SIO ki he tangata ‘i he loto tahí. ‘Okú ne fu‘u faingata‘a‘ia lahi ‘aupito, ‘ikai ko ia? Ko e ika ko ‘ená ‘oku teu ke ne folo ia! ‘Okú ke ‘ilo pe ko hai ‘a e tangata ko ‘ení? Ko hono hingoá ko Siona. Tau sio ange pe ko e hā na‘e mo‘ua ai ‘i he faingata‘a lahi peheé.

Ko Sioná ko e palōfita ia ‘a Sihova. Na‘e ‘ikai ke fuoloa mei he mate ‘a e palōfita ko ‘Ilaisá na‘e tala ‘e Sihova kia Siona: ‘ ‘Alu ki he kolo lahi ko Ninive. Ko e faikovi ‘a e kakai ‘i aí ‘oku fu‘u lahi, ko ia ‘oku ou fiema‘u koe ke ke lea kiate kinautolu ‘o fekau‘aki mo e me‘a ko iá.’

Ka na‘e ‘ikai ke fie ‘alu ‘a Siona ia. Ko ia na‘á ne heka ki ha vaka ‘oku ‘alu ia ki he feitu‘u kehe kae ‘ikai ko Ninive. Na‘e ‘ikai ke fiemālie ‘a Sihova ki he hola ‘a Sioná. Ko ia na‘á Ne fakatupu ha fu‘u afā lahi. Na‘e fu‘u kovi ‘aupito ‘o ngali ‘e ngoto ai ‘a e vaká. Na‘e mātu‘aki fu‘u ilifia ‘a e kau kauvaká, pea na‘a nau ui ki honau ngaahi ‘otuá ki ha tokoni.

Faifai atu pē pea tala ‘e Siona kiate kinautolu: ‘ ‘Oku ou lotu kia Sihova, ko e ‘Otua ia na‘á ne ngaohi ‘a e langí mo e māmaní. Pea ‘oku ou hola mei hono fai ‘a e me‘a na‘e fakahā mai ‘e Sihova ke u fai.’ Ko ia na‘e ‘eke ‘e he kau kauvaká: ‘⁠Ko e hā ‘oku totonu ke mau fai kiate koe kae ‘osi ‘a e afaá?’

Na‘e pehē ‘e Siona: ‘⁠Lī au ki tahi, pea ‘e toe nonga leva ‘a e tahí.’ Na‘e ‘ikai ke fie fai ‘eni ‘e he kau kauvaká, ka ‘i he toe kovi ange ‘a e afaá na‘e iku ‘o nau lī ‘a Siona ki tahi. Na‘e ‘osi leva ‘a e afaá, pea toe nonga mo e tahi fokí.

‘I he pulia hifo ‘a Siona ‘i he loto tahí, na‘e folo ia ‘e ha fu‘u ika. Ka na‘e ‘ikai ke mate ‘a Siona. Na‘á ne ‘i he loto kete ‘o e iká ‘i he ‘aho ‘e tolu mo e pō ‘e tolu. Na‘e mātu‘aki fakatomala ‘a Siona ‘i he ‘ikai te ne talangofua kia Sihova ‘o ‘alu ki Ninivé. Ko ia ‘okú ke ‘ilo ‘a e me‘a na‘á ne faí?

Na‘e lotu ‘a Siona kia Sihova ki ha tokoni. Ko ia na‘e ‘ai ‘e Sihova ‘a e iká ke ne pu‘aki ‘a Siona ki ha fonua mōmoa. Hili pē iá na‘e ‘alu leva ‘a Siona ki Ninive. ‘Ikai ‘oku ako‘i heni kitautolu ki hono mahu‘inga ke tau fai ‘a ia pē ‘oku fakahā mai ‘e Sihová?