1, 2. ‘Oku anga-fēfē vakai ‘a e kakai tokolahi ki he‘enau ngāué?

‘OKU ongo‘i ‘e he kakai tokolahi ‘oku makatu‘unga ‘a honau mahu‘ingá pe ta‘emahu‘ingá ‘i he ngāue ‘oku nau faí. ‘I he anga fakafonua ‘e ni‘ihi, ke ‘ilo‘i ha taha, ‘oku angamaheni‘aki hono ‘eke, “Ko e hā ‘a e fa‘ahinga ngāue ‘okú ke faí?”

² ‘I he taimi ‘e ni‘ihi, ‘oku fakamatala‘i ‘e he Tohi Tapú ‘a e kakaí ‘aki hono fakahaa‘i ‘a e fa‘ahinga ngāue na‘a nau faí. Ko e fakatātaá, ‘oku lave kia “Mātiu ko e tānaki tukuhaú,” “Saimone, ko ha tufunga kili‘imanu,” mo “Luke ko e toketā ‘ofeiná.” (Māt. 10:3; Ngā. 10:6; Kol. 4:14) ‘I he taimi ‘e taha, ‘oku lave ‘a e Tohi Tapú ki he vāhenga-ngāue na‘e ma‘u ‘e he kakaí ‘i he ngāue ‘a Sihová. Fakakaukau kia Tu‘i Tēvita, ko e palōfita ko ‘Ilaisiaá, mo e ‘apositolo ko Paulá. Na‘e fakamahu‘inga‘i ‘e he kau tangata ko ení ‘a e ngāue na‘e ‘oange ‘e Sihova kiate kinautolú. Pehē foki, ‘oku totonu ke tau toe fakamahu‘inga‘i ha fa‘ahinga vāhenga-ngāue pē ‘oku tau ma‘u ‘i he ngāue ‘a Sihová.

3. Ko e hā ‘oku fiema‘u ai ke ako‘i ‘e he fa‘ahinga ta‘umotu‘á ‘a e fa‘ahinga kei iiki angé? (Sio ki he ‘uluaki fakatātā ‘i he kupú ni.)

³ ‘Oku tau ‘ofa ‘i he ngāue ‘a Sihová pea koloa‘aki ‘etau vāhenga-ngāué. Ko e tokolahi ‘o kitautolu ‘oku tau fiefia ‘aupito ‘i he‘etau  ngāué mo e ‘amanaki ‘e hokohoko atu ia ‘i he fuoloa taha ‘o ‘etau malavá. Ka ko e me‘a fakamamahí, ‘i he taimi ‘oku hoholo ai ‘a e kakaí ‘o motu‘á, ‘oku ‘ikai malava ke nau fai kotoa ‘a e ngāue na‘a nau anga ki ai ‘i he taimi na‘a nau kei si‘i ange aí. (Koh. 1:4) ‘Oku fakatupunga heni ‘a e ngaahi pole kehe ki he kakai ‘a Sihová. ‘I he ‘ahó ni, ‘oku hokohoko atu ‘a e tupulaki ‘a e ngāue fakamalangá, pea ‘oku ngāue‘aki ‘e he kautaha ‘a Sihová ‘a e tekinolosia fakaonopōní ke a‘u ai ki he tokolahi taha ‘e ala lavá mo e ongoongo leleí. Ka ‘i he taimi ‘e ni‘ihi ‘e faingata‘a nai ki he fa‘ahinga ta‘umotu‘á ke nau ako ‘a e ngaahi founga fo‘ou ‘o hono fai ha me‘á. (Luke 5:39) Pehē foki, ko e me‘a anga-maheni ia ‘a e hōloa ‘a e mālohi mo e ivi ‘o e kakaí ‘i he‘enau hoholo ke motu‘a angé. (Pal. 20:29) ‘I he‘ene peheé, ko ha ngāue anga-‘ofa mo ‘aonga foki ‘a hono ako‘i ‘e he fa‘ahinga ta‘umotu‘á ‘a e fa‘ahinga kei iiki angé, ke nau fua ‘a e fatongia lahi ange ‘i he kautaha ‘a Sihová.—Lau ‘a e Saame 71:18.

4. Ko e hā ‘oku faingata‘a ai ki he ni‘ihi ke nau tukuange atu ‘a e ngaahi fatongiá? (Sio ki he puha “ ‘Uhinga ‘Oku Faingata‘a Nai Ai Ke Tau Tukuange ha Ngāue.”)

