PEHĒ eni ‘oku tala ange ‘e ha ki‘i ta‘ahine ki he‘ene fa‘eé: “ ‘Io, ko e tuku pē ‘a e akó te u foki vave mai ki ‘apí ni.” Ka neongo ia, ‘oku nofo ia ‘o va‘inga mo hono ngaahi kaungāme‘á pea toki tala ange ki he‘ene fa‘eé: “Na‘e ‘ai ‘e he‘eku faiakó ke u nofo ‘i he tuku ‘a e akó.” ‘E sai ke lea‘aki ha me‘a pehē?—

Pe mahalo ‘oku tala ange ‘e ha ki‘i tamasi‘i ki he‘ene tamaí: “ ‘Ikai, na‘e ‘ikai te u ‘akahi ‘a e fo‘i pulú ‘i loto fale.” Kae fēfē kapau na‘á ne fai mo‘oni ia? ‘E hala ke pehē na‘e ‘ikai te ne fai ia?—

Na‘e fakahaa‘i mai ‘e he Faiako Lahí kia kitaua ‘a e me‘a ‘oku totonu ke ta faí. Na‘á ne pehē: ‘ ‘Ai ho‘omou lea ‘Ió ke ‘Io, mo ho‘omou ‘Ikaí, ke ‘Ikai; he ko ha me‘a kehe mei ai ‘oku mei he Filí ia.’ (Mātiu 5:37) Ko e hā na‘e ‘uhinga ki ai ‘a Sīsuú?— Na‘á ne ‘uhingá ‘oku totonu ke ta fai ‘a e me‘a ‘okú ta lea‘akí.

‘Oku ‘i ai ha talanoa ‘i he Tohitapú ‘oku fakahaa‘i ai ‘a e mahu‘inga ko ia ke lea‘aki ‘a e mo‘oní. ‘Oku fekau‘aki ia mo ha ongo me‘a na‘á na pehē ko e ongo ākonga kinaua ‘a Sīsū. Ta sio angé ki he me‘a na‘e hokó.

 Si‘i hifo ‘i he māhina ‘e ua mei he pekia ‘a Sīsuú, ‘oku ha‘u ‘a e kakai tokolahi mei he ngaahi feitu‘u mama‘ó ki Selusalema ki ha kātoanga mahu‘inga ‘a e kau Siú ‘oku ui ko e Penitekosí. ‘Oku fai ‘e he ‘apositolo ko Pitá ha malanga lelei mo‘oni ‘a ia ‘okú ne talanoa ai ki he kakaí ‘o fekau‘aki mo Sīsū, ‘a ia na‘e fokotu‘u ‘e Sihova mei he maté. Ko e fuofua taimi eni ki he tokolahi ‘o e fa‘ahinga kuo nau ha‘u ki Selusalemá ke nau ako ai ‘o fekau‘aki mo Sīsū. ‘Oku nau fiema‘u he taimí ni ke lahi ange ‘enau ‘iló. Ko ia, ko e hā ‘a e me‘a ‘oku nau faí?

‘Oku nau nofo ‘o fuoloa ange ‘i he taimi na‘a nau fakakaukau ki aí. Ka ‘i he hili ha taimi nounou mei ai, ‘oku ‘osi ‘a e pa‘anga ‘a e ni‘ihi ‘o kinautolu, pea ‘oku nau fiema‘u ha tokoni koe‘uhi ke nau lava ai ‘o fakatau ha‘anau me‘akai. Ko e kau ākonga ‘i Selusalemá ‘oku nau loto ke tokoni‘i ‘a e kau ‘a‘ahí. Ko ia, ko e tokolahi ‘o kinautolu ‘oku nau fakatau ‘a e ngaahi me‘a ‘oku nau ma‘ú pea ‘omi ‘a e pa‘angá ki he kau ‘apositolo ‘a Sīsuú. ‘Oku foaki leva ‘e he kau ‘apositoló ‘a e pa‘angá ki he fa‘ahinga ‘oku nau fiema‘u iá.

