 15:45) Naʻe ʻikai ha toe tangata naʻe malava ke ne tokonaki mai ʻa e huhuʻí, tukukehe pē ʻa Sīsū. Naʻe pehē koeʻuhi ko Sīsū pē ʻa e tangata naʻe moʻui pea tatau mo ʻĀtama ʻi he tuʻunga ko ha foha haohaoa fakaetangata ʻo e ʻOtuá.​—Sāme 49:7; Luke 1:32; 3:38.

17. Naʻe totongi ʻa e huhuʻí ki he ʻOtuá ʻanefē?

¹⁷ Naʻe pekia ʻa Sīsū ʻi hono taʻu 33¹/2. Ka ʻi he ʻaho hono tolu hili ʻene pekiá naʻe fokotuʻu ia ke moʻui. ʻAho ʻe fāngofulu mei ai naʻá ne foki ki hēvani. (Ngāue 1:​3, 9-11) ʻI aí, ʻi heʻene toe hoko ko ha tokotaha laumālié, naʻá ne hā “i he ao oe Otua koeuhi ko kitautolu,” ʻo ne ʻave ʻa e mahuʻinga ʻo ʻene feilaulau huhuʻí. (Hepelū 9:​12, 24, PM) ʻI he taimi ko iá naʻe totongi ai ʻa e huhuʻí ki he ʻOtuá ʻi hēvani. Naʻe malava leva ki he faʻahinga  ʻo e tangatá ʻa e fakatauʻatāiná. Ka ʻe hoko ʻafē ʻa hono ngaahi ʻaongá?

18. (a) Naʻa mo e taimí ni ʻoku malava fēfē ke tau maʻu ʻa e ʻaonga mei he huhuʻí? (e) Ko e hā ʻoku ʻai ʻe he huhuʻí ke malava ʻi he kahaʻú?

¹⁸ Naʻa mo e taimí ni ʻoku malava ke ʻaonga kiate kitautolu ʻa e feilaulau huhuʻi ʻa Sīsuú. ʻO fēfē? ʻI he tui ki aí ʻoku malava ai ke tau maʻu ha tuʻunga maʻa ʻi he ʻao ʻo e ʻOtuá pea hoko ai ki he malumalu ʻo ʻene tokanga ʻofa mo manavaʻofá. (Fakahā 7:​9, 10, 13-15) Kuo fai nai ʻe ha tokolahi ʻo kitautolu ʻa e ngaahi angahala lahi fakaʻulia ki muʻa pea tau ako ʻo fekauʻaki mo e ʻOtuá. Pea naʻa mo e taimí ni ʻoku tau fai ʻa e ngaahi angahala, pea mamafa ʻaupito ʻi he taimi ʻe niʻihi. Ka ʻoku malava ke tau kole tauʻatāina ʻa e fakamolemole mei he ʻOtuá ʻo makatuʻunga ʻi he huhuʻí, fakataha mo e falala te ne fanongo mai kiate kitautolu. (1 Sione 2:​1, 2; 1 Kolinitō 6:​9-11) ʻIkai ngata aí, ʻi he kahaʻú ʻe fakaʻatā ai ʻe he huhuʻí kiate kitautolu ʻa e hala ke maʻu ai ʻa e meʻaʻofa ʻa e ʻOtuá ko e moʻui taʻengata ʻi heʻene māmani foʻou māʻoniʻoní. (2 Pita 3:13) ʻI he taimi ko iá ʻe tukuange kakato ai mei he haʻi ʻo e angahalá mo e maté ʻa e faʻahinga kotoa ʻoku ngāueʻi ʻa e tui ʻi he huhuʻí. ʻOku malava ke nau fakatuʻotuʻa atu ki he moʻui taʻengata ʻi he tuʻunga haohaoa!

19. (a) ʻOku fēfē hono laveʻi koe ʻe he tokonaki ʻo e huhuʻí? (e) Ko e hā ʻa e founga naʻe pehē ʻe Paula ʻoku totonu ke fakahā ʻaki ʻa ʻetau houngaʻia ʻi he huhuʻí?

