‘OKÚ KE sio ki he me‘a ‘oku fai heni ‘e ‘Ēpalahamé? ‘Okú ne puke ha hele, pea ‘oku hangē ‘okú ne teu ke tāmate‘i hono fohá. Ko e hā hono ‘uhinga te ne fai ai iá? ‘Uluaki, te tau sio pe na‘e anga-fēfē hono ma‘u ‘e ‘Ēpalahame mo Sela ‘a ‘ena tamá.

Manatu‘i, na‘e tala‘ofa ‘e he ‘Otuá kiate kinaua te na ma‘u ha tamasi‘i. Ka na‘e hangē ‘e ‘ikai ‘aupito malava eni, koe‘uhi he na‘e fu‘u motu‘a ‘a ‘Ēpalahame mo Sela. Kaekehe, na‘e tui ‘a ‘Ēpalahame ‘e malava pē ‘e he ‘Otuá ‘a e me‘a ‘oku hangē ‘e ‘ikai malavá. Ko ia ko e hā na‘e hokó?

‘I he hili ‘a hono fai ‘e he ‘Otuá ‘ene tala‘ofá pea ‘osi atu mo e ta‘u kakato ‘e taha. Pea ‘i he ta‘u 100 ‘a ‘Ēpalahame pea ta‘u 90 ‘a Selá, na‘á na ma‘u ha pēpē tangata na‘e fakahingoa ko ‘Aisake. Na‘e tauhi pē ‘e he ‘Otuá ‘ene tala‘ofá!

Ka ‘i he hoko ‘a ‘Aisake ‘o lahi angé, na‘e ‘ahi‘ahi‘i ‘e Sihova ‘a e tui ‘a ‘Ēpalahamé. Na‘á ne ui ia: ‘ ‘Ēpalahame!’ Pea tali ‘e ‘Ēpalahame: ‘⁠Ko au ‘eni!’ Pea toki pehē ‘e he ‘Otuá: ‘ ‘E, ke ke ‘ave ho fohá, ‘a ho foha pē taha, ko ‘Aisake, pea ‘alu mo koe ki he mo‘unga te u fakahā kiate koe. Pea tāmate‘i ho fohá ‘i ai ‘o foaki ia ko ha feilaulau.’

Na‘e fu‘u fakamamahi ‘a e ngaahi lea ko iá kia ‘Ēpalahame, koe‘uhi he na‘e fu‘u ‘ofa ‘aupito ‘a ‘Ēpalahame ‘i hono fohá. Pea manatu‘i foki, na‘e tala‘ofa ‘e he ‘Otuá ‘e nofo ‘a e fānau ‘a ‘Ēpalahamé ‘i he fonua ko Kēnaní. Ka ‘e malava fēfē ke hoko ‘eni ‘o kapau ‘e mate ‘a ‘Aisake? Na‘e ‘ikai mahino ‘eni ia kia ‘Ēpalahame, ka na‘á ne kei talangofua pē ki he ‘Otuá.

‘I he a‘u ki he mo‘ungá, na‘e ha‘i ‘e ‘Ēpalahame ‘a ‘Aisake ‘o hili ia ‘i he funga ‘ōlita na‘á ne ngaohi. Peá ne to‘o hake ‘ene helé ke tāmate‘i hono fohá. Ka ‘i he taimi pē ko iá na‘e ui mai ha ‘āngelo ‘a e ‘Otuá: ‘ ‘Ēpalahame, ‘Ēpalahame!’ Pea tali ‘e ‘Ēpalahame: ‘⁠Ko au ‘eni!’

Na‘e pehē ‘e he ‘Otuá: ‘ ‘Oua te ke fakalavea‘i ‘a e tamá, pe fai ha me‘a ki ai. ‘Oku ou toki ‘ilo ‘okú ke tui kiate au, koe‘uhi na‘e ‘ikai te ke ta‘ofi meiate au ho fohá, ko ho foha pē taha.’

Ko e tui lahi ē na‘e ma‘u ‘e ‘Ēpalahame ki he ‘Otuá! Na‘á ne tui ‘oku ‘ikai ha me‘a ‘e ta‘emalava ‘e Sihova, pea ‘e toe lava ‘e Sihova ke fokotu‘u mai ‘a ‘Aisake mei he maté. Ka na‘e ‘ikai ko e finangalo mo‘oni ia ‘o e ‘Otuá kia ‘Ēpalahamé ke tāmate‘i ‘a ‘Aisake. Ko ia na‘e ‘ai ‘e he ‘Otuá ha sipi ke fihia ‘i he ki‘i ‘ulu‘akau ofi ki ai, peá ne tala kia ‘Ēpalahame ke fai‘aki ia ‘a e feilaulaú kae ‘ikai ko hono fohá.