‘OKÚ KE sio ki he me‘a ‘oku lolotonga hokó? Ko e kau tangata tau kotoa ‘eni ‘a ‘Isilelí. Ko e kau tangata ‘oku nau punoú ko ‘enau inu. Ko e Fakamaau ko Kitioné ‘okú ne tu‘u ‘o ofi kiate kinautolú. ‘Okú ne vakai‘i ‘a e anga ‘o ‘enau inu ‘a e vaí.

Vakai fakalelei ange ki he ngaahi founga kehekehe ‘a e inu ‘a e kau tangatá. Ko e ni‘ihi ‘oku nau hanga honau matá ki he vaí. Ka ko e toko taha ia ‘okú ne ‘ohake pē ‘a e vaí ‘aki hono nimá, kae lava ke ne sio ki he me‘a ‘e hoko takatakai ‘iate iá. ‘Oku mahu‘inga eni, he na‘e tala ‘e Sihova kia Kitione ke ne fili pē ‘a e kau tangata ‘oku nau sio holo lolotonga ‘enau inú. Na‘e pehē ‘e he ‘Otuá ke fekau hono toé ke foki ki ‘api. Tau sio ange pe ko e hā hono ‘uhingá.

Na‘e toe faingata‘a‘ia lahi ‘a e kau ‘Isilelí. Ko hono ‘uhingá ko e ‘ikai te nau talangofua kia Sihová. Na‘e pule‘i mo fakamamahi‘i kinautolu ‘e he kakai Mitiané. Ko ia na‘e tangi ‘a e kakai ‘Isilelí kia Sihova ke tokoni, pea na‘e fanongo ‘a Sihova ki he‘enau tangí.

Na‘e tala ‘e Sihova kia Kitione ke ‘ai ha kau tau, ko ia na‘e fakataha‘i ‘e Kitione ha kau tangata tau ‘e toko 32,000. Ka na‘e ‘i ai ‘a e kau tangata tau ia ‘e toko 135,000 na‘e tu‘u mai ke faitau ki ‘Isileli. Ka na‘e tala ‘e Sihova kia Kitione: ‘ ‘Oku fu‘u tokolahi ho‘o kau tangatá.’ Ko e hā na‘e lea pehē ai ‘a Sihová?

Ko hono ‘uhingá he kapau ‘e ikuna ‘e ‘Isileli ‘a e taú, te nau fakakaukau nai ko e ikuna pē ‘anautolu. Te nau fakakaukau nai na‘e ‘ikai fiema‘u kiate kinautolu ha tokoni meia Sihova ka nau toki ikuna. Ko ia na‘e tala ‘e Sihova kia Kitione: ‘⁠Tala ki he kau tangata kotoa ‘oku nau ilifiá ke foki ki honau ‘apí.’ ‘I hono fai ‘eni ‘e Kitioné, ko e toko 22,000 ‘o ‘ene kau tangatá na‘a nau foki ki honau ngaahi ‘apí. Na‘e toe pē ‘a e kau tangata tau ‘e toko 10,000 ke faitau mo e kau sōtia ‘e toko 135,000 ko ‘ení.

Ka ke fanongo! Na‘e pehē ‘e Sihova: ‘ ‘Oku kei fu‘u tokolahi pē ‘a e kau tangatá ia.’ Ko ia na‘á ne tala kia Kitione ke ‘ai ‘a e kau tangatá ke nau inu ‘i he vaitafe ko ‘ení pea fakafoki leva ki ‘api ‘a e kakai kotoa pē na‘e hanga honau matá ki he vaí ‘i he‘enau inú. Na‘e tala‘ofa ‘e Sihova: ‘⁠Te u ‘oatu kiate koe ‘a e ikuná ‘aki ‘a e kau tangata ‘e 300 na‘a nau sio takai holo lolotonga ‘enau inú.’

Na‘e hoko ‘a e taimi ke fai ‘a e taú. Na‘e ‘ai ‘e Kitione ‘ene kau tangata ‘e toko 300 ki ha kulupu ‘e tolu. Na‘á ne ‘oange ki he tangata taki taha ha me‘a fakalea mo ha siā ‘oku fa‘o ai ha tūhulu. ‘I he a‘u ki he tu‘uapō, na‘a nau ‘ātakai‘i ‘a e ‘apitanga ‘o e kau sōtia ko e filí. Pea na‘a nau ifi ‘i he taimi tatau pē ‘enau ngaahi me‘aleá pea ha‘aki ‘enau ngaahi siā mo nau kaila: ‘⁠Ko e heletā ‘a Sihova mo Kitione!’ ‘I he ‘ā hake ‘a e kau sōtia ko e filí, na‘a nau puputu‘u mo ilifia. Na‘a nau kamata ke hola, pea na‘e ikuna ‘e he kau ‘Isilelí ‘a e taú.