1, 2. Naʻe anga-fēfē ʻa e hoko ʻa e ngaahi feinga ke fakasīlongoʻi ʻa e ongoongo leleí ʻo maʻu ai ʻa hono ola fehangahangaí ia ʻoʻona ʻi he ʻuluaki senitulí?

 KUO tō mai ha fuʻu peau ʻo e fakatanga fefeka, pea ʻoku kamata ke “ʻohofi anga-fakamanu” ʻe Saula ʻa e fakatahaʻangá​—ʻa ia ko ha kupuʻi lea ia ʻi he muʻaki leá ʻokú ne fakamatalaʻi ʻa e anga-fakamamahi mātuʻaki kakaha. (Ngā. 8:3) ʻOku hola ʻa e kau ākongá, pea ʻoku ngali hā nai ki he niʻihi ʻe hoko ʻa e taumuʻa ko ia ʻa Saula ke ne fakaʻauhamālie ʻa e lotu faka-Kalisitiané. Kae kehe, ʻoku iku ʻo hoko ha meʻa taʻeʻamanekina ia mei he movete holo ko ia ʻa e kau Kalisitiané. Ko e hā ʻa e meʻa ko iá?

² Ko e faʻahinga ko ia ʻoku nau movetevete holó ʻoku kamata ke nau “fanongonongo ʻa e ongoongo lelei ʻo e folofolá” ʻi he ngaahi fonua ko ia kuo nau hola ki aí. (Ngā. 8:4) Sioloto atu angé! Kuo ʻikai ngata pē ʻi he ʻikai lava ʻe he fakatangá ke ne fakasīlongoʻi ʻa e ongoongo leleí ka kuó ne tokoniʻi moʻoni ʻe ia ke mafola atu ai pē ʻa e pōpoakí! ʻI heʻenau ʻai ko ia ʻo movetevete holo ʻa e kau ākongá, kuo fakamafeia taʻeʻilo ai ʻe he kau fakatangá ʻa e ngāue malangaʻi ʻo e Puleʻangá ke mafola atu ʻo aʻu ki he ngaahi feituʻu mamaʻo atú. Hangē ko ia te tau sio ki aí, kuo hoko ha meʻa meimei tatau ʻi onopooni.

3. (a) Ko hai ʻa Filipe? (e) Ko e hā naʻe teʻeki ai aʻu ai ʻa e ngāue fakamalangá ki he tokolahi taha ʻi Samēliá, pea neongo iá ko e hā naʻe tomuʻa tala ʻe Sīsū ʻe hoko ki he feituʻu ko iá?

³ Ko e taha ʻo e “faʻahinga ko ia naʻe movete atú” ko Filipe. a (Ngā. 8:4; sio ki he puha “ Filipe ‘ko e ʻEvangelioó.’”) Naʻá ne ʻalu ki Samēlia, ko ha kolo ʻa ia ko e tokolahi taha aí naʻe teʻeki ai aʻu ki ai ʻa e ngāue fakamalangá, he naʻe fakahinohino ʻe Sīsū ki he kau ʻapositoló ʻi he taimi ʻe taha ki muʻa: “ʻOua naʻa mou hū ki ha kolo Samēlia; ka mou ʻalu pē ki he fanga sipi mole ʻo e fale ʻo ʻIsilelí.” (Māt. 10:5, 6) Kae kehe, naʻe ʻiloʻi  ʻe Sīsū, ʻi he faai atu ʻa e taimí, ʻe fai ʻi Samēlia ha faifakamoʻoni fakaʻāuliliki, he ki muʻa ke ne ʻalu hake ki hēvaní, naʻá ne pehē: “Te mou hoko ko e kau fakamoʻoni kiate au ʻi Selusalema, ʻi he kotoa ʻo Siuteá mo Samēlia, pea ki he feituʻu taupotu taha ʻo e māmaní.”​—Ngā. 1:8.

4. Naʻe anga-fēfē ʻa e fakafeangai ʻa e kau Samēliá ki he malanga ʻa Filipé, pea ko e hā nai ʻa e meʻa naʻe tokoni ki he anga ko ia ʻo ʻenau fakafeangaí?

