‘I Ma‘asi 23, ko e toko 12 miliona nai pe ko ha kau ‘a‘ahi tokolahi ange ‘oku ‘amanekina ke nau ma‘u ‘a e Fakamanatú ‘a ia ko ‘etau kau ‘a‘ahi. Ko ha faifakamo‘oni tu‘u-ki-mu‘a ē te nau ma‘ú ‘i he taimi ‘e lāulea ai ‘a e tokotaha-malangá ‘o fekau‘aki mo e me‘a‘ofa ‘a Sihova ko e huhu‘í pea mo e ngaahi tāpuaki ‘e ni‘ihi ‘e ma‘u ‘e he fa‘ahinga ‘o e tangatá ‘i he kaha‘ú! (‘Ai. 11:6-9; 35:5, 6; 65:21-23; Sione 3:16) Kae kehe, ‘oku ‘ikai ko e tokotaha-malangá pē ‘e faifakamo‘oni ‘i he kātoanga makehe ko ení. Ko kitautolu kotoa ‘oku lava ke tau kau ki ai ‘aki hono talitali lelei loto-māfana ‘etau kau ‘a‘ahí. (Loma 15:7) Ko e ngaahi fokotu‘u eni ‘e ni‘ihi.

• ‘I he ‘ikai ke ke tangutu ‘i ho nofo‘angá pea tatali ki he kamata ‘a e polokalamá, talitali lelei ‘a e kau ‘a‘ahí mo e fa‘ahinga ‘ikai longomo‘uí ‘aki ha malimali mo ha fakafe‘iloaki anga-fakakaume‘a

• ‘I ho‘o fai ha tokanga makehe ki ho ngaahi maheni na‘á ke fakaafe‘i maí, tokanga ki he ni‘ihi kehe na‘a nau ‘i ai nai ko ‘enau ma‘u ha tohi fakaafe ‘i he feingangāué. Fakaafe‘i ‘a e fa‘ahinga fo‘oú ke tangutu fakataha mo koe. Sio fakataha mo ia ‘i ho Tohi Tapú mo e tohi hivá

• Hili ‘a e malangá, mateuteu ke tali ha ngaahi fehu‘i. Kapau ‘oku fakangatangata ‘a e taimí koe‘uhi ko e pau ki ho‘o fakataha‘angá ke mavahe kae ‘atā ki ha fakataha‘anga ‘e taha, fai ha fokotu‘utu‘u ke ‘a‘ahi ki he tokotahá ‘i ha ngaahi ‘aho si‘i mei ai. Kapau ‘oku ‘ikai te ke ma‘u hono tu‘asilá, te ke pehē nai: “Na‘e fēfē ho‘o fakakaukau ki he polokalamá. ‘E lava nai ke u fetu‘utaki atu?”