Ko ‘Ananaia mo hono uaifí ko Sāfaila, ‘a ia ko e mēmipa kinaua ‘o e fakataha‘anga Kalisitiane ‘i Selusalemá, ‘okú na fakatau atu hona ‘apí. ‘Oku ‘ikai ke tala ange ‘e ha taha ke na fakatau atu ia. Ko e fili pē ia ‘a kinaua. Ka ko e me‘a ‘okú na faí ‘oku ‘ikai fai ia koe‘uhi ko ‘ena ‘ofa ‘i he kau  ākonga fo‘ou ‘a Sīsuú. Ko hono mo‘oní, ‘oku loto ‘a ‘Ananaia mo Sāfaila ke ‘ai ke fakakaukau ‘a e kakaí ko e ongo me‘a lelei kinaua ‘o kehe ia mei hona tu‘unga totonú. Ko ia, ‘okú na fili leva ai ke na pehē, te na foaki kotoa atu ‘a e pa‘angá ke tokoni ki he ni‘ihi kehé. Ko hono mo‘oní, te na foaki pē ‘a e konga ‘o e pa‘angá ka ‘okú na pehē te na foaki kātoa atu ia. Ko e hā ho‘o fakakaukau ki he me‘a ko iá?—

Sai, ‘oku ha‘u ‘a ‘Ananaia ke sio ki he kau ‘apositoló. ‘Okú ne ‘oange ‘a e pa‘angá kia kinautolu. ‘Oku ‘ilo‘i mo‘oni ‘e he ‘Otuá ‘oku ‘ikai te ne ‘oange kotoa ia. Ko ia, ‘oku ‘ai ai ‘e he ‘Otuá ‘a e ‘apositolo ko Pitá ke ne ‘ilo ‘oku ‘ikai ke lea totonu ‘a ‘Ananaia ‘o fekau‘aki mo e me‘á.

‘Oku pehē atu leva ‘e Pita: ‘ ‘Ananaia, ko e hā kuó ke tuku ai ‘a Sētane ke ne ‘ai koe ke ke fai ‘a e me‘a ko ení? Ko e ‘apí na‘e ‘a‘au ia. Na‘e ‘ikai fiema‘u ke ke fakatau atu ia. Pea na‘a mo e hili ho‘o fakatau atu ‘a e ‘apí, na‘e ‘a‘au pē ke ke fili ki he me‘a te ke fai‘aki ‘a e pa‘angá. Ka ko e hā ‘okú ke fakangalingali ai ke foaki ‘a e pa‘angá kotoa kae hili iá ko e konga pē ‘okú ke foakí? ‘I he me‘á ni ‘okú ke loi ai, ‘o ‘ikai kia kimautolu pē, ka ki he ‘Otuá.’

Ko ha me‘a mamafa ‘aupito eni. ‘Oku loi ‘a ‘Ananaia! ‘Oku ‘ikai te ne fai ‘a e me‘a na‘á ne pehē te ne faí. ‘Okú ne fakangalingali pē ke fai ia. ‘Oku tala mai ‘e he Tohitapú kia kitaua ‘a e me‘a ‘oku hoko atu aí. ‘Oku pehē ai: ‘ ‘I he fanongo ki he lea ‘a Pitá, ‘oku tō ‘a ‘Ananaia ki lalo ‘o mate.’ ‘Oku taa‘i ‘e he ‘Otuá ‘a ‘Ananaia ‘o ne mate! Hili iá, ‘oku fata atu hono sinó ki tu‘a ‘o tanu.

 ‘I he ‘osi nai mei ai ‘a e houa ‘e tolu, ‘oku hū mai ‘a Sāfaila. ‘Oku ‘ikai te ne ‘ilo ki he me‘a na‘e hoko ki hono husepānití. Ko ia, ‘oku ‘eke ange ‘e Pita: ‘Na‘á mo fakatau atu ‘a e ‘apí ‘i he mahu‘inga ‘o e pa‘anga na‘á mo ‘omai kia kimautolú?’

‘Oku tali ‘e Sāfaila: ‘ ‘Io, na‘á ma fakatau atu ‘a e ‘apí ‘i he mahu‘inga pē ko iá.’ Ka ko ha loi ia! Na‘á na tauhi ma‘anaua ha konga ‘o e pa‘anga mei he fakatau atu ‘o e ‘apí. Ko ia, na‘e taa‘i ‘e he ‘Otuá ‘a Sāfaila ‘o ne mate foki.—Ngāue 5:1-11.

