Naʻe malanga ʻa Sione ʻo pehē: ‘ʻOku haʻu ha taha ʻoku lahi ange ia ʻiate au.’ ʻI he taʻu 30 nai ʻa Sīsuú, naʻá ne haʻu ai mei Kāleli ki he Vaitafe Sioataní, ʻa ia naʻe papitaiso ai ʻe Sione ʻa e kakaí. Naʻe loto ʻa Sīsū ke papitaiso ia ʻe Sione, ka naʻe pehē ange ʻe Sione: ‘ʻOku ʻikai totonu ke u papitaiso koe. Ko koe ʻoku totonu ke ke papitaiso aú.’ Naʻe tala ʻe Sīsū kia Sione: ‘ʻOku fiemaʻu ʻe Sihova ke ke papitaiso au.’ Ko ia naʻá na ō ki he Vaitafe Sioataní, pea naʻe fakauku kakato ai ʻe Sione ʻa Sīsū ʻi he vaí.

Hili ʻa e ʻalu hake ʻa Sīsū mei he vaí, naʻá ne lotu. ʻI he taimi pē ko iá, naʻe fakaava ʻa e langí, pea naʻe ʻalu hifo kiate ia ʻa e laumālie ʻo e ʻOtuá hangē ha lupé. Naʻe lea mai leva ʻa Sihova mei hēvani: “Ko hoku ʻAló koe, ʻa e ʻofeiná; kuó u hōifua ʻiate koe.”

ʻI he ʻalu hifo ʻa e laumālie ʻo Sihová kia Sīsuú, naʻá ne hoko ai ko e Kalaisí, pe Mīsaiá. Ko e taimi eni te ne kamata ai ʻa e ngāue naʻe fekauʻi mai ia ʻe Sihova ke ne fai ʻi he māmaní.

ʻI he ʻosi pē ʻene papitaisó, naʻe ʻalu ʻa Sīsū ki he toafá ʻo nofo ai ʻi he ʻaho ʻe 40. ʻI heʻene fokí, naʻá ne ʻalu ke sio kia Sione. ʻI he ʻalu atu ʻa Sīsū kiate iá, naʻe pehē ʻe Sione: ‘Ko eni ʻa e Lami ʻa e ʻOtuá ʻa ia te ne ʻave ʻa e angahala ʻa e māmaní.’ ʻI hono leaʻaki ení, naʻe ʻai ai ʻe Sione ke ʻiloʻi ʻe he kakaí ko Sīsū ʻa e Mīsaiá. ʻOkú ke ʻiloʻi ʻa e meʻa naʻe hoko kia Sīsū lolotonga ʻene ʻi he toafá? Tau sio angé ki aí.