1, 2. Ko e hā ‘oku hoko ai ‘a e Tohi Tapú ko ha me‘a‘ofa fakato‘oaloto mei he ‘Otuá?

‘OKU anga-fēfē ho‘o ongo‘í ‘i he taimi ‘oku faka‘ohovale‘i ai koe ‘e ha kaume‘a ‘i ha‘ane ‘oatu ha‘o me‘a‘ofa? ‘Oku ‘ikai te ke kei fa‘a tatali ke fakaava ia, pea ‘okú ke fiefia ‘i he fakakaukau atu kiate koe ho kaume‘á. ‘Okú ke fakamālō kiate ia ‘i he me‘a‘ofá.

² Ko e Tohi Tapú ko ha me‘a‘ofa ia mei he ‘Otuá. ‘Oku ‘omai ai kiate kitautolu ‘a e fakamatala ‘oku ‘ikai lava ke tau ma‘u mei ha toe feitu‘u. Ko e fakatātaá, ‘oku tala mai ai kiate kitautolu na‘e fakatupu ‘e he ‘Otuá ‘a e langí, ko e māmaní, mo e ‘uluaki tangatá mo e fefiné. ‘Oku ‘omai ai ‘a e ngaahi tefito‘i mo‘oni ‘a ia ‘e lava ke ne tokoni‘i kitautolu ‘i he‘etau ma‘u ha ngaahi palopalemá. ‘I he Tohi Tapú, ‘oku tau ako ai ki he founga ‘e fakahoko ai ‘e he ‘Otuá ‘ene taumu‘a ke ngaohi ‘a e māmaní ke hoko ko ha feitu‘u lelei ange. Ko e Tohi Tapú ko ha me‘a‘ofa fakato‘oaloto ia!

3. Ko e hā te ke ‘ilo‘i ‘i ho‘o ako ‘a e Tohi Tapú?

³ ‘I ho‘o ako ‘a e Tohi Tapú, te ke ‘ilo‘i ai ‘oku fiema‘u mai ‘e he ‘Otuá ke ke hoko ko hono kaume‘a. Ko e lahi ange ho‘o ako fekau‘aki mo iá, ko e hoko ia ‘o toe vāofi ange ‘a ho‘omo kaume‘á.

4. Ko e hā ‘oku maongo kiate koe ‘o fekau‘aki mo e Tohi Tapú?

⁴ Kuo liliu ‘a e Tohi Tapú ‘i he lea nai ‘e 2,600, pea kuo pulusi ‘a e tatau ‘e laui piliona. ‘Oku lava ke lau  ‘e he kakai laka hake ‘i he pēseti ‘e 90 ‘i he māmaní ‘a e Tohi Tapú ‘i he‘enau leá tonu. Pea ‘i he uike taki taha, ‘oku ma‘u ai ha Tohi Tapu ‘e he kakai laka hake he milioná! ‘Io, ‘oku ‘ikai ha toe tohi ‘e hangē ko e Tohi Tapú.

5. Ko e hā ‘oku lava ai ke tau pehē ko e Tohi Tapú “kuo fakamānava‘i ia ‘e he ‘Otuá”?

⁵ Ko e Tohi Tapú “kuo fakamānava‘i ia ‘e he ‘Otuá.” (Lau ‘a e 2 Tīmote 3:16.) Ka ‘oku fakakaukau nai ‘a e ni‘ihi, ‘Na‘e hiki ‘a e Tohi Tapú ‘e ha kau tangata, ko ia ‘e lava fēfē ke pehē ‘oku mei he ‘Otuá?’ ‘Oku tali ia ‘e he Tohi Tapú: “Na‘e lea mei he ‘Otuá ha kau tangata ‘i hono ue‘i [pe tataki] kinautolu ‘e he laumālie mā‘oni‘oní.” (2 Pita 1:21) ‘Oku meimei tatau eni mo hano tala ‘e ha tangata pisinisi ki he‘ene sekelitalí ke ne  fai ha tohi. Ko hai ‘a e fa‘utohí? Ko e tangata pisinisí, ‘o ‘ikai ko e sekelitalí. ‘I he founga tatau, ko e ‘Otuá ‘a e Fa‘utohi ‘o e Tohi Tapú, ‘o ‘ikai ko e kau tangata na‘á ne ngāue‘aki ke nau tohi iá. Na‘e tataki kinautolu ‘e he ‘Otuá ke nau hiki ‘a ‘ene ngaahi fakakaukaú. Ko e mo‘oni ko e Tohi Tapú “ko e folofola ia ‘a e ‘Otuá.”​—1 Tesalonaika 2:13; sio ki he Fakamatala ‘i he Ngata‘angá 2.

