Ko Sīsū ʻa e ʻUlu ʻo e fakatahaʻanga Kalisitiané. (ʻEfesō 5:23) ʻI he ʻahó ni, ʻi he tuʻunga ko ha tuʻi ʻi hēvani, ʻoku tataki ʻe Sīsū ʻa hono kau muimui ʻi he māmaní fakafou ʻi he “tamaioʻeiki anga-tonu mo potó.” (Lau ʻa e Mātiu 24:45.) Naʻe fakanofo ʻe Sīsū Kalaisi tonu ʻa e “tamaioʻeiki” pea ʻoange ʻa e totonu ke ne fai ha ngaahi fili. Neongo ia, ko e tamaioʻeiki ko iá kuo pau ke ne talangofua kia Kalaisi pea ngāue ki he fanga tokoua ʻo Kalaisí. Ko hai ʻa e tamaioʻeiki ko iá? ʻOku anga-fēfē hono tokangaʻi kitautolu ʻe he tamaioʻeikí?

1. Ko hai ʻa e “tamaioʻeiki anga-tonu mo potó”?

Kuo ngāueʻaki maʻu pē ʻe Sihova ha tangata pe ko ha kiʻi kulupu ʻo e kau tangata ke ʻoatu ʻa e fakahinohinó ki hono kakaí. (Malakai 2:7; Hepelū 1:1) Hili ʻa e pekia ʻa Sīsuú, ko e kau ʻapositolo mo e kau mātuʻa ʻi Selusalemá naʻa nau takimuʻá. (Ngāue 15:2) ʻI he ʻahó ni, ʻi he founga tatau, ko e kiʻi kulupu ʻo e kau mātuʻá, ʻoku nau takimuʻá. ʻOku ui kinautolu ko e Kulupu Pule ʻo e Kau Fakamoʻoni ʻa Sihová. ʻOku nau tokonaki mai ʻa e meʻakai fakalaumālié pea mo e tataki ki he ngāue fakamalangá. Ko kinautolu “ʻa e tamaioʻeiki anga-tonu mo potó ʻa ia kuo fakanofo ʻe heʻene ʻeikí” ʻa Sīsū, ke tokangaʻi ʻa e ngaahi fatongia ko ení. (Mātiu 24:45a) Ko e kotoa ʻo e Kulupu Pulé ko e kau Kalisitiane pani ʻe he laumālié ʻoku nau hanga atu ke pule fakataha mo Kalaisi ʻi hono Puleʻanga fakahēvaní ʻi he taimi ʻe ngata ai ʻenau moʻui ʻi he māmaní.

2. Ko e hā ʻa e meʻakai fakalaumālie ʻoku tokonaki mai ʻe he tamaioʻeiki anga-tonú?

Naʻe pehē ʻe Sīsū ko e tamaioʻeiki anga-tonú te ne ʻomai ki he kaungā-Kalisitiané “ʻenau meʻakaí ʻi he taimi totonu.” (Mātiu 24:45e) Hangē pē ko hono tokoniʻi kitautolu ʻe he meʻakai ʻoku tau kaí ke nofoʻaki mālohi fakaesino mo moʻui leleí, ko e meʻakai fakalaumālié, ʻa e fakahinohino mei he Folofola ʻa e ʻOtuá, ʻokú ne ʻomai kiate kitautolu ʻa e mālohi ʻoku tau fiemaʻú ke hanganaki mateaki ai pē kia Sihova pea fakahoko ʻa e ngāue kuo vaheʻi mai ʻe Sīsū ke tau faí. (1 Tīmote 4:6) ʻOku tau maʻu ʻa e meʻakai fakalaumālie ko iá fakafou he ngaahi fakatahá, ʻasemipilií mo e fakataha-lahí pea pehē ki he ʻū tohi makatuʻunga ʻi he Tohi Tapú mo e ngaahi vitiō ʻokú ne tokoniʻi kitautolu ke mahinoʻi ʻa e finangalo ʻo e ʻOtuá pea fakaivimālohiʻi hotau vahaʻangatae mo iá.

 KELI LOLOTO ANGE

3. Kuo pau ke fokotuʻutuʻu maau ʻa e kakai ʻa Sihová

ʻI he tataki ʻa Sīsuú, ʻoku fokotuʻutuʻu ʻe he Kulupu Pulé ʻa e ngāue ʻa e Kau Fakamoʻoni ʻa Sihová. Naʻe tataki ʻe Sīsū ʻa e ʻuluaki kau Kalisitiané ʻi ha founga meimei tatau. Huluʻi ʻa e VITIOÓ.

