KUÓ KE fanongo ‘i ha taha ‘oku talanoa ‘o fekau‘aki mo e ngata ‘a e māmaní?— ‘I he ‘ahó ni ‘oku talanoa ‘a e tokolahi ‘o fekau‘aki mo ia. ‘Oku fakakaukau ‘a e kakai ‘e ni‘ihi ‘e ngata ‘a e māmaní ‘i ha tau ‘a ia ‘e ngāue‘aki ai ‘e he tangatá ‘a e ngaahi pomu niukilia. ‘Okú ke fakakaukau ‘e faka‘atā ‘e he ‘Otuá ‘a e kakaí ke faka‘auha hotau fo‘i māmani faka‘ofo‘ofá?—

Hangē ko ia kuó ta akó, ‘oku fakamatala ‘a e Tohitapú ‘o fekau‘aki mo e ngata ‘a e māmaní. “ ‘Oku faka‘a‘au ke mole ‘a mamani,” ko e lau ia ‘a e Tohitapú. (1 Sione 2:17) ‘Okú ke fakakaukau ‘e ‘uhinga ‘a e ngata ‘a e māmaní ki he ngata ‘a e  fo‘i māmaní?— ‘Ikai, ‘oku pehē ‘e he Tohitapú na‘e ngaohi ‘e he ‘Otuá ‘a e fo‘i māmaní ‘ke nofo‘i,’ ‘io, ke nofo ai ‘a e kakaí pea ke nau fiefia ai. (Aisea 45:18) ‘Oku pehē ‘e he Sāme 37:29: “Ko ha‘a fai totonu te nau ma‘u ‘a e fonua [“māmaní,” NW] pea te nau nofo ai ‘o tuputupu‘a.” ‘I he ‘uhinga ko ení ‘oku toe pehē ai ‘e he Tohitapú ‘e tu‘u ‘o ta‘engata ‘a e fo‘i māmaní.—Sāme 104:5; Koheleti 1:4.

Ko ia, kapau ‘oku ‘ikai ‘uhinga ‘a e ngata ‘a e māmaní ki he ngata ‘a e fo‘i māmaní, ko e hā hono ‘uhingá?— ‘E lava ke ta ‘ilo‘i ia kapau te ta vakai fakalelei ki he me‘a na‘e hoko ‘i he ngaahi ‘aho ‘o Noá. ‘Oku fakamatala ‘a e Tohitapú: ‘Na‘e lomaki vai ‘a e māmani ‘o e taimi ko iá, ‘o ‘auha.’—2 Pita 3:6.

Na‘e ‘i ai ha taha na‘e mo‘ui ‘i he ngata ‘a e māmani lolotonga ‘a e Lōvai, pe fu‘u Lōmaki ko ia ‘i he ‘aho ‘o Noá?— ‘Oku pehē ‘e he Tohitapú na‘e ‘tauhi [‘e he ‘Otuá] ha toko fitu, pea valu ‘aki ‘a Noa, ‘a ia na‘á ne malanga‘aki ‘a e ma‘oni‘oní, ‘i he‘ene ‘omi ‘a e Lōmaki ki he māmani ‘o e kau faka‘otuamaté.’—2 Pita 2:5.

Ko ia ai, ko e hā ‘a e māmani na‘e ngatá? Ko e fo‘i māmaní, pe ko e kakai koví?— ‘Oku pehē ‘e he Tohitapú ko e ‘māmani ‘o e kau faka‘otuamaté.’ Pea fakatokanga‘i, ‘oku ui ‘a Noa ‘ko ha tokotaha malanga.’ Ko e hā ‘okú ke fakakaukau na‘á ne malanga‘akí?— Na‘e fakatokanga ‘a Noa ki he kakaí ‘o fekau‘aki mo e ngata ‘a e ‘māmani ‘o e taimi ko iá.’