6, 7. Ko e hā ‘oku lava ai ke tau pehē ‘oku feongoongoi ‘a e Tohi Tapú?

⁶ Na‘e fe‘unga mo e ta‘u ‘e 1,600 tupu ‘a hono hiki ‘a e Tohi Tapú. Ko e fa‘ahinga na‘a nau hikí na‘a nau mo‘ui ‘i he ngaahi taimi kehekehe. Na‘e ako lelei ‘a e ni‘ihi ka na‘e ‘ikai ke ako lelei ‘a e ni‘ihi. Ko e fakatātaá, ko e toko taha ko ha toketā. Ko e ni‘ihi ko e kau ngoue, kau toutai, kau tauhi-sipi, kau palōfita, kau fakamaau, mo e ngaahi tu‘i. Neongo na‘e kehekehe ‘a e kau hiki-tohí, ‘oku feongoongoi ‘a e konga kotoa pē ‘o e Tohi Tapú. ‘Oku ‘ikai ke tala ai ha me‘a ‘i he vahe ‘e taha pea kehe ‘i he vahe ‘e taha. *

⁷ Ko e ‘uluaki ngaahi vahe ‘o e Tohi Tapú ‘oku fakamatala ai ki he anga ‘o e kamata ‘a e ngaahi palopalema ‘i he māmaní, pea ko e ngaahi vahe faka‘osí ‘oku tala mai ai ‘a e founga ‘e solova ai ‘e he ‘Otuá ‘a e ngaahi palopalema ko iá ‘aki hono ngaohi ‘a e māmaní ko ha palataisi. ‘Oku kāpui ‘i he Tohi Tapú ‘a e ta‘u ‘e laui afe  ‘o e hisitōlia ‘o e fa‘ahinga ‘o e tangatá pea fakahaa‘i ai ‘oku fakahoko ma‘u pē ‘a e taumu‘a ‘a e ‘Otuá.

8. ‘Omai ha ngaahi fakatātā ‘oku fakahaa‘i ai ‘oku tonu fakasaienisi ‘a e Tohi Tapú.

⁸ Na‘e ‘ikai hiki ‘a e Tohi Tapú ke ako‘i ai ‘a e saienisí pe ke hoko ko ha tohi fakaako, ka ko e me‘a ‘oku lea‘aki ai ‘o fekau‘aki mo e ngaahi me‘a fakasaienisí ‘oku tonu ma‘u pē. Ko e me‘a ia ‘oku tau ‘amanekina mei ha tohi ‘oku mei he ‘Otuá. Ko e fakatātaá, ko e tohi Livitikó ‘oku ‘i ai ‘a e ngaahi fakahinohino ‘a e ‘Otuá ki he ngaahi founga na‘e lava ke ta‘ofi ai ‘e he kau ‘Isilelí ‘a e mafola ‘a e mahakí. Na‘e hiki fuoloa eni ki mu‘a ke ‘ilo‘i ‘e he kakaí ‘a e anga hono fakatupunga ‘e he pekitīliá mo e ngaahi vailasí ‘a e mahakí. ‘Oku toe ako‘i totonu ‘e he Tohi Tapú ‘oku tautau ‘a e māmaní ki he hala‘ataá. (Siope 26:7) Pea ‘i he taimi na‘e tui ai ‘a e tokolahi taha ‘o e kakaí ‘oku lafalafa ‘a e māmaní, na‘e pehē ‘e he Tohi Tapú ia ‘oku fuopotopoto.​—‘Aisea 40:22.

