1. Ko e hā ‘a e ngaahi me‘a lelei ‘oku ‘ai ‘e he huhu‘í ke tau malava ‘o ma‘ú?

KO E feilaulau huhu‘i ‘a Sīsū Kalaisí ‘oku malava ai ke tau ma‘u ‘a e ngaahi tāpuaki lahi. Ko e fakatātaá, ko e fokotu‘utu‘u ki he huhu‘í ‘oku fakaava ai ‘a e matapā ki he fānau kotoa ‘a ‘Ātama ‘oku ‘ofa ki he mā‘oni‘oní ke nau hoko ko e konga ‘o e fāmili ‘o e ‘Otuá ‘i ha ‘aho. Ko e tāpuaki ‘e taha ko e malava ke tau mo‘ui ta‘engata ‘i he fiefia. ‘Oku toe malava foki ai ke tau fakatu‘otu‘a atu ki he mo‘ui fiefia ‘o ta‘engata. Mahulu hake aí, ‘oku fekau‘aki ‘a e huhu‘í mo e ngaahi me‘a ‘oku mātu‘aki mahu‘inga ki he tokotaha kotoa ‘i hēvani mo māmani.—Hep. 1:8, 9.

2. (a) Ko e hā ‘a e ngaahi me‘a mātu‘aki mahu‘inga ‘i hēvani mo māmani na‘e fakakau ‘e Sīsū ‘i he‘ene lotú? (Sio ki he ‘uluaki fakatātā ‘i he kupú ni.) (e) Ko e hā te tau lāulea ki ai ‘i he kupu ko ení?

² ‘I he ta‘u nai ‘e ua ki mu‘a ke pekia ‘a Sīsuú, na‘á ne ako‘i ‘a ‘ene kau ākongá ke nau lotu ‘o pehē: “Ko ‘emau Tamai ‘oku ‘i hēvani, tuku ke fakamā‘oni‘oni‘i ho huafá. Tuku ke hoko mai ho Pule‘angá. Tuku ke fai ho finangaló, ‘o hangē ko ia ‘i hēvaní, ke pehē foki ‘i  māmani.” (Māt 6:9, 10) Tau sivisivi‘i angé ‘a e anga ‘o e fekau‘aki ‘a e huhu‘í mo hono fakamā‘oni‘oni‘i ‘a e huafa ‘o Sihová, mo e pule ‘a e Pule‘anga ‘o e ‘Otuá, pea mo hono fai ‘a e finangalo ‘o e ‘Otuá.

3. Ko e hā ‘oku fakafofonga‘i ‘e he huafa ‘o Sihová? Na‘e anga-fēfē hono fakaongoongokovi‘i ‘e Sētane ‘a e huafa ‘o Sihová?

³ Ko e me‘a mu‘omu‘a tahá, na‘e lotu ‘a Sīsū ke fakamā‘oni‘oni‘i pe ‘ai ke mā‘oni‘oni ‘a e huafa ‘o Sihová. ‘Oku fakafofonga‘i ‘e he huafa ‘o Sihová ‘a Sihova tonu, ko hai ia. Ko ia ‘a e Tokotaha mālohi taha mo mā‘oni‘oni taha ‘i he kotoa ‘o e ‘univēsí. Na‘e toe ui ia ‘e Sīsū ko e “Tamai Mā‘oni‘oni.” (Sione 17:11) Koe‘uhi ko Sihová ‘oku mā‘oni‘oni, ko e me‘a kotoa pē ‘okú ne faí pea ko ha lao pē ‘okú ne fa‘u ‘oku mā‘oni‘oni. Ka ‘i ‘Īteni, na‘e fehu‘ia olopoto ai ‘e Sētane ‘a e totonu ‘a e ‘Otuá ke ne fokotu‘u ‘a e ngaahi tu‘unga ki he fa‘ahinga ‘o e tangatá. Na‘á ne loi ‘o fekau‘aki mo Sihova peá ne fakaongoongokovi‘i ai ‘a e huafa pe ko e ongoongo ‘o e ‘Otuá.—Sēn. 3:1-5.

