KI HE TOʻUTUPÚ
9: ʻIloʻanga
KO HONO ʻUHINGÁ
Ko ho ʻiloʻangá ʻoku fakalaka atu ia ʻi ho hingoá mo ho fōtunga hā maí. ʻOku kau ki ai ʻa e ngaahi meʻa ʻokú ke fakamahuʻingaʻí, tui ki aí pea mo ho angaʻitangatá. Ko hono moʻoní, ko ho ʻiloʻangá ʻoku kaunga ki ai ʻa e meʻa kotoa ʻoku fekauʻaki mo koé—fakatouʻosi ʻi loto mo tuʻa.
ʻUHINGA ʻOKU MAHUʻINGA AÍ
ʻI he taimi ʻokú ke ʻiloʻi moʻoni ai ʻa koe tonú, ʻokú ke tuʻu maʻu ʻi hoʻo tuí kae ʻikai ko hono fakaʻatā ho toʻumeʻá ke nau puleʻi koe.
“Ko e kakai tokolahi ʻoku nau hangē ko e ngaahi tamapua tuʻuaki ʻi ha falekoloa. ʻOku ʻikai ke nau fili ʻa e vala ke nau tuí; ʻoku fili ia ʻe he niʻihi kehé.”—Adrian.
“Kuó u ako ki he founga ke tuʻu maʻu ai ʻi he meʻa ʻoku totonú naʻa mo e ʻi he taimi ʻoku faingataʻa aí. ʻOku lava ke u tala pe ko hai hoku ngaahi kaumeʻa moʻoní ʻi he anga ʻenau tōʻongá pea mo e anga ʻeku fakafeangai ʻi heʻeku ʻi ai mo kinautolú.”—Courtney.
TEFITOʻI MOʻONI FAKATOHITAPU: “Tuku hono fakafuo kimoutolu ki he fokotuʻutuʻu ko ení, ka ke fai homou liliú ʻaki hono fakafoʻou homou ʻatamaí.”—Loma 12:2.
MEʻA ʻE LAVA KE KE FAÍ
Fakakaukau ki ho tuʻunga he taimi ní pea mo e faʻahinga tokotaha ʻokú ke loto ke hoko ki aí ʻaki hono sivisiviʻi ho ngaahi mālohingá, vaivaiʻangá pea mo e ngaahi meʻa ʻokú ke tuipau ki aí. Ko ha founga lelei ke kamataʻaki ko hono tali ʻa e ngaahi fehuʻi ko ení.
Mālohinga: Ko e hā ʻa e ngaahi talēniti mo e ngaahi pōtoʻi ʻoku ou maʻú? Ko e hā hoku ngaahi mālohingá? (Ko e fakatātaá: ʻOku ou tauhi taimi? Mapuleʻi-kita? Ngāue mālohi? Nima-homo?) Ko e hā ʻa e ngaahi ngāue lelei ʻoku ou faí?
FOKOTUʻU: ʻOku faingataʻa ke ke fakakaukau ki ha meʻa lelei fekauʻaki mo koe? ʻEke ki ha mātuʻa pe ko ha kaumeʻa falalaʻanga pe ko e hā ʻa e mālohinga ʻokú ne sio ʻokú ke maʻú pea mo hono ʻuhingá.
TEFITOʻI MOʻONI FAKATOHITAPU: “Tuku ki he tokotaha taki taha ke ne sivisiviʻi ʻene ngaahi ngāue pē ʻaʻaná, pea te ne maʻu leva ai ha ʻuhinga ke fiefia ʻi he fekauʻaki mo ia toko taha pē, ʻo ʻikai ʻi hono fakahoa atu ki ha taha kehe.”—Kalētia 6:4.
Vaivaiʻanga: Ko e hā ʻa e ngaahi tafaʻaki ʻi hoku angaʻitangatá ʻoku fiemaʻu lahi taha ke u fakaleleiʻí? Ko fē ʻa e taimi ʻoku ou mātuʻaki tuʻu laveangofua ai ki he ʻahiʻahí? Ko fē ʻa e ngaahi tafaʻaki ʻe lava ke u fakahāhā lahi ange ai ʻa e mapuleʻi-kitá?
TEFITOʻI MOʻONI FAKATOHITAPU: “Kapau ʻoku tau leaʻaki ʻo pehē, ‘ʻOku ʻikai haʻatau angahala,’ ʻoku tau takihalaʻi ai kitautolu tonu.”—1 Sione 1:8.
Tuipau: Ko e hā ʻa e tuʻunga ʻoku ou muimui ki aí, pea ko e hā hono ʻuhingá? ʻOku ou tui ki he ʻOtuá? Ko e hā ʻa e fakamoʻoni kuó ne fakatuipauʻi au ʻokú ne ʻi aí? Ko e hā ʻa e ngaahi tōʻonga ʻoku ou fakakaukau ʻoku taʻetotonú, pea ko e hā hono ʻuhingá? Ko e hā ʻa e tuipau ʻoku ou maʻu fekauʻaki mo e kahaʻú?
TEFITOʻI MOʻONI FAKATOHITAPU: “ʻE hanganaki tokangaʻi koe ʻe he malava fakaefakakaukaú, pea ʻe leʻohi koe ʻe he ʻiloʻiló.”—Palōveepi 2:11.
Te Ke Fie Vakai Foki ki Heni
TALI KI HE FEHU‘I ‘E 10 ‘OKU ‘EKE ‘E HE TO‘UTUPÚ
Ko Hai Au?
Ko e lāu‘ilo ki he me‘a ‘okú ke fakamahu‘inga‘í, mālohingá, fakangatangatá mo e taumu‘á te ne tokoni‘i koe ke fai ha fili fakapotopoto ‘i he taimi ‘oku tenge ai koé.