9. Ko e hā ‘okú ne tokoni‘i kitautolu ke tau mahino‘i ‘i he faitotonu ‘a e kau hiki Tohi Tapú?

⁹ ‘I he taimi ‘oku fakamatala ai ‘a e Tohi Tapú ‘o fekau‘aki mo e hisitōliá, ‘oku tonu ma‘u pē ia. Ka ‘oku ‘ikai ke tonu faka‘aufuli ‘a e ngaahi tohi hisitōlia lahi koe‘uhí na‘e ‘ikai ke faitotonu ‘a honau kau hiki-tohí. Ko e fakatātaá, na‘e ‘ikai te nau hiki ma‘u pē ‘a e ngaahi taimi na‘e fo‘i ai honau fonuá ‘i he taú. ‘I hono kehé, na‘e faitotonu ‘a e kau hiki Tohi Tapú na‘a mo e ‘i he taimi na‘e fo‘i ai ‘a ‘Isilelí. Na‘a nau toe hiki foki ‘a ‘enau ngaahi fehālaakí tonu. Ko e fakatātaá, ‘i he tohi Nōmipá, ‘oku tala mai ai ‘e Mōsese na‘á ne fai ha fehālaaki mafatukituki pea na‘e pau ke akonaki‘i ia ‘e he ‘Otuá ‘i he me‘a ko iá. (Nōmipa 20:2-12) Ko e faitotonu  ‘a e kau hiki Tohi Tapú ‘oku fakahaa‘i ai ko e Tohi Tapú ‘oku mei he ‘Otuá. ‘Oku ‘uhinga ení ‘oku lava ke tau falala ki he Tohi Tapú.

10. Ko e hā ‘oku ‘aonga ai ‘a e fale‘i ‘a e Tohi Tapú kiate kitautolu ‘i he ‘aho ní?

¹⁰ Ko e Tohi Tapú “kuo fakamānava‘i ia ‘e he ‘Otuá pea ‘oku ‘aonga ki he akonaki, ki he valoki, ki he fakatonutonu.” (2 Tīmote 3:16) ‘Io, ko e fale‘i ‘a e Tohi Tapú ‘oku ‘aonga ia kiate kitautolu ‘i he ‘ahó ni. ‘Oku ‘ilo‘i ‘e Sihova ‘a e founga na‘e ngaohi ai kitautolú, ko ia ‘okú ne mahino‘i ‘a e anga ‘o ‘etau fakakaukaú mo ‘etau ongo‘í. ‘Okú ne ‘ilo‘i lelei ange kitautolu ‘iate kitautolu, pea ‘okú ne loto ke tau fiefia. ‘Okú ne ‘ilo‘i ‘a e me‘a ‘oku lelei kiate kitautolú mo e me‘a ‘oku kovi kiate kitautolú.

11, 12. (a) Ko e hā ‘a e fale‘i lelei na‘e fai ‘e Sīsū ‘i he Mātiu vahe 5 ki he 7? (e) Ko e hā ha toe me‘a ‘oku lava ke tau ako mei he Tohi Tapú?

¹¹ ‘I he Mātiu vahe 5 ki he 7, ‘oku tau lau ai ‘a e fale‘i lelei ‘aupito na‘e fai ‘e Sīsū ki he founga ke hoko ai ‘o fiefiá, founga ke ma‘u ai ha vaha‘angatae lelei mo e ni‘ihi kehé, founga ‘o hono fai ‘a e lotú, pea mo e founga ke vakai ‘aki ki he pa‘angá. Neongo na‘á ne fai ‘a e fale‘i ko ení ‘i he ta‘u ‘e 2,000 kuo maliu atú, ‘oku kei mālohi tatau pē ia mo ‘aonga ‘i he ‘ahó ni.

¹² ‘I he Tohi Tapú, ‘oku toe ako‘i mai ai ‘e Sihova ‘a e ngaahi tefito‘i mo‘oni ‘oku tokoni kiate kitautolu ke ma‘u ai ha mo‘ui fakafāmili ‘oku toe lelei ange, ke hoko ko e fa‘ahinga ‘oku ngāue lelei, pea ke nofo melino mo e ni‘ihi kehé. ‘Oku lava ke tokoni‘i ma‘u pē kitautolu ‘e he ngaahi tefito‘i mo‘oni ‘i he Tohi Tapú, ‘o tatau ai pē pe ko hai kitautolu, ko fē ‘oku tau nofo aí, pe ko e  hā ‘a e ngaahi palopalema ‘oku tau ma‘ú.​—Lau ‘a e ‘Aisea 48:17; sio ki he Fakamatala ‘i he Ngata‘angá 3.