‘I he taimi na‘e lea ai ‘a Sīsū ‘o fekau‘aki mo e fu‘u Lōmakí, na‘á ne fakamatala ki he‘ene kau ākongá ‘a e me‘a na‘e fai ‘e he kakaí ki mu‘a pē pea hoko ‘a e ngata‘angá. Ko e me‘a eni na‘á ne lea‘aki kia kinautolú: ‘ ‘I he ngaahi ‘aho ki mu‘a ‘i he lomakí [ko e kakaí] na‘a nau kai mo inu, mo mali, mo foaki ke fakama‘u, ‘o a‘u ki he ‘aho na‘e hu ai ‘a Noa ki he vaká, pea na‘e ‘ikai te nau ‘amanaki, mo ‘ene hoko mai ‘a e vai lahí, ‘o ‘ave ‘akinautolu kotoape.’ Na‘e pehē leva ‘e Sīsū ‘e fai pehē tofu pē ‘a e kakaí ki mu‘a ke ngata ‘a e māmani ko ení.—Mātiu 24:37-39, PM.

‘Oku fakahā mai ‘e he lea ‘a Sīsuú ‘e lava ke ta ako ha ngaahi lēsoni  mei he me‘a na‘e fai ‘e he kakaí ki mu‘a ‘i he Lōmakí. Mei hono lau ‘a e Vahe 10 ‘o e tohí ni, ‘okú ke manatu‘i ‘a e me‘a na‘e fai ‘e he kakai ko iá?— Ko e kau tangata ‘e ni‘ihi ko e kau fakaaoao na‘a nau fai ‘a e ngaahi me‘a fakamamahi. Ka ko e tokolahi kehe ia, ko e lea ia ‘a Sīsuú, na‘e ‘ikai pē te nau fanongo ‘i he taimi na‘e fekau atu ai ‘e he ‘Otuá ‘a Noa ke malanga kia kinautolú.

Ko ia, na‘e hoko mai ‘a e ‘aho ‘a ia na‘e tala ai ‘e Sihova kia Noa te Ne faka‘auha ‘a e kakai koví ‘aki ha lōmaki. ‘E ‘ufi‘ufi ‘e he vaí ‘a e fo‘i māmaní kātoa, ‘o a‘u ki he ngaahi mo‘ungá. Na‘e tala ange ‘e Sihova kia Noa ke ne langa ha fu‘u ‘a‘ake lahi. Na‘e hangē ia ha fu‘u puha lahi lōloa, ‘o hangē ko ia ‘oku lava ke ke sio ki ai kapau te ke sio ki he fakatātā ‘i he peesi 238.

Na‘e tala ange ‘e he ‘Otuá kia Noa ke ne langa ‘a e ‘a‘aké ke lahi fe‘unga ke ne malu ai ‘i loto mo hono fāmilí pea mo e tokolahi ‘o e fanga manú. Na‘e ngāue mālohi ‘aupito ‘a Noa mo hono fāmilí. Na‘a nau tutu‘u hifo ha ngaahi fu‘u ‘akau lalahi, pea ‘i hono ngāue‘aki ‘a e papá na‘a nau kamata langa ‘a e ‘a‘aké. Na‘e fe‘unga eni mo e ngaahi ta‘u lahi koe‘uhí na‘e fu‘u lahi ‘aupito ‘a e ‘a‘aké.

‘Okú ke manatu‘i ‘a e toe me‘a kehe na‘e fai ‘e Noa lolotonga ‘a e ngaahi ta‘u kotoa na‘á ne langa ai ‘a e ‘a‘aké?— Na‘á ne malanga, ‘o ne fakatokanga ki he kakaí ‘o fekau‘aki mo e Lōmaki ‘oku ‘amanaki ke hokó. Na‘e ‘i ai ha ni‘ihi ‘o kinautolu na‘e fanongo? Na‘e ‘ikai ha taha ‘o kinautolu na‘e fanongo tuku kehe pē ‘a e fāmili ‘o Noá. Ko e toengá na‘a nau fu‘u femo‘uekina ‘aupito pē ‘i he fai ‘o e ngaahi me‘a kehé. ‘Okú ke manatu‘i ‘a e me‘a na‘e pehē ‘e Sīsū na‘a nau faí?— Na‘a nau mo‘ua ‘i he kaí mo e inú mo e malí. Na‘e ‘ikai te nau fakakaukau ko e kakai kovi kinautolu, pea na‘e ‘ikai te nau fakamoleki ha taimi ke fanongo ai kia Noa. Ko ia, ta sio angé ki he me‘a na‘e hoko kia kinautolú.

