Naʻe nofoʻaki faitōnunga ʻa Sāmiuela kia Sihova ʻi he kotoa ʻo ʻene moʻuí. ʻI heʻene kei tamasiʻí, naʻá ne fakafisi ke fai ha tōʻonga taʻetaau ʻo hangē ko e ongo foha ʻo ʻĪlai ko Hofinai mo Fineasí. (1 Sām. 2:22-26) Naʻe hokohoko atu ʻa e tupu ʻa Sāmiuelá pea naʻe kau ai pē ʻa Sihova mo ia. (1 Sām. 3:19) ʻI heʻene taʻumotuʻá naʻe hokohoko atu ai pē ʻene tauhi faitōnunga kia Sihová neongo naʻe ʻikai fai pehē ʻa hono ongo fohá.​—1 Sām. 8:1-5.

Ko e hā ʻoku tau ako mei he faʻifaʻitakiʻanga ʻa Sāmiuelá? Kapau ko ha tokotaha kei siʻi koe, hoko ʻo tuipau ʻoku mahinoʻi ʻe Sihova ʻa e faingataʻa ʻokú ke fehangahangai mo iá mo e anga hoʻo ongoʻí. Te ne tokoniʻi koe ke ke loto-toʻa. (ʻAi. 41:10, 13) Kapau ko ha mātuʻa koe ʻoku ʻikai ke tauhi hoʻo kiʻi tamá kia Sihova te ke maʻu ʻa e fakafiemālie ʻi he ʻiloʻi naʻe ʻikai ke fakamālohiʻi ʻe Sāmiuela hono ongo fohá ke na nofoʻaki mateaki ki he ngaahi tuʻunga ʻa Sihová. ʻI heʻene tuku ʻa e ngaahi meʻá ki he toʻukupu ʻo Sihová naʻá ne tauhi maʻu ʻa ʻene anga-tonú pea fakahōifuaʻi ʻene Tamai fakahēvaní ʻa Sihova. Mahalo ko hoʻomo faʻifaʻitakiʻanga leleí te ne ueʻi hoʻomo kiʻi tamá ke foki kia Sihova.

SIO ʻI HE VITIŌ AKO MEIATE KINAUTOLU​—SĀMIUELA, PEA TALI LEVA ʻA E NGAAHI FEHUʻI KO ENÍ:

• ʻI he kei siʻi ʻa Sāmiuelá naʻe anga-fēfē ʻene fakahaaʻi ʻa e loto-toʻá?

• Naʻe anga-fēfē hono fakahaaʻi ʻe Teni ʻa e loto-toʻá?

• Naʻe anga-fēfē hono fokotuʻu ʻe Sāmiuela ha faʻifaʻitakiʻanga lelei ʻi heʻene hoko ʻo taʻumotuʻá?

• Naʻe anga-fēfē hono fakahaaʻi ʻe he ongo mātuʻa ʻa Tení ha faʻifaʻitakiʻanga lelei?