KO SĪSŪ ‘eni ‘i he funga mo‘unga ko ‘Olivé. Ko e kau tangata ‘e toko fā ko ē ko ‘ene kau ‘apositolo. Ko e ongo tokoua ko ‘Anitelū mo Pita, pea pehē foki ki he ongo tokoua ko Sēmisi mo Sione. ‘I he mama‘o atú ‘oku lava ke ke sio ai ki he temipale ‘o e ‘Otuá ‘i Selusalema.

Ko e ‘osi eni ‘a e ‘aho ‘e ua mei he heka atu ‘a Sīsū ‘i he ki‘i ‘así ki Selusalemá. Ko e ‘aho Tūsite eni. ‘I he houa pongipongi ‘o e ‘aho ko ení na‘e ‘i he temipale ‘a Sīsū. Na‘e feinga ai ‘a e kau taula‘eikí ke puke ‘a Sīsū ‘o tāmate‘i ia. Ka na‘a nau ilifia ke fai ‘eni koe‘uhi he na‘e sai‘ia ‘a e kakaí ia ‘ia Sīsū.

‘⁠Ko e fanga ngata kimoutolu mo e ngaahi foha ‘o e fanga ngata!’ ko e ui ia ‘e Sīsū ‘a e kau taki lotu ko iá. Pea na‘e pehē ‘e Sīsū ‘e tautea kinautolu ‘e he ‘Otuá koe‘uhi ko e ngaahi me‘a kotoa pē na‘a nau fai ‘oku koví. ‘I he hili pē iá pea na‘e ‘alu ‘a Sīsū ki he Mo‘unga ko ‘Olivé, pea na‘e kamata ke ‘eke ha ngaahi fehu‘i kiate ia ‘e he kau ‘apositolo ko ‘eni ‘e toko fā. ‘Okú ke ‘ilo pe ko e hā na‘a nau ‘eke kia Sīsuú?

Na‘e ‘eke ‘e he kau ‘apositoló ‘o kau ki he ngaahi me‘a ‘i he kaha‘ú. Na‘a nau ‘ilo ‘e fakangata ‘e Sīsū ‘a e ngaahi kovi hono kotoa pē ‘i he māmaní. Ka na‘a nau fie ‘ilo pe ‘e fakahoko ‘eni ‘afē. ‘E toe ha‘u ‘afē ‘a Sīsū ke pule ko e Tu‘í?

Na‘e ‘ilo ‘e Sīsū ia ‘e ‘ikai ke malava hono kau muimuí ‘i māmani ke mamata kiate ia ‘i he‘ene toe ha‘ú. Ko hono ‘uhingá he te ne ‘i hēvani pē ia, pea ‘e ‘ikai malava ke nau sio ange ki ai. Ko ia na‘e tala ‘e Sīsū ki he‘ene kau ‘apositoló ha ngaahi me‘a ‘e hoko ‘i māmani ‘i he taimi te ne pule ai ko e Tu‘i ‘i hēvaní. Ko e hā ‘a e ni‘ihi ‘o e ngaahi me‘a ko ‘ení?

Na‘e pehē ‘e Sīsū ‘e ‘i ai ‘a e ngaahi tau lalahi, ‘e puke mo fiekaia ‘a e kakai tokolahi, ‘e kovi ‘aupito ‘a e faihiá, pea ‘e ‘i ai ‘a e ngaahi mofuike lahi. Na‘e toe pehē ‘e Sīsū ‘e malanga‘i ‘a e ongoongo lelei ‘o e pule‘anga ‘o e ‘Otuá ki he feitu‘u hono kotoa pē ‘i he māmaní. Kuo tau sio kuo hoko ‘a e ngaahi me‘a ko ‘ení ‘i hotau taimí? ‘Io! Pea ko ia ‘oku tau ‘ilo pau ai ‘oku lolotonga pule ‘a Sīsū ‘i he taimí ni ‘i hēvani. Kuo vavé ni ha‘ane fakangata ‘a e ngaahi kovi hono kotoa pē ‘i he māmaní.