“ʻIkai ha fiekaia.” Ko e lea ko iá ʻokú ne fakahaaʻi mai ʻa e taumuʻa ʻa e kau taki ʻo e māmaní ki he taha ʻo e palopalema lahi taha ʻa e faʻahinga ʻo e tangatá​—ko hono tokonaki ʻa e meʻakai ki he tokotaha kotoa ʻi he māmaní. a Ka ʻe toe ngata ʻa e fiekaiá ʻi he māmaní? Ko e hā ʻa e lau ʻa e Tohi Tapú?

Naʻe tomuʻa tala ʻe he Tohi Tapú ʻa e ngaahi nounou fakameʻatokoni ʻi he ʻaho ní

 Naʻe tomuʻa tala ʻe he Tohi Tapú ʻe hoko ʻa e ngaahi nounou fakameʻatokoní ʻi hotau taimí, ko ha vahaʻa taimi ʻoku ui ko e “ngaahi ʻaho fakaʻosí.” (2 Tīmote 3:1) ʻOku ʻikai ke fakatupunga ʻe he ʻOtuá ʻa e ngaahi nounou fakameʻatokoni ko ʻení ka kuó ne ʻomai ha fakatokanga fekauʻaki mo ia. (Sēmisi 1:13) Fakatokangaʻi ʻa e kikite Fakatohitapu ʻe ua.

 “ʻE ʻi ai ʻa e ngaahi nounou fakameʻatokoni . . . ʻi he feituʻu ki he feituʻu.” (Mātiu 24:7) Ko e kikite Fakatohitapu ko ení naʻá ne tomuʻa tala ha honge ʻi māmani lahi. Ko e meʻa ʻoku fakatupu tokangá, ko ha līpooti ki muí ni mai mei he kakai ʻoku nau ako ki he founga hono ngaohi mo tufaki ʻa e meʻakaí ʻoku pehē ai: “ʻOku ʻikai ke ola lelei ʻa e feinga ʻa e māmaní ke fakangata ʻa e fiekaiá, ʻikai maʻu ha meʻakai feʻunga mo e fasimanavá.” b Ko e kakai ʻe laui teau miliona ʻi he ngaahi fonua lahi ʻoku ʻikai lava ke nau maʻu ʻa e meʻakai ʻoku nau fiemaʻú. Ko e meʻa fakamamahí, ʻoku iku ʻo mate ai ʻa e tokolahi ʻo kinautolu.

 “Vakai, tā ko ha hoosi ʻuliʻuli, pea ko e tokotaha naʻe heka aí naʻá ne toʻo ha meʻafua fua mamafa ʻi hono nimá.” (Fakahā 6:5) ʻI he kikite ko ení, ko e hoosi fakaefakatātaá mo e tokotaha ʻoku heka aí ʻokú ne fakatātaaʻi ʻa e honge ʻi he ngaahi ʻaho fakaʻosí. c Ko e meʻafua fua mamafa ʻi he nima ʻo e tokotaha ʻoku heka ʻi he hōsí ʻoku fakataumuʻa ia ke fuaʻaki ʻa e lahi ʻo e ʻinasi meʻakaí. ʻI he haʻu ʻa e tangata heka hoosi ko ení, ʻoku ongo mai ha leʻo ʻo fanongonongo ko e ngaahi totongi ʻo e meʻakaí ʻe mamafa ʻaupito pea fakatokanga ki he kakaí ke ʻoua ʻe maumauʻi ʻa e meʻakai tefitó. (Fakahā 6:6) ʻOku fakatātaaʻi tonu mātē ʻe he meʻá ni ʻa e nounou fakameʻatokoni ʻi māmani lahi ʻi he ʻaho ní, ʻa ia ko e kakai ʻe laui piliona ʻoku ʻikai ke nau lava ʻo kumi pe maʻu ʻa e meʻakai fakatupu moʻui leleí.

Founga ʻe ngata ai ʻa e ngaahi nounou fakameʻatokoní

 ʻOku pehē ʻe he kau mataotaó ko hotau foʻi palanité ʻoku lava ke ne fakatupu ʻa e meʻakai hulu fau ke fafangaʻaki ʻa e tokotaha kotoa ʻi aí. Ko ia leva, ko e hā ʻa e ngaahi palopalema ʻokú ne fakatupunga ʻa e nounou fakameʻatokoní? Pea ko e hā ʻoku leaʻaki ʻe he Tohi Tapú fekauʻaki mo e meʻa ʻe fai ʻe hotau Tokotaha-Fakatupú, ʻa Sihova, d ke fakaleleiʻi ʻa e ngaahi palopalema ko ení?

 Koeʻuhi ko e Puleʻanga ʻo e ʻOtuá te ne fakangata ʻa e tupuʻanga tefito ʻo e fiekaiá, ko ia ko e faʻahinga kotoa ʻo e tangatá te nau fiefia ʻi hono maʻu ʻa e meʻakai hulu fau mo fakatupu moʻui leleí. (ʻAisea 25:6) Ke ako fekauʻaki mo e taimi ʻe fakahoko ai ʻe he Puleʻanga ʻo e ʻOtuá ʻa e meʻá ni, sio ki he kupu “ʻE Pule Fakakū ʻa e Puleʻanga ʻo e ʻOtuá ki he Māmaní?”