13. Ko e hā na‘e tala ‘e ‘Aisea ‘e hoko ki he kolo ko Pāpiloné?

¹³ Kuo ‘osi hoko mo‘oni ‘a e ngaahi kikite lahi ‘i he Tohi Tapú. Ko e fakatātaá, na‘e kikite‘i ‘e ‘Aisea ‘e faka‘auha  ‘a Pāpilone. (‘Aisea 13:19) Na‘á ne fakamatala‘i ‘a e founga tofu pē ‘e ikuna‘i ai ‘a e koló. Na‘e malu‘i ‘a e koló ‘e ha ngaahi fu‘u matapā lalahi mo ha vaitafe. Ka na‘e tomu‘a tala ‘e ‘Aisea ‘e mātu‘u ‘a e vaitafé pea ‘e tuku fakaava ‘a e ngaahi matapaá. ‘E hamu ‘e he fa‘ahinga te nau fai ‘a e ‘ohofí ‘a e koló ‘o ‘ikai fai ha tau. Na‘e a‘u ‘o kikite‘i ‘e ‘Aisea ko ha tangata ko hono hingoá ko Kōlesi te ne ikuna‘i ‘a Pāpiloné.​—Lau ‘a e ‘Aisea 44:27–45:2; sio ki he Fakamatala ‘i he Ngata‘angá 4.

14, 15. Na‘e anga-fēfē ‘a e hoko mo‘oni ‘a e kikite ‘a ‘Aiseá?

¹⁴ ‘I he ta‘u ‘e 200 hili hono hiki ‘a e kikité, na‘e tū‘uta ai ha kau tau ‘o nau mateuteu ke ‘ohofi ‘a Pāpilone. Ko hai na‘e taki ‘i he kau taú? Hangē tofu pē ko e lau ‘a e kikité, ko Kōlesi, ‘a e tu‘i ‘o Pēsiá. Na‘e fakapapau‘i ai ‘e hoko mo‘oni ‘a e me‘a kotoa pē ‘i he toenga ‘o e kikité.

¹⁵ ‘I he pō na‘e fai ai ‘a e ‘ohofí, na‘e fai ha fu‘u kātoanga kai ‘a e kau Pāpiloné. Na‘a nau ongo‘i malu he na‘e malu‘i kinautolu ‘e he ngaahi fu‘u ‘aá pea mo e vaitafé. ‘I tu‘a ‘i he koló, na‘e keli ai ‘e Kōlesi mo ‘ene kau taú ha fakatafenga vai ke maha hifo ai ‘a e vai ‘o e vaitafé. Na‘e mamaha fe‘unga ‘a e vaí ke a‘a atu ai ‘a e kau sōtia Pēsiá. Ka ‘e lava fēfē ke hū atu ‘a e kau taú ‘i he ngaahi ‘ā ‘o  Pāpiloné? Hangē tofu pē ko e lau ‘a e kikité, na‘e tuku fakaava ‘a e ngaahi matapā ‘o e koló, ko ia na‘e hamu ai ‘e he kau sōtiá ‘a e koló ‘o ‘ikai ke fai ha tau.

16. (a) Ko e hā na‘e kikite‘i ‘e ‘Aisea fekau‘aki mo e kaha‘u ‘o Pāpiloné? (e) ‘Oku anga-fēfē ‘etau ‘ilo‘i na‘e hoko mo‘oni ‘a e kikite ‘a ‘Aiseá?

¹⁶ Na‘e kikite‘i ‘e ‘Aisea ‘e iku ‘o ‘ikai ‘aupito ke toe nofo ha taha ‘i Pāpilone. Na‘á ne tohi: “‘E ‘ikai ‘aupito ke toe nofo‘i ia, pea ‘e ‘ikai te ne hoko ko ha feitu‘u ke fai ai ha nofo ‘i he ngaahi to‘utangatá kotoa.” (‘Aisea 13:20) Na‘e hoko mo‘oni ia? ‘I he feitu‘u na‘e tu‘u ai ‘a Pāpiloné, ‘i he maile nai ‘e 50 ki he tafa‘aki fakatonga ‘o Baghdad, ‘Iulakí, ko e fokotu‘unga maumau pē ‘oku kei ‘i aí. Na‘a mo e ‘ahó ni, ‘oku ‘ikai ke nofo ai ha taha. Na‘e tafi‘i ‘e Sihova ‘a Pāpilone “‘aki ‘a e taufale ‘o e faka‘auhá.”​—‘Aisea 14:22, 23. *