⁴ ‘Oku ‘ikai ke faingofua ma‘u pē ki he fa‘ahinga ‘oku nau ma‘u ha ngaahi fatongia ke nau tukuange atu ha ngāue ki he kau tangata kei iiki angé. ‘Oku lava ke loto-mamahi ai ‘a e fanga tokouá ‘i he‘enau fakakaukau atu ki he mole ha vāhenga-ngāue ‘oku nau ‘ofa lahi ai. ‘Oku fakamamahi nai kia kinautolu ke fakakaukau atu ki hono tukuange ‘a e ngāue makehe ‘oku nau fiefia aí. Pe ‘oku nau hoha‘a nai kapau he‘ikai ke nau tataki ‘a e ngāué, ‘e ‘ikai ke fakahoko lelei ia. Mahalo ‘oku nau ongo‘i ‘oku ‘ikai ke nau ma‘u ha taimi ke ako‘i ai ‘a e ni‘ihi kehé. ‘I he taimi tatau, ‘oku fiema‘u ki he kau tangata kei iiki angé ke nau anga-kātaki ‘i he taimi ‘oku ‘ikai ke ‘oange ai kia kinautolu ha fatongia lahi angé.

5. Ko e hā ‘a e ngaahi fehu‘i te tau lāulea ki ai ‘i he kupu ko ení?

⁵ Ko ia ko e hā ‘oku mahu‘inga ai ki he fa‘ahinga ta‘umotu‘á ke nau tokoni‘i ‘a e fa‘ahinga kei iiki angé ke nau fua ha fatongia lahi angé? ‘E lava fēfē ke nau fai ení? (2 Tīm. 2:2) Pea ko e hā ‘oku fiema‘u ai ki he fa‘ahinga kei iiki angé ke nau ma‘u ‘a e fakakaukau totonu ‘i he‘enau ngāue fakataha mo e fanga tokoua ta‘umotu‘a mo taukei angé, pea ako meiate kinautolú? Ke kamata‘akí, tau sio angé ki he founga na‘e teu‘i ai ‘e Tu‘i Tēvita hono fohá ki ha ngāue mātu‘aki mahu‘inga.

6. Ko e hā na‘e loto ‘a Tu‘i Tēvita ke ne faí? Ko e hā na‘e tala ‘e Sihova kiate iá?

⁶ Na‘e fakatanga‘i ‘a Tēvita ‘i ha ngaahi ta‘u pea pau ke ne hiki mei he feitu‘u ki he feitu‘u. Pea hili ‘ene hoko ko e tu‘í, na‘á ne nofo ‘i ha fale lelei. Ko ia na‘á ne tala ange ki he palōfita ko Nētané: “Vakai, ‘oku ou nofo au ‘i ha fale sita, ka ko e Aake ‘o e Kovinanite ‘o Sihova ‘i ha fale tupenu.” Na‘e faka‘amu ‘a Tēvita ke ne langa ha temipale faka‘ofo‘ofa mo‘o Sihova. Na‘e tala ange ‘e Nētane kiate ia: “‘Ilonga ha me‘a ‘oku ‘i ho loto, fai; he ‘oku ‘iate koe ‘a Elohimi.” Ka na‘e ‘ikai ke fiema‘u eni ‘e Sihova. Na‘á ne tala ange kia Nētane ke tala kia Tēvita: “‘E ‘ikai te ke langa ‘ekoe ha fale mo‘oku ke u nofo ai.” Neongo na‘e tala‘ofa ‘e Sihova kia Tēvita te ne ‘iate ia ma‘u pē, na‘e ‘ilo‘i ‘e Tēvita ko e taha ‘o hono ngaahi fohá te ne langa ‘a e temipalé. Na‘e anga-fēfē fakafeangai ki ai ‘a Tēvitá?—1 Kal. 17:1-4, 8, 11, 12; 29:1.

