Ko e kakai ʻoku nau fua fatongiá ʻoku nau alafalalaʻanga. ʻOku nau muimuiʻi ha ngāue naʻe vaheʻi kiate kinautolu pea fakakakato ia ʻi hono taimí.

Neongo kapau ʻoku fakangatangata ʻa e malava ʻa e fānau īkí, ʻe lava ke nau kamata ako ke hoko ʻo fua fatongia. “Ko e malava ʻa ha kiʻi tama ke fai ʻa e meʻa ʻoku tala ange kiate iá ʻoku kamata ia ʻi hono māhina 15, pea ko ʻene holi ke fai loto-lelei ʻa e fanga kiʻi ngāué ʻoku kamata ia ʻi he māhina 18 nai,” ko e lau ia ʻa e tohi Parenting Without Borders. “ʻI he ngaahi anga fakafonua lahi ko e ngaahi mātuʻá ʻoku kamata ke nau akoʻi ʻenau fānaú ke fai ʻa e fanga kiʻi ngāué mei he taʻu nimá ki he taʻu fitú, pea ko e fānau iiki ko ení ʻoku malava ke nau fai ʻa e ngaahi ngāue lahi ʻi ʻapi.”

ʻI he ngaahi feituʻu ʻe niʻihi, ko e tamaiki lalahi tokolahi ʻoku nau feinga ke mavahe ʻo nofo pē ʻiate kinautolu pē ka ʻoku ʻikai malava ke nau fai pehē pea ʻoku nau toe foki leva ʻo nofo mo ʻenau ongo mātuʻá. ʻI he tuʻunga ʻe niʻihi, ʻoku hoko eni koeʻuhí naʻe ʻikai ʻaupito ke akoʻi ʻa e toʻutupú ke levaʻi lelei ʻa e paʻangá, tokangaʻi ha ʻapi pe fakahoko ʻa e ngaahi fatongia fakaʻahó.

Ko ia ai, ko e lelei tahá ke ke akoʻi hoʻo fānaú ki he ngaahi fatongia te nau fai ʻi heʻenau fuʻu lahí. “ʻOku ʻikai te ke loto ke nau fakafalala pē kia koe kae ʻoua ke nau taʻu 18 peá ke tuku atu kinautolu ki he māmaní,” ko e lau ia ʻa e tohi How to Raise an Adult.

Vaheʻi ʻa e ngaahi ngāue.

TEFITOʻI MOʻONI FAKATOHITAPU: “ʻOku ʻaonga ʻa e faʻahinga kotoa pē ʻo e ngāue mālohí.”​—Palōveepi 14:23.

Ko e fānau īkí ʻoku nau vēkeveke ke ngāue fakataha mo ʻenau ngaahi mātuʻá. ʻE lava ke ke ngāueʻaongaʻaki ʻa e hehema fakanatula ko ení ʻaki hono vaheʻi ki hoʻo fānaú ʻa e ngaahi ngāue ʻi ʻapi.

Ko e ngaahi mātuʻa ʻe niʻihi ʻoku nau toumoua ke fai ia. ʻOku nau fakaʻuhinga ko ʻenau fānaú ʻoku ʻosi tuʻuna pē ʻenau homueká ʻi he ʻaho taki taha, ko ia ko e hā ke toe fakalahi atu ai ʻenau kavengá?

Kae kehe, ko e fānau ʻoku nau fai ʻa e ngaahi ngāué ʻoku ngalingali ange te nau lavameʻa ʻi he akó, koeʻuhi ko e ngaahi ngāué ʻokú ne akoʻi kinautolu ke tali ʻa e ngaahi ngāue ʻoku ʻoange ʻi he akó pea fakakakato. He ko ē, ʻoku pehē ʻi he tohi Parenting Without Borders, “ʻi he taimi ʻoku tau tukunoaʻi ai ʻa e vēkeveke ʻa e fānaú ke fai ha ngāue ʻi heʻenau kei siʻi angé, ʻoku nau maʻu ai ʻa e fakakaukau ʻo pehē ko e tokoní ʻoku ʻikai mahuʻinga . . . ʻOku kamata foki ke nau ʻamanekina ke fai ʻe he niʻihi kehé ʻa e ngaahi meʻá maʻanautolu.”

 Hangē ko ia ʻoku fakahaaʻi ʻi he fakamatala ko iá, ko hono fai ʻe he fānaú ʻa e fanga kiʻi ngāué ʻoku akoʻi ai kinautolu ke nau faʻa tokoni ki he niʻihi kehé kae ʻikai ke nau hoko ʻo siokita. Ko e fanga kiʻi ngāue ko iá ʻokú ne tokoniʻi ʻa e fānaú ke nau ʻiloʻi ʻoku ʻi ai honau ngafa mahuʻinga ke fakahoko ʻi he fāmilí.

Tokoniʻi hoʻo fānaú ke nau fua ʻenau ngaahi fehālaakí.

TEFITOʻI MOʻONI FAKATOHITAPU: “Fanongo ki he faleʻí pea tali ʻa e akonakí, koeʻuhí ke ke hoko ai ʻo poto ʻi ho kahaʻú.”​—Palōveepi 19:20.

ʻI he taimi ʻoku fai ai ʻe hoʻo fānaú ʻa e ngaahi fehālaakí​—ko e fakatātaá, kapau ʻoku maumauʻi ʻe ho fohá pe ʻofefiné ha koloa ʻa ha taha​—talitekeʻi ʻa e hehema ke fūfuuʻi ʻa e meʻa naʻe hokó. Ko e fānaú ʻe lava ke nau tali ʻa e nunuʻá​—ʻi he tuʻunga ko ení, ko e kole fakamolemole pea mahalo naʻa mo hono fetongi ia.

Ko hono fakahaaʻi ʻa e fehālaakí mo e tōnounoú te ne akoʻi hoʻo fānaú

• ke nau hoko ʻo faitotonu pea fakahaaʻi ʻenau fehālaakí

• ke fakaʻehiʻehi mei hono tukuakiʻi ʻa e niʻihi kehé

• ke fakaʻehiʻehi mei he kumi kalofangá

• ke kole fakamolemole, ʻo ka feʻungamālie