“ʻOku ou saiʻia ʻi he Fale Fakatahaʻangá!” ko e lea ia ʻa Nicole, ko ha tuofefine kei siʻi ʻi Kolomupia. “Ko e feituʻu ia ʻoku lava ke u feohi ai mo hoku fāmili fakalaumālié.” ʻOkú ke ongoʻi pehē?

 Takatakai ʻi he māmaní, ʻoku fakatahataha ʻa e Kau Fakamoʻoni ʻa Sihová ʻi he ngaahi Fale Fakatahaʻanga ʻe 63,000 nai. Ko e ngaahi fale ko ení ʻokú ne ʻomai kiate kitautolu ha feituʻu feʻungamālie ke lotu ai ki he ʻOtuá. Ka ʻoku ʻikai ko ia pē. Ko ha tāimuʻa tuʻumaʻu ʻi Kolomupia ko David ʻokú ne pehē: “ʻOku ʻai ʻe hotau Fale Fakatahaʻangá ʻetau pōpoakí ke fakamānako ange. Ko e kau ʻaʻahi tokolahi ʻoku nau ʻohovale ʻi he sio ki he founga ʻoku tau tokangaʻi ai ʻa e ngaahi falé ke ʻi ha tuʻunga lelei.” ʻOku ʻikai ke hokonoa pē eni. ʻOku tau ngāue mālohi ke fakamaʻa mo tokangaʻi hotau ngaahi Fale Fakatahaʻangá. ʻOku anga-fēfē ʻetau fakahoko ení?

 Ko e ngaahi fakatahaʻanga ʻoku nau ngāueʻaki ʻa e Fale Fakatahaʻangá ko honau fatongiá ke tauhi ia. Ke fai ení, ʻoku fakamaʻa maʻu pē ʻe he fanga tokouá mo e fanga tuofāfiné ʻenau Fale Fakatahaʻangá. ʻOku nau fakahoko foki ʻa e ngaahi ngāue ke maluʻi ai ʻa e ngaahi falé pea fai ha fanga kiʻi monomono.

 Ke tokoniʻi ʻa e ngaahi fakatahaʻangá ke tokangaʻi honau Fale Fakatahaʻangá, ʻoku vaheʻi ʻe he Potungāue Tisaini/Langa Fakalotofonuá (LDC) ha fanga tokoua ke nau akoʻi ʻa e founga ke tokangaʻi ai ʻa e ngaahi Fale Fakatahaʻangá. Pea ʻi he fanga tokoua ko ení, ʻoku tokangaʻi ai ʻe he tokoua taki taha ʻa e ngaahi Fale Fakatahaʻanga ʻe ono ki he hongofulu. ʻOkú ne ʻaʻahi ki ai pea akoʻi ʻa e kau malanga ʻi he fakatahaʻangá ki he founga ke tokangaʻi ai honau holó. ʻI he taʻu ʻe tolu kotoa pē, ʻokú ne vakaiʻi ʻa e fale taki taha pea feinga ke ʻiloʻi ʻa e ngaahi palopalema ʻoku fiemaʻu ke fakaleleiʻí.

 ʻOku houngaʻia hotau fanga tokouá mo e fanga tuofāfiné ʻi he ako kuo tokonaki ʻe he fanga tokoua ko ení. Ko Indhumathi ko ha tuofefine ʻi ʻInitia ʻokú ne pehē: “Naʻe fakaʻofoʻofa ʻa e akó. Ko ha meʻa fakafiefia ʻa hono ako ʻa e founga ke tauhi ai hotau Fale Fakatahaʻangá ke ʻi ha tuʻunga leleí.” Ko Evans, ko ha tokoua ʻi Keniā ʻokú ne pehē: “ʻOku mau ako ki he founga ke fakasiʻisiʻi ai ʻa e fakamolé ʻaki hono fakaleleiʻi ʻa e fanga kiʻi palopalema īkí ki muʻa ke hoko ko ha palopalema lahi ange.”

 Ko e fakamole ki hono fakalele mo tokangaʻi ha Fale Fakatahaʻanga ʻi he taʻu taki taha ʻoku aʻu ia ki he paʻanga a ʻe laui ngeau ki he laui afe, ʻo makatuʻunga pē ʻi he feituʻu ʻoku tuʻu ai ʻa e holó, ko e fuoloa ʻene tuʻú, pea mo e lahi ʻo e ngaahi fakatahaʻanga ʻoku nau ngāueʻakí. ʻOku anga-fēfē hono totongi ʻa e fakamole ko ení?

 Ko hono tokangaʻi ʻo e Fale Fakatahaʻangá ʻoku poupouʻi ʻaki ia ha ngaahi tokoni. Ko Alexander, ko ha tokoua ʻi Kāsakisitani, ʻokú ne pehē: “Ko e konga ʻo e paʻangá ʻoku ngāueʻaki ia ki he ʻInitanetí mo e ngaahi fakamole kehé, hangē ko e vaí mo e ʻuhilá. ʻOku toe ngāueʻaki foki ʻa e paʻangá ki he ngaahi meʻa ʻaonga, hangē ko e pepa holoholó, kofu nimá, naunau fakamaʻá, mo e valí.” Ko e toenga leva ʻo e paʻangá ʻoku ʻave ia ki he ngāue ʻi māmani lahí ke tokoni ki he ngaahi poloseki lalahí mo e ngaahi poloseki ʻoku lahi ange ʻa e fakamole ki aí.