4. Na‘e anga-fēfē hono ‘ai ‘e Sīsū ke mā‘oni‘oni ‘a e huafa ‘o e ‘Otuá?

⁴ ‘I he tafa‘aki ‘e tahá, ko Sīsuú, na‘á ne ‘ofa mo‘oni ‘i he huafa ‘o Sihová peá ne fai ‘a e me‘a kotoa pē na‘á ne malavá ke fakamā‘oni‘oni‘i ia. (Sione 17:25, 26) Anga-fēfē? ‘Aki hono ‘ulungāngá mo ‘ene akonakí, na‘e tokoni‘i ai ‘e Sīsū ‘a e ni‘ihi kehé ke nau ‘ilo‘i ko e ngaahi tu‘unga ‘a Sihová ‘oku totonu pea ko e me‘a kotoa pē ‘okú ne fiema‘u meiate kitautolú ko e lelei pē ia ma‘atautolu. (Lau ‘a e Saame 40:8-10.) Na‘a mo e taimi na‘e ‘ai ai ia ‘e Sētane ke ne faingata‘a‘ia peá ne pekia ‘i ha pekia fakamamahí, na‘e kei mateaki ai pē ‘a Sīsū. Na‘á ne fakamo‘oni‘i ‘oku malava ke talangofua kakato ha tangata haohaoa kia Sihova.

5. ‘E lava fēfē ke tau ‘ai ke mā‘oni‘oni ‘a e huafa ‘o Sihová?

⁵ ‘E lava fēfē ke tau fakahāhā ‘oku tau ‘ofa ‘i he huafa ‘o Sihová? ‘Aki hotau ‘ulungāngá. ‘Oku fiema‘u mai ‘e Sihova ke tau mā‘oni‘oni. (Lau ‘a e 1 Pita 1:15, 16.) ‘Oku ‘uhinga ení ke tau lotu kiate ia pē pea talangofua kiate ia ‘aki hotau lotó kotoa. Na‘a mo e taimi ‘oku fakatanga‘i ai kitautolú, ‘oku tau fai hotau lelei tahá ke mo‘ui ‘i he founga ‘oku ako‘i mai ‘e Sihová. ‘I he mo‘ui ‘o fakatatau ki he ngaahi tu‘unga ‘a Sihová, ‘oku tau ‘oatu ai ‘a e lāngilangi ki hono huafá. (Māt. 5:14-16) ‘Oku tau fakamo‘oni‘i ai ko e ngaahi lao ‘a Sihová ‘oku lelei pea ko Sētané ko ha tokotaha loi. ‘Oku ‘ikai ke tau haohaoa, ko ia te tau fai ‘a e ngaahi fehālaaki. ‘I he taimi ‘oku tau fai pehē aí, ‘oku tau fakatomala pea fai hotau lelei tahá ke tuku hono fai ‘a e ngaahi me‘a ‘oku ‘ikai ke fakalāngilangi‘i ai ‘a e huafa ‘o Sihová.—Saame 79:9.

6. Ko e hā ‘oku lava ai ke vakai mai ‘a Sihova ‘oku tau mā‘oni‘oní, neongo ‘etau ta‘ehaohaoá?

⁶ Pe ‘oku tau kau ‘i he kau paní pe ko e “fanga sipi kehe,” ‘e fakamolemole‘i ‘e Sihova ‘etau ngaahi angahalá kapau ‘oku tau tui ki he huhu‘í. ‘Okú ne tali ko hono kau lotu ‘a e fa‘ahinga ‘oku nau fakatapui kiate iá. ‘Okú ne fakahaa‘i ‘oku mā‘oni‘oni ‘a e kau Kalisitiane paní ‘i he tu‘unga ko hono ngaahi foha pea ‘oku mā‘oni‘oni ‘a e “fanga sipi kehe” ‘i he tu‘unga ko hono ngaahi kaume‘a. (Sione 10:16; Loma 5:1, 2; Sēm. 2:21-25) Ko ia ai, na‘a mo e taimí ni, ‘oku ‘ai ‘e he huhu‘í ke tau malava ‘o ma‘u ha vaha‘angatae lelei mo ‘etau Tamaí pea fakamā‘oni‘oni‘i ‘a hono huafá.

