Toetuʻu–Maʻa Hai, pea ʻI Fē?
Vahe 20
Toetuʻu–Maʻa Hai, pea ʻI Fē?
1, 2. ʻOku anga-fēfē ʻa ʻetau ʻilo naʻe tui ki he toetuʻú ʻa e kau sevāniti ʻa e ʻOtuá ʻi he kuonga muʻa?
KUO TUI maʻu pē ʻa e kau sevāniti ʻa e ʻOtuá ki he toetuʻú. Fekauʻaki mo ʻĒpalahamé, ʻa ia naʻe moʻui he taʻu ʻe 2,000 ki muʻa pea ʻaloʻi ʻa Sīsū ko ha tangatá, ʻoku pehē ʻe he Tohitapú: “Naʻá ne pehe naʻe malava ʻe he ʻOtuá ke fokotuʻu ia [hono foha ko ʻAisaké] mei he mate.” (Hepelū 11:17-19, NW) Ki muí naʻe fehuʻi ʻe Siope ko e sevānti ʻa e ʻOtuá: “Ka pekia ha tangata, te ne toe moʻui koa?” ʻI heʻene tali ki he fehuʻi pē ʻaʻaná, naʻe pehē ʻe Siope ki he ʻOtuá: “Te ke toki ui, pea te u tali atu ʻe au.” Ko ia naʻá ne fakahāhā ʻokú ne tui ki he toetuʻú.—Siope 14:14, 15.
2 ʻI he ʻi māmani ʻa Sīsū Kalaisí, naʻá ne fakamatala: “Ka koe fokotuu oe mate, nae fakaha ia e Mosese, mei he uluakau, i he ene ui ae Eiki koe Otua o Ebalahame, moe Otua o Aisake, moe Otua o Jekobe. He oku ikai koe Otua ia oe mate, ka koe moui: he oku moui kotoabe kiate ia.” (Luke 20:37, 38, PM) ʻOku laka hake ʻi he tuʻo 40 ʻa hono ngāueʻaki ʻo e foʻi lea “toetuʻu” ʻi he Konga Tohitapu Faka-Kalisi Kalisitiané. Ko hono moʻoní, ko e toetuʻu ʻa e kau maté ko ha akonaki tefito ia ʻa e Tohitapú.—Hepelū 6:1, 2.
3. Ko e hā ʻa e tui ki he toetuʻú naʻe fakahā ʻe Māʻatá?
3 Naʻe fakahaaʻi ʻe Māʻata, ko e kaungāmeʻa ʻo Sīsuú, ʻa ʻene tui ki he toetuʻú ʻi he taimi naʻe mate ai hono tuongaʻane ko Lasalosí. ʻI he fanongo ki he haʻu ʻa Sīsuú, naʻe lele ʻa Māʻata ke fakafetaulaki kiate ia. Naʻá ne pehē: “ʻEiki, ka ne ke ʻi heni pehē ne ʻikai pekia hoku tuongaʻane.” ʻI he vakai ki heʻene loto-mamahí, naʻe fakafiemālieʻi ia ʻe Sīsū ʻaki ʻa e leá ni ʻo ne pehē: “ʻE toetuʻu ho tuongaʻane.” Naʻe tali ʻe Māʻata: “ʻOku ou ʻilo te ne toetuʻu ʻi he toetuʻu ʻi he ʻaho fakamui.”—Sione 11:17-24.
4-6. Ko e hā ʻa e ngaahi ʻuhinga naʻe tui ai ʻa Māʻata ki he toetuʻú?
4 Naʻe ʻi ai ʻa e ngaahi ʻuhinga mālohi ʻa Māʻata ki heʻene tui ki he toetuʻú. Naʻá ne ʻilo naʻe fokotuʻu mei he maté ha ongo tamaiki ʻaki ʻa e mafai ʻo e ʻOtuá ʻe he ongo palōfita ʻa e ʻOtuá ko ʻIlaisiā mo ʻIlaisa ʻi he ngaahi taʻu lahi ki muʻa. (1 Tuʻi 17:17-24; 2 Tuʻi 4:32-37) Pea naʻá ne ʻilo naʻe toe moʻui ha tangata mate ʻi hono lī ia ki ha luo peá ne pā ki he hui ʻo e tokotaha mate ko ʻIlaisá. (2 Tuʻi 13:20, 21) Ka ko e meʻa naʻá ne fakamālohiʻi lahi taha ʻene tui ki he toetuʻú ko e meʻa ko ia naʻe akoʻi mo fai ʻe Sīsū tonu.