Ko e hā ‘oku totonu ke ta ako mei he me‘a na‘e hoko kia ‘Ananaia mo Sāfailá?— ‘Oku ako‘i ai kitaua ko e ‘Otuá ‘oku ‘ikai ke sai‘ia ‘i he fa‘ahinga ‘oku loí. ‘Okú ne fiema‘u ma‘u pē ke ta tala ‘a e mo‘oní. Ka ‘oku pehē ‘e he kakai tokolahi ia ‘oku sai pē ke loi. ‘Okú ke fakakaukau ‘oku tonu ‘a e kakai ko iá?— Na‘á ke ‘ilo ko e puke, mamahi mo e mate kotoa pē ‘i he māmaní na‘e hoko iá koe‘uhi ko ha loi?—

Manatu‘i, na‘e loi ‘a e Tēvoló ki he ‘uluaki fefiné, ‘a ‘Ivi. Na‘á ne tala kiate ia ‘e ‘ikai te ne mate kapau te ne talangata‘a ki he ‘Otuá ‘o kai ‘a e fua‘i‘akau na‘e pehē ‘e he ‘Otuá ke ‘oua te ne kaí. Na‘e tui ‘a ‘Ivi ki he Tēvoló ‘o ne kai ‘a e fua‘i‘akaú. Na‘á ne fakaloto‘i foki mo ‘Ātama ke ne kai ia. Ko e ongo faiangahala kinaua ‘i he taimi ko ení, pea ko ‘ena fānaú kotoa ‘e fanau‘i mai ko e kau angahala. Pea koe‘uhi ko e kau angahala kinautolu, ko e fānau kotoa ‘a ‘Ātamá na‘a nau faingata‘a‘ia pea mate. Na‘e anga-fēfē ‘a e kamata ‘a e faingata‘á ni kotoa?— Na‘e kamata‘aki ha fo‘i loi.

‘Oku ‘ikai ke fai ha ‘ohovale ‘i he pehē ‘e Sīsū ko e Tēvoló ‘ko ha tokotaha loi ia pea mo e tamai ‘o e loí’! Ko ia ‘a e fuofua tokotaha na‘á ne fai ‘a e loí. ‘I he taimi ‘oku fai ai ‘e ha tokotaha ha loi, ‘okú ne fai ‘a e me‘a na‘e ‘uluaki fai ‘e he Tēvoló. ‘Oku totonu ke ta fakakaukau ki he me‘á ni kapau ‘okú ta ongo‘i ‘i ha taimi ‘oku fakatauele‘i kitaua ke fai ha loi.—Sione 8:44.

 Ko fē ‘a e taimi te ke ongo‘i nai ai ‘oku fakatauele‘i koe ke ke fai ha loí?— ‘Ikai ko e taimi kuó ke fai ai ha me‘a ‘oku hala?— ‘Okú ke maumau‘i nai ha me‘a neongo ‘oku ‘ikai te ke ‘uhinga ke hoko ia. Kapau ‘oku ‘eke atu ia kia koe, ‘oku totonu ke ke pehē na‘e fai ia ‘e ho tokouá, tuofefiné pe tuonga‘ané? Pe ‘oku totonu ke ke fakangalingali ‘oku ‘ikai te ke ‘ilo pe na‘e anga-fēfē ‘a ‘ene hokó?—

Fēfē kapau na‘e totonu ke ke fai ho‘o homueká ka na‘á ke fai ha konga pē ‘o ia? ‘Oku totonu ke ke pehē na‘á ke fai kotoa ia, neongo kapau na‘e ‘ikai te ke fai pehē?— ‘Oku totonu ke ta manatu‘i ‘a ‘Ananaia mo Sāfaila. Na‘e ‘ikai te na tala ‘a e mo‘oní kotoa. Pea na‘e fakahā ‘e he ‘Otuá ‘a e kovi ‘o e me‘a ko iá ‘aki ‘ene taa‘i kinaua ‘o na mate.

Ko ia, tatau ai pē pe ko e hā nai te ta faí, ‘e ‘ai ma‘u ai pē ke kovi ange ‘a e ngaahi me‘á kapau te ta loi ‘o fekau‘aki mo ia pea ‘oku ‘ikai totonu ke ta tala na‘a mo ha konga pē ‘o e mo‘oní. ‘Oku pehē ‘e he Tohitapú: “Lea mo‘oni.” ‘Oku toe pehē ai: ‘ ‘Oua na‘a mou felohi‘aki.’ ‘Oku lea‘aki ma‘u pē ‘e Sihova ‘a e mo‘oní, pea ‘okú ne ‘amanaki te ta fai ‘a e me‘a tatau.—Efeso 4:25; Kolose 3:9, PM.