Na‘e fokotu‘utu‘u maau ‘e he ‘Otuá ‘a e ngaahi hako ‘o e pēteliake ko ‘Ēpalahamé ki ha pule‘anga pea ‘oange kiate kinautolu ha ngaahi lao. Na‘á ne ui ‘a e pule‘anga ko iá ko “‘Isileli” pea ‘ai ia ke ne malu‘i ‘a e lotu mo‘oní mo ‘ene folofolá. (Saame 147:19, 20) Ko ia na‘e malava ai ‘a e kakai ‘o e ngaahi pule‘anga kotoa pē ke nau ma‘u ‘aonga mei ‘Isileli.​—Lau ‘a e Sēnesi 22:18.

Na‘e fili ‘e he ‘Otuá ‘a e kau ‘Isilelí ke nau hoko ko ‘ene kau fakamo‘oni. ‘Oku ‘omai ‘e honau hisitōlia ‘i he kuonga mu‘á ha fakahāhā ‘o e anga ‘o e ma‘u ‘aonga ‘a e kakaí mei he talangofua ki he ngaahi lao ‘a e ‘Otuá. (Teutalōnome 4:6) Ko ia, fakafou ‘i he kau ‘Isilelí, na‘e malava ai ‘a e ni‘ihi kehé ke nau hoko ‘o ‘ilo‘i ‘a e ‘Otua mo‘oní.​—Lau ‘a e ‘Aisea 43:10, 12.

‘I he faai mai ‘a e taimí, na‘e mole ai mei ‘Isileli ‘a e hōifua ‘a e ‘Otuá, pea na‘e fetongi ‘e Sihova ‘a e pule‘anga ko iá ‘aki ‘a e fakataha‘anga Kalisitiané. (Mātiu 21:43; 23:37, 38) ‘I he taimí ni, ‘i hono fetongi ‘o e kau ‘Isilelí, ‘oku hoko ‘a e kau Kalisitiane mo‘oní ko e kau fakamo‘oni ‘a Sihova.​—Lau ‘a e Ngāue 15:14, 17.

Na‘e fokotu‘utu‘u maau ‘e Sīsū ‘a hono kau muimuí ke nau malanga mo ngaohi ākonga ‘i he ngaahi pule‘anga kotoa pē. (Mātiu 10:7, 11; 24:14; 28:19, 20) Ko e ngāué ni kuo a‘u ki hono tumutumú he taimí ni, ‘i he faka‘osi‘osi ‘o e ngaahi me‘a ‘o e fokotu‘utu‘u lolotongá. Ko e fuofua taimi eni ‘i he hisitōliá, kuo fakafā‘ūtaha‘i ai ‘e Sihova ‘a e laui miliona mei he ngaahi pule‘anga kotoa pē ‘i he lotu mo‘oní. (Fakahā 7:9, 10) ‘Oku fokotu‘utu‘u maau ‘a e kau Kalisitiane mo‘oní ke nau fefakalototo‘a‘aki mo fetokoni‘aki. ‘I māmani lahi, ‘oku nau ma‘u ai ‘a e polokalama tatau pē ‘o e fakahinohino mei he Tohi Tapú ‘i he‘enau ngaahi fakatahá.​—Lau ‘a e Hepelū 10:24, 25.

‘I he 1870 tupú, na‘e kamata ke toe ma‘u hake ai ‘e ha ki‘i kulupu ‘o ha kau ako Tohi Tapu ‘a e ngaahi mo‘oni ‘o e Tohi Tapú na‘e puli fuoloa. Na‘a nau ‘ilo na‘e fokotu‘utu‘u maau ‘e Sīsū ‘a e fakataha‘anga Kalisitiané ke malanga, ko ia na‘a nau kamata ai ha feingangāue fakavaha‘apule‘anga ko hono malanga‘i ‘o e Pule‘angá. ‘I he 1931 na‘a nau ngāue‘aki ai ‘a e hingoa Kau Fakamo‘oni ‘a Sihová.​—Lau ‘a e Ngāue 1:8; 2:1, 4; 5:42.

‘I he ‘uluaki senitulí, ko e ngaahi fakataha‘anga Kalisitiané ‘i he ngaahi fonua lahi na‘a nau ma‘u ‘aonga mei ha kulupu pule tefito na‘e lāu‘ilo kia Sīsū ko e ‘Ulu ‘o e fakataha‘angá. (Ngāue 16:4, 5) ‘Oku meimei tatau pē ‘i he ‘ahó ni, ‘oku ma‘u ‘aonga ‘a e Kau Fakamo‘oni ‘a Sihová ‘i māmani lahi mei ha Kulupu Pule ko e kau mātu‘a taukei. ‘Okú ne tokanga‘i ‘a e ngaahi ‘ōfisi va‘a ‘o e Kau Fakamo‘oni ‘a Sihová ‘a ia ‘oku nau liliu lea, pulusi, mo tufaki ‘a e ngaahi naunau fakaeako Tohi Tapu ‘i he ngaahi lea laka hake ‘i he 600. Ko ia ‘oku malava ai ‘e he Kulupu Pulé ke tokonaki mai ‘a e fakalototo‘a mo e tataki Fakatohitapu ki he ngaahi fakataha‘anga laka hake ‘i he 100,000 ‘i māmani lahi. ‘I he fakataha‘anga taki taha, ‘oku ngāue ai ha kau tangata taau ‘i he tu‘unga ko e kau mātu‘a, pe kau ‘ovasia. ‘Oku tokanga‘i anga-‘ofa ‘e he kau tangatá ni ‘a e tākanga ‘a e ‘Otuá.​—Lau ‘a e 1 Pita 5:2, 3.

‘Oku fokotu‘utu‘u maau ‘a e Kau Fakamo‘oni ‘a Sihová ke nau malanga‘i ‘a e ongoongo leleí mo ngaohi ākonga. ‘I he hangē ko e kau ‘apositoló, ‘oku tau malanga mei he fale ki he fale. (Ngāue 20:20) ‘Oku tau toe tu‘uaki atu ke ako ‘a e Tohi Tapú mo e kau ‘ofa loto-totonu ki he mo‘oní. Ka ko e Kau Fakamo‘oni ‘a Sihová ‘oku ‘ikai ko ha fo‘i kautaha ‘ata‘atā pē. Ko ha fāmili kitautolu ‘oku ‘i ai ha Tamai ‘ofa. Ko ha fanga tokoua mo ha fanga tuofāfine kitautolu ‘oku tau fetokanga‘aki. (2 Tesalonaika 1:3) Koe‘uhi ‘oku fokotu‘utu‘u maau ‘a e kakai ‘a Sihová ke nau fakahōifua‘i ‘a e ‘Otuá pea ke tokoni‘i ‘a e ni‘ihi kehé, ‘oku nau fa‘u ai ‘a e fāmili fiefia taha ‘i he māmaní.​—Lau ‘a e Saame 33:12; Ngāue 20:35.