5 Naʻe ʻi Selusalema nai ʻa Māʻata ʻo siʻi hifo ʻi he taʻu ʻe 2 ki muʻa ʻi he taimi naʻe lea ai ʻa Sīsū ʻo fekauʻaki mo ʻene kaunga ki he toetuʻu ʻa e kau maté. Naʻá ne pehē: “He hange ā ʻoku fokotuʻu ʻe he Tamai ʻa e kau pekia, mo ne ngaohi ke moʻui; pehe foki mo e ʻAlo, ʻoku ne ngaohi ke moʻui ʻa kinautolu ʻoku ne loto ki ai. ʻOua te mou ofo ʻi he meʻa ko ia: he ʻoku ʻunu mai ha taimi, ʻa ia ʻe fanongo ai ki hono leʻo ʻe he kakai kotoa pe ʻoku ʻi he ngaahi faʻitoka, pea te nau ʻalu atu mei ai.”—Sione 5:21, 28, 29.
6 Aʻu mai ki he taimi naʻe leaʻaki ai ʻe Sīsū ʻa e ngaahi leá ni, ʻoku ʻikai ha fakamatala ʻi he Tohitapú naʻá ne fokotuʻu ai ha taha mei he maté. Kae taimi nounou pē mei ai naʻá ne fokotuʻu ke moʻui ha talavou, ko e tama ʻa ha uitou ʻi he kolo ko Neini. Naʻe aʻu atu ʻa e ngaahi ongoongo ʻo e meʻá ni ki he tafaʻaki fakatongá ki Siutea, ko ia naʻe pau pē ke fanongo ʻa Māʻata ʻo fekauʻaki mo ia. (Luke 7:11-17) Ki muí naʻe pau pē ke toe fanongo ʻa Māʻata ʻo fekauʻaki mo e meʻa naʻe hoko ofi ki he Tahi Kālelí ʻi he ʻapi ʻo Siailosí. Naʻe puke lahi hono ʻofefine taʻu 12 pea mate. Ka ʻi he aʻu ʻa Sīsū ki he ʻapi ʻo Siailosí naʻá ne ʻalu ki he tama maté peá ne pehē: “Taʻahine, tuʻu.” Pea naʻá ne tuʻu!—Luke 8:40-56.
7. Ko e hā naʻe fai ʻe Sīsū ke fakamoʻoniʻi kia Māʻata ʻa ʻene malava ke fokotuʻu ʻa e maté?
7 Ka naʻe kei fakakaukau pē ʻa Māʻata heʻikai fokotuʻu mei he maté ʻe Sīsū ʻa hono tuongaʻané ʻi he taimi ko ení. Ko e ʻuhinga ia naʻá ne pehē ai: “ʻOku ou ʻilo te ne toetuʻu ʻi he toetuʻu ʻi he ʻaho fakamui.” Kaekehe, ke fakamamafaʻi kia Māʻata ʻa ʻene kaunga ki hono fokotuʻu ʻa e maté naʻe pehē ʻe Sīsū: “Ko au pē ko e toetuʻu, pea mo e moʻui: ko ia ʻoku tui pikitai kiate au, neongo kuo pekia, ka te ne moʻui pē: pea ʻilonga ʻa ia ʻoku moʻui mo tui pikitai kiate au ʻe ʻikai ʻaupito te ne mate, ʻo taʻengata.” Hili pē iá naʻe ʻave leva ʻa Sīsū ki he fonualoto naʻe ʻi ai ʻa Lasalosí. Naʻá ne kalanga: “Lasalosi, tuʻu mai kituʻa.” Pea naʻe hū mai ki tuʻa ʻa Lasalosi, ʻa ia kuo ʻosi ʻa e ʻaho ʻe fā ʻa ʻene mate!—Sione 11:24-26, 38-44.
