‘I HE ongo me‘a na‘e hoko ‘i ‘olungá, ko e hā ‘oku lava lelei ange ai ‘a Sēsika ke ne taliteke‘i ‘a e tengé? Koe‘uhí ‘okú ne ma‘u e me‘a ‘oku ‘ikai ma‘u ia ‘e Maikolo. ‘Okú ke ‘ilo‘i ko e hā ia? Ko ha faka‘ilonga. ‘Oku ‘ikai ko ha kaati ia fakataha mo ha hingoa pea mo ha lau‘i tā ‘i ai. Ko ha faka‘ilonga ko ha ongo‘i ia ‘i loto ‘okú ne tala atu ko hai koe mo e me‘a ‘okú ke fakafofonga‘í. ‘I he teu‘i ‘aki e ‘ilo ko iá, ‘oku fakaivia ai koe ke ‘ikai ki he faingata‘á—ke mapule‘i ho‘o mo‘uí kae ‘ikai tuku ke pule‘i ia ‘e he ni‘ihi kehé. ‘E lava fēfē ke ke fakatupulekina ‘a e loto-ma‘u peheé? Ko hono tali e ngaahi fehu‘i ko ení ko ha kamata‘anga lelei ia.

‘Uhinga ‘oku mahu‘inga aí: Ko hono ‘ilo‘i ho ngaahi malavá mo e ngaahi ‘ulungaanga leleí ‘e fakalahi ai ho‘o loto-ma‘ú.

Fakakaukau: Ko e tokotaha kotoa ‘oku ‘i ai hono ngaahi talēniti kehekehe. Ko e fakatātaá, ko e kakai ‘e ni‘ihi ‘oku nau talēniti‘ia ‘i he ‘ātí pe mūsiká, lolotonga ia ‘oku lelei ‘a e ni‘ihi ‘i he sipotí. ‘Oku poto ‘a Lesieli ‘i he ngaahi kaá. * “‘I he‘eku ta‘u 15 nai,” ko ‘ene leá ia, “na‘á ku ‘ilo‘i ai ‘oku ou loto ke hoko ko ha ‘enisinia.”

Fa‘ifa‘itaki‘anga Fakatohitapu: Na‘e tohi ‘a e ‘apositolo ko Paulá: “Neongo kapau ‘oku ‘ikai te u pōto‘i ‘i he leá, ‘oku ‘ikai mo‘oni ke u ta‘epoto ‘i he ‘iló.” (2 Kolinitō 11:6) ‘I he‘ene mahino‘i faka‘āuliliki ‘a e Folofolá, na‘e malava ai ‘a Paula ke tu‘u mālohi pē ‘i he taimi na‘e pole‘i ai ia ‘e he ni‘ihi kehé. Na‘e ‘ikai te ne faka‘atā ‘enau fakakaukau ta‘epaú ke mole ai ‘ene loto-ma‘ú.—2 Kolinitō 10:10; 11:5.

Sivisivi‘i Koe. ‘I laló, tohi‘i ai ha talēniti pe pōto‘i ‘okú ke ma‘u.

 Fakamatala he taimí ni ki ha mālohinga fakae‘ulungaanga ‘okú ke ma‘ú. (Ko e fakatātaá, ‘okú ke tokanga? nima-homo? alafalala‘anga? tauhi taimi?)

“‘Oku ou feinga ke ‘i ai ma‘á e kakaí. Kapau ‘oku fiema‘u ‘e ha taha ke talanoa pea ‘oku ou mo‘ua, ‘e tuku e me‘a ‘oku ou faí pea fanongo kiate ia.”—Piliana.

Kapau ‘okú ke faingata‘a‘ia hono ‘ilo‘i ha mālohinga fakae‘ulungaanga, fakakaukau ki ha ‘ulungaanga ‘e taha kuó ke hoko ai ‘o matu‘otu‘a talu mei ho‘o kei si‘í, pea tohi‘i ia ‘i lalo.—Ko e fakatātaá, sio ki he puha  “Me‘a ‘Oku Lea‘aki ‘e Ho To‘ume‘á.”

‘Uhinga ‘oku mahu‘inga aí: Hangē pē ko e vaivai ha sēini mālohi ‘o tatau mo hono fehokotakinga vaivaí, ko ho faka‘ilongá ‘e lava ke liliu vave ki he kovi ange kapau te ke tuku ho‘o ngaahi tōnounoú ke ne pule‘i ho‘o mo‘uí.