 ¹⁹ ʻOku fēfē hoʻo ongoʻi ʻi hoʻo ako ʻo fekauʻaki mo e huhuʻí? ʻIkai ʻoku māfana ai ho lotó ki he ʻOtua ko Sihová ke ʻilo ʻokú ne tokanga lahi pehē fau kiate koe ʻi heʻene foaki mai hono ʻAlo ʻofaʻangá koeʻuhi ko koe? (Sione 3:16; 1 Sione 4:​9, 10) Kae toe fakakaukau ange ki he ʻofa ʻa Kalaisí. Naʻá ne loto-fiefai ke haʻu ki māmani ke pekia maʻatautolu. ʻIkai ʻoku totonu ke tau houngaʻia ai? Naʻe fakamatalaʻi ʻe he ʻapositolo ko Paulá ʻa e founga ʻoku totonu ke tau fakahā ʻaki ʻa ʻetau houngaʻiá ʻi heʻene pehē: “Nae bekia ia ma ae kakai kotoabe, koeuhi ko kinautolu oku moui, ke oua naa nau toe moui kiate kinautolu, ka kiate ia nae bekia maa nautolu, pea toe tuu hake.” (2 Kolinitō 5:​14, 15, PM) Te ke fakahaaʻi hoʻo houngaʻiá ʻaki hoʻo ngāueʻaki hoʻo moʻuí ke tauhi ʻa e ʻOtuá mo hono ʻAlo fakahēvani ko Sīsū Kalaisí?

ʻUHINGA NAʻE FAI AI ʻE SĪSŪ ʻA E NGAAHI MANÁ

20. Ko e hā ʻoku tau ako ʻo fekauʻaki mo Sīsū mei heʻene fakamoʻui ʻa e tokotaha kiliá?

²⁰ ʻOku ʻiloa ʻa Sīsū ʻi he ngaahi mana naʻá ne faí. Naʻá ne ongoʻi ʻofa loloto ki he kakai naʻe faingataʻaʻiá, pea naʻá ne loto-fiefai ke ngāueʻaki hono mālohi naʻe foaki ange ʻe he ʻOtuá ke tokoniʻi ʻa kinautolu. Hangē ko ení, naʻe haʻu kiate ia ha tokotaha naʻe puke he mahaki fakalilifu ko e kiliá ʻo ne pehē: “Ka ne ke loto ke fai, te ke lava ke fakamaʻa au.” Pea naʻe “langa ʻa e fatu ʻo Sisū ʻi he ʻofa, ʻo ne mafao atu hono nima ʻo ala kiate ia, mo ne pehē, ʻOku ou loto pe; ke ke maʻa koe.” Pea naʻe fakamoʻui ʻa e tangata mahakí!​—Maʻake 1:​40-42.

21. Naʻe anga-fēfē hono tokoniʻi ʻe Sīsū ʻa e fuʻu kakai tokolahí?

²¹ Fakakaukau atu ki he meʻa ʻe taha ʻi he Tohitapú, pea sio loto atu ʻi he ʻofa lahi ʻa Sīsū ki he kakaí ʻoku fakamatalaʻi aí: “Pea ʻalu atu kiate ia ha ngāhi fuʻu kakai, ʻo nau omi mo kinautolu ha niʻihi naʻe heke, mo e niʻihi naʻe kui, mo e niʻihi naʻe noa, mo e niʻihi naʻe pai, pea mo ha tokolahi naʻe puke kehe: ʻo nau laku kinautolu ki he vaʻe ʻo Sīsū, pea ne fakamoʻui kinautolu. Pea ofo ai ʻa e kakai, heʻenau sio ki he noa ʻoku lea, mo e pai ʻoku moʻui, mo e heke ʻoku ʻeveʻeva, mo e kui ʻoku ʻa: pea nau fakamaloʻia ʻa e Otua ʻo Isileli.”​—Mātiu 15:​30, 31.

