‘Okú ke sio ki he ta‘ahine ‘i he fakatātaá?— Ko e ‘ofefine ia ‘o e tangata ko hono hingoá ko Sēfita. ‘Oku ‘ikai ke tala mai ‘e he Tohi Tapú hono hingoá, ka ‘oku tau ‘ilo‘i na‘á ne ‘ai ke fiefia ‘ene tamaí mo Sihova. Tau ako angé fekau‘aki mo ia mo ‘ene tamai ko Sēfitá.

Ko ha tangata lelei ‘a Sēfita pea na‘á ne fakamoleki ‘a e taimi lahi ke ako‘i hono ‘ofefiné fekau‘aki mo Sihova. Na‘á ne toe hoko ko ha tangata mālohi pea ko ha taki lelei. Ko ia na‘e kole ‘e he kau ‘Isilelí ke ne tataki kinautolu ‘i he tau mo honau ngaahi filí.

Na‘e lotu ‘a Sēfita ki ha tokoni ‘a e ‘Otuá ke nau mālohi. Na‘e palōmesi ‘a Sēfita kapau ‘e ikuna, te ne ‘oatu kia Sihova ‘a e ‘uluaki tokotaha ‘e hū mai ki tu‘a mei hono  falé ‘i he taimi ‘e foki ai ki hono ‘apí. Ko e tokotaha ko ení ‘e nofo mo ngāue ‘i he kotoa ‘o ‘ene mo‘uí ‘i he tāpanekale ‘a e ‘Otuá. Ko e tāpanekalé ko ha feitu‘u ia na‘e ō ki ai ‘a e kakaí ke lotu ki he ‘Otuá ‘i he taimi ko iá. Sai, na‘e ikuna ‘a Sēfita ‘i he taú! ‘Okú ke ‘ilo‘i ‘a e tokotaha na‘e ‘uluaki hū mai ki tu‘a mei hono falé ‘i he‘ene foki ki ‘apí?—

‘Io, ko e ‘ofefine ‘o Sēfitá! Ko ‘ene ta‘ahine pē ia ‘e tahá pea ko e taimí ni ‘e ‘ave ia ‘e Sēfita. Na‘e hoko eni ‘o loto-mamahi lahi ‘a Sēfita. Kae manatu‘i, na‘á ne ‘osi fai ha palōmesi. ‘I he ‘ikai toe veiveiuá, na‘e pehē ‘e hono ‘ofefiné: ‘Tangata‘eiki, na‘á ke ‘osi fai ha palōmesi kia Sihova pea kuo pau ke ke fai ki ai.’

Na‘e loto-mamahi foki mo e ‘ofefine ‘o Sēfitá. ‘I he tāpanekalé, ‘e ‘ikai lava ke ne mali mo ma‘u ha fānau. Ka na‘á ne loto ‘aupito ke fakahoko ‘a e palōmesi ‘ene tamaí mo ‘ai ‘a Sihova ke fiefia. Na‘e mahu‘inga lahi ange eni kiate ia, ‘i ha‘ane mali pe ma‘u ha fānau. Ko ia ai, na‘á ne mavahe mei ‘api pea nofo ‘i he tāpanekalé ‘i he toenga ‘o ‘ene mo‘uí.

‘Okú ke pehē ko e me‘a na‘á ne faí na‘e fiefia ai ‘ene tamaí mo Sihova?— ‘Io, ko ia tofu pē! Kapau ‘okú ke talangofua mo ‘ofa kia Sihova, ‘e lava ke ke hangē ko e ‘ofefine ‘o Sēfitá. ‘E pehē pē mo koe foki te ke ‘ai ke fiefia ‘aupito ho‘o ongo mātu‘á mo Sihova.