⁴ Naʻe sio ʻa Filipe ko Samēliá naʻe “hina ki he utu-taʻú.” (Sione 4:35) Ko ʻene pōpoakí naʻe fakatupu ivi foʻou ia ki he faʻahinga naʻe nofo aí, pea ʻoku faingofua ke sio ki he ʻuhinga naʻe pehē aí. Naʻe ʻikai ha feangaingaʻaki ʻe taha ʻa e kau Siú pea mo e kau Samēliá, pea aʻu ki he siolalo ʻa e tokolahi ʻo e kau Siú kiate kinautolu. ʻI hono kehé, naʻe sio ʻa e kau Samēliá ko e pōpoaki ia ʻo e ongoongo leleí naʻe ʻikai ke kau ai ʻa e ngaahi fakakalakalasí, pea ko ia naʻe kehe lahi ia mei he faʻahinga fakakaukau filifilimānako ʻa e kau Fālesí. ʻI he faifakamoʻoni faivelenga mo taʻefilifilimānako ki he kau Samēliá, naʻe fakahāhā ai ʻe Filipe ko iá naʻe ʻikai ke uesia ia ʻe he tomuʻa fehiʻa ʻa e faʻahinga naʻa nau siolalo ki he kau Samēliá. ʻOku ʻikai leva ke ʻi ai ha ofo ai ʻi he fanongo fakataha “kotoa” ha fuʻu kakai ʻo e kau Samēliá kia Filipé.​—Ngā. 8:6.

5-7. ʻOmai ha ngaahi fakatātā ʻo e anga ʻo e iku atu ʻa e movetevete ʻa e kau Kalisitiané ki he mafola ʻa e ongoongo leleí.

⁵ ʻI he ʻahó ni, hangē ko ia ʻi he ʻuluaki senitulí, kuo ʻikai ke hanga ʻe he  fakatangaʻi ʻo e kakai ʻa e ʻOtuá ʻo fakasīlongoʻi ʻenau malangá. ʻI he ngaahi taimi lahi, ko hono fakamālohiʻi ʻa e kau Kalisitiané ke nau hiki mei ha feituʻu ʻe taha ki ha toe feituʻu ʻe tahá​—pe ko pilīsone pe ko ha toe fonua kehe​—ko e meʻa pē kuo hoko aí ko ʻene tokoni ʻaʻana ke fuofua tūʻuta atu ai ʻa e pōpoaki ia ʻo e Puleʻangá ki he kakai ʻi he feituʻu foʻou ko iá. Hangē ko ʻení, ʻi he lolotonga ʻo e Tau II ʻa Māmaní, naʻe malava ai ʻa e Kau Fakamoʻoni ʻa Sihová ke nau fai ha faifakamoʻoni tuʻu-ki-muʻa ʻi he ngaahi kemi fakamamahi ʻa e kau Nasí. Ko ha Siu naʻe fetaulaki ʻi ai mo e Kau Fakamoʻoní ʻokú ne fakamatala: “Ko e loto-lahi ʻa e kau pōpula ʻa ia ko e Kau Fakamoʻoni ʻa Sihová naʻá ne fakatuipauʻi ai au ko ʻenau tuí naʻe makatuʻunga ia ʻi he Folofolá​—pea naʻá ku hoko ai ʻa au tonu ko ha tokotaha Fakamoʻoni.”

⁶ ʻI he ngaahi tuʻunga ʻe niʻihi, naʻa mo e kau fakatangá naʻe fai ha faifakamoʻoni kiate kinautolu pea naʻa nau tali ia. Ko e fakatātaá, ʻi he taimi naʻe fakahikiʻi ai ha tokotaha Fakamoʻoni ko hono hingoá ko Franz Desch ki he kemi fakamamahi Gusen ʻi ʻAosituliá, naʻe malava ai ke ne ako ʻa e Tohi Tapú mo ha ʻōfisa SS Nasi. Sioloto atu ki heʻena fiefiá ʻi heʻena toe fetaulaki ʻi ha ngaahi taʻu ki mui ai ʻi ha fakataha-lahi ʻa e Kau Fakamoʻoni ʻa Sihová pea ko kinaua fakatouʻosi naʻá na hoko ko e ongo fanongonongo ʻo e ongoongo leleí!

