‘I HE taimi ‘e taha na‘e ‘eke ai ‘e he Faiako Lahí ha fehu‘i faka‘ohovale. Na‘e pehē: “Ko hai ia ‘eku fa‘e? pea ko hai ‘a kinautolu ko hoku ngāhi tokoua?” (Mātiu 12:48) ‘E lava ke ke tali ‘a e fehu‘i ko iá?— ‘Okú ke ‘ilo‘i nai ko e fa‘ē ‘a Sīsuú ko hono hingoá ko Mele. Ka ‘okú ke ‘ilo ‘a e hingoa ‘o hono fanga tokouá?— Na‘e ‘i ai hano fanga tuofāfine?—

‘Oku pehē ‘e he Tohitapú ko e hingoa ‘o e fanga tokoua ‘o Sīsuú ko “Semisi mo Siosefa mo Saimone mo Siutasi.” Pea na‘e ‘i ai ‘a e fanga tuofāfine ‘o Sīsū na‘a nau mo‘ui ‘i he taimi na‘á ne malanga aí. Koe‘uhi ko Sīsū ‘a e ‘uluaki tamá, ko e fa‘ahingá ni na‘a nau iiki kotoa ‘iate ia.—Mātiu 13:55, 56; Luke 1:34, 35.

Na‘e toe hoko ‘a e fanga tokoua ‘o Sīsuú ko ‘ene kau ākonga?— ‘Oku pehē ‘e he Tohitapú ko e ‘uluaki taimí na‘e “ ‘ikai te nau tui pikitai kiate ia.” (Sione 7:5) Kae kehe, ki mui ai, na‘e hoko ‘a Sēmisi mo Siutasi (‘oku toe ui ko Sute) ko ‘ene ongo ākonga, pea na‘e a‘u ‘o na hiki ha ongo tohi ‘i he Tohitapú. ‘Okú ke ‘ilo ‘a e ongo tohi na‘á na hikí?— ‘Io, ko e tohi ‘a Sēmisi mo Suté.

Neongo ko e fanga tuofāfine ‘o Sīsuú ‘oku ‘ikai ke ‘asi honau hingoá ‘i he Tohitapú, ‘okú ta ‘ilo‘i na‘e ‘ikai ke si‘i hifo ia ‘i he toko uá. Kae kehe, na‘e malava ke tokolahi ange. Na‘e hoko ‘a e fanga tuofāfine ko ení ko ‘ene kau muimui?— ‘Oku ‘ikai ha lau ki ai ‘a e Tohitapú, ko ia ‘oku ‘ikai te ta ‘ilo‘i. Ka ‘okú ke ‘ilo ‘a e ‘uhinga na‘e ‘eke ai ‘e Sīsū ‘a e fehu‘i, “Ko hai ia ‘eku fa‘e? pea ko hai ‘a kinautolu ko hoku ngāhi tokoua?”— Ta sio angé.

Na‘e ako‘i ‘e Sīsū ‘a ‘ene kau ākongá ‘i he taimi na‘e fakahoha‘asi ai ia ‘e ha taha, ‘o ne pehē: “Ko ho‘o fa‘e mo ho ngāhi tokoua ‘oku tutu‘u mei tu‘a, ‘oku nau fie lea kiate koe.” Ko ia, na‘e ngāue‘aki ‘e Sīsū ‘a e faingamālie  ko iá ke ako‘i ai ha lēsoni mahu‘inga ‘aki ‘ene ‘eke ‘a e fehu‘i faka‘ohovale ko ia: “Ko hai ia ‘eku fa‘e? pea ko hai ‘a kinautolu ko hoku ngāhi tokoua?” Na‘e mafao atu hono nimá ki he‘ene kau ākongá peá ne tali ia, ‘o ne kalanga: “Ko eni ia ‘eku fa‘e mo hoku ngāhi tokoua!”

Na‘e fakamatala‘i leva ‘e Sīsū ‘a ‘ene ‘uhingá, ‘o ne pehē: “ ‘Ilonga ‘a ia ‘oku ne fai ‘a e finangalo o ‘eku Tamai ‘oku ‘i Hevani, ko ia ia ‘a hoku tokoua, mo hoku tuofefine, mo ‘eku fa‘e.” (Mātiu 12:47-50) ‘Oku fakahaa‘i ‘e he me‘á ni ‘a e ‘ofa lahi ‘a Sīsū ‘i he‘ene kau ākongá. Na‘á ne ako‘i mai kia kitaua ko ‘ene kau ākongá na‘a nau hangē pē kiate ia hano fanga tokoua, tuofāfine mo e fanga fa‘ē mo‘oní.

