‘OKÚ KE ‘ilo pe ko e hā ‘oku lau ‘e he ki‘i ta‘ahiné mo hono ongo kaungāme‘á? ‘Io, ko e tohi pē ko eni ‘okú ke laú​—⁠Ko ‘Eku Tohi ‘o e Ngaahi Talanoa Faka-Tohitapú. Pea ‘oku nau lau ‘a e talanoa pē ko ia ‘okú ke laú​—⁠“Ko e Founga ‘E Lava Ke Tau Ma‘u Ai ‘a e Mo‘ui Ta‘engatá.”

‘Okú ke ‘ilo ‘a e me‘a ‘oku nau ako ki aí? ‘Uluaki, ‘oku fiema‘u kiate kitautolu ke tau ‘ilo ‘o kau kia Sihova mo hono ‘Aló ko Sīsū kae malava ke tau mo‘ui ta‘engata. ‘Oku pehē ‘e he Tohitapú: ‘⁠Ko e founga ‘eni ki he mo‘ui ta‘engatá. Ako ‘o kau ki he ‘Otua mo‘oní pē ‘e taha, mo e ‘Alo na‘á ne fekau mai ki he māmaní, ko Sīsū Kalaisi.’

‘Oku anga-fēfē ha‘atau ako ‘o kau kia Sihova ko e ‘Otuá mo hono ‘Alo ko Sīsuú? Ko e founga ‘e taha ko e lau ‘o e Ko ‘Eku Tohi ‘o e Ngaahi Talanoa Faka-Tohitapú mei hono kamata‘angá ki he‘ene ‘osi. ‘Oku lahi ‘ene fakamatala ‘o kau kia Sihova mo Sīsū, ‘ikai ko ia? Pea ‘oku lahi ‘ene fakamatala ‘o kau ki he ngaahi me‘a kuó na fai mo e ngaahi me‘a te na toki fai. Ka ‘oku fiema‘u kiate kitautolu ke fai ‘a e me‘a lahi ange ‘i hono lau pē ‘o e tohi ní.

‘Okú ke sio ki he tohi ‘e taha ‘oku tuku ‘i he falikí? Ko e Tohitapú ia. ‘Ai ha tokotaha ke ne lau atu kiate koe ‘a e ngaahi konga mei he Tohitapú ‘a ia ‘oku makatu‘unga mei ai ‘a e ngaahi talanoa ‘i he tohí ni. ‘Oku ‘omai ‘e he Tohitapú kiate kitautolu ‘a e fakamatala kakato ‘oku fiema‘u kiate kitautolú kae lava ke tau tauhi kia Sihova ‘i he founga totonú pea ma‘u ai ‘a e mo‘ui ta‘engatá. Ko ia ‘oku totonu ke tau anga‘aki ke ako ma‘u pē ‘a e Tohitapú.

Ka ‘oku ‘ikai ke fe‘unga pē ‘a e ako ‘o kau kia Sihova ko e ‘Otuá mo Sīsū Kalaisí. ‘E lava ke tau ma‘u ha ‘ilo lahi ‘aupito ‘o kau kiate kinaua mo ‘ena ngaahi akonakí, kae ‘ikai pē ke tau ma‘u ‘a e mo‘ui ta‘engatá. ‘Okú ke ‘ilo pe ko e hā mo ha toe me‘a kehe ‘oku fiema‘ú?

‘Oku toe fiema‘u kiate kitautolu foki ke mo‘ui ‘o fakatatau ki he ngaahi me‘a ‘oku tau akó. ‘Okú ke manatu‘i ‘a Siutasi ‘Isikaliote? Ko e tokotaha ia ‘o e toko 12 na‘e fili ‘e Sīsū ke hoko ko ‘ene kau ‘apositoló. Na‘e lahi ‘a e ‘ilo ‘a Siutasi ‘o kau kia Sihova mo Sīsuú. Ka ko e hā na‘e hoko kiate iá? Na‘á ne hoko ‘o siokita, pea na‘á ne lavaki‘i ‘a Sīsū ki hono ngaahi filí ki he konga siliva ‘e 30. Ko ia ‘e ‘ikai ke ma‘u ‘e Siutasi ‘a e mo‘ui ta‘engatá.

‘Okú ke manatu‘i ‘a Kēhesi, ‘a e tangata na‘a tau ako ki ai ‘i he Talanoa 69? Na‘á ne loto ke ma‘u ‘a e ngaahi kofu mo e pa‘anga na‘e ‘ikai ko ha‘ane me‘a iá. Ko ia na‘á ne fai ha loi ke ma‘u ai ‘a e ngaahi me‘a ko iá. Ka na‘e tautea ia ‘e Sihova. Pea te ne tautea mo kitautolu foki ‘o kapau ‘e ‘ikai te tau talangofua ki he‘ene ngaahi laó.

Ka na‘e ‘i ai ‘a e kakai lelei tokolahi na‘a nau tauhi angatonu ma‘u pē kia Sihova. ‘Oku tau fiema‘u ke tau hangē ko kinautolú, ‘ikai ko ia? Ko ki‘i Sāmiuela ko ha fa‘ifa‘itaki‘anga lelei ia ke muimui ai. Manatu‘i, ‘i he‘etau sio ‘i he Talanoa 55, na‘á ne ta‘u fā pe nima nai ‘i he‘ene kamata tauhi kia Sihova ‘i hono tāpanekalé. Ko ia tatau ai pē pe ko e hā ho ta‘u motu‘á, ‘oku ‘ikai te ke fu‘u kei si‘i ke tauhi kia Sihova.

Ko e mo‘oni, ko e tokotaha ‘oku tau fie muimui kotoa aí ko Sīsū Kalaisi. Na‘a mo e taimi na‘á ne kei tamasi‘i aí, ‘o hangē ko ia na‘e fakahā ‘i he Talanoa 87, na‘á ne ‘i ai ‘i he temipalé ‘o talanoa ki he ni‘ihi kehe ‘o kau ki he‘ene Tamai fakahēvaní. Tau muimui ‘i he‘ene fa‘ifa‘itaki‘angá. Tau tala ki he lahi taha ‘o e kakai te tau malavá ‘o kau ki hotau ‘Otua fakaofo ko Sihová mo hono ‘Aló, ko Sīsū Kalaisi. Kapau te tau fai ‘a e ngaahi me‘a ko ‘ení, ‘e lava ke tau ma‘u ‘a e mo‘ui ta‘engata ‘i he palataisi fo‘ou ‘a e ‘Otuá ‘i he māmaní.