Fakakaukau: ‘Oku ‘ikai ha taha ‘e haohaoa. (Loma 3:23) Ko e tokotaha kotoa ‘oku ‘i ai honau ‘ulungaanga te nau sai‘ia ke liliu. Ko e hā ‘oku ou faka‘atā ai ke u loto-mamahi ‘i he fanga ki‘i me‘a valevalé?” ko e fehu‘i ia ha ta‘ahine ko Sesa. “‘Oku ‘ai au ‘e he me‘a valevale tahá ke u ‘ita, pea ‘oku fakafokifā ‘a e ‘ikai te u mapule‘i ‘eku ngaahi ongo‘í!”

Fa‘ifa‘itaki‘anga Fakatohitapu: Na‘e lāu‘ilo ‘a Paula ki hono ngaahi vaivai‘angá. Na‘á ne tohi: “‘Oku ou manako mo‘oni ‘i he lao ‘a e ‘Otuá ‘o fakatatau ki hoku tangata ‘i lotó, ka ‘oku ou mātā ‘i hoku sinó ha toe lao ia ‘e taha ‘okú ne faitau mo e lao ‘o hoku ‘atamaí mo ne taki pōpula au ki he lao ‘a angahalá.”—Loma 7:22, 23.

Sivisivi‘i koe. Ko e hā e vaivai‘anga ‘oku fiema‘u ke ke ako ke mapule‘í?

“Kuó u fakatokanga‘i ‘i he hili ‘eku sio he ngaahi faiva ‘evá, ‘oku ou hoko ai ‘o ki‘i loto-mamahi pea ‘oku ou loto ke ma‘u ha taha ke u sō mo ia. Ko ia ‘oku ou ‘ilo‘i he taimí ni kuo pau ke u tokanga fekau‘aki mo e fa‘ahinga fakafiefia ko iá.”—Pilisita.

Ko e hā ‘oku mahu‘inga aí: ‘I he taimi ‘okú ke ma‘u ai ha ngaahi taumu‘a, ‘oku ‘i ai e tataki mo e taumu‘a ki ho‘o mo‘uí. ‘Oku toe ngalingali ange ai te ke faka‘ehi‘ehi mei he kakai mo e ngaahi tu‘unga ‘a ia ‘e lava ke ne ta‘ofi koe mei hono fakahoko ‘a e me‘a kuó ke fili ke faí.

Fakakaukau: Te ke heka ha tekisī pea tala ange ki he faka‘ulí ke toutou lele takai holo he poloká kae ‘oua ke maha e penisini ‘ene kaá? ‘E fakavalevale ia—mo fakamole lahi! ‘Oku ta‘ofi koe ‘e he ngaahi taumu‘á mei he fononga ta‘e‘aonga holo ‘i ho‘o mo‘uí. ‘Oku ‘i ai e feitu‘u ke ke ‘alu ki ai mo ha palani ki he founga ke a‘u ai ki aí.

Fa‘ifa‘itaki‘anga Fakatohitapu: Na‘e tohi ‘a Paula: “Ko e anga ‘o ‘eku lelé ‘oku ‘ikai fai ta‘efakapapau‘i.” (1 Kolinitō 9:26) ‘I he ‘ikai tēkina  noa‘ia holo he mo‘uí ‘o faka‘atā ke hoko kiate ia ‘a e ngaahi me‘á, na‘e fokotu‘u ‘e Paula e ngaahi taumu‘a pea mo‘ui leva ‘o fakatatau ki ai.—Filipai 3:12-14.

Sivisivi‘i koe. ‘I laló, tohi‘i ai ‘a e taumu‘a ‘e tolu te ke sai‘ia ke a‘usia he ta‘u hono hokó.

1. ․․․․․

2. ․․․․․

3. ․․․․․

Fili he taimí ni ‘a e taumu‘a ‘i ‘olunga ‘a ia ‘oku mahu‘inga taha kiate koé, pea tohi‘i e me‘a ‘e lava ke ke fai he taimí ni ke kamata lava‘i ai iá.

“Kapau he‘ikai ke u hanganaki femo‘uekina, ‘oku kamata pē ke u tēkina noa‘ia holo. ‘Oku lelei ange ke ma‘u ha ngaahi taumu‘a pea laka ki mu‘a ke lava‘i ia.”—Hōsea.