⁷ Naʻe hoko ha meʻa meimei tatau ʻi he taimi ne fakatupunga ai ʻe he fakatangá ʻa e kau Kalisitiané ke nau hola mei he fonua ʻe taha ki ha toe fonua ʻe tahá. Ko e fakatātaá, ʻi he 1970 tupú, naʻe fakahoko ai ha faifakamoʻoni lahi ʻi Mosemipiiki ʻi he taimi naʻe fakamālohiʻi ai ʻa e Kau Fakamoʻoni Malauií ke nau hola ki aí. Naʻa mo e taimi naʻe malanga hake ai ha fakafepaki ki mui ai ʻi Mosemipīkí, naʻe hokohoko atu pē ʻa e ngāue fakamalangá ia. “Ko e moʻoni, ko e niʻihi ʻo kimautolu naʻe puke pea taki pōpula ʻi ha ngaahi taimi lahi koeʻuhi ko ʻemau ngāue fakamalangá,” ko e lau ia ʻa Francisco Coana. “Neongo ia, ʻi he taimi naʻe tali ai ʻe he tokolahi ʻa e pōpoaki ʻo e Puleʻangá, naʻa mau tuipau ai naʻe tokoniʻi kimautolu ʻe he ʻOtuá, ʻo hangē pē ko ʻene tokoniʻi ʻa e kau Kalisitiane ʻi he ʻuluaki senitulí.”

8. Kuo anga-fēfē ʻa e kaunga ʻa e ngaahi feliliuaki fakapolitikalé mo fakaʻekonōmiká ki he ngāue fakamalangá?

⁸ Ko e moʻoni, kuo ʻikai hoko ʻa e fakatangá ko e ʻuhinga pē ia ʻe taha ki he tupu ʻa e lotu faka-Kalisitiané ʻi he ngaahi feituʻu mulí. ʻI he ngaahi hongofuluʻi taʻu ki muí ni maí, kuo toe fakaava mai ʻe he ngaahi feliliuaki fakapolitikale mo fakaʻekonōmiká ha ngaahi faingamālie ki he pōpoaki ʻo e Puleʻangá ke mafola atu ai ki he kakai ʻo e ngaahi lea mo e ngaahi kulupu fakafonua lahi. Ko e faʻahinga ʻe niʻihi mei he ngaahi feituʻu ʻoku hoko ai ʻa e taú mo e ngaahi feituʻu ʻoku tōlalo fakaʻekonōmiká kuo nau hola ki he ngaahi feituʻu ko ia ʻoku maʻumaʻuluta angé pea kuo kamata ke nau ako ʻa e Tohi Tapú ʻi he fonua ʻa ia kuo nau hiki ki aí. Ko ha fuʻu fakatūʻuta mai ʻa e kau kumi hūfangá kuo hoko ʻo fakaava mai ai ha ngaahi vāhenga-ngāue lea muli. ʻOkú ke feinga ke faifakamoʻoni ki he kakai “mei he kotoa ʻo e ngaahi puleʻanga mo e ngaahi matakali mo e ngaahi kakai mo e ngaahi lea” ʻi ho feituʻú?​—Fkh. 7:9.

9. Ko hai ʻa Saimone, pea ko e hā ʻa e meʻa ʻoku hā mahino naʻá ne tohoakiʻi ia kia Filipé?

⁹ Naʻe fakahoko ʻe Filipe ʻa e ngaahi mana lahi ʻi Samēlia. Ko e fakatātaá, naʻá ne fakamoʻui ʻa e faʻahinga naʻe faingataʻaʻia fakasinó pea aʻu ki heʻene kapusi ha ngaahi laumālie ʻuli. (Ngā. 8:6-8) Naʻe ʻi ai ha tangata ʻe taha naʻe tautautefito ʻene maongo kiate ia ʻa e ngaahi meʻaʻofa fakaemana ʻa Filipé. Ko Saimone ia, ko ha tokotaha faimana ʻa ia naʻe tokaʻi lahi ʻaupito ʻo pehē ai ʻe he kakaí ʻo fekauʻaki mo ia: “Ko e tangatá ni ko e Mālohi ia ʻo e ʻOtuá.” Naʻe hoko ʻa Saimone ʻi he taimi ko ení ko ha tokotaha fakamoʻoni sio tonu ʻi he mālohi moʻoni ʻo e ʻOtuá, ʻo hangē ko ia naʻe fakamoʻoniʻi ʻi he ngaahi mana naʻe fakahoko ʻe Filipé, pea naʻe hoko ʻa Saimone ko ha tokotaha tui. (Ngā. 8:9-13) Neongo ia, ki mui aí naʻe siviʻi ai ʻa e ngaahi fakaueʻiloto ʻa Saimoné. Anga-fēfē?

