Ko e polosiua Fanongo ki he ‘Otuá na‘e fa‘u ia ke ako‘i ‘a e ngaahi mo‘oni tefito ‘o e Tohi Tapú ‘aki ‘a e ngaahi tokoni fakaemamatá ki he fa‘ahinga ‘oku faingata‘a ke nau ako mei ha fakamatala kuo tohi. Ko e lēsoni taki taha ‘oku peesi ‘e ua ‘a ia ‘oku ‘i ai ha ngaahi fakatātā ‘osi teuteu‘i lelei mo ha faka‘ilonga ‘oku tuhu ki he fakatātā hokó ke tataki ‘a e fetalanoa‘akí mei he fakatātā ki he fakatātā.

Ko e polosiua Fanongo ki he ‘Otuá pea Mo‘ui Ta‘engata ‘oku tatau hono ngaahi fakatātaá mo ia ‘i he Fanongo ki he ‘Otuá, ka ‘oku lahi ange ‘a e fakamatala ‘i he Fanongo ki he ‘Otuá pea Mo‘ui Ta‘engata pea ‘oku lava ke ngāue‘aki ia ‘e he kau ako ‘oku nau lava ‘o lautohí. ‘Oku fa‘a ngāue‘aki ‘e he kau malangá ‘a e tatau ko iá ko e tatau ia ‘a e tokotaha faiakó kae ngāue‘aki ‘e he tokotaha akó ‘a e tatau Fanongo ki he ‘Otuá. Ko e lahi taha ‘o e ngaahi pēsí ‘oku ‘i ai ha puha mo ha fakamatala fakalahi ‘e lava ke fai ha lāulea ki ai, ‘o makatu‘unga ‘i he malava ‘a e tokotaha akó.

‘E lava ke ke tu‘uaki ‘a e polosiuá ‘i ha fa‘ahinga taimi pē na‘a mo e māhina ‘oku ‘ikai ke tu‘uaki ai iá. ‘I hono fakahoko ha ako Tohi Tapu, ngāue‘aki ‘a e ngaahi fakatātaá ke fakamatala‘i ‘a e me‘a ‘i he Tohi Tapú. ‘Eke ha ngaahi fehu‘i ‘e fakakau ki ai ‘a e tokotaha akó pea fakapapau‘i ‘okú ne mahino‘i. Lau pea lāulea ki he ngaahi konga Tohi Tapu ‘i lalo ‘i he peesi taki taha. ‘I he ‘osi ‘a e polosiuá, ako ‘a e Ko e Hā ‘Oku Ako‘i Mo‘oni ‘e he Tohi Tapú? pe What Can the Bible Teach Us? ke tokoni‘i ho‘o ako Tohi Tapú ke fakalakalaka ki he papitaisó.