‘I he taimi ko iá, ko e fanga tokoua tonu ‘o Sīsuú—‘a Sēmisi, Siosefa, Saimone mo Siutasi—na‘e ‘ikai te nau tui ko Sīsuú ko e ‘Alo ia ‘o e ‘Otuá. Kuo pau pē na‘e ‘ikai te nau tui ki he me‘a na‘e tala ‘e he ‘āngelo ko Kepalelí ki he‘enau fa‘eé. (Luke 1:30-33) Ko ia, mahalo pē na‘a nau anga-kovi kia Sīsū. Ko ha taha pē ‘oku fai pehē ‘oku ‘ikai te ne hoko ko ha tokoua, tuofefine pe tuonga‘ane mo‘oni. ‘Okú ke ‘ilo ha taha na‘á ne ngaohikovi‘i ‘a hono tokouá, tuofefiné pe tuonga‘ané?—

 ‘Oku fakamatala ‘a e Tohitapú ‘o fekau‘aki mo ‘Īsoa mo Sēkope pea mo e hoko ‘o ‘ita lahi ‘a ‘Īsoa ‘o ne pehē ai: ‘Te u tāmate‘i ‘a hoku tokoua ko Sekopé.’ Na‘e ilifia ‘aupito ‘a ‘ena fa‘eé, ‘a Lepeka, ‘o ne fekau ai ‘a Sēkope ke ‘alu koe‘uhi ke ‘oua ‘e tāmate‘i ia ‘e ‘Īsoa. (Senesi 27:41-46) Kae kehe, ‘i ha ngaahi ta‘u lahi ki mui ai na‘e liliu ai ‘a ‘Īsoa, pea na‘á ne fā‘ofua mo ‘uma kia Sēkope.—Senesi 33:4.

‘I he faai mai ‘a e taimí, na‘e toko 12 ‘a e ngaahi foha ‘o Sēkopé. Ka ko e ngaahi foha lalahi ‘o Sēkopé na‘e ‘ikai te nau ‘ofa ‘i honau tokoua si‘isi‘i ko Siosefá. Na‘a nau loto-kovi kiate ia koe‘uhi he ko ia na‘e ‘ofa taha ai ‘a ‘enau tamaí. Ko ia, na‘a nau fakatau atu ia ki ha kau fakatau pōpula ‘a ia na‘a nau fononga ki ‘Isipite. Na‘a nau tala ange leva ki he‘enau tamaí na‘e tāmate‘i ‘a Siosefa ‘e ha manu fekai. (Senesi 37:23-36) ‘Ikai ko ha me‘a kovi ‘aupito ia?—

Na‘e loto-mamahi ki mui ‘a e ngaahi tokoua ‘o Siosefá ‘i he me‘a na‘a nau faí. Ko ia, na‘e fakamolemole‘i kinautolu ‘e Siosefa. ‘Oku lava ke ke sio ki he hangē ‘a Siosefa ko Sīsuú?— Ko e kau ‘apositolo tonu ‘a Sīsuú na‘a nau hola ‘i he taimi na‘á ne faingata‘a‘ia aí, pea ko Pita na‘e a‘u ‘o ne tala ‘oku ‘ikai te ne ‘ilo‘i ia. Ka neongo ia, hangē ko Siosefá, na‘e fakamolemole‘i kotoa kinautolu ‘e Sīsū.

 Ko e ongo tautehina leva ko Keini mo ‘Ēpelí. ‘E lava foki ke ta ako ha lēsoni meiate kinaua. Na‘e vakai ‘a e ‘Otuá ki he loto ‘o Keiní na‘e ‘ikai te ne ‘ofa mo‘oni ‘i hono tokouá. Ko ia, na‘e tala ‘e he ‘Otuá kia Keini ke liliu ‘a ‘ene foungá. Kapau na‘e ‘ofa mo‘oni ‘a Keini ‘i he ‘Otuá, na‘á ne mei tokanga ki ai. Ka na‘e ‘ikai te ne ‘ofa ‘i he ‘Otuá. ‘I he ‘aho ‘e taha na‘e pehē ai ‘e Keini kia ‘Ēpeli: “Ta ō ki he ngoué.” Na‘e ‘alu ‘a ‘Ēpeli mo Keini. Lolotonga ‘ena toko ua pē ‘i he ngoué, na‘e taa‘i lahi ‘e Keini ‘a hono tokouá ‘o ne tāmate‘i ia.—Senesi 4:2-8, NW.

‘Oku tala mai ‘e he Tohitapú ‘oku ‘i ai ha lēsoni makehe ‘oku totonu ke ta ako mei he me‘a ko iá. ‘Okú ke ‘ilo‘i ia?— ‘Ko eni ‘a e fekau kuo mou fanongo ki ai talu mei he kamata‘angá: Ke tau fe‘ofa‘aki kiate kitautolu. Kae ‘ikai ke hange ko Keiní, ‘a ia na‘e ha‘u mei he tokotaha kovi.’ Ko ia, ko e fanga tokouá, tuofāfiné pe fanga tuonga‘ané ‘oku totonu ke nau fe‘ofa‘aki. ‘Oku ‘ikai totonu ke nau hangē ko Keiní.—1 Sione 3:11, 12, PM.