8. Ko e hā ʻa e fakamoʻoni ʻoku ʻi ai naʻe toetuʻu ʻa Sīsū?
8 Hili pē ha ngaahi uike siʻi naʻe tāmateʻi ʻa Sīsū pea tuku ki ha fonualoto. Ka naʻá ne ʻi ai pē ʻo meimei ʻaho ʻe tolu. ʻOku fakamatalaʻi ʻe he ʻapositolo ko Pitá ʻa hono ʻuhingá ʻo pehē: “Ko e Sīsū ko eni naʻe toe fokotuʻu ia ʻe he ʻOtua: pea ko kimautolu kotoa pē ko e kau fakamoʻoni ki ai.” Naʻe ʻikai malava ʻe he kau taki lotú ke nau taʻofi ʻa e ʻAlo ʻo e ʻOtuá mei heʻene hū ki tuʻa mei he fonualotó. (Ngāue 2:32; Mātiu 27:62-66; 28:1-7) ʻOku ʻikai ha toe tālaʻa ki hono fokotuʻu ʻa Kalaisi mei he pekiá, he naʻá ne toki hā moʻui ki he tokolahi ʻo ʻene kau ākongá, pea ʻi he taimi ʻe taha ki he toko 500 ʻo kinautolu. (1 Kolinitō 15:3-8) Naʻe mālohi fau ʻa e tui ʻa e kau ākonga ʻa Sīsuú ki he toetuʻú ʻo nau loto-lelei ke fehangahangai mo e maté ʻi hono tauhi ʻa e ʻOtuá.
9. Ko hai ʻa e toko hiva ʻoku fakahā ʻe he Tohitapú naʻe fokotuʻu mei he maté?
9 Ko e toe fakamoʻoni ki he malava ke fokotuʻu ʻa e maté naʻe ʻomai ia ki mui ʻo fakafou mai ʻi he ʻapositolo ko Pitá mo Paula. ʻUluakí, naʻe fokotuʻu mei he maté ʻe Pita ʻa Tāpaita, naʻe toe ui ko Toakasé, ʻi he kolo ko Siopa. (Ngāue 9:36-42) Pea naʻe fokotuʻu leva mei he maté ʻe Paula ʻa e talavou ko ʻUtiko, ʻa ia naʻe mate ʻi heʻene tō mei ha matapā ʻo ha fale fungavaka tolu he lolotonga ʻa e malanga ʻa Paulá. (Ngāue 20:7-12) Ko hono moʻoní, ʻoku ʻomai ʻe he ngaahi toetuʻu ko eni ʻe hiva ʻoku hiki ʻi he Tohitapú ʻa e fakamoʻoni pau ʻoku malava ke fakamoʻui mai ʻa e kau maté!
KO HAI ʻE TOETUʻÚ?
10, 11. (a) Ko e hā naʻe fokotuʻutuʻu ai ʻe he ʻOtuá ke ʻi ai ha toetuʻú? (e) Fakatatau kia Ngāue 24:15, ko e hā ʻa e ongo kalasi ʻe ua ʻo e kakaí ʻe toetuʻú?
10 ʻI he kamataʻangá naʻe ʻikai ko e taumuʻa ia ʻa e ʻOtuá ke fokotuʻu ha taha mei he maté, koeʻuhi kapau naʻe angatonu ai pē ʻa ʻĀtama mo ʻIvi heʻikai ke mate ha taha. Ka ʻi he angahala ʻa ʻĀtamá naʻá ne ʻomai ai ʻa e taʻehaohaoá mo e maté ki he tokotaha kotoa. (Loma 5:12) Ko ia naʻe fokotuʻutuʻu ʻe he ʻOtua ko Sihová ke ʻi ai ha toetuʻu, ke malava ai ha taha pē ʻi he fānau ʻa ʻĀtamá ke maʻu ʻa e moʻui taʻengatá. Ka ko e hā ʻokú ne fakapapauʻi pe ʻe toetuʻu ha taha pe ʻikai?
11 ʻOku fakamatala ʻe he Tohitapú: “E ai ha toetuu oe bekia, ae agatonu moe taeagatonu.” (Ngāue 24:15, PM) ʻOku fakaʻohovale nai eni ki ha niʻihi. Te nau fifili nai: ‘Ko e hā ʻe toe fakamoʻui mai ai ʻa e “taeagatonu” mei he maté?’ ʻE tokoni kiate kitautolu ki hono tali ʻo e fehuʻi ni ʻa e meʻa ko ia naʻe hoko lolotonga ʻa e tautau ʻo Sīsū ʻi he ʻakau fakamamahí.
12, 13. (a) Ko e hā ʻa e talaʻofa naʻe fai ʻe Sīsū ki ha tokotaha faihia? (e) Ko fē ʻa e “Palataisi” naʻe lave ki ai ʻa Sīsuú?
