KO E tuí ‘oku ‘i ai hono mālohi lahi. Ko e fakatātaá, neongo ‘oku loto ‘a Sētane ke ne tāmate‘i fakalaumālie kitautolu, ko e tuí ‘e malava ke tau “tāmate‘i‘aki ‘a e ngaahi ngahau vela kotoa ‘a e tokotaha fulikivanú.” (‘Ef. 6:16) Fakataha mo e tuí, ‘e lava ke tau fehangahangai ai mo e ngaahi palopalema hangē ha mo‘ungá. Na‘e tala ange ‘e Sīsū ki he‘ene kau ākongá: “Kapau ‘oku mou ma‘u ‘a e tui ‘oku hangē ko e lahi ‘o ha tenga‘i mūsitá, te mou pehē ki he mo‘ungá ni, ‘Hiki mei heni ki hē,’ pea ‘e hiki ia.” (Māt. 17:20) Koe‘uhi ‘oku malava ‘e he tuí ke fakaivimālohi‘i fakalaumālie kitautolu, ‘oku lelei ke tau fakakaukau ki he ngaahi fehu‘i ko ení: Ko e hā ‘a e tui? ‘Oku anga-fēfē hono tākiekina ‘e he tu‘unga hotau lotó ‘etau tuí? ‘E lava fēfē ke tau fakaivimālohi‘i ‘etau tuí? Pea ko hai ‘oku totonu ke tau tui ki aí?​—Loma 4:3.

Ko e tuí ‘oku kau ki ai ‘a e me‘a lahi ange ‘i he tui pē pe ko e lāu‘ilo ki he mo‘oní, he na‘a mo e “fanga tēmenioó ‘oku nau tui [‘oku ‘i ai ‘a e ‘Otua] . . . pea nau teteki.” (Sēm. 2:19) Ko e hā leva ‘a e tui?

‘Oku fakamatala‘i ‘e he Tohi Tapú ‘a e tuí ‘oku ‘i ai hono tafa‘aki ‘e ua. ‘Uluakí, “ko e tuí ‘okú ne ‘oatu kiate koe ‘a e tuipau ko e me‘a ‘okú ke ‘amanaki ki aí ‘e hoko mo‘oni.” (Hep. 11:1a) Kapau ‘okú ke ma‘u ‘a e tuí, ‘okú ke tuipau ko e me‘a kotoa ‘oku lea‘aki ‘e Sihová ‘oku mo‘oni pea ‘e fakahoko. Ko e fakatātaá, na‘e tala ‘e Sihova ki he kau ‘Isilelí: “Kapau ‘e lava ke mou maumau‘i ‘eku fuakava ‘o fekau‘aki mo e ‘ahó pea mo ‘eku fuakava ‘o fekau‘aki mo e po‘ulí, ke ta‘ofi ‘a e ‘ahó mo e po‘ulí mei he‘ena hoko mai ‘i hona taimi totonú, ko e toki taimi pē ia ‘e lava ke maumau‘i ai ‘a ‘eku fuakava mo ‘eku sevāniti ko Tēvitá.” (Sel. 33:20, 21) ‘Oku faifai ange peá ke manavasi‘i na‘a ‘ikai ke hopo mo tō ‘a e la‘aá, ‘o ‘ai ai ke ‘ikai ha ‘aho pe po‘uli? Kapau ‘oku ‘ikai ke ke veiveiua ‘i he ngaahi lao ‘o natulá ‘a ia ‘okú ne tauhi ‘a e māmaní ke vilo takai ‘i hono halangá pea vilo takai he la‘aá, ‘oku totonu ke ke veiveiua ‘i he malava ke fakahoko ‘e he Tokotaha-Fakatupu ‘o e ngaahi lao ko ení ‘ene ngaahi tala‘ofá? Ko hono mo‘oní ‘ikai!​—‘Ai. 55:10, 11; Māt. 5:18.

Uá, ko e tuí “ko e fakamo‘oni ia ko e me‘a ‘okú ke tui ki aí ‘oku mo‘oni neongo ‘oku te‘eki ke ke mātā.” Ko e tuí ‘oku lava ke pehē “ko e fakamo‘oni” pe “fakamo‘oni tuipau” ia ‘o e ngaahi me‘a ‘oku ta‘ehāmaí ka ‘oku mo‘oni. (Hep. 11:1e) ‘I he founga fē? Tau pehē ‘oku ‘eke atu ‘e ha ki‘i tama, ‘‘Oku anga-fēfē ho‘o ‘ilo‘i ‘oku ‘i ai ha ‘eá?’ Neongo ‘oku te‘eki ‘aupito ke ke sio ki he ‘eá, ‘oku ngalingali ‘e lava ke ke tokoni ki he ki‘i tamá ke faka‘uhinga ‘i he fakamo‘oni ‘oku ‘i aí​—ko e mānavá, ko e havilí mo e hā fua. ‘I he tuipau pē ‘a e ki‘i tamá ki he fakamo‘oní, ‘okú ne tali ‘a e ‘i ai ‘a e me‘a ‘oku ta‘ehāmai kiate iá. ‘I he tu‘unga meimei tatau, ko e tuí ‘oku makatu‘unga ‘i he fakamo‘oni fefeka.​—Loma 1:20.

