Naʻe tomuʻa tala ʻi he Tohi Tapú “[kuo] tuʻu ʻa e fonua ki he fonua” pea kuo ʻi ai mo e ngaahi fakatamaki ʻi he lolotonga ʻa e “fakaʻosiʻosi ʻo e fokotuʻutuʻu lolotongá.” (Mātiu 24:3, 7) Kuo tau sio ki hono fakahoko ʻa e ngaahi lea fakaekikite ko ení lolotonga ʻa e taʻu fakangāue 2023. a Ka ʻi he lolotonga ia ʻa e hoko ʻa e taú mo e fakatamaki fakanatulá ʻi he ngaahi fonua ofi ki he 100, kuo tapua atu ʻe he Kau Fakamoʻoni ʻa Sihová ʻa e ʻofa ʻa Sihová. Anga-fēfē?

 Lolotonga ʻa e taʻu fakangāue 2023, naʻe laka hake ʻi he 200 tupú ʻa e ngaahi fakatamaki fakanatula pe fakatupu ʻe he tangatá kuó ne uesia hotau fanga tokouá. ʻI hono fakakātoá, kuo fakamoleki ʻe he ngaahi kautaha fakalao ʻa e Kau Fakamoʻoni ʻa Sihová ʻa e tola ʻoku laka hake ʻi he hongofulu milioná b mei he meʻaʻofa ʻoku tokoni ki he ngāue ʻi māmani lahí ke tokoni ki he fakatamakí. ʻOku tānaki atu eni ki he paʻanga ʻoku fakamoleki fakafoʻituitui ʻe he fanga tokouá mo e fanga tuofāfine tokolahi ke tokoni ki he faʻahinga ʻoku fiemaʻu tokoni ʻi honau feituʻú. Ako ki he founga ʻoku ngāueʻaki ai hoʻo ngaahi meʻaʻofá ke tokoni ki he faʻahinga naʻe maʻukovia ʻe he fakatamaki ʻe ua mei he ngaahi fakatamaki lahi naʻá ne uesia hotau fanga tokouá.

 ʻOku ʻi ai ʻa e ngaahi feituʻu ʻe niʻihi ʻi Naisīlia ʻoku nau faʻa hokosia ʻa e tāfeá. Kae kehe, ʻi ʻOkatopa 2022 ko e taʻu kovi taha ia kuo hokosia ʻe he fonuá ʻa e ngaahi tāfeá ʻi he ngaahi taʻu ʻe hongofulu kuo ʻosí. Laka hake ʻi he ngaahi faama ʻeka ʻe 1,670,432 naʻe taʻeʻaonga ʻaupito, pea laka hake ʻi he kakai ʻe ua miliona naʻa nau hiki mei honau ngaahi ʻapí. Naʻe ngāue vave ʻa e vaʻa Naisīliá ke fokotuʻu ha Kōmiti Tokoni Fakatamaki ke nau fokotuʻutuʻu ʻa e ngaahi ngāue tokoní pea tokonaki mo e ngaahi tokoni fakalaumālié.

•   Ko e kau malanga ʻe toko 7,505 naʻa nau hiki mei honau ngaahi ʻapí

•   Ko e ngaahi ʻapi ʻe 860 naʻe maumau pe taʻeʻaonga

•   Ko e ngaahi Fale Fakatahaʻanga ʻe 90 mo e Holo ʻAsemipilī ʻe taha naʻe uesia ʻe he tāfeá

 Laka hake ʻi he $250,000 naʻe fakamoleki ki he tokoni fakatamakí, naʻe kau ki ai ʻa e:

•   Ngaahi meʻakai hangē ko e laise, piini mo e nūtolo

•   Naunau fale hangē ko e ngaahi fakamolū mo e tainamu

•   Fakaleleiʻi pe toe langa ʻa e ngaahi fale naʻe maumaú

 Naʻe anga-fēfē hono fakapapauʻi ʻe he fanga tokouá ʻoku ngāueʻaki fakapotopoto ʻa e ngaahi paʻanga tokoní? Ko e founga ʻe taha ko hono sivisiviʻi fakalelei ʻa e fale taki taha ke fakapapauʻi pē ʻoku fiemaʻu ke fakaleleiʻi. Kapau ʻoku fiemaʻu ke toe langa ha fale, ʻe langa ia ʻo ngāueʻaki ʻa e tisaini faingofua ʻoku anga-maheni ʻi he feituʻu ko iá.

 Naʻe houngaʻia ʻaupito hotau fanga tokoua mo e fanga tuofāfine naʻe fai ki ai ʻa e tokoní. Naʻe pehē ʻe ha tuofefine ʻe taha: “Naʻe māveuveu ʻemau moʻuí ko e meʻa ʻi he tāfeá koeʻuhi ko e kotoa ʻemau fāmá naʻe taʻeʻaonga pea mole mo homau ʻapí. Naʻa mau ongoʻi fiemālie ʻi he ʻaʻahi mai ʻa e fanga tokouá mo e fanga tuofāfiné ʻi he ʻaho pē ko iá ke tokoniʻi kimautolu pea tokonaki ha nofoʻanga malu. Naʻa mau toe maʻu ʻa e tokoni lahi ʻi hono ʻomai ʻa e meʻakai mei he ʻōfisi vaʻá. Naʻa mau ofoofo ʻi heʻemau hokosia tonu ʻa e lea ʻi he Sione 13:34, 35 ʻi heʻemau moʻuí. . . . Tā ʻoku ʻi ai ʻa e ʻofa moʻoni. Ko au mo hoku fāmilí kotoa, ʻoku mau ʻoatu ʻa e fakamālō loto-moʻoni ki he fanga tokouá ʻi heʻenau ʻomai ʻa e tokoní ʻi he taimi totonú.”

