ʻI he hili ʻa e Lōmakí, naʻe tokolahi ʻa e fānau ʻa e ngaahi foha ʻo Noá mo honau uaifí. Naʻe tupu honau ngaahi fāmilí, pea kamata ke nau mafola atu ki he tafaʻaki kehekehe ʻo e māmaní, ʻo hangē pē ko e meʻa naʻe tala ʻe Sihova ke nau faí.

Ka naʻe ʻikai ke talangofua ʻa e fāmili ʻe niʻihi kia Sihova. Naʻa nau pehē: ‘Tau langa ha kolo pea nofo ʻi heni. Te tau ngaohi ha taua māʻolunga ʻa ia ʻe aʻu ki hēvani ʻa hono tumutumú. Pea te tau ongoongoa ai.’

 Naʻe ʻikai ke fiefia ʻa Sihova ʻi he meʻa naʻe fai ʻe he kakai ko iá, ko ia naʻá ne fakapapauʻi ke taʻofi kinautolu. ʻOkú ke ʻiloʻi ʻa e founga naʻá ne fai ai iá? Naʻá ne ʻai fakafokifā ke nau lea ʻi he ngaahi lea kehekehe. Koeʻuhi ko e ʻikai kei lava ke nau femahinoʻakí, naʻe tuku ai ʻenau langá. Ko e kolo naʻa nau langá naʻe ʻiloa ia ko Pēpeli, ʻa ia ʻoku ʻuhingá ko e “Puputuʻu.” Naʻe kamata ke hiki ʻa e kakaí ʻo nofo ʻi he feituʻu kotoa ʻo e māmaní. Ka naʻe hokohoko atu pē ʻenau faikoví ʻi he ngaahi feituʻu naʻa nau nofo aí. Naʻe ʻi ai ha niʻihi naʻa nau kei ʻofa kia Sihova? Te tau sio ki ai ʻi he vahe hono hokó.