1, 2. (a) Ko e hā ‘a e palopalema ‘oku hokosia ‘e he fānau tokolahi ‘oku hiki ki ha fonua ‘e taha? (e) Ko e hā ‘a e ongo fehu‘i ‘e lāulea ki ai ‘a e kupu ko ení?

“MEI HE kei valevalé, na‘á ku lea ‘i he lea tu‘ufonua ‘eku ongo mātu‘á ‘i ‘api pea ‘i he fakataha‘angá,” ko e lau ia ‘a Joshua. “Ka ‘i he‘eku ‘alu ki he akó, na‘e kamata ke u sai‘ia ‘i he lea ‘a e feitu‘ú. ‘I ha ngaahi ta‘u si‘i mei ai, na‘á ku lea pē ‘i he lea ‘a e feitu‘ú. Na‘e ‘ikai malava ke u mahino‘i ‘a e ngaahi fakatahá, pea ‘ikai ha‘aku ‘ilo ki he anga fakafonua ‘eku ongo mātu‘á.” Ko e hokosia ‘a Joshua ko e me‘a anga-maheni.

² ‘I he ‘ahó ni, ‘oku laka hake ‘i he kakai ‘e toko 240,000,000 ‘oku ‘ikai ke nau nofo ‘i he fonua na‘e fanau‘i ai kinautolú. Kapau ko ha mātu‘a koe ‘okú ke hiki ki ha fonua ‘e taha, ‘e lava fēfē ke ke ‘oange ki ho‘o fānaú ‘a e faingamālie lelei taha ‘e malavá ke nau ako ai ke ‘ofa kia Sihova pea nau ‘‘a‘eva ‘i he mo‘oní’? (3 Sio. 4) Pea ‘e lava fēfē ke tokoni ‘a e ni‘ihi kehé?

3, 4. (a) ‘E lava fēfē ke fokotu‘u ‘e he ngaahi mātu‘á ha fa‘ifa‘itaki‘anga lelei ki he‘enau fānaú? (e) Ko e hā ‘oku totonu ke ‘oua ‘e ‘amanekina ‘e he ngaahi mātu‘á mei he‘enau fānaú?

³ Ngaahi mātu‘a, ko ho‘omou fa‘ifa‘itaki‘angá ‘oku mātu‘aki mahu‘inga ia kapau ‘oku mou loto ke ma‘u ‘e ho‘omou fānaú ha vaha‘angatae  fakafo‘ituitui mo Sihova pea mo‘ui ta‘engata. ‘I he taimi ‘oku sio ai ho‘omou fānaú ‘oku mou “fuofua kumi ki he Pule‘angá,” ‘oku nau ako ai ke fakafalala ‘enau ngaahi fiema‘u faka‘ahó kia Sihova. (Māt. 6:33, 34) Fakamu‘omu‘a ‘a ho‘omou ngāue kia Sihová kae ‘ikai ko e kumi ki he ngaahi me‘a fakamatelie lahi ange. Mo‘ui fakapotopoto pea feinga ke faka‘ehi‘ehi mei ha mo‘ua. Kumi ki he “koloa ‘i hēvani,” ‘a ia ko e hōifua ‘a Sihová, kae ‘ikai ko e kumi ki he pa‘angá pe ko e “lāngilangi ‘o e tangatá.”—Lau ‘a e Ma‘ake 10:21, 22; Sione 12:43.

⁴ ‘Oua ‘aupito ‘e fu‘u femo‘uekina ‘o ‘ikai ai hamou taimi ki ho‘omou fānaú. ‘Ai ke nau ‘ilo‘i ‘oku mou laukau‘aki kinautolu ‘i he taimi ‘oku nau fili ai ke fakamu‘omu‘a ‘a Sihova kae ‘ikai ko e kumi ki he ongoongoá pe ko e pa‘angá, ma‘anautolu pe ma‘amoutolu. Faka‘ehi‘ehi mei he fakakaukau hala ‘o e pehē ‘oku totonu ke tokonaki ‘e he fānaú ki he‘enau ngaahi mātu‘á ha mo‘ui mātu‘aki fakafiemālie. Manatu‘i, “‘oku ‘ikai ‘amanekina ‘a e fānaú ke nau tātānaki me‘a ma‘a ‘enau ngaahi mātu‘á, ka ko e ngaahi mātu‘á ma‘a ‘enau fānaú.”—2 Kol. 12:14.