10. (a) Ko e hā naʻe fai ʻe Pita mo Sione ʻi Samēliá? (e) Ko e hā naʻe fai ʻe Saimoné ʻi heʻene sio ki hono maʻu ʻe he kau ākonga foʻoú ʻa e laumālie māʻoniʻoní ʻi he taimi naʻe hilifaki ai ʻe Pita mo Sione hona nimá kiate kinautolú?

¹⁰ ʻI he taimi naʻe ʻiloʻi ai ʻe he kau ʻapositoló ʻa e tupu naʻe hoko ʻi Samēliá, naʻa nau fekauʻi atu ai ki ai ʻa Pita mo Sione. (Sio ki he puha “ Ngāueʻaki ʻe Pita ʻa e ‘Ngaahi Kī ʻo e Puleʻanga.’”) ʻI heʻena aʻu atu ki aí, naʻe hilifaki ai ʻe he ongo ʻapositoló hona nimá ʻi he kau ākonga foʻoú, ʻa ia naʻe maʻu ai ʻe he tokotaha taki taha ʻa e laumālie māʻoniʻoní. b ʻI he sio ʻa Saimone ki he meʻá ni, naʻá ne  toʻoa ai. “Foaki mai foki kiate au ʻa e mafaí ni,” ko ʻene tala ange ia ki he ongo ʻapositoló, “koeʻuhi ke ʻilonga ha taha te u hilifaki ki ai hoku nimá ke ne lava ʻo maʻu ʻa e laumālie māʻoniʻoní.” Naʻe aʻu ki he pehē ʻe Saimone te ne ʻoange kiate kinaua ha paʻanga, ʻo ne ʻamanaki atu te ne fakatau mai ʻa e monū toputapu ko ení!​—Ngā. 8:14-19.

11. Ko e hā ʻa e ekinaki ʻoku ʻoange ʻe Pita kia Saimoné, pea ʻoku anga-fēfē ʻa e tali ki ai ʻa Saimoné?

¹¹ Ko e tali ʻa Pita kia Saimoné naʻe papau. “Ke ke ʻauha fakataha mai mo hoʻo silivá,” ko e lea ia ʻa e ʻapositoló, “koeʻuhi naʻá ke fakakaukau ʻe lava ke ke maʻu ʻa e meʻaʻofa taʻetotongi ʻa e ʻOtuá ʻaki ʻa e paʻangá. ʻOku ʻikai hao kaunga pe ʻinasi ʻi he meʻá ni, he ʻoku ʻikai totonu ho lotó ʻi he vakai mai ʻa e ʻOtuá.” Naʻe ekinaki leva ʻa Pita kia Saimone ke ne fakatomala pea ke ne lotu ki ha fakamolemole. “Kōlenga kia Sihova,” ko e lea ia ʻa Pitá, “kapau ʻe malava, ke fakamolemoleʻi ʻa e taumuʻa fulikivanu ʻo ho lotó.” ʻOku hā mahino, ko Saimoné naʻe ʻikai ko ha tangata fulikivanu; naʻá ne loto ke fai ʻa e meʻa naʻe totonú, ka naʻá ne maʻu fakataimi ha fakakaukau hala. Ko ia naʻá ne kōlenga ai ki he ongo ʻapositoló: “Mo fai muʻa ha hū tōtōaki kia Sihova maʻaku ke ʻoua naʻa hoko mai kiate au ha taha ʻo e ngaahi meʻa kuó mo leaʻakí.”​—Ngā. 8:20-24.