7. Ko e hā ‘a e ngaahi tāpuaki ‘oku ‘ai ke malava ‘e he huhu‘í?

⁷ ‘I he sīpinga lotú, na‘e pehē ai ‘e Sīsū: “Tuku ke hoko mai ho Pule‘angá.” ‘Oku anga-fēfē ‘a e fekau‘aki ‘a e huhu‘í mo e Pule‘anga ‘o e ‘Otuá?  Ko e Pule‘anga ‘o e ‘Otuá, pe founga-pulé, ‘oku fa‘u‘aki ia ‘a Sīsū mo e toko 144,000 kuo fili mei he fa‘ahinga ‘o e tangatá. ‘Oku ‘ai ‘e he huhu‘í ke malava ‘o fokotu‘u hake ki hēvani ‘a e fa‘ahinga ko eni ‘o e tangatá. (Fkh. 5:9, 10; 14:1) Te nau hoko ko e ngaahi tu‘i mo e kau taula‘eiki pea te nau pule mai ki he māmaní fakataha mo Sīsū ‘i he ta‘u ‘e taha afe. Lolotonga ‘a e taimi ko iá, ‘e ngāue‘aki ‘e Sihova ‘a e Pule‘angá ke ngaohi ‘a e māmaní ko ha palataisi pea tokoni‘i ‘a e fa‘ahinga ‘o e tangatá kotoa ke nau hoko ‘o haohaoa. Ko e kau sevāniti ‘a Sihova ‘i hēvani mo māmaní ‘e faai atu pē ‘o nau hoko ko e fāmili pē ‘e taha. (Fkh. 5:13; 20:6) ‘E faka‘auha ‘e Sīsū ‘a Sētane pea to‘o ‘a e ngaahi palopalema kotoa na‘á ne fakatupungá.—Sēn. 3:15.

8. (a) Na‘e anga-fēfē hono tokoni‘i ‘e Sīsū ‘a ‘ene kau ākongá ke nau mahino‘i ‘oku mahu‘inga ‘a e Pule‘anga ‘o e ‘Otuá? (e) ‘Oku anga-fēfē ‘etau poupou ‘i he ‘ahó ni ki he Pule‘angá?

⁸ Na‘e tokoni‘i ‘e Sīsū ‘a ‘ene kau ākongá ke nau mahino‘i ‘a e mahu‘inga ‘o e Pule‘anga ‘o e ‘Otuá. Anga-fēfē? ‘I he hili pē ‘ene papitaisó, na‘e kamata ke malanga‘i ‘e Sīsū “‘a e ongoongo lelei ‘o e Pule‘anga ‘o e ‘Otuá” ‘i he feitu‘u kotoa pē na‘á ne ‘alu ki aí. (Luke 4:43) Na‘á ne tala foki ki he‘ene kau ākongá ke nau hoko ko ‘ene kau fakamo‘oni ‘o a‘u “ki he feitu‘u taupotu taha ‘o e māmaní.” (Ngā. 1:6-8) ‘I he ‘ahó ni, fakafou ‘i he ngāue ko hono malanga‘i ‘o e Pule‘angá, ‘oku ma‘u ai ‘e he kakaí ‘a e faingamālie ke ako fekau‘aki mo e huhu‘í pea hoko ko e fa‘ahinga ‘e pule mai ki ai ‘a e Pule‘anga ‘o e ‘Otuá. ‘Oku tau fakahaa‘i ko e fa‘ahinga mateaki kitautolu ki he Pule‘angá ‘aki ‘etau tokoni ki he kau paní ‘i hono malanga‘i ‘a e ongoongo leleí ‘i māmani lahi.—Māt. 24:14; 25:40.