22. Ko e hā ʻokú ne fakahā naʻe mātuʻaki tokanga ʻa Sīsū ki he kakai naʻá ne tokoniʻí?

²² ʻE lava ke ʻilo naʻe mātuʻaki tokanga ʻa Sīsū ki he kakai faingataʻaʻiá ni pea naʻá ne manako moʻoni ke tokoniʻi ʻa kinautolu, ʻi he meʻa naʻá ne toki tala ki heʻene kau ākongá. Naʻá ne pehē: “ʻOku langa hoku fatu ʻi he ʻofa ki he kakai ni, he ko e ʻaho tolu malo ʻeni mo ʻenau nofo mai,  pea ʻoku ʻikai haʻanau meʻa tokoni: pea ʻoku ʻikai te u loto ke tukuange kinautolu fiekai, naʻa ʻiloange te nau pōngingia ʻi he hala.” Ko ia naʻe fafanga fakaemana ʻaki ʻe Sīsū ʻa e foʻi mā pē ʻe fitu mo ha ngaahi mataʻi ika ʻa e “toko faafe ʻa e tangata, ʻo taʻe lau ai ʻa e fefine mo e tamaiki iki.”​—Mātiu 15:​32-38.

23. Ko e hā naʻá ne ueʻi ʻa Sīsū ke fokotuʻu ʻa e tama ʻa e uitoú mei he maté?

²³ ʻI ha taimi ʻe taha naʻe fetaulaki ʻa Sīsū mo ha putu ʻoku fata mai ki tuʻa mei he kolo ko Neini. ʻOku fakamatalaʻi ia ʻe he Tohitapú ʻo pehē: “Naʻe fata mai kituaʻā ha pekia, ko e tama pe toko taha ia a ʻene faʻe, pea ko e fefine uitou ia: . . . Pea ʻi he mamata ʻe Sīsū ki he fefine, naʻe langa hono fatu ʻi he ʻofa ki ai.” Naʻá ne ongoʻi loloto ʻa e mamahi ʻa e fefiné. Ko ia, ʻi heʻene lea ki he ʻangaʻangá ni, naʻe fekau atu ʻe Sīsū: “Tama, ʻoku ou tala atu, Ke ke tuʻu!” Pea ko e ofo ē ka ko ha ofo! “Pea nofo hake ʻa e ʻangaʻanga, ʻo kamata lea. Pea ne tuku ia ki heʻene faʻe.” Fakakaukau atu ki he ongoʻi kuo pau ke maʻu ʻe he faʻē ko iá! ʻE fēfē hoʻo ongoʻí? Naʻe mafola lahi mo mamaʻo ʻa e tala ʻo fekauʻaki mo e meʻa fakaofo ko eni naʻe hokó. Tā neʻineʻi ke ʻiloa lahi ʻa Sīsū.​—Luke 7:​11-17.

24. Ko e hā naʻe fakahaaʻi ʻe he ngaahi mana ʻa Sīsuú ʻo kau ki he kahaʻú?

²⁴ Ka naʻe ʻaonga fakataimi pē ʻa e mana naʻe fai ʻe Sīsuú. Naʻe toe tupu pē ha ngaahi palopalema fakaesino ʻi he kakai naʻá ne fakamoʻuí. Pea naʻe toe mate ʻa kinautolu naʻá ne fokotuʻu mei he maté. Ka naʻe fakamoʻoniʻi ʻe he ngaahi mana ʻa Sīsuú naʻe fekau mai ia ʻe he ʻOtuá, pea ʻoku moʻoni ko e ʻAlo ia ʻo e ʻOtuá. Pea ʻoku nau fakamoʻoniʻi ʻoku malava ke fakaleleiʻi ʻa e palopalema kotoa pē ʻa e faʻahinga ʻo e tangatá ʻaki ʻa e mālohi ʻo e ʻOtuá. ʻIo, naʻa nau fakahā siʻisiʻi ʻa e meʻa ʻe hoko ʻi he māmaní he malumalu ʻo e puleʻanga ʻo e ʻOtuá. ʻI he taimi ko iá ʻe fafanga ʻa e kakai fiekaiá, ʻe fakamoʻui ʻa e kakai mahakí, pea naʻa mo e kakai maté ʻe fokotuʻu! Pea heʻikai ʻaupito toe ʻi ai ha mahaki, mate, pe ko ha ngaahi faingataʻa kehe ʻoku fakatupu-lotomamahi. Ko ha toki tāpuaki lahi ia ʻe hoko!​—Fakahā 21:​3, 4; Mātiu 11:​4, 5.

