Ki he faʻahinga ʻoku nau ʻofa kia Sihova ko e ʻOtuá mo ʻene Folofolá, ʻa e Tohi Tapú:

“Te mou ʻilo ʻa e moʻoní, pea ʻe fakatauʻatāinaʻi kimoutolu ʻe he moʻoní,” ko e lea ia ʻa Sīsuú. (Sione 8:32) Fakakaukau angé ki he anga hoʻo ongoʻí ʻi hoʻo ʻuluaki ʻilo ʻa e moʻoni mei he Tohi Tapú! Naʻe fakafiefia ke ʻiloʻi ʻe lava ke tau ʻilo ʻa e moʻoní ʻi ha māmani ʻoku fonu ʻi he loí.​—2 Tīmote 3:1.

ʻOku fiemaʻu mai ʻe Sihova ko e ʻOtuá ke tau ʻilo ʻa e moʻoní. Pea koeʻuhi ʻoku tau ʻofa ʻi he kakaí, ʻoku tau loto ke talanoa kiate kinautolu fekauʻaki mo ia. Ka ʻoku ʻi ai ʻa e meʻa lahi ange ʻi he tauhi ki he ʻOtuá. Kuo pau ke tau fai hotau lelei tahá ke moʻui ʻi he tuʻunga ko e kau Kalisitiane koeʻuhi ʻoku tau fakaʻapaʻapaʻi lahi ʻa e ngaahi tefitoʻi moʻoni ʻa Sihová. Naʻe fakamatala ʻa Sīsū ki ha founga mahuʻinga ʻe lava ke tau fakamoʻoniʻi ai ki he ʻOtuá ʻoku tau ʻofa kiate ia. Naʻá ne pehē: “Kapau ʻoku mou tauhi ʻeku ngaahi fekaú, te mou nofo maʻu ʻi heʻeku ʻofá, ʻo hangē tofu pē ko ʻeku tauhi ʻa e ngaahi fekau ʻa e Tamaí mo nofo maʻu ʻi heʻene ʻofá.”​—Sione 15:10.

ʻOku ʻofa moʻoni ʻa Sīsū ʻi heʻene Tamaí, pea ʻokú ne fai ʻa e meʻa kotoa pē ʻoku fiemaʻu ʻe heʻene Tamaí ke ne faí. Kapau ʻoku tau faʻifaʻitaki kia Sīsū ʻi he founga ʻo ʻetau moʻuí, ʻe ʻofaʻi kitautolu ʻe Sihova pea te tau fiefia moʻoni. Hangē ko ia naʻe leaʻaki ʻe Sīsuú, “kapau ʻoku mou ʻiloʻi ʻa e ngaahi meʻá ni, he fiefia ē ko kimoutolu kapau ʻoku mou fai ia.”​—Sione 13:17.

ʻOku mau fakatauange ʻe tokoniʻi kimoutolu ʻe he tohí ni ke mou ako ke moʻui ʻo fakatatau ki he moʻoni mei he Tohi Tapú pea ke mou hoko ko ha kaumeʻa ʻo e ʻOtuá. Ko ʻemau lotú ia ke mou tupulekina ʻi hoʻomou ʻofa ki he ʻOtuá pea nofo maʻu “ʻi he ʻofa ʻa e ʻOtuá, . . . fakataha mo e vakai atu ki he moʻui taʻengatá.”​—Sute 21.