12 Ko e ongo tangata ko eni ʻi he tafaʻaki ʻo Sīsuú ko e ongo faihia. Kuo toki ngaahiʻi ia ʻe he toko taha ʻo kinaua ʻo pehē: “ʻIkai ko e Kalaisi koe? Fakahaofi koe mo kimaua.” Kaekehe, ʻoku tui ʻa e tokotaha faihia ia ʻe tahá kia Sīsū. ʻOkú ne hanga kiate ia ʻo ne pehē: “Manatuʻi au ʻi hoʻo hoko ki ho puleʻanga.” ʻI heʻene lea peheé, ʻoku talaʻofa ai ʻa Sīsū: “Ko e moʻoni ʻoku ou tala atu kiate koe ʻi he ʻahó ni, Te ke ʻi Palataisi mo au.”—Luke 23:39-43, NW.
13 Ka ko e hā ʻa e ʻuhinga ʻa Sīsū ʻi heʻene pehē: “Te ke ʻi Palataisi mo au”? ʻOku ʻi fē ʻa Palataisi? Sai, naʻe ʻi fē ʻa e palataisi naʻe ngaohi ʻe he ʻOtuá ʻi he kamataʻangá? Naʻe ʻi māmani, ʻikai ko ia? Naʻe tuku ʻe he ʻOtuá ʻa e ʻuluaki ongo mātuʻá ʻi he palataisi fakaʻofoʻofa naʻe ui ko e ngoue ʻo ʻĪteni. Ko ia ʻi he taimi ʻoku tau lau ai ʻe ʻi Palataisi ʻa e tokotaha faihia ko ení, ʻoku totonu ke tuʻu ʻi heʻetau fakakaukaú ko e māmani ko ení ʻe ngaohi ko ha feituʻu fakaʻofoʻofa ke nofo ai, he ko e foʻi lea “palataisi” ʻoku ʻuhinga ki he “ngoue” pe “paʻake.”—Sēnesi 2:8, 9.
14. ʻI he ʻuhinga fē ʻe ʻi Palataisi ai ʻa Sīsū mo e tokotaha faihiá?
14 Ko hono moʻoní, ʻe ʻikai ke ʻi heni ʻi māmani ʻa Sīsū Kalaisi mo e tokotaha faihiá. Ka ʻe ʻi hēvani ʻa Sīsū ʻo pule mai ko e tuʻi ki he Palataisi fakamāmaní. Ko ia ʻoku ʻuhinga ʻa ʻene ʻi palataisi mo e tangatá ni te Ne fokotuʻu ia mei he maté pea te Ne tokanga ki heʻene ngaahi fiemaʻu, fakamatelie mo fakalaumālie fakatouʻosi. Ka ko e hā ʻe fakangofua ai ʻe Sīsū ha tangata naʻe hoko ko ha tokotaha faihia ke ne moʻui ʻi Palataisi?
15. Ko e hā ʻe toetuʻu ai ʻa e “taeagatonu”?
15 ʻOku moʻoni naʻe fai ʻe he tangatá ni ʻa e ngaahi meʻa naʻe kovi. Naʻá ne “taeagatonu.” ʻIkai ngata ai, ka naʻá ne taʻeʻilo ki he finangalo ʻo e ʻOtuá. Ka te ne hoko ko ha faihia ʻo kapau naʻá ne ʻilo ʻo fekauʻaki mo e ngaahi taumuʻa ʻa e ʻOtuá? Ke ʻilo fakapapauʻi eni, ʻe fokotuʻu mei he maté ʻe Sīsū ʻa e tangata taʻeangatonú ni, pea pehē ki he laui afe miliona naʻá nau mate mo e taʻeʻilo. Hangē ko ení, ʻi he ngaahi senituli kuo maliu atú naʻe mate ʻa e kakai tokolahi naʻe ʻikai te nau lava ke lautohi pea naʻe ʻikai ʻaupito te nau sio ʻi ha Tohitapu. Ka ʻe fokotuʻu ʻa kinautolu mei Seoli, pe Hētesi. ʻE akoʻi kinautolu ki he finangalo ʻo e ʻOtuá ʻi he palataisi he māmaní, pea te nau maʻu ai ʻa e faingamālie ke fakamoʻoniʻi ai ʻoku nau mātuʻaki ʻofa ki he ʻOtuá ʻaki ʻenau fai hono finangaló.
16. (a) Ko hai ʻa e kau mate ʻe ʻikai toetuʻú? (e) Ko e hā ʻoku ʻikai totonu ai ke tau feinga ke fakamaauʻi ʻa e ngaahi meʻa ko ia? (f) Ko e hā ʻoku totonu ke tau tokanga tefito ki aí?