5. Ko e hā kuo pau ai ke toutou lea ‘a e ngaahi mātu‘á ki he‘enau fānaú fekau‘aki mo Sihová?

⁵ Hangē ko ia na‘e tomu‘a talá, ‘oku ha‘u ‘a e kakai “mei he ngaahi lea kotoa ‘o e ngaahi pule‘angá” ki he kautaha ‘a Sihová. (Sāk. 8:23) Ka ‘o kapau ‘oku ‘ikai ke mahino‘i lelei ‘e ho‘omou fānaú ‘a e lea ‘oku mou lea aí, ‘e lava ke faingata‘a kiate kimoutolu hono ako‘i ‘a e mo‘oní kiate kinautolu. Ko e kau ako Tohi Tapu mahu‘inga taha kinautolu ‘oku mou ma‘ú, pea ko ‘enau “hoko ‘o ‘ilo‘i” ‘a Sihová ‘e kaunga ia ki he‘enau mo‘ui ta‘engatá. (Sione 17:3) Ke hoko ho‘omou ki‘i tamá ‘o ‘ilo‘i ‘a e ngaahi akonaki ‘a Sihová, kuo pau ke mou toutou “lea‘aki ia.”—Lau ‘a e Teutalōnome 6:6, 7 .

6. Ko e hā ‘a e ‘aonga ‘e ma‘u ‘e ho‘omou fānaú mei hono ako ‘a e lea ‘oku mou lea aí? (Sio ki he ‘uluaki fakatātā ‘i he kupú ni.)

⁶ Ngalingali ‘e ako ‘e ho‘omou fānaú ‘a e lea ‘a e feitu‘ú ‘i he ‘apiakó pea mei he ni‘ihi kehé. Ka te nau ako ‘a e lea ‘oku mou lea‘akí ‘i ho‘omou talanoa ma‘u pē mo kinautolú. ‘I he taimi ‘oku lea ai ho‘omou fānaú ‘i he lea ‘oku mou lea aí, ‘e faingofua ange ai ke mou talanoa mo fakahaa‘i atu ‘enau ongo‘í. Ka ‘oku ‘i ai ‘a e ngaahi ‘aonga kehe. ‘I he taimi ‘oku lea ai ‘a e fānaú ‘i ha toe lea ‘e tahá, ‘oku lelei ange ai ‘enau malava fakaefakakaukaú pea tokoni‘i ai kinautolu ke nau mahino‘i ‘a e anga ‘o e fakakaukau ‘a e ni‘ihi kehé. ‘Oku nau toe ma‘u ai ‘a e faingamālie ke fai ha me‘a lahi ange ‘i he ngāue fakafaifekaú. “Ko e kau ki ha fakataha‘anga lea mulí ‘oku fakalata,” ko e lau ia ‘a Carolina, ‘a ia ko ‘ene ongo mātu‘á ‘okú na hiki ki ha fonua kehe. “Pea ‘oku fakafiefia ke tokoni ‘i he feitu‘u ‘oku lahi ange ai ‘a e fiema‘ú.”

7. Ko e hā ‘e lava ke mou faí kapau ‘oku hoko ‘a e leá ko ha pole ia ‘i homou fāmilí?

⁷ Kae kehe, ‘i hono ako ‘e he fānau ‘a e kau hiki ki ha fonua mulí ‘a e anga fakafonuá mo e leá, ‘e mole nai mei he ni‘ihi ‘o kinautolu ‘enau holi mo ‘enau malava ke fetu‘utaki ‘i he lea ‘oku lea ai ‘enau ngaahi mātu‘á. Ngaahi mātu‘a, kapau ko e me‘a eni ‘oku hoko ki ho‘omou fānaú, ‘e lava ke mou ako ha ki‘i lea ‘a e feitu‘ú? ‘E faingofua ange ke mou ‘ohake ho‘omou fānaú ko e kau Kalisitiane kapau ‘oku mou mahino‘i ‘enau fetalanoa‘akí, fakafiefiá mo e ngāue fakaakó pea kapau ‘oku malava ke mou talanoa hangatonu mo ‘enau kau faiakó. Ko e mo‘oni ko hono ako ha lea fo‘oú ‘oku fiema‘u ki ai ‘a e taimi, feinga mo e anga-fakatōkilalo. Ka ‘oku mahu‘inga mo‘oni ia. Ko e fakatātaá, kapau ‘oku ‘i ai ha‘amou ki‘i tama ‘oku tuli, ‘ikai te mou feinga ke ako ‘a e lea fakanoá ke mou lava ai ‘o fetu‘utaki mo ia? Ko ha ki‘i tama ‘oku fetu‘utaki lelei taha ‘i ha lea kehe ‘oku tuha ke fai ki ai ha tokanga makehe, ‘ikai te mou loto-tatau ki ai? *—Sio ki he fakamatala ‘i lalo.