9. Ko e hā ‘e lava ai ke tau tuipau ‘e fakahoko ‘e Sihova ‘ene taumu‘a ma‘á e fa‘ahinga ‘o e tangatá?

⁹ Ko e hā ‘a e ‘uhinga ‘a Sīsū ‘i he‘ene hoko atu ‘o pehē: “Tuku ke fai ho finangaló”? ‘I he taimi ‘oku pehē ai ‘e Sihova ‘e hoko ha me‘á, ‘e hoko ia. (‘Ai. 55:11) Na‘e ‘ikai lava ‘e he angatu‘u ‘a Sētané ‘o ta‘ofi ‘a Sihova. Ko e hā ‘a e finangalo ‘o Sihova ki he māmaní? Na‘á ne loto ke fakafonu ‘a e māmaní ‘aki ha fānau haohaoa ‘a ‘Ātama mo ‘Ivi. (Sēn. 1:28) Kapau na‘e mate ‘a ‘Ātama mo ‘Ivi ‘oku ‘ikai ha‘ana fānau, na‘e ‘ikai mei fakahoko ai ‘a e taumu‘a ‘a e ‘Otuá ke fakafonu ‘a e māmaní ‘aki ‘ena fānaú. Ko ia na‘e faka‘atā kinaua ‘e Sihova ke na ma‘u fānau. ‘Oku ‘oange ‘e he huhu‘í ki he fa‘ahinga kotoa ‘oku nau ngāue‘i ‘a e tuí ‘a e faingamālie ke nau hoko ‘o haohaoa pea mo‘ui ta‘engata. ‘Oku ‘ofa ‘a Sihova ki he kakaí pea ‘okú ne loto ke tau ma‘u ‘a e mo‘ui fisifisimu‘a ko ia na‘á ne fakataumu‘a ma‘atautolú.

10. ‘Oku anga-fēfē ‘a e ma‘u ‘aonga mei he huhu‘í ‘a e fa‘ahinga ‘o e tangatá kuo nau maté?

¹⁰ Fēfē ‘a e kakai ‘e laui piliona na‘a nau mate ‘oku te‘eki ai ‘aupito ke nau ma‘u ha faingamālie ke ‘ilo‘i ‘a Sihová? ‘Oku fiema‘u ‘e Sihova ke mo‘ui ‘a e kakaí. Ko ia ‘e a‘u ‘o ne fakamo‘ui ‘a e fa‘ahinga kuo maté. ‘Oku ‘ai ‘e he huhu‘í ke malava ‘o nau toe mo‘ui. Te nau malava leva ai ke ako ‘o fekau‘aki mo Sihova pea mo‘ui ta‘engata. (Ngā. 24:15) Ko Sihova ‘a e Matavai ‘o e mo‘uí. ‘I he taimi ‘e fakamo‘ui ai ‘e Sihova ‘a e fa‘ahinga kuo nau maté, te ne hoko ko ‘enau Tamai. (Saame 36:9) ‘I he sīpinga lotú, na‘e pehē ai ‘e Sīsū ko Sihova ‘a ‘etau “Tamai ‘oku ‘i hēvani.” (Māt. 6:9) Kuo ‘oange ‘e Sihova kia Sīsū ha ngafa mātu‘aki mahu‘inga ki hono fokotu‘u hake ‘a e kau maté. Na‘e pehē ‘e Sīsū: “Ko au ‘a e toetu‘ú pea mo e mo‘uí.”—Sione 6:40, 44; 11:25.

11. Ko e hā ‘a e finangalo ‘o e ‘Otuá ki he “fu‘u kakai lahi”?

¹¹ Na‘e toe pehē ‘e Sīsū: “‘Ilonga ‘a ia ‘okú ne fai ‘a e finangalo ‘o e ‘Otuá, ko ia ia ‘a hoku tokouá mo hoku tuofefiné mo ‘eku fa‘eé.” (Mk.  3:35) Ko e finangalo ia ‘o e ‘Otuá ke hoko ‘a e kakai tokolahi mei he pule‘anga kotoa pē mo e ngaahi matakali mo e ngaahi lea ko ‘ene kau lotu. ‘Oku fakamatala‘i kinautolu “ko ha fu‘u kakai lahi, ‘a ia na‘e ‘ikai lava ‘e ha taha ke lau.” ‘Oku nau tui ki he huhu‘í pea loto ke talangofua ki he ‘Otuá. ‘Oku nau fakahīkihiki‘i ia mo pehē: “Ko hotau fakamo‘uí ‘oku mei he ‘Otuá, ‘a ia ‘okú ne ‘afio ‘i he taloní, pea mei he Lamí.”—Fkh. 7:9, 10.

