Kapau ‘okú ke loto ke ke hoko ko ha kaume‘a ‘o e ‘Otuá, kuo pau ke ke fai ‘a e lotu ko ia ‘oku hōifua ki ai ‘a e ‘Otuá. Na‘e pehē ‘e Sīsū “ko e kakai ‘oku lotu mo‘oni” te nau lotu ki he ‘Otuá ‘o fehoanaki mo e “mo‘oni.” (Sione 4:23, 24) ‘Oku ‘i ai ‘a e founga tonu pē ‘e taha ke lotu ai ki he ‘Otuá. (Efeso 4:4-6) ‘Oku iku ‘a e lotu mo‘oní ki he mo‘ui ta‘engatá, pea ‘oku iku ‘a e lotu loí ki he ‘auha.​—Mātiu 7:13, 14.

‘Oku lava ke ke ‘ilo‘i ‘a e lotu mo‘oní ‘aki hono siofi ‘a e kakai ‘oku nau fai iá. Koe‘uhi ‘oku lelei ‘a Sihova, ko e fa‘ahinga ko ia ‘oku nau hoko ko ‘ene kau lotu mo‘oní kuo pau pē ko e kakai lelei. Hangē pē ko e ‘omai ‘e ha fu‘u moli lelei ha ngaahi fo‘i moli lelei, ‘oku ‘omai ‘e he lotu mo‘oní ‘a e kakai lelei.​—Mātiu 7:15-20.

‘Oku ‘apasia loloto ‘a e ngaahi kaume‘a ‘o Sihová ki he Tohitapú. ‘Oku nau ‘ilo‘i ko e Tohitapú ‘oku mei he ‘Otuá ia. ‘Oku nau faka‘atā ‘a e me‘a ‘okú ne lea‘akí ke ne tataki ‘enau mo‘uí, ke solova ‘enau ngaahi palopalemá, pea ke tokoni‘i kinautolu ke nau ako ‘o fekau‘aki mo e ‘Otuá. (2 Timote 3:16) ‘Oku nau feinga ke fai ‘a e me‘a ‘oku nau malanga‘akí.

Ko e ngaahi kaume‘a ‘o Sihová ‘oku nau fakahāhā ‘a e fe‘ofa‘aki. Na‘e fakahaa‘i ‘e Sīsū ‘a e ‘ofa ki he kakaí ‘aki hono ako‘i kinautolu ‘o fekau‘aki mo e ‘Otuá, mo hono fakamo‘ui ‘a e fa‘ahinga ko ia na‘e puké. Ko e fa‘ahinga  ko ia ‘oku nau fai ‘a e lotu mo‘oní ‘oku nau toe fakahāhā ‘a e fe‘ofa‘akí. ‘I he hangē ko Sīsuú, ‘oku ‘ikai te nau siolalo ki he fa‘ahinga ko ia ‘oku nau masiva pe ‘i ha kulupu fakamatakali kehé. Na‘e pehē ‘e Sīsū ‘e ‘ilo‘i ‘e he kakaí ‘a ‘ene kau ākongá ‘i he ‘ofa ko ia ‘oku nau fefakahāhā‘akí.​—Sione 13:35.

Ko e ngaahi kaume‘a ‘o e ‘Otuá ‘oku nau fakalāngilangi‘i ‘a e huafa ‘o e ‘Otuá, ‘a Sihova. Kapau ‘oku fakafisi ha taha ke ngāue‘aki ho hingoá, ‘e hoko ‘a e tokotaha ko iá ko ho kaume‘a ofi? ‘Ikai! ‘I he taimi ‘oku ‘i ai ai hatau kaume‘á, ‘oku tau ngāue‘aki ‘a hono hingoá pea ‘oku tau lea‘aki ‘a e ngaahi me‘a lelei ‘o fekau‘aki mo e kaume‘a ko iá ki he ni‘ihi kehé. Ko ia, ko e fa‘ahinga ko ia ‘oku nau faka‘amu ke hoko ko e ngaahi kaume‘a ‘o e ‘Otuá ‘oku totonu ke nau ngāue‘aki ‘a hono huafá pea talanoa ‘o fekau‘aki mo ia ki he ni‘ihi kehé. ‘Oku fiema‘u ‘e Sihova ke tau fai ‘a e me‘a ko iá.​—Mātiu 6:9; Loma 10:13, 14.

‘I he hangē ko Sīsuú, ‘oku ako‘i ‘e he ngaahi kaume‘a ‘o e ‘Otuá ‘a e kakaí ‘o fekau‘aki mo e Pule‘anga ‘o e ‘Otuá. Ko e Pule‘anga ‘o e ‘Otuá ‘a e founga-pule fakahēvani ko ia te ne ‘ai ‘a e fo‘i māmaní ko ha palataisí. Ko e ngaahi kaume‘a ‘o e ‘Otuá ‘oku nau vahevahe atu ‘a e ongoongo lelei ko eni ‘o fekau‘aki mo e Pule‘anga ‘o e ‘Otuá ki he ni‘ihi kehé.​—Mātiu 24:14.

Ko e Kau Fakamo‘oni ‘a Sihová ‘oku nau feinga ke hoko ko e ngaahi kaume‘a ‘o e ‘Otuá. ‘Oku nau ‘apasia ki he Tohitapú pea ‘oku nau fe‘ofa‘aki. ‘Oku nau toe ngāue‘aki mo fakalāngilangi‘i ‘a e huafa ‘o e ‘Otuá pea ako‘i ‘a e ni‘ihi kehé ‘o fekau‘aki mo e Pule‘anga ‘o e ‘Otuá. Ko e Kau Fakamo‘oni ‘a Sihová ‘oku nau fai ‘a e lotu mo‘oní ‘i he fo‘i māmaní he ‘aho ní.