8. ‘E lava fēfē ke mou tokoni‘i ho‘omou fānaú kapau ‘oku ‘ikai ke mou poto lelei ‘i he lea ‘a e feitu‘ú?

⁸ ‘E mātu‘aki faingata‘a nai ki he ni‘ihi ‘o e  ngaahi mātu‘a ‘oku hiki mai mei ha fonua ‘e taha ke nau pōto‘i ‘i he lea fo‘ou ‘a ‘enau fānaú. ‘Oku ‘ai ai heni ke faingata‘a ki he ngaahi mātu‘á ke tokoni‘i ‘enau fānaú ke nau mahino‘i ‘a e “ngaahi tohi mā‘oni‘oní.” (2 Tīm. 3:15) Kapau ko homou tu‘unga iá, ‘e lava ke mou kei tokoni‘i ho‘omou fānaú ke nau ‘ilo mo ‘ofa kia Sihova. “Ko hono mahino‘i ‘e he‘emau fa‘ē ta‘emalí ‘a e lea ‘oku mau mahino‘i lelei tahá na‘e fakangatangata pē, pea ko au mo hoku fanga tuofāfiné na‘e ‘ikai ke mau poto lelei ‘i he‘ene leá,” ko e lau ia ‘a e tokotaha mātu‘a ko Shan. “Ka ‘i he‘emau sio ki he‘ene ako, lotu mo fai hono lelei tahá ke fakahoko ‘a e lotu fakafāmilí ‘i he uike kotoa pē, na‘a mau mahino‘i ai ko hono ‘ilo‘i ‘a Sihová ‘oku mātu‘aki mahu‘inga.”

9. ‘E lava fēfē ke tokoni‘i ‘e he ngaahi mātu‘á ‘a e fānau ‘e fiema‘u nai ke nau ako ‘i ha lea ‘e uá?

⁹ ‘Oku fiema‘u nai ki he fānau ‘e ni‘ihi ke nau ako fekau‘aki mo Sihova ‘i he lea ‘e ua. Ko e hā hono ‘uhingá? Koe‘uhí ‘oku nau lea ‘i he lea ‘e taha ‘i he ‘apiakó pea lea ‘e taha ‘i ‘api. ‘I he ‘uhinga ko iá, ‘oku ngāue‘aki ai ‘e he ngaahi mātu‘a ‘e ni‘ihi ‘a e ‘ū tohi, ngaahi hiki-le‘o mo e ngaahi vitiō ‘i he ongo leá fakatou‘osi. ‘Oku hā mahino, kuo pau ke ngāue mālohi ange ‘a e ngaahi mātu‘a ‘oku hiki mai mei ha fonua ‘e tahá koe‘uhí ke tokoni‘i ‘enau fānaú ke nau hoko ‘o ofi kia Sihova.

10. (a) Ko hai kuo pau ke ne fili pe ko e fakataha‘anga lea fē ke kau ki aí? (e) Ko e hā ‘oku totonu ke fai ‘e he ngaahi ‘ulu‘i fāmilí ki mu‘a ke nau fai ha filí?

¹⁰ ‘I he taimi ‘oku nofo mama‘o ai ‘a e “kau mulí” mei he Kau Fakamo‘oni kehe ‘oku nau lea ‘i he‘enau leá, ‘oku fiema‘u ke nau feohi mo ha fakataha‘anga ‘oku lea ‘i he lea ‘a e feitu‘ú. (Saame 146:9) Ka ‘o kapau ‘oku ‘i ai ha fakataha‘anga ofi mai ‘oku nau ngāue‘aki ‘enau lea tu‘ufonuá, kuo pau ke fili ‘e he ‘ulu‘i fāmilí ‘a e fakataha‘anga ‘oku lelei taha ki he fāmilí. Ki mu‘a ke fai ha filí, te ne fakakaukau fakalelei mo lotu fekau‘aki mo ia. Te ne toe talanoa foki mo hono uaifí mo e fānaú. (1 Kol. 11:3) Ko e hā te ne fakakaukau ki aí? Ko e hā ‘a e ngaahi tefito‘i mo‘oni Fakatohitapu ‘e lava ke ne tokoni‘i ia ke fai ‘a e filí?