12. Mei he lotu ‘a Sīsuú, ko e hā ‘oku tau ako fekau‘aki mo e taumu‘a ‘a Sihova ki he fa‘ahinga ‘o e tangatá?

¹² Kuo tau ako ‘a e me‘a lahi ‘o fekau‘aki mo Sihova mo ‘ene taumu‘a ki he fa‘ahinga ‘o e tangatá mei he sīpinga lotu ‘a Sīsuú. ‘Uluakí, kuo pau ke tau fai ‘a e me‘a kotoa ‘oku tau malavá ke fakamā‘oni‘oni‘i ‘a e huafa ‘o Sihová pea fakalāngilangi‘i ia. (‘Ai. 8:13) Ko e feilaulau huhu‘i ‘a Sīsuú, ‘a ia ‘okú ne ‘ai ke malava ‘a hotau fakamo‘uí, ‘oku toe fakalāngilangi‘i ai ‘a e huafa ‘o e ‘Otuá. Ko hono mo‘oní, ko e hingoa ‘o Sīsuú tonu ‘oku ‘uhingá “Ko Sihova ‘a e Fakamo‘uí.” Uá, ‘e ngāue‘aki ‘e Sihova ‘a hono Pule‘angá ke ne ‘omai ‘a e ngaahi ‘aonga kotoa ‘o e huhu‘í ki he fa‘ahinga talangofua ‘o e tangatá. Pea ko e tolú, ‘oku tau tuipau he‘ikai ha me‘a ‘e lava ke ne ta‘ofi ‘a hono fai ‘a e finangalo ‘o Sihová.—Saame 135:6; ‘Ai. 46:9, 10.

13. Ko e hā ‘oku tau papitaiso aí?

¹³ Ko e founga mahu‘inga ke tau fakahāhā ai ‘etau hounga‘ia ki he huhu‘í ko hono fakatapui ‘etau mo‘uí kia Sihova pea papitaiso. ‘I he founga ko ení, ‘oku tau fakahaa‘i ai ‘oku tau ma‘u ‘a e tui ki he huhu‘í pea “‘oku ‘a Sihova ‘a kitautolu.” (Loma 14:8) ‘I he‘etau papitaisó, ‘oku tau kole ai kia Sihova ke ne ‘omai kiate kitautolu “ha konisēnisi lelei.” (1 Pita 3:21) ‘Oku tali ia ‘e Sihova ‘aki hono ngāue‘aki ‘a e ngaahi  ‘aonga ‘o e huhu‘í kia kitautolu. Pea ‘oku tau fakapapau‘i mo‘oni te ne ‘omai ‘a e me‘a kotoa pē na‘á ne tala‘ofa‘akí.—Loma 8:32.

14. Ko e hā ‘oku fekau‘i ai kitautolu ‘e Sihova ke tau ‘ofa ki he ni‘ihi kehé?

¹⁴ ‘Oku tākiekina ‘e he ‘ofá ‘a e me‘a kotoa pē ‘oku fai ‘e Sihová. Ko hono finangaló ia ke fa‘ifa‘itaki kiate ia ‘ene kau lotú mo nau fe‘ofa‘aki. (1 Sio. 4:8-11) ‘I he‘etau ‘ofa ‘i he kakaí, ‘oku tau fakahaa‘i mahino ‘oku tau loto ke hoko ‘ko e fānau kitautolu ‘a ‘etau Tamai ‘oku ‘i hēvaní.’ (Māt. 5:43-48) Ko e ongo fekau lahi tahá eni, ‘uluakí ke ‘ofa kia Sihova, pea ko hono uá, ke ‘ofa ki he ni‘ihi kehé. (Māt. 22:37-40) Ko e founga ‘e taha ‘oku tau fakahāhā ai ‘oku tau ‘ofa ‘i he kakaí ko hono ako‘i kiate kinautolu ‘a e ongoongo lelei ‘o e Pule‘anga ‘o e ‘Otuá. Kapau ‘oku tau talangofua ki he fekau ‘a Sihova ke ‘ofa ki he ni‘ihi kehé, tautefito ki hotau fanga tokouá, ‘e “fakahaohaoa‘i” ai ‘etau ‘ofa kiate iá.—1 Sio. 4:12, 20.

15. (a) Ko e hā ‘a e ngaahi tāpuaki meia Sihova ‘oku tau ma‘u he taimí ni? (e) Ko e hā ‘a e ngaahi tāpuaki te tau ma‘u ‘i he kaha‘ú?