7. Na‘e anga-fēfē ‘a e fakafeangai ‘a Tēvita ki he fakahinohino ‘a Sihová?

⁷ Na‘e fiema‘u mo‘oni ‘e Tēvita ke ne langa ha temipale mo‘o Sihova, pea na‘á ne mei loto-mamahi lahi nai ai. Ka na‘á ne kei poupou‘i kakato ‘a e ngāue ‘e tataki ‘e hono foha ko Solomoné. Na‘e tokoni ‘a Tēvita ki hono fokotu‘utu‘u ‘a e kau ngāué pea tānaki ‘a e ukamea, kopa, siliva, koula mo e papa. Na‘e ‘ikai ke ne hoha‘a pe ko hai te ne ma‘u ‘a e lāngilangi ki hono langa ‘a e temipalé, ‘a ia na‘e ‘iloa ia ki mui ko e temipale ‘o Solomoné. ‘I hono kehé, na‘á ne fakalototo‘a‘i ‘a Solomone, ‘i he‘ene pehē: “Pea ko eni tama, ke ‘iate koe ‘a Sihova: Pea ‘ofa ke ke tu‘umalie, pea ke langa ‘a e fale ‘o Sihova ko ho ‘Otua, ‘o hange ko ‘ene folofola ‘iate koe.”—1 Kal. 22:11, 14-16.

8. Ko e hā na‘e mei fakakaukau nai ai ‘a Tēvita na‘e ‘ikai ke taau ‘a Solomone ke ne langa ‘a e temipalé? Ka ko e hā na‘e fai ‘e Tēvitá?

⁸ Lau ‘a e 1 Kalonikali 22:5. Na‘e mei ongo‘i nai ‘e Tēvita kuo te‘eki ai ke mateuteu ‘a Solomone ke tataki ‘a e ngāue mahu‘inga ko iá. Na‘e pau ke hoko ‘a e temipalé ‘o “hulu ‘aupito,” pea ko Solomoné “ko e tamasi‘i kei ngavaivai.” Ka na‘e ‘ilo‘i ‘e Tēvita ‘e tokoni‘i ‘e Sihova ‘a Solomone ‘i hono fakahoko ‘a e ngāue makehe ko ení. Ko ia na‘e fai ‘e Tēvita ‘a e kotoa ‘o ‘ene malavá ke tokoni‘i ‘a Solomone ke ne mateuteu ki he ngāue kāfakafa ko ení.

9. ‘E lava fēfē ke ongo‘i fiefia ‘a e fa‘ahinga ta‘umotu‘á fekau‘aki mo hono ‘oange ‘a e ngaahi fatongiá ki he ni‘ihi kehé? ‘Omai ha fakatātā.

⁹ ‘Oku ‘ikai totonu ki he fanga tokoua ta‘umotu‘á ke nau ongo‘i loto-si‘i ‘i he taimi ‘oku fiema‘u ai ke nau ‘oange ha fatongia ki he kau tangata kei iiki angé. ‘Oku tau ‘ilo‘i kotoa ko e me‘a mahu‘inga taha ‘i he ‘aho ní ko e ngāue ‘a Sihová. Ko hono ako‘i ‘a e kau tangata kei iiki angé ke nau fua ‘a e ngaahi fatongiá ‘e tokoni ia ke fakahoko ‘a e ngāue ko ení. Fakakaukau ki he me‘á ni. ‘I he taimi na‘á ke kei si‘i aí, ngalingali na‘á ke siofi ‘a e faka‘uli me‘alele ho‘o tamaí. ‘I ho‘o lahi haké, na‘á ne fakamatala‘i atu ‘a e me‘a na‘á ne faí. ‘I he faai mai ‘a e taimí, na‘á ke ma‘u ho‘o laisení pea kamata ke ke faka‘uli. Neongo ia, ‘oku kei fale‘i pē koe ‘e ho‘o tamaí. ‘I he taimi ‘e ni‘ihi ‘okú mo taufetongi ‘i he faka‘ulí. Ka ‘i he hoholo ke motu‘a ange ho‘o tamaí, na‘e lahi ange  ho‘o faka‘ulí. Na‘e loto-mamahi ai ho‘o tamaí? ‘Ikai, na‘á ne fiefia nai ke ke faka‘uli holo ia. ‘I ha founga meimei tatau, ‘oku fiefia ‘a e fanga tokoua ta‘umotu‘á ke sio ki he kau tangata kei iiki ange na‘a nau ako‘í ‘oku nau mateuteu ke fua ‘a e ngaahi fatongia ‘i he kautaha ‘a Sihová.

