NA‘E nofo hifo ‘a Sīsū ke mālōlō ‘i ha vaikeli ‘i Samēlia. Na‘e ‘alu ‘ene kau ākongá ki kolo ke fakatau mai ha me‘akai. Ko e fefine na‘e lea ki ai ‘a Sīsuú ko ‘ene ha‘u ke ‘utu vai. Na‘á ne pehē kiate ia: ‘ ‘Omi haku inu.’

Na‘e fu‘u ‘ohovale lahi ‘aupito heni ‘a e fefiné. ‘Okú ke ‘ilo hono ‘uhingá? Koe‘uhi he ko Sīsuú ko ha Siu ia, pea ko e fefiné ko ha Samēlia ia. Pea ko e tokolahi taha ‘o e kau Siú na‘e ‘ikai te nau sai‘ia ‘i he kau Samēliá. Na‘e ‘ikai te nau lea kiate kinautolu! Ka na‘e ‘ofa ‘a Sīsū ki he kakai kotoa pē. Ko ia na‘á ne pehē: ‘⁠Kapau ‘okú ke ‘ilo ‘a ia ‘oku kole inu atu kiate koé, te ke kole kiate ia pea te ne ‘oatu kiate koe ‘a e vai foaki-mo‘ui.’

Na‘e pehē ange ‘e he fefiné: ‘⁠Tangata‘eiki, ‘oku loloto ‘a e vaikelí, pea ‘oku ‘ikai ke ‘i ai ha‘o kane. Te ke ma‘u mei fē ‘a e vai foaki-mo‘ui ko ‘ení?’

Na‘e fakamatala ‘e Sīsū: ‘⁠Kapau te ke inu ‘a e vai mei he vaikeli ko ‘ení te ke toe fieinua pē. Ka ko e vai te u ‘oatú ‘e lava ke ‘ai ai ha taha ke mo‘ui ta‘engata.’

Na‘e pehē ange ‘e he fefiné: ‘⁠Tangata‘eiki, ‘omai kiate au ‘a e vai ko ‘ení! Pea he‘ikai ‘aupito ke u toe fieinua. Pea he‘ikai ke toe fiema‘u kiate au ke ha‘u ki heni ke ‘utu vai.’

Na‘e fakakaukau ‘a e fefiné ko e lave ‘a Sīsū ki he vai mo‘oni. Ka ko ‘ene lave ia ‘a‘ana ‘o fekau‘aki mo e mo‘oni ‘o kau ki he ‘Otuá mo hono pule‘angá. Ko e mo‘oni ko ‘ení ‘oku hangē ha vai foaki-mo‘uí. ‘E lava ke ne ‘oange ki ha tokotaha ‘a e mo‘ui ta‘engatá.

Na‘e toki pehē ange ‘e Sīsū ki he fefiné: ‘ ‘Alu ‘o ui mai ho husepānití pea ke ha‘u.’

Na‘á ne tali: ‘ ‘Oku ‘ikai ke ‘i ai haku husepāniti.’

Na‘e pehē ange ‘e Sīsū: ‘ ‘Oku totonu ho‘o talí. Ka na‘e ‘i ai ho ngaahi husepāniti ‘e toko nima, pea ko e tangata ‘okú ke nofo mo ia ‘i he taimi ní ‘oku ‘ikai ko hao husepāniti ia.’

Na‘e ‘ohovale ‘a e fefiné, he ko e mo‘oni kotoa ‘a e ngaahi me‘a ko ‘ení. Na‘e anga-fēfē hono ‘ilo‘i ‘e Sīsū ‘a e ngaahi me‘a ko ‘ení? Koe‘uhi he ko Sīsū ko e Tokotaha ia na‘e Tala‘ofa ‘e fekau mai ‘e he ‘Otuá, pea na‘e ‘oange ki ai ‘e he ‘Otua ‘a e fakamatala ko ‘ení. ‘I he mōmeniti ko ‘ení na‘e foki mai ‘a e kau ākonga ‘a Sīsuú, pea na‘a nau ‘ohovale ‘i he‘ene talanoa ki ha fefine Samēliá.

Ko e hā ‘oku tau ako mei he ngaahi me‘a ko ‘ení hono kotoa? ‘Oku hā na‘e anga-‘ofa ‘a Sīsū ki he kakai ‘o e matakali hono kotoa pē. Pea ‘oku totonu ke tau pehē foki. ‘Oku ‘ikai ke totonu ke tau fakakaukau ‘oku kovi ha kakai koe‘uhi pē ko ‘enau kau ki ha fa‘ahinga matakali. ‘Oku fiema‘u ‘e Sīsū ‘a e kakai hono kotoa pē ke nau ‘ilo ‘a e mo‘oni ‘oku fakatau ki he mo‘ui ta‘engatá. Pea ko kitautolu foki ‘oku totonu ke tau loto ke tokoni ki he kakaí ke nau ako ki he mo‘oní.