12. Ko e hā ʻa e “simonia,” pea kuo anga-fēfē hono fakamoʻoniʻi ko ha tauhele ia ʻi he Puleʻanga-Haʻa-Kalisitiané?

¹² Ko e valoki naʻe fai ʻe Pita kia Saimoné ʻoku tuʻu ia ko ha fakatokanga ki he kau Kalisitiane ʻi he ʻaho ní. Ko hono moʻoní, ko e foʻi lea faka-Tonga ko e “simonia” naʻe liliuʻi fakafoʻilea hangatonu pē ia ʻo makatuʻunga ʻi he meʻa ko eni naʻe hokó. Ko e “simonia” ʻoku ʻuhinga ia ki hono fakatau mai pe fakatau atu ʻo e ngaahi lakangá, ʻo tautautefito ʻi ha tuʻunga fakalotu. Ko e hisitōlia ʻo Puleʻanga-Haʻa-Kalisitiané ʻa ia kuó ne tafoki ʻo fakafepaki ki he moʻoní ʻoku lahi ai ʻa e ngaahi fakatātā ʻo e foʻi tōʻonga ko ení. Ko e moʻoni, ko e pulusinga hono hiva ʻo e The Encyclopædia Britannica (1878) naʻe pehē ai: “Ko ha ako ki he hisitōlia ʻo e ngaahi fakataha ki hono fili ko ia ʻo e Tuʻi Tapú ʻoku ʻosi  angé pea maʻu ai ʻe he tokotaha akó ʻa e tuipau kuo teʻeki ai pē ke faifai ange pea ʻi ai ha foʻi fili ia ʻe taha kuo fai ʻe taʻefakameleʻi ʻe he simoniá, lolotonga iá ʻi ha ngaahi tuʻunga lahi ko e tōʻongaʻaki ko ia ʻa e simoniá ʻi he fakataha ki hono fili ʻo e Tuʻi Tapú kuo hoko ia ko e tuʻunga kovi taha, fakamā taha, pea mo maeʻeeʻa tahá.”

13. ʻI he ongo founga fē kuo pau ke maluʻi ai ʻe he kau Kalisitiané kinautolu mei he simoniá?

¹³ Ko e kau Kalisitiané kuo pau ke nau maluʻi kinautolu mei he angahala ko ia ko e simoniá. Hangē ko ení, ʻoku ʻikai totonu ke nau feinga ke fai mai ha leleiʻia ʻiate kinautolu ʻaki hono fai ha ngaahi fuʻu foaki nima-homo lahi pe fakahīkihikiʻi tōtuʻa ʻa e faʻahinga ʻoku hā ʻoku nau malava ke foaki ha toe ngaahi monū lahi ange ki he faʻahinga tāutaha ʻi he fakatahaʻangá. ʻI he tafaʻaki ʻe tahá, ko e faʻahinga ko ia ʻoku fai ʻa e fakakaukau ki ai ʻoku nau ʻi ha tuʻunga ke fakahāhā atu ha leleiʻia ki ha tahá ʻoku totonu ke nau maluʻi kinautolu ke ʻoua te nau fakahāhā ha filifilimānako ki he faʻahinga ʻoku koloaʻiá. Ko e ongo tuʻungá ni fakatouʻosi ko e toe faʻahinga ia ʻo e simoniá. Ko hono moʻoní, ko e kau sevāniti kotoa ʻa e ʻOtuá ʻoku totonu ke nau ʻai kinautolu ko ha ‘faʻahinga siʻi ange,’ ʻo tatali ki he laumālie ʻo Sihová ke ne fai ʻa e ngaahi fakanofo ki he ngaahi monū ʻo e ngāué. (Luke 9:48) ʻOku ʻikai ha feituʻu ia ʻi he kautaha ʻa e ʻOtuá ki he faʻahinga ko ia ʻoku nau feinga ke “kumi . . . ho nau ogoogolelei onautolu.”​—Pal. 25:27, PM.

14, 15. (a) Ko hai ʻa e “ʻiunoke ʻItiopea,” pea naʻe anga-fēfē hono maʻu ia ʻe Filipé? (e) Naʻe anga-fēfē ʻa e tali ʻa e tangata ʻItiopeá ki he pōpoaki ʻa Filipé, pea ko e hā naʻe ʻikai ko ha foʻi ngāue loto-ʻoho ai ʻa ʻene papitaisó? (Sio ki he fakamatala ʻi laló.)