11, 12. (a) ‘Oku anga-fēfē kaunga ‘a e leá ki he lahi ‘o e ‘aonga ‘oku ma‘u ‘e ha ki‘i tama mei he ngaahi fakatahá? (e) Ko e hā ‘oku ‘ikai loto ai ‘a e fānau ‘e ni‘ihi ke ako ‘a e lea ‘a ‘enau ngaahi mātu‘á?

¹¹ Kuo pau ke fakakaukau‘i ‘e he ngaahi mātu‘á ‘a e fiema‘u mo‘oni ‘enau fānaú. Ke mahino‘i lelei ‘a e ngaahi mo‘oni Fakatohitapú, ‘oku fiema‘u ‘e he fānaú ‘a e me‘a lahi ange ia ‘i ha ngaahi houa si‘i pē ‘o e fakahinohino Fakatohitapu ‘i he uike taki taha ‘i he ngaahi fakatahá. Kae fakakaukau ki heni: ‘I he ngaahi fakataha ‘oku fai ‘i he lea ‘oku nau mahino‘i lelei tahá, ‘oku ma‘u ‘aonga pē nai ‘a e fānaú ‘i he‘enau ‘i aí, ‘o ako nai ‘a e me‘a lahi ange ‘i he me‘a ‘oku ‘ilo‘i ‘e he‘enau ngaahi mātu‘á. ‘E ‘ikai ke pehē nai ‘a e tu‘ungá ia ‘i he taimi ‘oku ‘ikai ke mahino‘i kakato ai ‘e he fānaú ‘a e leá. (Lau ‘a e 1 Kolinitō 14:9, 11.) Pea ko e lea tu‘ufonua ‘a ha ki‘i tama ‘e ‘ikai ke hoko ma‘u pē ko e lea ia te ne ue‘i ‘a e anga ‘ene fakakaukaú mo ‘ene ongo‘í. Ko e mo‘oni, ko e fānau ‘e ni‘ihi ‘e lava ke nau fai ha ngaahi tali, ngaahi tu‘uaki mo ha ngaahi konga ‘i he lea ‘enau ngaahi mātu‘á ka ‘oku ‘ikai ke fakahaa‘i mo‘oni ai ‘enau ngaahi fakakaukaú mo e ongo‘í tonu.

¹² Pehē foki, ‘oku ‘ikai ko e leá pē ‘okú ne tākiekina ‘a e loto ‘o ha ki‘i tama. Ko e me‘a ia na‘e hoko kia Joshua, ‘a ia na‘e lave ki ai ki mu‘á. ‘Oku pehē ‘e hono tuofefine ko Esther: “Ki he fānau īkí, ko e lea, anga fakafonua mo e lotu ‘a ‘enau ngaahi mātu‘á ‘oku ha‘u fakataha ia.” Kapau ‘oku ongo‘i ‘e he fānaú ‘oku ‘ikai ko e konga kinautolu ‘o e anga fakafonua ‘enau ngaahi mātu‘á, he‘ikai nai ke nau loto ke ako ki he lea mo e lotu ‘a ‘enau ngaahi mātu‘á. Ko e hā ‘e lava ke fai ‘e he ngaahi mātu‘a ‘oku hiki mai mei ha fonua ‘e taha?

13, 14. (a) Ko e hā na‘e hiki ai ha ongo me‘a ‘e taha mo hona fāmilí ki ha fakataha‘anga ‘oku lea ‘i he lea ‘a e feitu‘ú? (e) Na‘e anga-fēfē hono tauhi ‘e ha ongo mātu‘a ke mālohi hona vaha‘angatae mo Sihova?