 Naʻe fakatokangaʻi ʻe he niʻihi kehe ʻo e koló ʻa ʻetau ngāue tokoní. Naʻe pehē ʻe ha pule fakavahe ʻi Sabagreia, ʻi he Siteiti Bayelsa: “ʻOku lahi ʻa e ngaahi kautaha mo e ngaahi siasi ʻi he māmaní, ka ko e Kau Fakamoʻoni ʻa Sihová pē ʻoku nau fai ha meʻa hangē ko ení. . . . Ko [hoʻomou] kautahá ʻa e lelei taha ʻi he māmaní.”

 Lolotonga ʻa Fepueli 2023, laka hake ʻi ha vela ʻe 400 naʻá ne fakatupunga ʻa e maumau lahi ʻi Sili. Laka hake ʻi he ʻeka ʻe 1,062,553 ʻo e fonuá, fakataha mo e ngaahi langa mahuʻinga ʻo Silí naʻe fakaʻauha. Fakafuofua ki he kakai ʻe toko 8,000 naʻa nau fetukutuku. ʻI he hili pē ʻa e fakatamakí, naʻe kamata leva ke fokotuʻutuʻu ʻe he ʻōfisi vaʻá ʻa e ngaahi tokoní.

•   Ko e kau malanga ʻe toko 222 naʻe fiemaʻu ke nau hiki

•   Ko e ngaahi fale ʻe 20 naʻe taʻeʻaonga

 Laka hake ʻi he $200,000 naʻe fakamoleki ʻi he tokoni fakatamakí, naʻe kau ki ai ʻa e:

•   Meʻakai mo e vai

•   Fakamole ki he fefonongaʻakí, naunau ki he fakamaʻá, mo e ngaahi faitoʻo

•   Toe langa ʻo e ngaahi ʻapi naʻe maumaú

 Naʻe ʻohovale ha fāmili ʻe taha ʻi he mole ʻa e meʻa kotoa naʻa nau maʻú, ʻo kau ai honau ʻapí mo e pisinisí. Naʻe ʻikai ha toe maʻuʻanga paʻanga ʻa e fāmilí. Lolotonga ʻa e ngaahi ʻaho siʻi mei ai, naʻe loto-mamahi ʻa e fāmilí ʻi heʻenau sio ki he tuʻuʻanga naʻe tuʻu ai honau fale ki muʻá. Ka ʻi heʻenau sio ki hono toe langa honau falé, naʻe kamata ke nau ongoʻi lelei ange. ʻI he sio ki he ʻofa lahi mo e tokanga ʻa e kau ngāue polé naʻá ne tokoniʻi kinautolu ke fekuki mo e palopalemá. Naʻe ueʻi ai heni ʻa e fāmilí ke nau kau fakataha mo e kau ngāue polé pea tokoni ki hono toe langa ha ʻapi ʻo ha tokoua ʻe taha.

 Naʻe maongo ki he tokolahi ʻa hotau fanga tokouá mo e fanga tuofāfiné ʻa e ngāue tokoní. Naʻe pehē ʻe ha tokoua ʻe taha: “Ko e fokotuʻutuʻu ʻa Sihova ʻokú ne ʻomai fakafou ʻi he Kōmiti Tokoni Fakatamakí ʻoku fakaofo moʻoni. ʻI he hili atu pē ha ʻaho mei he fakatamakí, naʻa nau ʻosi ʻi ai tonu ke tokonaki ʻa e ngaahi fiemaʻu tefitó. ʻOku fakalototoʻa ʻa hono lau ʻa e ngaahi talanoa fekauʻaki mo e ngaahi tokoni fakatamakí ʻi he tafaʻaki kehekehe ʻo e māmaní. Ka ʻi hoʻo hokosia tonu iá, ʻoku kehe ʻaupito ia. Te ke fakamahuʻingaʻi lahi ange ai ʻa e kautahá; ʻa e founga ʻo e faʻifaʻitaki ʻa e fanga tokouá ki he ʻulungaanga ʻo Sihová; mo e founga ʻenau tokanga ki heʻetau ngaahi fiemaʻu fakamatelié, fakalaumālié mo fakaeongó. ʻOku mau sio tonu ai ki he ʻofa ʻa Sihová ʻoku fakahaaʻi ia ʻi he ngāué.”

 ʻI he ofi ke ngata ʻa e fokotuʻutuʻu ko ení, ʻe hokohoko atu ʻetau sio ki he fakautuutu ange ʻa e ngaahi fakatamakí. (Luke 21:10, 11) Neongo iá, ko hotau Tuʻi ʻofá ʻa Sīsū Kalaisi, ʻokú ne ngāueʻaki ʻa e fakatahaʻanga Kalisitiané ke fakahaaʻi mai ʻokú ne ʻiate kitautolu, ʻi he “ʻaho kotoa pē ʻo aʻu ki he fakaʻosiʻosi ʻo e fokotuʻutuʻu lolotongá.” (Mātiu 28:20) Ko hoʻomou ngaahi tokoni loto-fiefoaki ki he ngāue ʻi māmani lahí, ʻo fakafou ʻi he donate.dan124.com mo e ngaahi founga kehé, fakataha mo hoʻomou foaki atu homou taimí mo e iví, ʻoku fakahaaʻi ai homou poupou ki he Puleʻangá mo hono Tuʻi ʻofá. Fakamālō atu ʻi hoʻomou hokohoko atu ke foaki nima-homó.