Ko e hā ‘e kovi ai ke hangē ko Keiní?— Koe‘uhí he ‘oku pehē ‘e he Tohitapú na‘á ne ‘ha‘u mei he tokotaha kovi,’ ko Sētane ko e Tēvoló. Koe‘uhi na‘e hangē ‘a e tō‘onga ‘a Keiní ko e Tēvoló, na‘e hangē ai ko ‘ene tamaí ‘a e Tēvoló.

‘Okú ke sio ki he ‘uhinga ‘oku mahu‘inga ai ke ‘ofa ‘i ho fanga tokouá, tuofāfiné pe fanga tuonga‘ané?— Kapau ‘oku ‘ikai te ke ‘ofa ‘ia kinautolu, ko e fānau ‘a hai ‘okú ke fa‘ifa‘itaki ki aí?— Ko e fānau ‘a e Tēvoló. ‘E ‘ikai te ke loto ke hangē ko iá, ‘ikai ko ia?— Ko ia, ‘e lava fēfē ke ke fakamo‘oni‘i ‘okú ke loto ke ke hoko ko ha ki‘i tama ‘a e ‘Otuá?— ‘Aki ho‘o ‘ofa mo‘oni ‘i ho fanga tokouá, tuofāfiné pe fanga tuonga‘ané.

Ka ko e hā ‘a e ‘ofa?— Ko e ‘ofá ko ha ongo‘i loloto ia ‘i loto ‘ia kitaua ‘a ia ‘okú ne ‘ai ke ta loto ke fai ha ngaahi me‘a lelei ma‘á e kakai kehé. ‘Okú ta fakahāhā ‘okú ta ‘ofa ‘i he ni‘ihi kehé ‘i he‘eta ma‘u ha ongo‘i ‘ofa kia kinautolu pea ‘i he‘eta fai ha ngaahi me‘a lelei ma‘anautolú. Pea ko hai ‘a hota fanga tokoua, tuofāfine pe fanga tuonga‘ane ‘oku totonu ke ta ‘ofa ki aí?— Manatu‘i, na‘e ako‘i ‘e Sīsū ko kinautolu ia ‘a e fa‘ahinga ‘oku fa‘u‘aki ‘a e fāmili lahi faka-Kalisitiané.

 Ko e hā hono mahu‘inga ke ta ‘ofa ai ‘i he fanga tokoua, tuofāfine pe fanga tuonga‘ane faka-Kalisitiane ko ení?— ‘Oku pehē ‘e he Tohitapú: “Ko ia ‘oku ‘ikai te ne ‘ofa ki hono tokoua [pe ki hono tuofefiné pe tuonga‘ané], ‘a ia kuo ne māta‘i, tala‘ehai ‘oku ne lava ke ‘ofa ki he ‘Otua, ‘a ia kuo te‘eki ke ne māta‘i?” (1 Sione 4:20) Ko ia, ‘e ‘ikai lava ke ta ‘ofa ‘i ha ki‘i tokosi‘i pē ‘i he fāmili Kalisitiané. Kuo pau ke ta ‘ofa ‘ia kinautolu kotoa. Na‘e pehē ‘e Sīsū: “Ko e me‘a kó é ‘e ‘ilo ai ‘e he kakai kotoa pē ko e kau ako kimoutolu a‘aku, ‘o kapau ‘e ai ha‘amou fe‘ofa‘aki.” (Sione 13:35) ‘Okú ke ‘ofa ‘i he fanga tokouá, tuofāfiné pe fanga tuonga‘ané kotoa?— Manatu‘i, kapau ‘oku ‘ikai, ‘e ‘ikai lava mo‘oni ke ke ‘ofa ki he ‘Otuá.

‘E lava fēfē ke ta fakahaa‘i ‘okú ta ‘ofa mo‘oni ‘i hota fanga tokouá, tuofāfiné pe fanga tuonga‘ané?— Sai, kapau ‘okú ta ‘ofa ‘ia kinautolu, ‘e ‘ikai te ta fakamama‘o meia kinautolu koe‘uhi ko e ‘ikai te ta fie talanoa kia kinautolú. Te ta anga fakakaume‘a kia kinautolu kotoa. Te ta failelei ma‘u pē kia kinautolu pea loto-lelei ke fevahevahe‘aki mo kinautolu. Pea kapau ‘e faifai ange ‘oku nau faingata‘a‘ia, te ta tokoni kia kinautolu koe‘uhi he ko kitautolú ko ha fāmili lahi mo‘oni.

‘I he‘eta ‘ofa mo‘oni ‘i he kotoa ‘o hota fanga tokouá, tuofāfiné pe fanga tuonga‘ané, ko e hā ‘oku fakamo‘oni‘i aí?— ‘Oku fakamo‘oni‘i ai ko e ongo ākonga kitaua ‘a Sīsū, ko e Faiako Lahí. Pea ‘ikai ko e me‘a ia ‘okú ta loto ki aí?—