Lau ʻa e 1 Kolinitō 14:33, 40, pea lāulea leva ki he fehuʻi ko ení:

• ʻOku anga-fēfē hono fakahaaʻi ʻe he ongo veesi ko ení ʻoku loto ʻa Sihova ke fokotuʻutuʻu maau ʻene Kau Fakamoʻoní?

4. Ko e tamaioʻeiki anga-tonú ʻokú ne tataki ʻetau ngāue fakamalangá

Ko e ngāue fakamalangá ʻa e ngāue mahuʻinga taha naʻe fakahoko ʻe he muʻaki kau Kalisitiané. Lau ʻa e Ngāue 8:14, 25, pea lāulea leva ki he ongo fehuʻi ko ení:

• Ko hai ʻi he muʻaki kau Kalisitiané naʻá ne ʻoatu ʻa e fakahinohino ki he founga ke fakahoko ai ʻa e ngāue fakamalangá?

• Naʻe anga-fēfē ʻa e tali ʻa Pita mo Sione ki he fakahinohino naʻe ʻoange ʻe hona kaungāʻapositoló?

Ko e ngāue fakamalangá ʻa e ngāue mahuʻinga taha ʻoku fokotuʻutuʻu ʻe he Kulupu Pulé. Huluʻi ʻa e VITIOÓ.

 Naʻe fakamamafaʻi ʻe Sīsū ʻa e mahuʻinga ʻo e ngāue fakamalangá. Lau ʻa e Maʻake 13:10, pea lāulea leva ki he ongo fehuʻi ko ení:

• Ko e hā ʻoku mātuʻaki mahuʻinga ai ʻa e ngāue fakamalangá ki he Kulupu Pulé?

• Ko e hā ʻoku tau fiemaʻu ai “ʻa e tamaioʻeiki anga-tonu mo potó” ke ne fokotuʻutuʻu ʻa e ngāue ko eni ʻoku fakahoko takatakai he māmaní?

5. ʻOku ʻomai ʻe he tamaioʻeiki anga-tonú ʻa e fakahinohino

ʻOku ʻomai ʻe he Kulupu Pulé ʻa e fakahinohino ki he kau Kalisitiane ʻi māmani lahí. ʻOku anga-fēfē ʻene fili pe ko e hā ʻa e fakahinohino ke ʻoatú? Sio ki he founga naʻe fakahoko ai eni ʻe he kulupu pule ʻo e muʻaki kau Kalisitiané. Lau ʻa e Ngāue 15:1, 2, pea lāulea leva ki he ongo fehuʻi ko ení:

• Ko e hā ʻa e meʻa naʻe ʻikai loto-tatau ai ʻa e niʻihi ʻo e muʻaki kau Kalisitiané?

• Ko hai naʻe ʻalu ki ai ʻa Paula, Panepasa mo e niʻihi kehé ke fakaleleiʻi ʻa e palopalemá?

Lau ʻa e Ngāue 15:12-18, 23-29, pea lāulea leva ki he fehuʻi ko ení:

• Ki muʻa ke fai ha fili, ko e hā naʻe lāulea ki ai ʻa e muʻaki kulupu pulé ʻi heʻenau kumi ki he tataki ʻa e ʻOtuá fekauʻaki mo e palopalemá?​—Sio ki he veesi 12, 15 mo e 28.

Lau ʻa e Ngāue 15:30, 31 mo e 16:4, 5, pea lāulea leva ki he ongo fehuʻi ko ení:

• Naʻe anga-fēfē fakafeangai ʻa e muʻaki kau Kalisitiané ki he fakahinohino naʻe ʻoatu ʻe he kulupu pulé?

• Naʻe anga-fēfē hono tāpuakiʻi ʻe Sihova ʻenau talangofuá?

Lau ʻa e 2 Tīmote 3:16 mo e Sēmisi 1:5, pea lāulea leva ki he fehuʻi ko ení:

• ʻOku hanga ki fē ʻa e Kulupu Pulé ʻi heʻenau fiemaʻu ha tataki ʻi heʻenau fai ʻa e ngaahi fili ʻi he ʻaho ní?

 FAKANOUNOU

Ko e Kulupu Pulé “ʻa e tamaioʻeiki anga-tonu mo potó” kuo fakanofo ʻe Kalaisi. ʻOkú ne ʻoatu ʻa e fakahinohino mo e meʻakai fakalaumālié ki he kau Kalisitiane takatakai he māmaní.

Fakamanatu

• Ko hai kuó ne fakanofo “ʻa e tamaioʻeiki anga-tonu mo potó”?

• ʻOku anga-fēfē hono tokangaʻi kitautolu ʻe he Kulupu Pulé?

• ʻOkú ke tui ko e Kulupu Pulé “ʻa e tamaioʻeiki anga-tonu mo potó”?