16 ʻOku ʻikai ʻuhinga eni ia ʻe toetuʻu ʻa e tokotaha kotoa pē. ʻOku fakahā ʻe he Tohitapú ʻe ʻikai toetuʻu ʻa Siutasi ʻIsikaliote ʻa ia naʻá ne lavakiʻi ʻa Sīsuú. Koeʻuhi ko ʻene anga-fulikivanu loto-fiefai, ʻoku ui ai ʻa Siutasi ko e “hako ʻo mala.” (Sione 17:12) Naʻá ne ʻalu ki he Kīhena fakaefakatātā ʻa ia ʻoku ʻikai ha toetuʻu mei aí. (Mātiu 23:33) ʻOku angahala fakafepaki nai ki he laumālie māʻoniʻoní ʻa e faʻahinga ʻoku nau fai loto-fiefai ʻa e meʻa ʻoku koví hili ʻenau ʻiloʻi ʻa e finangalo ʻo e ʻOtuá. Pea ʻe ʻikai fokotuʻu mei he maté ʻe he ʻOtuá ʻa e faʻahinga ʻoku nau angahala fakafepaki ki hono laumālie māʻoniʻoní. (Mātiu 12:32; Hepelū 6:4-6; 10:26, 27) Kaekehe, koeʻuhi ko e ʻOtuá ʻa e Fakamaaú, ʻoku ʻikai ha ʻuhinga kiate kitautolu ke tau feinga ke mateʻi pe ʻe toetuʻu pe ʻikai ha kakai anga-fulikivanu pau ʻi he kuo hilí pe ʻi onopooni. ʻOku ʻafioʻi pē ʻe he ʻOtuá ʻa e faʻahinga ʻoku ʻi Hētesí pea mo ia ʻoku ʻi Kīhená. ʻI heʻetau tafaʻakí, ʻoku totonu ke tau fai ʻa e meʻa kotoa pē te tau malavá ke hoko ai ko e faʻahinga kakai ʻoku fiemaʻu ʻe he ʻOtuá ki heʻene fokotuʻutuʻu foʻoú.—Luke 13:24, 29.
17. Ko hai ʻe maʻu ʻa e moʻui taʻengatá kae ʻikai fou mai ʻi he toetuʻu?
17 Ko hono moʻoní ko kinautolu kotoa te nau maʻu ʻa e moʻui taʻengatá ʻe ʻikai fou kotoa mai ʻi he toetuʻu. ʻE hao moʻui atu pē ʻi ʻĀmaketone ʻa e tokolahi ʻo e kau sevāniti ʻa e ʻOtuá ʻoku lolotonga moʻui ʻi he “gaahi aho fakamui” ʻo e ngaahi meʻa ʻo e tuʻu ko ení. Pea ʻi heʻenau hoko ko e konga ʻo e “fonua foʻou” angatonú, ʻe ʻikai ʻaupito fiemaʻu ke nau mate. ʻOku malava ke hoko ʻi ha founga moʻoni ʻo fekauʻaki mo kinautolu ʻa e meʻa naʻe leaʻaki ʻe Sīsū kia Māʻatá: “Pea ʻilonga ʻa ia ʻoku moʻui mo tui pikitai kiate au ʻe ʻikai ʻaupito te ne mate, ʻo taʻengata.”—Sione 11:26; 2 Tīmote 3:1, PM.
18. Ko hai ʻa e “agatonu” ʻe toetuʻu maí?
18 Ko hai ʻa e kau “agatonu” ʻe toetuʻú? ʻE kau heni ʻa e kau sevāniti angatonu ʻa e ʻOtuá ʻa ia naʻa nau moʻui ki muʻa pea toki hoko mai ʻa Sīsū Kalaisi ki he māmaní. ʻOku hā ʻa e hingoa ʻo e tokolahi ʻo e faʻahingá ni ʻi he tohi Hepelū vahe 11. Naʻe ʻikai te nau ʻamanaki ke ō ki hēvani, ka naʻa nau ʻamanaki pē ke toe moʻui ʻi māmani. ʻOku toe kau foki ʻi he lotolotonga ʻo e kau “agatonu” ʻe toetuʻú ʻa e kau sevāniti angatonu ʻa e ʻOtuá kuo nau toki mate ʻi he ngaahi taʻu ki mui ní. ʻE fakapapauʻi ʻe he ʻOtuá ke fakahoko ʻenau ʻamanaki ke moʻui taʻengata ʻi he māmaní ʻaki hono fokotuʻu kinautolu mei he maté.
