Hangē ko ia kuó ke ako ʻi he polosiua ko ení, ʻoku ʻi he Tohi Tapú ʻa e ngaahi tefitoʻi moʻoni lahi ʻa ia te ne tokoniʻi koe mo ho fāmilí. ʻOku finangalo ʻa Sihova ke ke hoko ʻo fiefia. ʻOkú ne talaʻofa kapau te ke fakamuʻomuʻa ʻene lotú, “ʻe tānaki atu kiate kimoutolu ʻa e toe ngaahi meʻá ni kotoa.” (Mātiu 6:33) ʻOkú ne finangalo moʻoni ke ke hoko ko hono kaumeʻa. Ngāueʻaongaʻaki ʻa e faingamālie kotoa pē ke fakatupulekina ho vahaʻangatae mo e ʻOtuá. Ko e monū lahi taha eni ʻe lava ke maʻu ʻe ha taha.—Mātiu 22:37, 38.

MEʻA ʻOKU LEAʻAKI ʻE HE TOHI TAPÚ: “‘Te u hoko ko ha tamai kiate kimoutolu, pea te mou hoko ko e ngaahi foha mo e ngaahi ʻofefine kiate au,’ ko e folofola ia ʻa Sihova.” (2 Kolinitō 6:18) ʻOku finangalo ʻa Sihova ke ke hoko ko hono kaumeʻa ofi. Ko e lotú ko e founga ia ʻe taha ke fakahoko ai ení. ʻOku fakaafeʻi koe ʻe Sihova ke ke “lotu maʻu pē.” (1 Tesalonaika 5:17) ʻOkú ne vēkeveke ke fanongo ki hoʻo ngaahi fakakaukau ʻi lotó mo hoʻo ngaahi hohaʻá. (Filipai 4:6) ʻI he taimi ʻokú ke lotu fakataha ai mo ho fāmilí, te nau sio ki he founga ʻoku hoko ai ʻa e ʻOtuá ko e tokotaha moʻoni ia kiate koe.

ʻI hoʻo lotu ki he ʻOtuá, ʻoku tānaki atu ki ai ʻa e fiemaʻu ke ke fanongo kiate ia. ʻE lava ke ke fai eni ʻaki hono ako ʻene Folofolá pea mo e ʻū tohi makatuʻunga ʻi he Tohi Tapú. (Saame 1:1, 2) Fakalaulauloto ki he meʻa kuó ke akó. (Saame 77:11, 12) Ko e fanongo ki he ʻOtuá ʻoku toe fiemaʻu ki ai ʻa hoʻo ʻalu maʻu pē ki he ngaahi fakataha faka-Kalisitiané.—Saame 122:1-4.

Ko e lea ki he niʻihi kehé fekauʻaki mo Sihová ko e founga mahuʻinga ia ʻe taha ke fakaivimālohiʻi ai ho vahaʻangatae mo iá. Ko e lahi ange hoʻo fai ení, te ke ongoʻi ofi ange ai kiate iá.—Mātiu 28:19, 20.

MEʻA ʻE LAVA KE KE FAÍ:

• Vaheʻi ha taimi ʻi he ʻaho kotoa pē ke ke lau ai ʻa e Tohi Tapú fakataha mo e lotu

• ʻI he tuʻunga ko e fāmili, fokotuʻu ʻa e ngaahi ngāue fakalaumālié ke muʻomuʻa ia ʻi he fakafiefiá mo e mālōloó

MEʻA ʻOKU LEAʻAKI ʻE HE TOHI TAPÚ: “ʻUnuʻunu ofi ki he ʻOtuá, pea te ne ʻunuʻunu ofi mai kiate kimoutolu.” (Sēmisi 4:8) ʻOku fiemaʻu ke ke fokotuʻu ha taimi-tēpile pea muimui ʻi ha polokalama lotu fakafāmili tuʻumaʻu. (Sēnesi 18:19) Ka ʻoku fiemaʻu ʻa e meʻa lahi ange. ʻOku fiemaʻu ke hoko ʻa e ʻOtuá ko e konga ia ʻa hoʻo moʻui fakaʻahó. Fakaivimālohiʻi ho vahaʻangatae fakafāmili mo e ʻOtuá ʻaki ʻa e lea fekauʻaki mo ia “ʻi hoʻo nofo ʻi ho fale, pea ʻi hoʻo ʻalu ʻi he hala, pea ʻi hoʻo tokoto hifo, pea ʻi hoʻo tuʻu hake.” (Teutalōnome 6:6, 7) Fokotuʻu ia ko hoʻo taumuʻa ke ke hoko ʻo hangē ko Siosiuá, ʻa ia naʻá ne pehē: “Ka ko au mo hoku fale te mau tauhi ʻa Sihova.”—Siosiua 24:15.

MEʻA ʻE LAVA KE KE FAÍ:

• Fokotuʻu ha polokalama ako tuʻumaʻu ʻa ia ʻe lava ke ke fakakau ki ai ʻa e ngaahi fiemaʻu ʻa e mēmipa taki taha ho fāmilí