‘I HE ‘osi hono tāmate‘i ‘e Tēvita ‘a Kolaiaté, na‘e ‘omai ‘a Tēvita kia Saula ‘e he ‘eikitau ‘o e kau ‘Isilelí ko ‘Āpina. Na‘e fiefia ‘aupito ‘a Saula ‘ia Tēvita. Na‘á ne fokotu‘u ia ko e ‘eikitau pea na‘e toe ‘ave foki ia ‘o nofo ‘i he fale ‘o e tu‘í.

Ki mui mai, ‘i he foki mai ‘a e kau taú mei he‘enau tau mo e kau Filisitiá, na‘e hiva ‘a e kau fefiné: ‘⁠Kuo tāmate‘i ‘e Saula ‘a e toko afe, ka ko e toko mano ‘a Tēvita.’ Na‘e hanga ‘e he me‘a ko ‘ení ‘o ‘ai ‘a Saula ke meheka, koe‘uhi kuo ‘oange ‘a e lāngilangi lahi ange kia Tēvita ‘ia Saula. Ka na‘e ‘ikai ke meheka ‘a e foha ia ‘o Saula ko Sionatané. Na‘á ne fu‘u ‘ofa ‘aupito ‘ia Tēvita pea na‘e ‘ofa pehē foki mo Tēvita ‘ia Sionatane. Ko ia na‘á na fetala‘ofa‘aki te na hoko ma‘u ai pē ko e ongo kaungāme‘a.

Ko Tēvitá ko e tokotaha tā ha‘ape lelei, pea na‘e sai‘ia ‘aupito ‘a Saula ‘i he ngaahi fasi na‘á ne taá. Ka ‘i he ‘aho ‘e taha na‘e ‘ai ‘e he meheká ‘a Saula ke ne fai ha me‘a ‘oku kovi ‘aupito. ‘I he lolotonga tā ‘e Tēvita ‘a e ha‘apé, na‘e to‘o ‘e Saula ‘ene taó ‘o ne velo‘i‘aki ia ‘a Tēvita mo ne pehē: ‘⁠Te u velo‘i ‘a Tēvita ki he holisí ‘aki ‘a e taó!’ Ka na‘e kalo ‘a Tēvita ia, pea ‘ikai ke tau ai ‘a e taó. Ki mui ai na‘e toe hoka‘i ‘e Saula ‘a Tēvita ‘aki ‘a e taó kae hala pē. Ko ia na‘e ‘ilo leva ‘e Tēvita kuo pau ke ne tokanga ‘aupito.

‘Okú ke manatu‘i ‘a e tala‘ofa na‘e fai ‘e Saulá? Na‘á ne pehē te ne ‘oange hono ‘ofefiné ke hoko ko e uaifi ia ‘o e tangata te ne tāmate‘i ‘a Kolaiaté. Faifai atu pē pea na‘e toki tala ange ‘e Saula kia Tēvita ‘e lava ke ne mali mo hono ‘ofefine ko Maikale, ka kuo pau ke ne ‘uluaki tāmate‘i ‘a e toko 100 ‘o e ngaahi fili ko e kau Filisitia. Fakakaukau ange ki ai! Na‘e ‘amanaki mo‘oni ‘a Saula ‘e tāmate‘i ‘e he kau Filisitiá ‘a Tēvita. Ka na‘e ‘ikai, pea ko ia na‘e ‘ave ai ‘e Saula hono ‘ofefiné ke hoko ko e uaifi ‘o Tēvita.

‘I he ‘aho ‘e taha na‘e tala ai ‘e Saula kia Sionatane mo e kotoa ‘o ‘ene kau sevānití ‘okú ne fiema‘u ke tāmate‘i ‘a Tēvita. Ka na‘e lea ange ‘a Sionatane ki he‘ene tamaí: ‘ ‘Oua te ke fakalavea‘i ‘a Tēvita. Kuo te‘eki ai ke ne faihala kiate koe. Ka ‘i he me‘a kotoa kuó ne faí ko ha tokoni lahi ia kiate koe. Na‘e mei mole ‘ene mo‘uí ‘i he‘ene tau mo Kolaiaté, pea ‘i ho‘o vakai ki aí na‘á ke fiefia ‘i he me‘a na‘á ne faí.’

Na‘e fanongo ‘a Saula ki hono fohá, pea na‘á ne tala‘ofa kiate ia he‘ikai te ne fakalavea‘i ‘a Tēvita. Na‘e toe fakafoki mai ‘a Tēvita, pea na‘e toe ngāue ‘i he fale ‘o Saulá ‘o hangē pē ko ia ‘i mu‘a atú. Kaekehe, ‘i he ‘aho ‘e taha, lolotonga ‘a e tā ‘e Tēvita ha ngaahi fasi, na‘e toe velo‘i ‘e Saula ‘aki ‘ene taó ‘a Tēvita. Na‘e kalo ‘a Tēvita ia, pea na‘e tu‘u ‘a e tao ‘i he holisí. Ko hono tu‘o tolu ‘eni! Na‘e ‘ilo leva ‘e Tēvita kuo pau ke ne hola!

‘I he pō ko iá na‘e ‘alu ‘a Tēvita ki hono fale ‘o‘ona. Ka na‘e fekau atu ‘e Saula ha kau tangata ke tāmate‘i ia. Na‘e ‘ilo ‘e Maikale ‘a e palani ‘a ‘ene tamaí. Ko ia na‘á ne tala ki hono husepānití: ‘⁠Kapau he‘ikai te ke ‘alu ‘i he poó ni, te ke mate ‘apongipongi.’ ‘I he pō ko iá na‘e tokoni ‘a Maikale kia Tēvita ke hola ‘i he matapā sio‘atá. ‘I ha ta‘u nai ‘e fitu na‘e pau ke toitoi holo ‘a Tēvita koe‘uhi na‘a ma‘u ia ‘e Saula.