TAIMI MO E FEITUʻU ʻO E TOETUʻÚ
19. (a) Naʻe hoko ʻa Sīsū ko e ʻuluaki ke toetuʻu ʻi he ʻuhinga fē? (e) Ko hai ʻa e kau toetuʻu hono hokó?
19 ʻOku lave fekauʻaki mo Sīsū Kalaisi “ko e ʻuluaki ia ʻi he toetuʻu ʻo e pekia.” (Ngāue 26:23) ʻOku ʻuhinga ení ko ia ʻa e ʻuluaki ke toetuʻu ʻiate kinautolu ʻe ʻikai toe maté. ʻIkai ngata ai, ko ia ʻa e ʻuluaki naʻe fokotuʻu ko ha tokotaha laumālié. (1 Pita 3:18) Ka ʻoku tala mai ʻe he Tohitapú kiate kitautolu ʻe ʻi ai mo e niʻihi kehe, ʻo pehē: “Ko e tokotaha taki taha ʻi hono vāhenga: ko e ʻuluaki fua ko Kalaisi, hili ia ko e faʻahinga ʻoku kau kia Kalaisi he lolotonga ʻo ʻene ʻi ai.” (1 Kolinitō 15:20-23, NW) Ko ia ʻi he toetuʻú ko e niʻihi ʻe fokotuʻu hake ia ki muʻa ʻi he niʻihi.
20. (a) Ko hai ʻa e “faʻahinga ʻoku kau kia Kalaisi”? (e) Ko e hā ʻa e toetuʻu ʻoku nau maʻú?
20 “Ko e faʻahinga ʻoku kau kia Kalaisi” ko e kau ākonga angatonu ia ʻe toko 144,000 kuo fili ke pule mo ia ʻi he Puleʻangá. ʻOku pehē ʻe he Tohitapú ʻo fekauʻaki mo ʻenau toetuʻu fakahēvaní: “ʻOku monūʻia mo toputapu ʻa ia ʻoku ʻinasi ʻi he ʻuluaki toetuʻu: ko e faʻahinga ko ia ʻoku ʻikai ke mafai ha meʻa ki ai ʻe he mate ʻangaua, ka te nau . . . hau mo ia ʻi he taʻu ʻe taha afe.”—Fakahā 20:6; 14:1, 3.
21. (a) ʻOku kamata fakakū ʻa e “ʻuluaki toetuʻu”? (e) Ko hai nai kuo ʻosi fokotuʻu mei he maté ki he moʻui fakahēvaní?
21 Ko ia hili ʻa e toetuʻu ʻa Kalaisí, ko e faʻahinga hoko mai leva ke toetuʻú ko e toko 144,000. ʻOku nau kau ʻi “he ʻuluaki toetuʻu,” pe “ko e toetuʻu ki muʻa.” (Filipai 3:11, NW) ʻOku hoko fakakū eni? ʻOku pehē ʻe he Tohitapú, “lolotonga ʻo ʻene ʻi ai.” Hangē ko ia kuo tau ako ʻi he ngaahi vahe ki muʻá, naʻe kamata ʻa e ʻi ai ʻa Kalaisí ʻi he taʻu 1914. Ko ia kuo ʻosi hoko ʻa e “ʻaho” ki he “ʻuluaki toetuʻu” ki hēvani ʻa e kau Kalisitiane angatonú. Kuo ʻosi fokotuʻu nai mei he maté ki he moʻui fakahēvaní ʻa e kau ʻapositoló mo e muʻaki kau Kalisitiane kehé.—2 Tīmote 4:8.
22. (a) Ko toe hai ʻe kau ki “he ʻuluaki toetuʻu”? (e) Te nau toetuʻu fakakū?
22 Ka ʻoku ʻi ai ʻa e kau Kalisitiane ʻoku nau moʻui he taimí ni he lolotonga ʻo e ʻi ai taʻehāmai ʻa Kalaisí ʻoku nau maʻu ʻa e ʻamanaki tatau ko eni ke pule fakataha mo Kalaisi ʻi hēvaní. Ko kinautolu ʻa e toenga ʻo e toko 144,000. Te nau toetuʻu fakakū? ʻOku ʻikai fiemaʻu ke nau mohe ʻi he maté, ka ʻoku fokotuʻu ʻa kinautolu ʻi he taimi pē ʻoku nau mate aí. ʻOku fakamatala ʻa e Tohitapú: “ʻE ʻikai te tau mohe kotoa pe, ka te tau liliu kotoa pe, ʻi ha foʻi momeniti, ʻi ha foʻi kemo pe, ʻi he ifi fakamui ʻo e talupite: ʻio, ʻe ifi ʻa e talupite, pea ʻe fokotuʻu ʻa e pekia.”—1 Kolinitō 15:51, 52; 1 Tesalonaika 4:15-17.