¹³ ‘Oku fakamu‘omu‘a ‘e he ngaahi mātu‘a Kalisitiané ‘a e ngaahi fiema‘u ‘enau fānaú ‘i he‘enau  sai‘ia fakafo‘ituituí. (1 Kol. 10:24) ‘Oku pehē ‘e he tamai ‘a Joshua mo Esther, ko Samuel: “Ko au mo hoku uaifí ‘okú ma siofi ‘ema fānaú ke ‘ilo pe ko e hā ‘a e lea ‘oku nau tupu fakalaumālie aí, pea na‘á ma lotu ki ha poto. Ko e talí na‘e ‘ikai ko e me‘a ia na‘á ma ‘ilo‘i tonu ‘oku fe‘ungamālié. Ka ‘i he taimi na‘á ma sio ai na‘a nau ma‘u ‘a e ki‘i ‘aonga si‘isi‘i mei he ngaahi fakataha ‘i he‘ema leá, na‘á ma fili ai ke hiki ki he fakataha‘anga ‘oku lea ‘i he lea ‘a e feitu‘ú. Na‘a mau kau fakataha ‘i hono ma‘u ma‘u pē ‘a e ngaahi fakatahá pea kau ki he ngāue fakafaifekaú. Na‘a mau toe fakaafe‘i ‘a e ngaahi kaume‘a ‘i he feitu‘ú ke mau kai me‘akai mo ‘eva fakataha. Ko e kotoa ‘o e ngaahi me‘á ni na‘e tokoni‘i ai ‘ema fānaú ke nau ‘ilo‘i ‘a e fanga tokouá pea ‘ilo‘i ‘a Sihova, ‘o ‘ikai ko honau ‘Otua pē kae toe pehē foki ko ‘enau Tamai mo e Kaume‘a. Na‘á ma vakai ki he me‘á ni na‘e mātu‘aki mahu‘inga ange ia ‘i he‘enau mahino‘i lelei ‘a ‘ema leá.”

¹⁴ ‘Oku tānaki mai ‘e Samuel: “Ke ‘ai ke ma mālohi fakalaumālié, ko au mo hoku uaifí na‘á ma toe ma‘u ‘a e ngaahi fakataha he‘ema leá. Na‘e femo‘uekina ‘aupito ‘a e mo‘uí, pea na‘á ma hela‘ia. Ka na‘á ma fakamālō kia Sihova ‘i he‘ene tāpuaki‘i ‘ema ngaahi feingá mo e feilaulaú. Ko ‘ema fānau ‘e toko tolú ‘oku nau tauhi kotoa kia Sihova ‘i he ngāue fakafaifekau taimi-kakató.”

15. Ko e hā na‘e ongo‘i ai ‘e ha tuofefine ko Kristina ‘e lava ke ne fai ‘a e ngāue lelei ange ‘i ha fakataha‘anga ‘oku lea ‘i he lea ‘a e feitu‘ú?

¹⁵ ‘I he tupu hake ‘a e fānaú, ‘oku nau ‘ilo‘i nai te nau malava ke tauhi lelei ange kia Sihova ‘i ha fakataha‘anga ‘oku ngāue‘aki ai ‘a e lea ‘oku nau mahino‘i lelei tahá. Kapau ko ia, ‘oku totonu ki he ngaahi mātu‘á ke ‘oua te nau ongo‘i ‘oku taliteke‘i kinautolu ‘e he‘enau fānaú. “Na‘á ku ‘ilo‘i ‘a e ngaahi me‘a tefito ‘i he lea ‘a ‘eku ongo mātu‘á, ka ko e lea na‘e lea‘aki ‘i he ngaahi fakatahá na‘e fu‘u faingata‘a ia kiate au,” ko e manatu ia ‘a Kristina. “‘I he‘eku ta‘u 12, na‘á ku ma‘u ha fakataha-lahi ‘i he lea ‘oku lea‘aki ‘i he ‘apiakó. Ko e ‘uluaki taimi ia na‘á ku mahino‘i ai ko e me‘a na‘á ku fanongo ki aí ko e mo‘oní ia! Ko e liliu ‘e taha na‘e hokó ko e taimi na‘á ku kamata lotu ai ‘i he lea ‘oku lea‘aki ‘i he ‘apiakó. Na‘e lava ai ke u lea kia Sihova mei hoku lotó!” (Ngā. 2:11, 41) ‘I he taimi na‘e ta‘u 18 ai ‘a Kristina, na‘á ne lāulea ki he me‘á ni mo ‘ene ongo mātu‘á pea fili ke hiki ki ha fakataha‘anga ‘oku lea‘aki ai ‘a e lea ‘i he feitu‘ú. ‘Okú ne pehē: “Ko e ako fekau‘aki mo Sihova ‘i he lea ‘oku lea‘aki ‘i he ‘apiakó na‘á ne ue‘i au ke u fai ha ngāue.” Na‘e hoko leva ‘a Kristina ko ha tāimu‘a tu‘uma‘u pea ‘okú ne fiefia ‘aupito.