 Kapau ʻe fiemaʻu ke fai ha ngāue monomono ki ha Fale Fakatahaʻanga ʻi ha māhina ʻe ua pe tolu pea ʻova hono fakamolé ʻi he lahi ʻo e paʻanga ʻoku faʻa ngāueʻaki ʻe he fanga tokouá ki hono tokangaʻi iá, ʻe talanoa leva ʻa e kau mātuʻá mo e tokoua LDC ʻokú ne tokangaʻi ʻa e Fale Fakatahaʻanga ko iá. Kapau ʻe tali ʻe he LDC ʻa e polosekí, ʻe fakapaʻanga ia mei he ngaahi tokoni ki he ngāue ʻi māmani lahí. Lolotonga ʻa e taʻu fakangāue 2023, ko e poloseki ʻe 8,793 naʻe fakahokó, pea naʻe feʻunga ʻa e fakamole ki aí mo e $76.6 miliona. Fakakaukau ki he poloseki ʻe ua mei he ngaahi poloseki ko ení.

 ʻI ʻEngikola, ko ha Fale Fakatahaʻanga taʻu ʻe 15 naʻe lahi ai ʻa e ngaahi palopalemá. Naʻe fiemaʻu ke fetongi ʻa e ngaahi meʻa fakaʻuhilá, naʻe maumau ʻa e ngaahi holisí, pea naʻe līpooti ʻe he ngaahi kaungāʻapí ʻa e tāfea ange ʻa e vaí ki honau ʻapí. Naʻe fokotuʻutuʻu ʻe he LDC ha poloseki ke fakaleleiʻi ʻa e ngaahi palopalema ko ení. Ko e fakamole ki aí naʻe feʻunga ia mo e $9,285. Naʻe houngaʻia ʻa e ngaahi kaungāʻapí ʻi he ngāue ko ení pea naʻe maongo kiate kinautolu ʻa e founga naʻe fakahoko ai iá.

 ʻI Pōlani, naʻe tutulu ai ʻa e ʻato ʻo ha Fale Fakatahaʻanga pea naʻe uesia ai ʻa e kāpetí ʻo ʻikai lava ke fakaleleiʻi. Naʻe tali ʻe he LDC ʻa e poloseki ke fakafoʻou ʻa e ʻató pea fetongi ʻa e kāpetí. Ko e fakamolé naʻe feʻunga ia mo e $9,757. Ko e olá, heʻikai toe fiemaʻu ia ke fai ha fakalelei lahi ki he Fale Fakatahaʻanga ko ení ʻi ha ngaahi taʻu lahi.

 Ko hono tokangaʻi ʻo e ngaahi Fale Fakatahaʻangá ʻoku ʻikai ngata pē hono fakasiʻisiʻi ai ʻa e fakamolé ka ʻoku ʻoatu foki ai ʻa e fakahīkihikí kia Sihova. Ko Shaun, ko ha tokoua ʻi Tonga ʻokú ne pehē: “Koeʻuhí ko e ngāue monomonó, ʻoku lava ke mau lotu ai kia Sihova ʻi ha Fale Fakatahaʻanga ʻoku maʻa, maau mo ʻi ha tuʻunga lelei ʻa ia ʻoku tapua lelei atu ai hono huafá ʻi he koló. ʻOku mau fiefia ke fakaafeʻi ʻa e kakaí ki homau Fale Fakatahaʻangá.”

 ʻE lava ke tau tokoni kotoa ki hono fakamaʻa mo tokangaʻi hotau feituʻu faiʻanga lotú. Ko Marino, ko ha tokoua ʻi ʻAositelēlia ʻoku kau ʻi hono akoʻi ʻa e founga ke tokangaʻi ʻa e Fale Fakatahaʻangá ʻokú ne pehē: “Ko kitautolu kotoa ʻoku lava ke tau kau ʻi he monū fakaofo ʻo hono tokangaʻi hotau ngaahi Fale Fakatahaʻangá. ʻI heʻetau fai iá, ʻoku tau fakasiʻisiʻi ai ʻa e fakamolé pea fakaʻatā ʻa e paʻanga ko iá ke ngāueʻaki ʻi he ngaahi feituʻu ʻoku nau fiemaʻu lahi ange iá.”

 Ko Joel, ko ha tokoua ʻi ʻInitia ʻokú ne fiefia ʻi hono tokangaʻi ʻa e Fale Fakatahaʻangá. ʻOkú ne pehē: “Ko e ngāue mo e fanga tokouá ʻoku fakalika mai ai ʻa e tuʻunga ʻe ʻi ai ʻa e moʻuí ʻi he māmani foʻoú.” Ko Nicole, naʻe lave ki ai ki muʻá ʻokú ne pehē: “Ki muí ni mai, naʻá ku tokoni ki hono mopi ʻa e falikí, lolotonga ia ʻoku fakaleleiʻi ʻe ha tokoua ha mama ʻi he falemālōloó. Neongo naʻe ʻikai ke u tokoni ki hono fakaleleiʻi ʻa e palopalemá, ka naʻá ku tokoni ki hono taʻofi ha fakatuʻutāmaki naʻe mei ala hoko.”

 Kapau ʻokú ke loto ke pole ki hono tokangaʻi ho Fale Fakatahaʻangá, talanoa ki ha taha ʻo e kau mātuʻa fakalotofonuá. ʻIkai ko ia pē, ko hoʻo ngaahi tokoní ʻoku tokoni ia ki hono tokangaʻi ho Fale Fakatahaʻangá pea pehē foki ki he ngaahi Fale Fakatahaʻanga takatakai ʻi he māmaní. Ko e ngaahi tokoni ko ení ʻoku lava ke faʻo ia ʻi he ngaahi puha meʻaʻofa ʻi ho Fale Fakatahaʻangá pe fakafou ʻi he donate.dan124.com. ʻOku mau houngaʻia moʻoni ʻi hoʻomou nima-homó.