Ko e fili tefito ‘o e ‘Otuá ko Sētane ko e Tēvoló. Ko ha me‘amo‘ui laumālie ia ‘a ia na‘e angatu‘u kia Sihova. ‘Oku hokohoko atu ‘a Sētane ke faitau ki he ‘Otuá pea fakatupunga ‘a e faingata‘a lahi ki he fa‘ahinga ‘o e tangatá. ‘Oku fulikivanu ‘a Sētane. Ko e tokotaha-loi ia mo ha tokotaha-fakapō.​—Sione 8:44.

Na‘e kau ‘a e ngaahi me‘amo‘ui laumālie kehe mo Sētane ‘i he‘ene angatu‘u ki he ‘Otuá. ‘Oku ui kinautolu ‘e he Tohitapú ko e fanga tēmeniō. ‘I he hangē ko Sētané, ko e kau tēmenioó ko e ngaahi fili ia ‘o e fa‘ahinga ‘o e tangatá. ‘Oku nau sai‘ia ke fakamamahi‘i ‘a e kakaí. (Mātiu 9:32, 33; 12:22) ‘E faka‘auha ‘e Sihova ‘a Sētane mo ‘ene kau tēmenioó ‘o ta‘engata. ‘Oku nounou pē ‘a honau taimi ‘oku toe ki hono fakahoha‘asi ‘a e fa‘ahinga ‘o e tangatá.​—Fakahā 12:12.

Kapau ‘okú ke loto ke hoko ko e kaume‘a ‘o e ‘Otuá, kuo pau ke ‘oua te ke fai ‘a e me‘a ‘oku loto ‘a Sētane ke ke faí. Ko Sētane pea mo e kau tē­menioó ‘oku nau fehi‘a ‘ia Sihova. Ko e ngaahi fili kinautolu ‘o e ‘Otuá, pea ‘oku nau loto ke ‘ai koe ko ha fili ‘o e ‘Otuá. Kuo pau ke ke fili pe ko hai ‘okú ke loto ke fakahōifua‘í​—ko Sētane pe ko Sihova. Kapau ‘okú ke fiema‘u ‘a e mo‘ui ta‘engatá, kuo pau ke ke fili ke fai ‘a e finangalo ‘o e ‘Otuá. ‘Oku lahi ‘a e ngaahi tō‘onga mo e ngaahi founga ‘a Sētane ke kākaa‘i­‘aki ‘a e kakaí. Ko e tokolahi taha ‘o e kakaí ‘okú ne kākaa‘i ‘e ia.​—Fakahā 12:9.