16. Ko e hā ‘oku fiefia ai ‘a Nadia ‘i he‘ene nofo pē ‘i he fakataha‘anga lea mulí?

¹⁶ To‘utupu, ‘oku mou fakakaukau te mou sai‘ia ange ke hoko ko e konga ‘o ha fakataha‘anga ‘oku lea ‘i he lea ‘a e feitu‘ú? Kapau ko ia, ‘eke hifo kiate koe ‘a e ‘uhingá. Ko e hiki ki he fakataha‘anga ko iá ‘e tokoni‘i ai koe ke ke ‘unu‘unu ofi ange ai kia Sihova? (Sēm. 4:8) Pe koe‘uhí ko e ‘ikai te ke loto ke siofi koe ‘e ho‘o ongo mātu‘á ‘i he me‘a kotoa pē ‘okú ke faí pe koe‘uhí ‘oku ‘ikai te ke loto ke fai ha feinga? “‘I he taimi na‘á ku a‘u ai mo e toenga ‘o e fānaú ki he ta‘u hongofulu tupú, na‘a mau loto ke hiki ki he fakataha‘anga ‘oku lea ‘i he lea ‘a e feitu‘ú,” ko e lau ia ‘a Nadia, ‘a ia ‘oku ngāue he taimí ni ‘i he Pētelí. Ka na‘e ‘ilo‘i ‘e he‘ene ongo mātu‘á ko e hiki ko iá ‘e ‘ikai ke lelei ia ki he vaha‘angatae ‘ena fānaú mo Sihová. “‘I he taimi ní ‘oku mau hounga‘ia ‘i he ngāue mālohi ‘emau ongo mātu‘á ke ako‘i kimautolu ki he‘ena leá pea tuku pē kimautolu ‘i he fakataha‘anga lea mulí. Kuo lelei ange ai ‘emau mo‘uí pea lahi ai ‘a e faingamālie ke mau tokoni‘i ‘a e ni‘ihi kehé ke nau ‘ilo‘i ‘a Sihova.”

17. (a) Ko hai na‘e ‘oange ki ai ‘e Sihova ‘a e fatongia ki hono ‘ohake ‘o e fānaú? (e) ‘E lava fēfē ke ma‘u ‘e he ngaahi mātu‘á ha tokoni ki hono ako‘i ‘a e mo‘oní ki he‘enau fānaú?

¹⁷ Kuo ‘oange ‘e Sihova ki he ngaahi mātu‘á ‘a e fatongia ke ako‘i ‘a e mo‘oní ki he‘enau fānaú. Na‘e ‘ikai ke ne ‘oange ia ki he fanga kuí pe ko ha toe taha kehe. (Lau ‘a e Palōveepi 1:8; 31:10, 27, 28.)  Neongo ia, ko e ngaahi mātu‘a ‘oku ‘ikai te nau ‘ilo‘i ‘a e lea ‘oku lea‘aki ‘i he feitu‘ú te nau fiema‘u nai ha tokoni ke a‘u ai ki he loto ‘enau fānaú. ‘I he taimi ‘oku kole tokoni ai ‘a e ngaahi mātu‘á, ‘oku ‘ikai ‘uhinga iá ‘oku nau feinga ke faka‘ehi‘ehi mei he fatongia ke ‘ohake ‘enau fānaú. Ka, ‘e lava ke hoko ia ko e konga ‘o hono ‘ohake ‘enau fānaú “‘i he akonaki mo e enginaki ‘a Sihová.” (‘Ef. 6:4) Ko e fakatātaá, ‘e kole nai ‘e he ngaahi mātu‘á ki he kau mātu‘a ‘i he fakataha‘angá ha ngaahi fokotu‘u ki hono fai ‘o e lotu fakafāmilí pea ki ha tokoni ‘i hono kumi ha ngaahi kaume‘a lelei ma‘a ‘enau fānaú.