TOKOTAHA PULE ʻO E PULEʻANGA ʻO E ʻOTUÁ

25. Ko e hā ʻa e konga ʻe tolu ʻoku malava ke vahevahe ki ai ʻa e moʻui ʻa Sīsuú?

²⁵ ʻOku ʻi ai ʻa e konga ʻe tolu ʻo kau ki he moʻui ʻa e ʻAlo ʻo e ʻOtuá. ʻUluakí, ko e ngaahi taʻu ʻoku ʻikai ʻilo hono lahí ʻa ia naʻá ne ʻi hēvani ai mo ʻene Tamaí ki muʻa peá ne toki hoko ko ha tangatá. Ko hono hokó, ko e taʻu ʻe 33¹/2 naʻá ne ʻi māmani ai hili hono ʻaloʻí. Pea ʻi he taimí ni ʻokú ne toe moʻui ʻi hēvani ko ha tokotaha laumālie. Ko e hā ʻa e tuʻunga kuó ne maʻu ʻi hēvani talu mei heʻene toetuʻú?

26. ʻI he tuʻumaʻu ʻa ʻene loto-tōnungá ʻi māmaní, naʻe fakamoʻoniʻi ai ʻe Sīsū ʻa ʻene taau ki he hā?

 ²⁶ ʻOku mahino, naʻe pau ke hoko ʻa Sīsū ko ha tuʻi. Naʻa mo e ʻāngeló naʻá ne fakahā kia Mele: “Te ne tuʻi . . . ʻo lauikuonga; pea ko ʻene pule [puleʻanga, NW] ʻe ʻikai ngata.” (Luke 1:33) Lolotonga ʻene ngāue fakafaifekau ʻi māmaní naʻá ne lea he taimi kotoa ʻo kau ki he puleʻanga ʻo e ʻOtuá. Naʻá ne akoʻi hono kau muimuí ke lotu: “Ke hoko mai hoo bule [puleʻanga, NW]. Ke fai ho finagalo i mamani, o hage i he lagi.” Pea naʻá ne naʻinaʻi kiate kinautolu ke “fuofua kumi ae buleʻanga.” (Mātiu 6:​10, 33, PM) ʻI he tuʻumaʻu ʻa ʻene loto-tōnungá ʻi māmaní, naʻe fakamoʻoniʻi ai ʻe Sīsū ʻa ʻene taau ke hoko ko e tuʻi ʻi he puleʻanga ʻo e ʻOtuá. Naʻe kamata ʻene pule ko e tuʻí ʻi heʻene foki atu pē ki hēvaní?

27. (a) Ko e hā naʻe fai ʻe Sīsū hili ʻene foki ki hēvaní? (e) Ko e hā naʻe ʻuluaki fai ʻe Sīsū ʻi heʻene hoko ko e tuʻi ʻo e puleʻanga ʻo e ʻOtuá?