23. ʻOku fēfē ʻa hono fakamatalaʻi ʻe he Tohitapú ʻa e liliu ki he moʻui fakalaumālié?
23 Ko hono moʻoní, ko e “ʻuluaki toetuʻu” ko eni ki he moʻui fakahēvaní ʻoku taʻehāmai ia ki he mata ʻo e tangatá. Ko ha toetuʻu ia ke moʻui ko e ngaahi meʻa moʻui fakalaumālie. ʻOku pehé ni ʻa hono fakamatalaʻi ʻe he Tohitapú ʻa e liliu ki he moʻui fakalaumālié: “ʻOku to ko e koto ʻauha, ʻe fokotuʻu ko e koto taʻefaʻaʻauha: ʻoku to ko e koto palakū, ʻe fokotuʻu ko e koto teungaʻia: . . . ʻOku to ko e sino fakakakano, ʻe fokotuʻu ko e sino fakalaumalie.”—1 Kolinitō 15:42-44.
24. (a) Ko e hā ʻa e toetuʻu hono hoko ki “he ʻuluaki toetuʻu”? (e) Ko e hā ʻoku ui ai ia ko e “toetuʻu lelei hake”?
24 Kaekehe, ʻoku fakahaaʻi ʻe he kupuʻi leá ko e “ʻuluaki toetuʻu” ʻoku ʻi ai ha toetuʻu ʻe toe hoko mai ai. Ko e toetuʻu eni ʻa e faʻahinga angatonú mo e taʻeangatonú fakatouʻosi ke moʻui he māmani palataisí. ʻE hoko eni ʻi he hili ʻa ʻĀmaketoné. ʻE hoko eni ko ha “toetuʻu lelei hake” ia ʻi he toetuʻu ʻa e tamaiki naʻe fokotuʻu ʻe ʻIlaisiā mo ʻIlaisa pea mo e niʻihi kehe naʻe toetuʻu ʻi he māmaní. Ko e hā hono ʻuhingá? Koeʻuhi kapau ʻe fili ʻa e faʻahinga te nau toetuʻu ʻi he hili ʻa ʻĀmaketoné ke tauhi ʻa e ʻOtuá heʻikai ʻaupito fiemaʻu ke nau toe mate.—Hepelū 11:35.
KO HA MANA ʻA E ʻOTUÁ
25. (a) Ko e hā ʻoku ʻikai toetuʻu ai ʻa e sino naʻe maté? (e) Ko e hā ʻoku toetuʻú, pea ko e hā ʻoku foaki ki he faʻahinga ʻoku toetuʻú?
25 Ko e hā ʻoku toetuʻú ʻi he hili ʻa e mate ʻa ha taha? ʻOku ʻikai ko e sino tatau pē ko ia naʻe mate ʻakí. ʻOku fakahaaʻi eni ʻe he Tohitapú ʻi heʻene fakamatala ki he toetuʻu ki he moʻui fakahēvaní. (1 Kolinitō 15:35-44) Naʻa mo e faʻahinga ʻe toetuʻu ke moʻui ʻi he māmaní heʻikai te nau maʻu ʻa e sino tatau pē naʻa nau maʻu ʻi heʻenau moʻui ki muʻá. Kuo ʻaunga nai ʻa e sino ko iá pea foki ki he kelekelé. ʻI he faai mai ʻa e taimí kuo hoko nai ʻa e ngaahi ʻelemeniti ʻo e sino mate ko iá ko ha konga ʻo ha ngaahi meʻa moʻui kehe. Ko ia ʻoku fokotuʻu mei he maté ʻe he ʻOtuá ʻa e tokotaha tatau ka ʻoku ʻikai ko e sino tatau. Ki he faʻahinga ʻoku ō ki hēvaní, ʻokú ne foaki ki ai ha sino fakalaumālie foʻou. Ki he faʻahinga ʻoku fokotuʻu mei he maté ke moʻui ʻi he māmaní, ʻokú ne foaki ki ai ha sino fakakakano foʻou. ʻE meimei tatau nai ʻa e sino fakakakano foʻoú ni mo ia naʻe maʻu ʻe he tokotahá ki muʻa peá ne maté, koeʻuhi ke ʻiloʻi ia ʻe he faʻahinga naʻa nau ʻilo iá.