17. Ko e hā ‘oku lava ai ke tau falala ki he ngaahi tala‘ofa kotoa ‘a e ‘Otuá?

¹⁷ Ko e mo‘oni‘i me‘a ko ia ‘a e ‘osi hoko mo‘oni ‘a e ngaahi kikite lahi ‘i he Tohi Tapú ‘oku ‘uhinga iá ‘e lava ke tau falala ki he me‘a ‘oku tala ‘e he Tohi Tapú fekau‘aki mo e kaha‘ú. ‘E lava ke tau fakapapau‘i ‘e fai ‘a Sihova ki he‘ene tala‘ofa ke ngaohi ‘a e māmaní ko ha palataisí. (Lau ‘a e Nōmipa 23:19.) ‘Io, ‘oku tau ma‘u ‘a e ‘amanaki ‘o e “mo‘ui ta‘engata na‘e tala‘ofa‘aki ‘e he ‘Otuá, ‘a ia ‘oku ‘ikai lava ke loí, ‘i ha taimi fuoloa ki mu‘a.”​—Taitusi 1:2. *

18. ‘Oku anga-fēfē hono fakamatala‘i ‘e Paula ‘a e “folofola ‘a e ‘Otuá”?

¹⁸ Kuo tau ‘ilo ‘oku ‘ikai ha toe tohi ‘e hangē ko e Tohi Tapú. ‘Oku feongoongoi, pea ‘i he taimi ‘oku fakamatala ai ‘o fekau‘aki mo e ngaahi me‘a fakasaienisí pe fakahisitōliá, ‘oku tonu ma‘u pē ia. ‘Oku toe ‘omai ai kiate kitautolu ‘a e fale‘i lelei pea ‘oku ‘i ai ‘a e ngaahi kikite lahi kuo ‘osi hoko mo‘oni. Ka ‘oku fai ‘e he Tohi Tapú ‘a e me‘a lahi ange ia ai. Na‘e tohi ‘e he ‘apositolo ko Paulá: “Ko e folofola ‘a e ‘Otuá ‘oku mo‘ui pea ko e koto mālohi.” ‘Oku ‘uhinga iá ki he hā?​—Lau ‘a e Hepelū 4:12.

19, 20. (a) ‘E lava fēfē ke tokoni‘i koe ‘e he Tohi Tapú ke ke ‘ilo‘i ‘a koe tonu? (e) ‘E lava fēfē ke ke fakahāhā ‘okú ke fakamālō‘ia ‘a e me‘a‘ofa ko e Tohi Tapú?

¹⁹ ‘E lava ke liliu ‘e he Tohi Tapú ‘a ho‘o mo‘uí. ‘E lava ke ne tokoni‘i koe ke ke ‘ilo‘i mo‘oni ‘a koe tonu. ‘E lava ke ne tokoni‘i koe ke ke mahino‘i ho‘o ngaahi fakakaukau mo e ongo‘i loloto tahá. Ko e fakatātaá, te tau fakakaukau nai ‘oku tau ‘ofa ki he ‘Otuá. Ka ke fakamo‘oni‘i ‘oku tau ‘ofa kiate ia, ‘oku fiema‘u ke tau ngāue‘aki ‘a e me‘a ‘oku lea‘aki ‘e he Tohi Tapú.

²⁰ Ko e mo‘oni ko e Tohi Tapú ko ha tohi mei he ‘Otuá. ‘Okú ne fiema‘u ke ke lau ia, ako ia, pea ‘ofa ai. Fakamālō‘ia‘i ‘a e me‘a‘ofa ko ení, pea hanganaki ako ia. Te ke toki mahino‘i leva ai ‘a e taumu‘a ‘a e ‘Otuá ki he fa‘ahinga ‘o e tangatá. ‘I he vahe hono hokó, te tau ako ai ‘a e me‘a lahi ange fekau‘aki mo e taumu‘a ko ení.