‘I he hili ‘a e hū ‘a Noa mo hono fāmilí ki he ‘a‘aké, na‘e tāpuni ‘e Sihova ‘a e matapaá. Ko e kakai ‘i tu‘á na‘a nau kei ta‘etui pē ‘e hoko mai ‘a e Lōmakí. Kae fakafokifā, na‘e kamata ke tō hifo ha vai mei he  langí! Na‘e ‘ikai ko ha ‘uha anga-maheni pē. Ko ha ‘uha lōvai ia! Na‘e ‘ikai fuoloa kuo hangē ‘a e vaí ha ngaahi fu‘u vaitafe lalahí, ‘o longoa‘a ‘aupito. Na‘á ne holoki ‘a e ‘akau lalahí pea teka‘i ‘a e ngaahi fu‘u maká ‘o hangē ia ha fanga ki‘i fo‘i maka īkí. Pea fēfē ‘a e kakai na‘e ‘i tu‘a ‘i he ‘a‘aké?— ‘Oku pehē ‘e Sīsū: ‘Na‘e hoko mai ‘a e vai lahí, ‘o ‘ave ‘akinautolu kotoape.’ Ko e kakai kotoa pē ‘i tu‘a ‘i he ‘a‘aké na‘a nau mate. Ko e hā hono ‘uhingá?— Hangē ko ia na‘e lea‘aki ‘e Sīsuú, ‘na‘e ‘ikai te nau ‘amanaki.’ Na‘e ‘ikai te nau fanongo!—Mātiu 24:39, PM; Senesi 6:5-7.

Sai, manatu‘i na‘e pehē ‘e Sīsū ko e me‘a na‘e hoko ki he kakai ko iá ko ha lēsoni ia kia kitaua he ‘ahó ni. Ko e hā ‘a e lēsoni ‘e lava ke ta akó?— Sai, na‘e faka‘auha ‘a e kakaí ‘o ‘ikai koe‘uhi pē ko ‘enau koví ka koe‘uhi na‘e fu‘u femo‘uekina pē ‘a e tokolahi ia ke vahe‘i ‘a e taimí ke ako ‘o fekau‘aki mo e ‘Otuá pea fekau‘aki mo e me‘a na‘e ‘amanaki ke ne faí. ‘Oku fiema‘u ke ta tokanga ke ‘oua na‘á ta hangē ko kinautolú, ‘ikai ko ia?—

‘Okú ke fakakaukau ‘e toe faka‘auha ‘e he ‘Otuá ‘a e māmaní ‘aki ha lōmaki?— ‘Ikai, na‘e palōmesi ‘a e ‘Otuá ‘e ‘ikai te ne toe fai pehē. Na‘á ne pehē: “Kuo u ‘ai ‘eku umata ‘i he ngaahi ‘ao; pea ‘e hoko ia ko e faka‘ilonga.” Na‘e pehē ‘e Sihova ‘e hoko ‘a e ‘umatá ko ha faka‘ilonga “ ‘e ‘ikai toe hoko ‘a e vai ko e lomaki, ‘o maumau‘i ‘a e kakano kotoa pe.”—Senesi 9:11-17.

Ko ia, ‘oku lava ke ta fakapapau‘i ‘e ‘ikai ‘aupito ke toe faka‘auha ‘e he ‘Otuá ‘a e māmaní ‘aki ha lōmaki. Ka neongo ia, hangē ko ia kuó ta vakai  ki aí, ‘oku fakamatala ‘a e Tohitapú ‘o fekau‘aki mo e ngata ‘a e māmaní. ‘I he taimi ‘e fakahoko mai ai ‘e he ‘Otuá ‘a e faka‘auha ‘o e māmani ko ení, ko hai te ne fakahaofí?— Ko e kakai na‘a nau fu‘u mahu‘inga‘ia ‘i he ngaahi me‘a kehé ‘o ‘ikai ‘aupito ai te nau loto ke ako ‘o fekau‘aki mo e ‘Otuá? Ko e fa‘ahinga na‘a nau fu‘u femo‘uekina ma‘u pē ke ako ‘a e Tohitapú? Ko e hā ho‘o fakakaukaú?—