26. (a) Ko e hā ko ha mana fakaofo pehē ai ʻa e toetuʻú? (e) Ko e hā ʻa e ngaahi meʻa foʻou toki faʻu ʻa e faʻahinga ʻo e tangatá ʻoku malava ke tokoni kiate kitautolu ke mahino ʻa e mafai lahi ʻa e ʻOtuá ke manatuʻi ʻa e kakai kuo maté?
26 ʻOku moʻoni ko ha mana fakaofo ʻa e toetuʻú. Naʻe aʻusia nai ʻe he tokotaha naʻe maté ha taukei mo ha ʻilo lahi mo e ngaahi manatu lahi ʻi he vahaʻa taimi naʻe moʻui aí. Naʻá ne fakatupu ha angaʻitangata ʻo kehe ai ia mei ha toe tokotaha kuo moʻui mai. Ka ʻoku manatuʻi ʻe he ʻOtua ko Sihová ʻa e mingimingiʻi meʻa kotoa pē, pea ʻe toe ʻomi ʻa e tokotaha kakató ni ʻi he taimi te Ne fokotuʻu ai ia mei he maté. Hangē ko e lau ʻa e Tohitapú ʻo fekauʻaki mo e kau mate ʻe toetuʻú: “He oku moui kotoabe kiate ia.” (Luke 20:38, PM) ʻOku malava ʻe he faʻahinga ʻo e tangatá ke hiki ʻa e ngaahi leʻo mo e ngaahi ʻata ʻo e kakai, pea toe vakai ki ai ʻi he hili ha taimi fuoloa mei he mate ʻa e kakai ko iá. Ka ʻoku malava ʻe Sihova ke fakamoʻui mai ʻa e faʻahinga kotoa pē ʻoku moʻui ʻi heʻene manatú, pea te ne fai pehē!
27. Ko e hā ʻa e ngaahi fehuʻi ʻo fekauʻaki mo e toetuʻú te tau toki maʻu ʻa e tali ki ai ʻamui?
27 ʻOku toe lahi ange ʻa e meʻa ʻoku fakahā mai ʻe he Tohitapú kiate kitautolu ʻo fekauʻaki mo e moʻui ʻi he Palataisí he hili ʻa e toetuʻu ʻa e maté. Ko e fakatātā, naʻe lave ʻa Sīsū ki he faʻahinga te nau ʻalu atu, ko e niʻihi ki he “toetuʻu ke moʻui” pea ko e niʻihi ki he “toetuʻu ke fakamāu.” (Sione 5:29) Naʻá ne ʻuhinga ki he hā? Pea ʻe ʻi ai ha faikehekehe ʻi he tuʻunga ki he kau “agatonu” ʻa ia ʻe toetuʻú pea mei he tuʻunga ki he kau “taeagatonu”? Ko ha lau fekauʻaki mo e ʻAho Fakamaaú te ne tali kiate kitautolu ʻa e ngaahi fehuʻi pehe ní.
[Fehuʻi ki he Ako]
[Fakatātā ʻi he peesi 167]
“ʻOku ou ʻilo te ne toetuʻu ʻi he toetuʻu”
Naʻe fokotuʻu mei he maté ʻe ʻIlaisiā ha tama ʻa ha uitou
Naʻe fokotuʻu mei he maté ʻe ʻIlaisa ha tama
Naʻe hoko ʻo moʻui ha tangata naʻe pā ki he hui ʻo ʻIlaisá
[Fakatātā ʻi he peesi 168]
Faʻahinga naʻe fokotuʻu ʻe Sīsū mei he maté:
Tamasiʻi ʻa e uitou ʻi Neiní
Ko Lasalosi
ʻOfefine ʻo Siailosí
[Fakatātā ʻi he peesi 169]
Niʻihi kehe naʻe fokotuʻu mei he maté:
Ko Toakase
Ko Sīsū tonu
Ko ʻUtiko
[Fakatātā ʻi he peesi 170]
Ko fē ʻa e Palataisi naʻe talaʻofa ʻe Sīsū ki he tangata faikoví?
