‘OKÚ KE ongo‘i faka‘ofa‘ia ‘i he tangata mahaki ko ‘ení? Ko hono hingoá ko Siope, pea ko e fefiné ko hono uaifí ia. ‘Okú ke ‘ilo pe ko e hā ‘okú ne tala ange kia Siopé? ‘⁠Lau kovi ki he ‘Otuá ka ke mate.’ Tau sio ange pe ko e hā na‘á ne lea‘aki ai ha me‘a pehē, pea ko e hā hono ‘uhinga na‘e faingata‘a‘ia lahi ai ‘a Siopé.

Ko Siopé ko e tangata angatonu na‘e talangofua kia Sihova. Na‘á ne nofo ‘i he fonua ko ‘Usa, ‘a ia na‘e ‘ikai ke fu‘u mama‘o mei Kēnani. Na‘e ‘ofa lahi ‘aupito ‘a Sihova ‘ia Siope, ka na‘e ‘i ai ‘a e tokotaha na‘e fehi‘a kiate ia. ‘Okú ke ‘ilo pe ko hai?

Ko Sētane ko e Tēvoló. Manatu‘i, ko Sētané ko e ‘āngelo kovi ia ‘oku fehi‘a kia Sihova. Na‘á ne malava ke ‘ai ‘a ‘Ātama mo ‘Ivi ke na talangata‘a kia Sihova, pea na‘á ne fakakaukau te ne lava ke ‘ai ‘a e tokotaha kotoa pē foki ke talangata‘a kia Sihova. Ka na‘á ne malava ke fai ‘a e me‘a ko ‘ení? ‘Ikai. Fakakaukau ange ki he kau tangata mo e kau fefine angatonu kuo tau ako ‘o kau ki ai. Ko e toko fiha te ke lava ke manatu‘i honau hingoá?

‘I he hili ‘a e mate ‘a Sēkope mo Siosifa ‘i ‘Isipité, ko Siope ‘a e tangata na‘e angatonu taha ki he ‘Otuá ‘i he māmaní kotoa. Na‘e fiema‘u ‘e Sihova ke ‘ai ke ‘ilo ‘e Sētane he‘ikai te ne lava ‘o ‘ai ‘a e tokotaha kotoa pē ke kovi, ko ia na‘á ne pehē: ‘⁠Vakai kia Siope. Sio ki he lahi ‘o ‘ene angatonu kiate aú.’

Na‘e kikihi ‘a Sētane: ‘ ‘Okú ne angatonú koe‘uhi ko ho‘o tāpuaki‘i iá pea kuó ne ma‘u ‘a e ngaahi me‘a lelei lahi. Ka ‘o kapau te ke to‘o ‘a e ngaahi me‘á ni, te ne lau kovi kiate koe.’

Ko ia na‘e pehē ‘e Sihova: ‘⁠Sai. To‘o kotoa ‘ene ngaahi me‘á. Fai ‘a e me‘a kotoa ‘oku kovi ‘okú ke fie fai kia Siopé. Te tau toki sio pe te ne lau kovi kiate au. Kae ‘oua ‘e tāmate‘i ia.’

‘Uluakí, na‘e ‘ai ‘e Sētane ha kau tangata ke kaiha‘asi ‘a e fanga pulu mo e fanga kāmeli ‘a Siopé, pea na‘e tāmate‘i mo ‘ene fanga sipí. Pea na‘e toki tāmate‘i leva hono ngaahi foha mo e ngaahi ‘ofefine ‘e toko 10 ‘i he afā. Ko hono hokó, na‘e taa‘i‘aki ‘e Sētane ‘a Siope ‘a e mahaki fakalilifú ni. Na‘e faingata‘a‘ia lahi ‘aupito ‘a Siope. Ko hono ‘uhinga ia na‘e pehē ai ‘e he uaifi ‘o Siopé kiate ia: ‘⁠Lau kovi ki he ‘Otuá ka ke mate.’ Ka na‘e ‘ikai fai ia ‘e Siope. Na‘e toe ha‘u foki ‘a e ngaahi kaungāme‘a loi ‘e toko tolu pea nau tala kiate ia kuó ne mo‘ui‘aki ha founga kovi. Ka na‘e kei tauhi angatonu pē ‘a Siope ia.

Na‘e ‘ai ‘e he me‘á ni ke fiefia ‘aupito ai ‘a Sihova, pea ki mui mai na‘á ne tāpuaki‘i ‘a Siope ‘o hangē ko ia ‘okú ke sio ki ai ‘i he fakatātā ko ‘ení. Na‘á ne fakamo‘ui ia mei hono mahakí. Na‘e toe ma‘u foki ‘e Siope ha‘ane fānau faka‘ofo‘ofa ‘e toko 10, pea toe liunga ua ‘a e tokolahi ‘o ‘ene fanga pulu, fanga sipi mo e fanga kāmeli ‘i he me‘a na‘á ne ma‘u ki mu‘a atú.

Te ke angatonu ma‘u pē kia Sihova ‘o hangē ko Siopé? Kapau te ke pehē, ‘e tāpuaki‘i foki mo koe ‘e he ‘Otuá. Te ke malava leva ke mo‘ui ta‘engata ‘i he taimi ‘e hoko ai ‘a e māmaní fakakātoa ‘o faka‘ofo‘ofa hangē pē ko e ngoue ko ‘Ītení.