¹⁵ ‘Oku fakapapau‘i mai ‘e Sihova ‘e “tāmate‘i” ‘etau ngaahi angahalá koe‘uhí ko ‘etau tui ki he huhu‘í. ‘E lava ke ne fakamolemole‘i faka‘aufuli ‘etau ngaahi angahalá. (Lau ‘a e Ngāue 3:19-21.) Hangē ko ia na‘a tau lāulea ki ai ki mu‘á, ‘oku ‘ai ‘e he huhu‘í ke malava ‘o ohi ai ‘e Sihova ‘a e ni‘ihi ‘o e fa‘ahinga ‘o e tangatá ke nau hoko ko hono ngaahi foha ‘i hēvani. Ko e fa‘ahinga ko ení ko e kau paní. (Loma 8:15-17) ‘Okú ne fakaafe‘i ‘a e fa‘ahinga ‘oku nau kau ‘i he “fanga sipi kehe” ke nau hoko ko e konga ‘o hono fāmili ‘i he māmaní. ‘I he hili ‘enau hoko ‘o haohaoá, ‘e ‘i ai ha ‘ahi‘ahi faka‘osi. Kapau te nau mateaki kia Sihova, te ne ohi mo kinautolu foki ke nau hoko ko ‘ene fānau. (Loma 8:20, 21; Fkh. 20:7-9) ‘E ‘ofa ma‘u pē ‘a Sihova ‘i he kotoa ‘o ‘ene fānaú. ‘E hokohoko atu hono ‘omai ‘e he huhu‘í ‘a e ngaahi tāpuaki ‘o ta‘engata. (Hep. 9:12) Kuo ‘omai ‘e Sihova kiate kitautolu ‘a e me‘a‘ofa mahu‘inga ko ení, pea he‘ikai lava ke to‘o ia ‘e ha taha meiate kitautolu.

16. ‘Oku anga-fēfē hono tokoni‘i kitautolu ‘e he huhu‘í ke tau hoko ‘o tau‘atāiná?

¹⁶ Kapau te tau fakatomala‘i ‘etau ngaahi angahalá, he‘ikai lava ‘e he Tēvoló ke ne ta‘ofi kitautolu mei he‘etau faai atu pē ‘o hoko ko e konga ‘o e fāmili ‘o Sihová. Na‘e pekia ‘a Sīsū ‘o “tā-tu‘o-taha.” Na‘e totongi ‘osi ai ‘a e huhu‘í. (Hep. 9:24-26) Na‘e ‘omai ‘e ‘Ātama ‘a e maté kiate kitautolu, ka ko e feilaulau ‘a Sīsuú te ne ‘omai ‘a e mo‘ui ta‘engatá. ‘Oku lava ‘e he huhu‘í ke ne fakatau‘atāina‘i kitautolu mei he māmani ‘o Sētané pea mei he manavahē ki he maté.—Hep. 2:14, 15.

17. Ko e hā ‘ene ‘uhinga kiate koe ‘a e ‘ofa ‘a Sihová?

¹⁷ Ko e ngaahi tala‘ofa ‘a e ‘Otuá ‘e fakahoko ma‘u pē. Hangē pē ko e ‘ikai ke liliu ‘a e ngaahi lao na‘e fa‘u ‘e Sihova ‘i natulá, ‘e ‘ikai ‘aupito ke liliu ‘a Sihova. He‘ikai ‘aupito te ne fakalotomamahi‘i kitautolu. (Mal.3:6) ‘Oku ‘omai ‘e Sihova ha me‘a ‘oku lahi mama‘o ange ia ‘i he me‘a‘ofa ko e mo‘uí. ‘Okú ne ‘omai kiate kitautolu ‘ene ‘ofá. “Kuo tau hoko ‘o ‘ilo mo tui ki he ‘ofa ‘oku ma‘u ‘e he ‘Otuá kiate kitautolú. Ko e ‘Otuá ko e ‘ofa.” (1 Sio. 4:16) Ko ‘ene ngaahi tala‘ofá ‘oku hoko ma‘u pē ‘o mo‘oni. ‘Oku vavé ni ke hoko ‘a e māmaní ko ha palataisi faka‘ofo‘ofa. Ko e tokotaha kotoa pē ‘e mo‘ui aí te nau fa‘ifa‘itaki kia Sihova mo nau fe‘ofa‘aki. Ko e kotoa leva ‘o ‘ene kau sevāniti ‘i hēvani mo māmaní te nau pehē: “Tuku ‘a e fakahīkihikí mo e lāngilangí mo e potó mo e fakafeta‘í mo e ngeiá mo e māfimafí pea mo e mālohí ke ‘a hotau ‘Otuá ‘o ta‘engata pea ta‘engata. ‘Ēmeni.”—Fkh. 7:12.