18, 19. (a) ‘E lava fēfē ke tokoni‘i ‘e he kau Kalisitiane kehé ‘a e to‘utupú? (e) Ko e hā kuo pau ke hokohoko atu hono fai ‘e he ngaahi mātu‘á?

¹⁸ Ke tokoni ki he‘enau fānaú, ‘oku fakaafe‘i nai ‘e he ngaahi mātu‘á ‘a e ngaahi fāmili kehe ke nau kau fakataha ‘i he lotu fakafāmilí ‘i he taimi ki he taimi. Pehē foki, ‘oku ako ‘a e to‘utupu tokolahi mei he kau Kalisitiane kehé ‘i he taimi ‘oku nau ‘alu ai mo kinautolu ‘i he malangá pea fai fakataha ha ngaahi me‘a. (Pal. 27:17) “‘Oku ou manatu‘i lelei ‘a e fanga tokoua na‘a nau tokanga‘i aú,” ko e lau ia ‘a Shan, ‘a ia na‘e lave ki ai ki mu‘á. “‘I he taimi na‘a nau tokoni‘i ai au ‘i he‘eku ngaahi konga ki he fakatahá, na‘e lahi ma‘u pē ‘a e me‘a na‘á ku akó. Pea na‘á ku fiefia ‘i he‘emau feohi fakatahá.”

¹⁹ Ko e mo‘oni, ko e fa‘ahinga ‘oku fili ‘e he ngaahi mātu‘á ke tokoni ki he‘enau fānaú ‘oku totonu ke nau fakalototo‘a‘i ma‘u pē kinautolu ke nau faka‘apa‘apa‘i ‘enau ngaahi mātu‘á. ‘E lava ke nau fai eni ‘aki ‘enau lea lelei fekau‘aki mo e ngaahi mātu‘á pea ‘oua ‘e fa‘ao ‘a e fatongia ‘o e ngaahi mātu‘á ke ‘ohake ‘enau fānaú. ‘Ikai ko ia pē, ko e fa‘ahinga ‘oku tokoní ‘oku totonu ke nau faka‘ehi‘ehi mei ha tō‘onga pē ‘e lava ke ma‘uhala ai ha ni‘ihi ‘i loto pe ‘i tu‘a mei he fakataha‘angá ‘oku hala fakae‘ulungaanga. (1 Pita 2:12) Neongo ‘e kole tokoni nai ‘a e ngaahi mātu‘á ki he ni‘ihi kehé, ko honau fatongia ia ke kei ako‘i ‘a e mo‘oní ki he‘enau fānaú. Kuo pau ke nau vakai‘i fakalelei ‘a e tokoni ‘oku ‘oange ‘e he kau Kalisitiane kehé.

20. ‘E lava fēfē ke tokoni‘i ‘e he ngaahi mātu‘á ‘enau fānaú ke nau hoko ko e kau sevāniti faitōnunga ‘a Sihova?

²⁰ Ngaahi mātu‘a, lotu ‘o kole ‘a e tokoni ‘a Sihová, pea feinga ke fai ho‘omou lelei tahá. (Lau ‘a e 2 Kalonikali 15:7.) Fakamu‘omu‘a ‘a e kaume‘a ‘a ho‘omou ki‘i tamá mo Sihová ‘i he me‘a ‘oku mou sai‘ia aí. Fai ha me‘a pē ‘e lava ke mou faí ke fakapapau‘i ‘oku a‘u ‘a e Folofola ‘a e ‘Otuá ki he loto ‘o ho‘omou ki‘i tamá. ‘Oua ‘aupito te mou ta‘efalala ‘e lava ke hoko ho‘omou ki‘i tamá ko ha sevāniti ‘a Sihova. ‘I he taimi ‘oku muimui ai ho‘omou fānaú ki he Folofola ‘a e ‘Otuá mo ho‘omou fa‘ifa‘itaki‘anga leleí, te mou ongo‘i ai ‘o hangē ko e ongo‘i ‘a e ‘apositolo ko Sioné fekau‘aki mo ‘ene fānau fakaefakatātaá: “‘Oku ‘ikai te u ma‘u ha fiefia ‘e lahi ange ‘i he me‘á ni: ‘A ‘eku fanongo ko ia ‘oku hokohoko atu ‘a e ‘a‘eva ‘eku fānaú ‘i he mo‘oní.”—3 Sio. 4.