10. Na‘e anga-fēfē ‘a e ongo‘i ‘a Mōsese ki he monū mo e fatongia na‘á ne ma‘ú?

¹⁰ Kuo pau ke tau tokanga ke ‘oua te tau meheka ‘i he vāhenga-ngāue ‘oku ma‘u ‘e he ni‘ihi kehé. ‘E lava ke tau ako mei he anga ‘o e fakafeangai ‘a Mōsese ‘i he taimi na‘e kamata ke ngāue fakapalōfita ai ‘a e kau ‘Isileli ‘e ni‘ihi. (Lau ‘a e Nōmipa 11:24-29, PM.) Na‘e loto ‘a Siosiua ke ta‘ofi kinautolu, ka na‘e pehē ‘e Mōsese: “Oku ke meheka koeuhi ko au? oku amujiaage e au ki he Otua ke kikite ae kakai kotoabe a Jihova, bea ke tuku e Jihova a hono laumalie kiate kinautolu.” Na‘e ‘ilo‘i ‘e Mōsese na‘e tataki ‘e Sihova ‘a e ngāué. ‘I he ‘ikai ke ne kumi ma‘ana ha lāngilangí, na‘e loto ‘a Mōsese ke ma‘u ‘e he kau sevāniti kotoa ‘a Sihová ha vāhenga-ngāue. Fēfē kitautolu? ‘Oku tau fiefia ‘i he taimi ‘oku ma‘u ai ‘e he ni‘ihi kehé ha vāhenga-ngāue ‘i he ngāue ‘a Sihová?

11. Ko e hā na‘e lea‘aki ‘e ha tokoua ‘e taha fekau‘aki mo hono ‘oange ha fatongia ki he ni‘ihi kehé?

¹¹ ‘Oku tokolahi ‘a e fanga tokoua kuo nau ngāue mālohi ‘i he ngāue ‘a Sihová ‘i he laui hongofulu‘i ta‘u pea kuo nau ako‘i ‘a e kau tangata kei iiki angé ke nau fua ha fatongia lahi ange. Ko e fakatātaá, tau fakakaukau ki ha tokoua ko Peter. Lolotonga ‘a e ta‘u ‘e 74 ‘o ‘ene ngāue taimi-kakató, na‘á ne fakamoleki ai ‘a e ta‘u ‘e 35 ‘i ha ‘ōfisi va‘a ‘i ‘Iulope. ‘I ha taimi fuoloa, ko e ‘ovasia ia ‘o e Potungāue Ngāué. Pea na‘e ‘oange leva ‘a e vāhenga-ngāue ko ení kia Paul, ko ha tangata kei si‘i ange ‘a ia na‘e ako‘i ‘e Peter. Na‘e ongo‘i loto-mamahi ‘a Peter fekau‘aki mo e liliu ko ení? ‘Ikai. Na‘á ne pehē: “‘Oku ou fiefia ‘aupito he ‘oku ‘i ai ‘a e fanga tokoua kuo ako‘i ke nau tali ha fatongia lahi ange pea ‘oku nau fakahoko lelei ‘a e fatongia ko iá.”

12. Ko e hā ‘e lava ke tau ako mei he fa‘ifa‘itaki‘anga ‘a Lehopoamé?

¹² ‘I he taimi na‘e tu‘i ai ‘a Lehopoame, foha ‘o Solomoné, na‘á ne kole fale‘i ki he kau tangata ta‘umotu‘á ki he founga ke fakahoko ai ‘ene vāhenga-ngāue fo‘oú. Ka na‘á ne taliteke‘i leva ‘enau fale‘í! ‘I hono kehé, na‘á ne muimui ki he fale‘i ‘a e kau tangata kei iiki na‘a nau tupu fakataha haké. Ko e olá na‘e fakatu‘utāmaki. (2 Kal. 10:6-11, 19) Ko e hā ‘e lava ke tau akó? ‘Oku fakapotopoto ke kole fale‘i ki he fa‘ahinga ‘oku nau motu‘a mo taukei ange ‘ia kitautolú. ‘Oku totonu ke ‘oua ‘e ongo‘i ‘e he fa‘ahinga kei iiki angé ‘oku tenge kinautolu ke nau hanganaki fai ‘a e ngaahi me‘a tofu pē na‘a nau fai ‘i he kuohilí. Neongo ia, ‘oku totonu ke nau faka‘apa‘apa‘i mo‘oni ‘a e ngaahi fakakaukau ‘a e kau ta‘umotu‘á pea ‘oku totonu ke ‘oua te nau vave ke fakakaukau ‘e ‘ikai ke ‘aonga ‘a e founga ‘o ‘enau fai ‘a e ngāue ko iá.