¹⁴ Naʻe fakahinohinoʻi ʻe he ʻāngelo ʻa Sihová ʻa Filipe ʻi he taimi ko ení ke fononga atu ʻi he hala ʻoku ʻalu mei Selusalema ki Kesá. Ko ha faʻahinga fehuʻi pē naʻe fehuʻia ʻe Filipe ʻi hono ʻatamaí ʻo fekauʻaki  mo e ʻuhinga ʻoku totonu ai ke ne ʻalu ki aí naʻe tali ia ʻi he hili pē ko ia ʻene fetaulaki mo ha ʻiunoke ʻItiopea ʻa ia naʻá ne “lau leʻo-lahi ʻa e tohi ʻa e palōfita ko ʻAiseá.” (Sio ki he puha “ Ko ha ‘ʻIunoke’ ʻi he ʻUhinga Fē?”) Naʻe ueʻi ʻe he laumālie māʻoniʻoni ʻo Sihová ʻa Filipe ke ne fakaofiofi atu ki he saliote ʻa e tangatá. “ʻOkú ke ʻiloʻi moʻoni ʻa e meʻa ʻokú ke laú?” ko ʻene ʻeke ia ki he ʻItiopeá lolotonga ʻene lele atu ʻi he tafaʻaki ʻo e salioté. “ʻE lava fēfē ke faifai ange peá u ʻiloʻi,” ko e tali ange ia ʻa e ʻItiopeá, “ʻo ka ʻikai ʻi ai ha taha ke ne tataki au?”​—Ngā. 8:26-31.

¹⁵ Naʻe fakaafeʻi ʻe he ʻItiopeá ʻa Filipe ke ne heka hake ki he salioté. Sioloto atu ki he fetalanoaʻaki naʻe hoko atu aí! Ko e tokotaha ko ia ʻa ia ko e “sipi,” pe “Sevaniti,” ʻi he kikite ʻa ʻAiseá naʻe fuoloa mai ʻene hoko ko ha misitelí. (ʻAi. 53:1-12) Ka ʻi heʻena fononga atú, naʻe fakamatala ai ʻe Filipe ki he ʻiunoke ʻItiopeá ko e kikité ni naʻe fakahoko ia ʻia Sīsū Kalaisi. ʻI he hangē ko e faʻahinga naʻe papitaiso ʻi he Penitekosi ʻo e 33 T.S., ko e ʻItiopeá​—ʻa ia naʻe ʻosi hoko ko ha tokotaha ului Siú​—naʻá ne ʻiloʻi leva ʻi he taimi pē ko iá ʻa e meʻa ʻoku totonu ke ne faí. “Vakai!” ko ʻene lea ia kia Filipé. “Ko ha vai ē; ko e hā ha meʻa ʻokú ne taʻofi au mei haʻaku papitaisó?” Naʻe papitaiso leva ʻe Filipe ʻa e ʻItiopeá ʻo ʻikai toe toloi! c (Sio ki he puha “ Papitaiso ʻi ha ‘Vai.’”) ʻI he hili iá, naʻe taki ʻa Filipe ki ha vāhenga-ngāue foʻou ʻi ʻAsitoti, ʻa ia naʻá ne hokohoko atu ai hono talaki ʻa e ongoongo leleí.​—Ngā. 8:32-40.

16, 17. ʻOku anga-fēfē ʻa e kau ʻa e kau ʻāngeló ʻi he ʻahó ni ʻi he ngāue fakamalangá?