‘Okú ta loto ke ta kau ‘i he fa‘ahinga ‘e fakahaofi ‘e he ‘Otuá, ‘ikai ko ia?— ‘Ikai ko ha me‘a lelei ia kapau ‘e lava ke hangē hota fāmilí ko e fāmili ‘o Noá koe‘uhi ke fakahaofi kotoa kitautolu ‘e he ‘Otuá?— Ke ta hao ‘i he ngata ‘a e māmaní, ‘oku fiema‘u ke ta mahino‘i ‘a e founga ‘e faka‘auha ai ia ‘e he ‘Otuá pea mo hono fakahoko mai ‘a ‘ene māmani fo‘ou mā‘oni‘oní. Ta sio angé ki he founga ‘okú ne fai ai ení.

‘Oku ‘omai ‘e he Tohitapú ‘a e talí kia kitaua ‘i he Taniela vahe 2, veesi 44. ‘Oku lea ‘a e konga Tohitapú ni ‘o fekau‘aki mo hota taimí tonu ‘i he‘ene pehē: “ ‘I he taimi ‘o e ngaahi tu‘i ko ia, ko e ‘Otua ‘o Langi te ne fokotu‘u ha pule‘anga ‘e ‘ikai fulihi ‘o ta‘engata; pea ko hono pule ‘e ‘ikai tuku ki ha kakai kehe: ka te ne laiki mo faka‘auha ‘a e ngaahi pule‘anga ko ia, kae tu‘u pe ia ‘o ta‘engata.”

‘Okú ke mahino‘i ia?— ‘Oku pehē ‘e he Tohitapú, ‘e faka‘auha ‘e he pule‘anga ‘o e ‘Otuá ‘a e ngaahi pule‘anga kotoa pē ‘i he māmaní. Ko e hā hono ‘uhingá?— Koe‘uhi ‘oku ‘ikai te nau talangofua ki he Tokotaha kuo fakanofo ‘e he ‘Otuá ko e Tu‘í. Pea ko hai ia?— ‘Io, ko Sīsū Kalaisi!

‘Oku ma‘u ‘e Sihova ko e ‘Otuá ‘a e totonu ke ne fakapapau‘i ‘a e fa‘ahinga pule‘anga ‘oku totonu ke pulé, pea kuó ne fili ‘a hono ‘Aló, ‘a Sīsū, ke hoko ko e Tu‘í. ‘Oku vavé ni ke takimu‘a ‘a e Pule ‘a e ‘Otuá, ‘a Sīsū Kalaisi, ‘i hono faka‘auha ‘a e ngaahi pule‘anga kotoa pē ‘o e māmani ko ení. ‘Oku fakamatala‘i ia ‘e he Tohitapú ‘i he Fakahā vahe 19, veesi 11 ki he 16, ‘i he‘ene fakahoko ‘a e me‘á ni, hangē ko hono fakahaa‘i ‘e he fakatātā ko ení. ‘I he Tohitapú, ko e tau ‘a e ‘Otuá ke faka‘auha ‘a e ngaahi pule‘anga kotoa ‘o e māmaní ‘oku ui ia ko Hāmaketone, pe ‘Āmaketone.

 Sai, ‘oku pehē ‘e he ‘Otuá ko hono Pule‘angá te ne faka‘auha ‘a e ngaahi pule‘anga ‘o e tangatá. Ka ‘okú ne tala mai kia kitaua ke ta fai ‘a e me‘a ko iá?— ‘Ikai, ‘i he Tohitapú, ko ‘Āmaketoné ‘oku ui ko e “tau ‘o e ‘aho lahi ‘o e ‘Otua Aoniu.” (Fakahā 16:14, 16) ‘Io, ko ‘Āmaketoné ko e tau ia ‘a e ‘Otuá, pea ‘okú ne ngāue‘aki ‘a Sīsū Kalaisi ke ne tataki ‘a e kau tau fakahēvaní ‘i he taú. ‘Oku ofi ‘a e tau ‘o ‘Āmaketoné? Ta sio angé pe ‘e anga-fēfē ha‘ata ‘ilo‘i.