Koá—Ko ha “Huhu Maluʻi Fai Pē ʻe Koe”

“KO E mateʻanga lahi taha hono ua ʻo e fānau ʻi he māmaní ʻoku ʻikai ko e malēliá, pe mahaki fatafatá pe ko e ʻeitisí. Ko e . . . fakalelé ia,” ko e līpooti ia ʻa e makasini Economist. Neongo ia, ko e tokolahi ʻo e fānau maʻukoviá ni ne nau mei moʻui he ʻahó ni kapau ko kinautolu mo honau ngaahi fāmilí naʻa nau fanofano maʻu pē ʻaki ha koa.

Ko e kau fakatotolo ʻi he Akoʻanga Lonitoni ki he Haisini mo e Faitoʻo Fakatalopikí naʻa nau ʻilo ko e “fanofano totonu ʻo e nimá ʻe lava ke ne tuʻusi ʻa e ngaahi mahaki fakalelé ʻaki ʻa e 43%,” ko e lau ia ʻa e Economist. “ʻE ʻi ai nai ʻene ola lelei lahi pehē ki he ngaahi ulufia ʻi he halanga mānavá, ʻa e mahaki ʻokú ne tāmateʻi lahi taha ʻa e fānaú. Ko ha fakatotolo lahi naʻe fai ki he kau tau ʻa ʻAmeliká naʻe ʻilo ai ko e mihimihí mo e taé naʻe holo ʻaki ʻa e 45% ʻi he taimi naʻe fanofano tuʻo nima ai he ʻaho ʻa e ngaahi kongakaú.” ʻI he ngaahi fonua langalanga haké ko e koá ʻoku ala fakatau ia ʻe he lahi taha ʻo e ngaahi fāmilí. Ko ia, ʻoku fakamatalaʻi feʻungamālie ai ia “ko ha faʻahinga huhu maluʻi fai pē ʻe koe.” Pea ko ha huhu ia ʻoku ʻikai mamahi!

Ko e Tohi Tapú foki ʻokú ne fakaʻaiʻai ʻa e maʻá. “Ke tau fakamaa akitautolu mei he uli kotoabe oe kakano moe laumalie,” ko e lau ia ʻa e 2 Kolinito 7:1 (PM; 6:19). Neongo ko e ʻOtuá ʻoku tautefito ʻene tokangá ki heʻetau maʻa fakalaumālié, ʻokú ne toe vakai foki ki he haisini fakaesinó ʻoku mahuʻinga. (Livitiko, vahe 12-15) Ko e moʻoni, ʻoku ʻikai te ne ʻamanekina kitautolu ke tau fai ia ke tōtuʻa. Ka, ʻoku totonu ke tau tōʻongaʻaki ʻa e fanofano hili hono ngāueʻaki ʻo e fale mālōloó, hili hono kaukauʻi pe fetongi ha pēpē, ki muʻa ʻi hono teuteu pe maʻu ha meʻatokoni pea ʻi ha taimi kehe pē ʻa ia ʻoku ngalingali te tau fakamafola ai ʻa e ngaahi siemu pe vailasi fakatupu maumaú ki he niʻihi kehé. ʻI heʻetau fanofano maʻu peé, ʻoku tau fakahā ai ʻa e ʻofa faka-Kalisitiane ki hotau fāmilí pea mo kinautolu kotoa pē te tau fetuʻutaki nai mo iá.—Maake 12:31.