‘Uhinga ‘oku mahu‘inga aí: ‘I he ‘ikai ha tuipaú, he‘ikai te ke heke takai holo. ‘I he hangē ha feké, te ke fakalanulanu ke tatau mo ho ngaahi to‘ume‘á—ko ha ‘ilo‘anga papau ‘oku ‘ikai te ke ma‘u hao faka‘ilonga tonu.

Fakakaukau: ‘Oku fakalototo‘a‘i ‘e he Tohi Tapú ‘a e kau Kalisitiané ke ‘fakamo‘oni‘i kiate kinautolu ‘a e finangalo lelei mo fakahōifua mo haohaoa ‘o e ‘Otuá.’ (Loma 12:2) ‘I he fakatefito ho‘o ngaahi ngāué ‘i ho‘o tuipaú, ‘okú ke hanganaki faitotonu ai kiate koe—‘o tatau ai pē pe ko e hā ‘oku fai ‘e he ni‘ihi kehé.

Fa‘ifa‘itaki‘anga Fakatohitapu: Lolotonga ‘ene ta‘u hongofulu tupú, ko e palōfita ko Tanielá na‘á ne ‘tu‘utu‘uni ‘i hono lotó’ te ne tauhi e ngaahi lao ‘a e ‘Otuá, neongo ‘ene mavahe mei hono fāmilí mo e kaungātuí. (Taniela 1:8) ‘I he fai peheé, na‘a ne fai mo‘oni ai kiate ia. Na‘e mo‘ui ‘a Taniela ‘o fakatatau ki he‘ene tuipaú.

Sivisivi‘i koe. Ko e hā ho‘o ngaahi tuipaú? Ko e fakatātaá:

• ‘Okú ke tui ki he ‘Otuá? Kapau ko ia, ko e hā hono ‘uhingá? Ko e hā e fakamo‘oni ‘oku fakatuipau‘i ai kiate koe ‘ene ‘i aí?

• ‘Okú ke tui ko e ngaahi tu‘unga fakae‘ulungaanga ‘a e ‘Otuá ko e lelei ia ma‘au? Kapau ko ia, ko e hā hono ‘uhingá? Ko e fakatātaá, ko e hā ‘okú ne fakatuipau‘i kiate koe ko e talangofua ki he ngaahi lao ‘a e ‘Otuá fekau‘aki mo e fehokotaki fakasinó te ne ‘ai koe ke ke fiefia ange ‘i he fakatatau ki he founga mo‘ui “tau‘atāina” ho ngaahi to‘ume‘á?

‘Oku ‘ikai ko e ngaahi fehu‘i eni ke tali fakavave. Vahe‘i ha taimi ke fakakaukau ai ki he ngaahi ‘uhinga ki ho‘o tuí. ‘I he fai peheé, te ke malava lelei ange ai ke taukapo‘i ia.—Palōveepi 14:15; 1 Pita 3:15.

“‘I he ‘apiakó, ‘oku tenge ai koe ‘e he kau leká ‘i he ‘ikai ha‘o tuipaú, pea na‘e ‘ikai te u loto ke ‘ikai te u tuipau fekau‘aki mo ‘eku tuí. Ko ia na‘á ku ngāue ke fakatupulekina ha ngaahi ‘uhinga mā‘ala‘ala mo mālohi ki he‘eku tuí. ‘I he ‘ikai tala ki he kakaí, ‘‘Ō, he‘ikai lava ke u fai ia koe‘uhí ‘oku fepaki ia mo ‘eku lotú” ko e me‘á ke pehē ‘‘Oku ‘ikai te u pehē ‘oku totonu ia.’ Ko ‘eku tuí eni.”—Taniele.

‘I he ‘osi angé, ko e hā te ke sai‘ia ke hangē ko iá—ko ha lau‘i‘akau ‘oku tō ‘o puhi takai holo ‘e he ki‘i havilivili kotoa pē pe ko ha fu‘u ‘akau ‘okú ne matu‘uaki na‘a mo e ngaahi afā mālohí? ‘Ai ke mālohi ho faka‘ilongá, pea te ke hangē ko e fu‘u ‘akau ko iá. Pea ‘e tokoni‘i ai koe ke ke tali ‘a e fehu‘i, Ko hai au?