Ko e foʻi lea ko e akonaki ʻoku lava ke ʻuhinga ko e tataki pe ko e akoʻi. ʻI he taimi ʻe niʻihi, ʻoku kau ki ai hono fakatonutonu ʻa e tōʻonga hala ʻa ha kiʻi tama. ʻOku faʻa kau ki ai hono ʻoatu ha akoʻi fakaeʻulungaanga ke tokoniʻi ha kiʻi tama ke ne fai ʻa e ngaahi fili lelei ʻi he kamatá pē.

ʻI he laui hongofuluʻi taʻu ki mui ní, kuo kamata ke mōlia atu ʻa e akonakí mei he ngaahi ʻapi ʻe niʻihi, he ʻoku ilifia ʻa e mātuʻá naʻa hoko hono fakatonutonu ha kiʻi tama ʻo tuku hifo ai ʻene ongoʻi fakamahuʻingaʻi-kitá. Neongo ia, ko e ngaahi mātuʻa fakapotopotó ʻoku nau fokotuʻu ha ngaahi lao feʻungamālie pea akoʻi ʻenau fānaú ke talangofua ki ai.

“ʻOku fiemaʻu ʻa e ngaahi fakangatangata ki he fānaú ke tokoniʻi kinautolu ke tupu hake ʻo hoko ko ha kakai lalahi matuʻotuʻa. ʻI he ʻikai ha akonakí, ko e fānaú te nau hangē ha vaka ʻoku ʻikai hano fohé​—ʻe faai atu pē ʻo ʻauhia pe mafuli.”​—Pamela.

Hoko ʻo tuʻumaʻu. Kapau ʻoku ʻikai ke talangofua hoʻo kiʻi tamá ki hoʻo ngaahi laó, fakapapauʻi kiate ia ʻa hono nunuʻá. ʻI he tafaʻaki ʻe tahá, mateuteu ke fakaongoongoleleiʻi hoʻo kiʻi tamá ʻi heʻene talangofuá.

“ʻOku ou fakaongoongoleleiʻi maʻu pē ʻeku fānaú ʻi heʻenau talangofua ʻi ha māmani ʻoku tātātaha ai ʻa e talangofuá. ʻOku ʻai ʻe he fakaongoongoleleí ke faingofua ange ke nau tali ʻa e fakatonutonú ʻi he taimi ʻoku fiemaʻu aí.”​—Christine.

TEFITOʻI MOʻONI FAKATOHITAPU: “ʻIlonga ha meʻa ʻoku tō ʻe ha taha, ko e meʻa ia te ne utú foki.”​—Kalētia 6:7.

Hoko ʻo fakaʻatuʻi. Fakakaukau ki he taʻu mo e malava ʻa e kiʻi tamá pea mo e mafatukituki ʻene fehālaakí. ʻOku faʻa ola lelei ʻa e akonakí kapau ʻoku felāveʻi mo e fehālaakí​—ko e fakatātaá, ko hono ngāuehalaʻaki ʻa e telefoní ʻe lava ke toʻo ai hoʻo telefoní ʻi ha vahaʻa taimi. ʻI he taimi tatau, fakaʻehiʻehi mei he ʻita ʻi he fanga kiʻi meʻa laulaunoá.

“ʻOku ou feinga ke fakapapauʻi pe naʻe talangataʻa ʻiloʻilo pau ʻeku kiʻi tamá pe ko haʻane fehālaaki pē. ʻOku ʻi ai ʻa e faikehekehe ʻi ha ʻulungaanga kovi ʻoku fiemaʻu ke taʻaki fuʻu pea mo ha kiʻi fehālaaki ʻoku fiemaʻu pē ki ai hano fakatonutonu.”​—Wendell.

TEFITOʻI MOʻONI FAKATOHITAPU: “ʻOua te mou fakaʻitaʻi hoʻomou fānaú, koeʻuhi ke ʻoua te nau hoko ʻo loto-siʻi.”​—Kolose 3:21; fakamatala ʻi lalo.

Hoko ʻo anga-ʻofa. ʻOku faingofua ange ki he fānaú ke tali pea ngāueʻaki ʻa e akonakí ʻi heʻenau ʻiloʻi ko e fakaueʻiloto tefito ʻa e mātuʻá ko e ʻofa.

“ʻI he fai ʻe homa fohá ha fehālaaki, naʻá ma fakapapauʻi kiate ia naʻá ma laukauʻaki ʻa e ngaahi fili fakapotopoto kotoa naʻá ne fai ki muʻá. Naʻá ma fakamatalaʻi ange, heʻikai ke uesia ʻe he fehālaakí hono ongoongó kapau te ne tali ʻa e fakatonutonú pea naʻá ma ʻi ai ke tokoniʻi ia ke ne fai ia.”​—Daniel.

TEFITOʻI MOʻONI FAKATOHITAPU: “Ko e ʻofá ʻoku kātaki mo anga-lelei.”​—1 Kolinitō 13:4.