13. Ko e hā ‘oku totonu ai ke ngāue fakataha ‘a e fa‘ahinga kei iiki angé mo e kau ta‘umotu‘á?

¹³ ‘I he taimi ‘e ni‘ihi, ‘oku ‘oange ki he fa‘ahinga kei iiki angé ‘a e fatongia ke tokanga‘i ‘a e ngāue ‘a e fanga tokoua ta‘umotu‘a mo taukei angé. ‘E fakapotopoto ke nau ako mei he kau ta‘umotu‘a ko ení. Ko e fa‘ifa‘itaki‘anga na‘a tau lāulea ki ai ki mu‘á, hili hono fetongi ‘e Paul ‘a Peter ko e ‘ovasia ‘o ha potungāue ‘i he Pētelí, na‘á ne pehē, “Na‘á ku vahe‘i ‘a e taimi ke kumi fale‘i kia Peter, pea na‘á ku fakalototo‘a‘i ‘a e ni‘ihi kehe ‘i he potungāué ke nau fai ‘a e me‘a tatau.”

14. Ko e hā ‘oku tau ako mei he founga na‘e ngāue fakataha ai ‘a Tīmote mo e ‘apositolo ko Paulá?

¹⁴ Na‘e kei si‘i ange ‘a Tīmote ‘i he ‘apositolo ko Paulá, ka na‘á na ngāue fakataha ‘i he ngaahi ta‘u lahi. (Lau ‘a e Filipai 2:20-22.) Na‘e tala ‘e Paula ki he kau Kolinitoó: “‘Oku ou fekau atu ai ‘a Tīmote kiate kimoutolú, he ko ‘eku tama ‘ofeina mo faitōnunga ia ‘i he ‘Eikí; pea te ne fakamanatu atu kiate kimoutolu ‘a ‘eku ngaahi foungá  ‘i he felāve‘i mo Kalaisi Sīsuú, hangē tofu pē ko ia ‘oku ou faiako ‘aki ‘i he feitu‘u kotoa pē he ngaahi fakataha‘anga kotoa pē.” (1 Kol. 4:17) Mei he me‘á ni, ‘oku lava ke tau ‘ilo‘i lelei ai na‘e ngāue fāitaha ‘a Paula mo Tīmote peá na fepoupouaki. Na‘e vahe‘i ‘e Paula ‘a e taimi ke ako‘i ‘a Tīmote ki he‘ene “ngaahi foungá ‘i he felāve‘i mo Kalaisi,” pea na‘e ‘ilo‘i lelei ia ‘e Tīmote. Na‘e ‘ofa ‘a Paula ‘ia Tīmote pea na‘á ne fakapapau‘i te ne tokanga‘i lelei ‘a e fanga tokoua mo e fanga tuofāfine ‘i Kolinitoó. ‘E lava ke fa‘ifa‘itaki ‘a e kau mātu‘á ki he ‘apositolo ko Paulá ‘i he‘enau ako‘i ha kau tangata ke nau takimu‘a ‘i he fakataha‘angá.

15. ‘E lava fēfē ke tokoni‘i kitautolu ‘e he Loma 12:3-5 ke tau fekuki mo ha liliu?

¹⁵ ‘Oku tau mo‘ui ‘i he ngaahi taimi fakafiefia. Ko e konga fakaemāmani ‘o e kautaha ‘a Sihová ‘oku tupulaki ia ‘i he ngaahi founga kehekehe. ‘Oku ‘uhinga ení ‘e hokohoko liliu ‘a e ngaahi me‘á. Ko e ni‘ihi ‘o e ngaahi liliu ko ení ‘e uesia fakafo‘ituitui ai kitautolu pea ‘ikai faingofua ke fekuki mo ia. ‘E tokoni kiate kitautolu kapau ‘oku tau anga-fakatōkilalo pea tokangataha ki he lelei ma‘á e ngāue ‘o e Pule‘angá kae ‘ikai nai ko ‘etau ngaahi fiema‘u fakafo‘ituituí. ‘I he‘etau fai ení, te tau nofo‘aki fā‘ūtaha ai. Na‘e tohi ‘a Paula ki he kau Kalisitiane ‘i Lomá: “‘Oku ou tala ai ki he tokotaha kotoa ‘i hena ‘i homou lotolotongá ke ‘oua ‘e fakakaukau kiate ia tonu ‘o mahulu hake ia ‘i he me‘a ‘oku totonu ke fakakaukau ki aí.” Na‘á ne fakamatala‘i leva hangē pē ko e kehekehe ‘a e ngāue ‘o e konga taki taha hotau sinó, ko e mēmipa taki taha ‘o e fakataha‘angá ‘oku nau ma‘u ‘a e fatongia kehekehe.—Loma 12:3-5.