 ¹⁶ Ko e kau Kalisitiane ʻi he ʻaho ní ʻoku nau maʻu ʻa e monū ʻo e kau ʻi he ngāue hangē ko ia naʻe fai ʻe Filipé. ʻOku faʻa malava ke nau ʻoatu ʻa e pōpoaki ʻo e Puleʻangá ki he faʻahinga ʻoku nau fetaulaki ʻi he ngaahi tuʻunga ʻikai anga-mahení, ʻo hangē ko e taimi fefonongaʻakí. ʻI he ngaahi tuʻunga lahi, ʻoku hā mai ko ʻenau fetaulaki ko ia mo ha tokotaha tāutaha loto-totonú ʻoku ʻikai ko ha meʻa pē naʻe hokonoa. ʻOku totonu ke ʻamanekina ʻe hoko eni, he ʻoku fakamahino mai ʻe he Tohi Tapú ʻoku tataki ʻe he kau ʻāngeló ʻa e ngāue fakamalangá koeʻuhí ke aʻu ʻa e pōpoakí ki he “puleʻanga mo e matakali mo e lea mo e kakai kotoa pē.” (Fkh. 14:6) Ko e tataki fakaeʻāngelo ʻi he ngāue fakamalangá ko e meʻa tofu pē ia naʻe tomuʻa tala ʻe Sīsuú. ʻI heʻene talanoa fakatātā ʻo fekauʻaki mo e uité mo e teá, naʻe pehē ai ʻe Sīsū ʻi he lolotonga ʻa e taimi utu-taʻú​—ʻa e fakaʻosiʻosi ʻo e fokotuʻutuʻu lolotongá​—“ko e kau tuʻusí ko e kau ʻāngelo.” Naʻá ne tānaki mai ko e ngaahi meʻamoʻui laumālie ko ení te nau “tānaki mei hono Puleʻangá ʻa e ngaahi meʻa kotoa pē ʻoku fakatupu tūkiá pea mo e kakai ʻoku nau maumau-laó.” (Māt. 13:37-41) ʻI he taimi tatau pē, ʻe fakatahatahaʻi ʻe he kau ʻāngeló ʻa e ngaahi ʻea fakahēvani ʻo e Puleʻangá ki he kahaʻú​—pea ki mui ai “ko ha fuʻu kakai lahi” ʻo e “fanga sipi kehe”​—ʻa ia ʻoku finangalo ʻa Sihova ke ne tohoakiʻi mai ki heʻene kautahá.​—Fkh. 7:9; Sione 6:44, 65; 10:16.

¹⁷ ʻI he hoko ko ha fakamoʻoni ki he hoko ʻa e meʻá ni, ko e niʻihi ʻo e faʻahinga ʻoku tau aʻu ki ai ʻi heʻetau ngāue fakafaifekaú ʻoku nau pehē naʻa nau lotu ki ha tataki fakalaumālie. Fakakaukau angé ki ha meʻa ʻe taha naʻe hokosia ʻa ia ko ha toko ua ʻo e kau malanga ʻo e Puleʻangá naʻá na ʻalu fakataha mo ha kiʻi leka. ʻI he ngataʻanga ʻo e pongipongi ko iá, naʻe teu ke tuku ai ʻe he ongo Fakamoʻoní ʻena ngāue fakamalangá, ka naʻe vēkeveke anga-kehe ʻa e kiʻi leká ia ke ʻalu ki he ʻapi hono hokó. Ko hono moʻoní, naʻe ʻalu pē ia ʻiate ia pē ʻo ne tukituki ʻi he matapaá! ʻI hono fakaava hake ʻe ha kiʻi fefine ʻa e matapaá, naʻe fakaofiofi atu ʻa e ongo Fakamoʻoni lalahí ke talanoa kiate ia. Naʻá na ʻohovale ʻi he fakamatala mai ʻa e fefiné ko e toki ʻosi atu pē ia ʻene lotu ʻo kole ke ʻaʻahi mai ha taha kiate ia ke tokoniʻi ia ke ne mahinoʻi ʻa e Tohi Tapú. Naʻe fokotuʻutuʻu leva ha ako Tohi Tapu!

18. Ko e hā ʻoku totonu ai ke ʻoua ʻaupito naʻa tau teitei fakamaʻamaʻaʻi ʻetau ngāue fakafaifekaú?

¹⁸ ʻI he tuʻunga ko ha konga ʻo e fakatahaʻanga Kalisitiané, ʻokú ke maʻu ai ʻa e monū ʻo e ngāue fakataha mo e kau ʻāngeló ʻi hono fakahoko ko ia ʻa e ngāue fakamalanga ʻi onopōní ʻi ha tuʻunga taʻehanotataú. ʻOua ʻaupito naʻá ke teitei fakamaʻamaʻaʻi ʻa e monū ko iá. ʻI hoʻo kītaki ʻi hoʻo ngaahi feingá, te ke maʻu ai ʻa e fiefia lahi ʻi hoʻo hokohoko atu ko ia ke talaki “ʻa e ongoongo lelei ʻo fekauʻaki mo Sīsuú.”​—Ngā. 8:35.