²⁷ ʻIkai, naʻe ʻikai pehē. ʻOku lave ʻa e ʻapositolo ko Paulá ki he Sāme 110:​1, ʻo fakamatala: “Ko e toko taha ni [Sīsū], hili ʻene ʻatu koeʻuhi ko e angahala ha foʻi feilaulau tofu pe taha ʻo taʻengata, naʻa ne nofo hifo mei he toʻomataʻu ʻo e ʻOtua; pea talunga ia mo ʻene nofoʻaki tali kaeʻoua ke ngaohi hono ngaahi fili ko hono tuʻunga vaʻe.” (Hepelū 10:​12, 13) Naʻe tatali ʻa Sīsū ki he fekau ʻa Sihova: “ʻI he lotolotonga ʻo ho ngaahi fili, pule pe koe.” (Sāme 110:2) ʻI he hoko ʻa e taimi ko iá, naʻá ne kamata ke fakamaʻa mei hēvani ʻa Sētane mo ʻene kau ʻāngeló. ʻOku fakahā ʻi he ngaahi leá ni ʻa e ikuʻanga ʻo e tau ko ia ʻi hēvaní: “Kuo hoko ʻeni ʻa e fakamoʻui, mo e malohi, mo e puleʻanga ʻo hotau ʻOtua, pea mo e pule ʻa ʻene Kalaisi: he kuo kapusi ʻa e tukuaki ʻo hotau kainga, ʻa ia ʻoku ne tukuakiʻi kinautolu ʻi he ʻao ʻo hotau ʻOtua, ʻi he ʻaho mo e po.” (Fakahā 12:10) Hangē ko ia kuo hā ʻi ha vahe ki muʻa ʻo e tohí ni, ʻoku fakahā ʻe he ngaahi moʻoniʻi meʻa kuo ʻosi hoko ʻa e tau ko eni ʻi hēvaní, pea ʻoku lolotonga pule ʻa Sīsū Kalaisi ʻi he lotolotonga ʻo hono ngaahi filí.

28. (a) Ko e hā ʻa e meʻa ʻoku vavé ni ke fai ʻe Kalaisí? (e) Ko e hā kuo pau ke tau fai kae maʻu ʻa ʻene maluʻí?

²⁸ ʻOku vavé ni ke ngāue mai ʻa Kalaisi mo ʻene kau ʻāngelo fakahēvaní ke toʻo mei he māmaní ʻa e ngaahi puleʻanga fakamāmani lolotongá kotoa. (Tāniela 2:44; Fakahā 17:14) ʻOku pehē ʻe he Tohitapú ʻoku ʻi ai ʻene “heleta masila ke ne tāʻi ʻaki ʻa e ngaahi kakai, pea te ne puleʻi kinautolu ʻaki ha sēpita ukamea.” (Fakahā 19:​11-16) Ke fakamoʻoniʻi ʻoku tau taau ke maluʻi he lolotonga ʻo e fakaʻauha ka hoko mai ko ení, kuo pau ke tau ngāueʻi ʻa e tui kia Sīsū Kalaisí. (Sione 3:36) Kuo pau ke tau hoko ko ʻene kau ākonga pea fakamoʻulaloa ʻa kitautolu kiate ia ko hotau Tuʻi fakahēvaní. Te ke fai pehē?

[Fehuʻi ki he Ako]

[Fakatātā ʻi he peesi 58]

Naʻe tuku ʻe Sīsū ʻa ʻene ngāue fakatufungá kae papitaiso pea hoko leva ko e tokotaha pani ʻa Sihova

[Fakatātā ʻi he peesi 63]

Naʻe tatau ʻa Sīsū mo e tangata haohaoa ko ʻĀtamá

 [Fakatātā ʻi he peesi 64]

Naʻe ueʻi ʻa Sīsū ʻe he langa hono fatú ʻi he ʻofá ke tokoni ki he kakai mahakí mo e kakai fiekaiá

 [Fakatātā ʻi he peesi 67]

ʻI hono fokotuʻu ʻa e kakai maté, naʻe fakahā ai ʻe Sīsū ʻa e meʻa te ne fai ʻo lahi ange ʻi he taimi ʻe pule ai ʻa e puleʻanga ʻo e ʻOtuá