16. Ko e hā ‘e lava ke fai ‘e he Kalisitiane taki taha ke tauhi ma‘u ‘a e melinó mo e fā‘ūtahá ‘i he kautaha ‘a Sihová?

¹⁶ Ko e kotoa ‘o e kakai ‘a Sihová ‘oku nau loto ke poupou‘i ‘a e Pule‘angá pea fai ha me‘a pē ‘oku kole ange kia kinautolu. ‘E lava ke ako‘i ‘e he fanga tokoua ta‘umotu‘á ‘a e fa‘ahinga kei iiki angé. ‘E lava ‘a e fanga tokoua kei iiki angé ke nau fua ha fatongia lahi ange ‘i ha founga angavaivai mo faka‘apa‘apa. Pea ‘oku hounga‘ia ‘a e fanga tokoua ‘osi malí ‘i he taimi ‘oku poupou‘i ai kinautolu ‘e honau ngaahi uaifí na‘a mo e taimi ‘oku liliu ai ‘a e tu‘ungá. ‘E lava ‘a e kau fefine ko ení ke nau fa‘ifa‘itaki kia Pīsila, ‘a ia na‘á ne ngāue faitōnunga fakataha mo hono husepāniti, ko ‘Akuilá.—Ngā. 18:2.

17. Ko e hā na‘e ako‘i ‘e Sīsū ke fai ‘e he‘ene kau ākongá?

¹⁷ Na‘e fokotu‘u ‘e Sīsū ‘a e fa‘ifa‘itaki‘anga lelei taha ‘o e loto-lelei ke ako‘i ‘a e ni‘ihi kehé. Na‘e ‘ilo‘i ‘e Sīsū ko e ni‘ihi kehé ‘e fiema‘u ke nau hokohoko atu ‘ene ngāué. Ko hono mo‘oní, na‘á ne ‘ilo‘i na‘e ta‘ehaohaoa ‘ene kau ākongá. Ka na‘á ne falala-pau te nau malava ke fakamafola atu ‘a e ongoongo leleí ‘o toe lahi ange ia ‘i he me‘a na‘á ne faí. (Sione 14:12) Na‘á ne ako‘i lelei kinautolu, pea na‘a nau malava ke malanga ‘i he fonua kotoa pē te nau malava ke ‘alu ki aí.—Kol. 1:23.

18. Ko e hā ‘a e ngāue te tau ma‘u ‘i he kaha‘ú?

¹⁸ Hili ‘a e pekia ‘a Sīsuú, na‘e fokotu‘u hake ia ‘e Sihova pea ‘oange kiate ia ‘a e ngāue lahi ange ke ne fai, pea pehē ki he mafai “‘a ia ‘oku mā‘olunga mama‘o ia ‘i he pule‘anga mo e mafai mo e mālohi mo e tu‘unga ‘eiki kotoa pē.” (‘Ef. 1:19-21) Neongo kapau te tau mate ‘i he tu‘unga ko e kau sevāniti faitōnunga ‘a Sihova ki mu‘a ‘i ‘Āmaketone, te tau toe mo‘ui pea ma‘u ‘a e ngāue lahi mo mohu ‘uhinga ‘i he māmani fo‘oú. Pea ‘i he taimí ni ‘oku tau ma‘u ‘a e vāhenga-ngāue fakafiefia ko hono malanga‘i ‘a e ongoongo leleí mo ngaohi ākonga. Ko ia tatau ai pē pe ‘oku tau kei si‘i pe ta‘umotu‘a, ko kitautolu taki taha ‘e lava ke “lahi fau ma‘u ai pē ‘a e me‘a ke fai ‘i he ngāue ‘a e ‘Eikí.”—1 Kol. 15:58.