Koe‘uhi ‘oku makatu‘unga ‘a e tuí ‘i he fakamo‘oni, ke ma‘u ‘a e tuí kuo pau ke ‘uluaki ma‘u ‘e ha taha “ha ‘ilo totonu ki he mo‘oní.” (1 Tīm. 2:4) Ka ‘oku ‘ikai fe‘unga pē ia. Na‘e tohi ‘e he ‘apositolo ko Paulá: “Ke mā‘oni‘oni ha tangata, kuo pau ke ne ngāue‘i ‘a e tuí ‘i hono lotó.” (Loma 10:10) Ko ha tokotaha kuo pau ke ‘ikai ngata pē ‘ene tui ki he mo‘oní kae fakamahu‘inga‘i foki ia. Ko e toki taimi pē ia ‘e ue‘i ai ia ke ne ngāue‘i ‘ene tuí, ‘a ia, ke ngāue ‘o fehoanaki mo e  mo‘oní. (Sēm. 2:20) Ko ha tokotaha ‘oku ‘ikai ke ne hounga‘ia loto-mo‘oni ‘i he mo‘oní te ne taliteke‘i nai na‘a mo e fakamo‘oni fakatupu tuipaú kapau ‘okú ne pipiki ki he ngaahi fakakaukau fakamahaló pe kumi kalofanga koe‘uhi ko ‘ene ngaahi holi fakakakanó. (2 Pita 3:3, 4; Sute 18) ‘I he taimi ‘o e Tohi Tapú, ko e ‘uhinga eni na‘e ‘ikai ke fakatupulekina ai ‘e he tokotaha kotoa na‘e sio ki he ngaahi maná ‘a e tuí. (Nōm. 14:11; Sione 12:37) ‘Oku fakatupulekina ‘e he laumālie mā‘oni‘oni ‘o e ‘Otuá ‘a e tuí ‘i he kakai pē ‘oku nau lelei‘ia ange ‘i he mo‘oní kae ‘ikai ko e loí.​—Kal. 5:22; 2 Tes. 2:10, 11.

‘I he lotolotonga ‘o e fa‘ahinga na‘a nau fakahāhā ‘a e tui tu‘u-ki-mu‘á ko Tu‘i Tēvita. (Hep. 11:32, 33) Kae kehe, na‘e ‘ikai ke ma‘u ‘e he tokotaha kotoa ‘i he fāmili ‘o Tēvitá ‘a e tui pehē. Ko e fakatātaá, ‘i he taimi ‘e taha, ko ‘Eliapi, ‘a e tokoua lahi taha ‘o Tēvitá, na‘á ne valoki‘i ‘a Tēvita ‘i he‘ene hoha‘a fekau‘aki mo e pole ‘a Kolaiaté. (1 Sām. 17:26-28) ‘Oku ‘ikai ha taha ‘oku fanau‘i mai mo e tuí; pe ma‘u tukufakaholo ‘e ha taha ‘a e tuí mei he‘ene ongo mātu‘á, ko ia ko e tui ‘a Tēvitá ko e ola ia ‘o hono vaha‘angatae tonu mo e ‘Otuá.

‘I he Saame 27, ‘oku fakahaa‘i ai ‘e Tēvita ‘a e founga na‘á ne ma‘u ai ‘a e tui mālohi peheé. (Veesi 1) Na‘e fakalaulauloto ‘a Tēvita ki he‘ene ngaahi hokosia ‘i he kuohilí pea mo e anga ‘o e fakafeangai ‘a Sihova ki hono ngaahi filí. (Veesi 2, 3) Na‘á ne hounga‘ia loloto ‘i he fokotu‘utu‘u ‘a Sihova ki he lotú. (Veesi 4) Na‘e lotu ‘a Tēvita ki he ‘Otuá fakataha mo hono kaungātuí ‘i he tāpanekalé. (Veesi 6) Na‘á ne kumi fakamātoato kia Sihova ‘i he lotu. (Veesi 7, 8) Na‘e loto foki ‘a Tēvita ke fakahinohino‘i ia ‘i he founga ‘a e ‘Otuá. (Veesi 11) Na‘e mātu‘aki mahu‘inga ‘a e ‘ulungaanga ko ení kia Tēvita ‘o ne ‘eke ai ‘a e fehu‘i: “Ko fē na‘á ku mei ‘i aí kapau na‘e ‘ikai te u tui?”​—Veesi 13.

‘E lava ke ke ma‘u ‘a e tui hangē ko Tēvitá kapau te ke fa‘ifa‘itaki ki he fakakaukau fakae‘atamai mo e tō‘onga ‘oku fakahaa‘i ‘i he Saame 27. Koe‘uhi ko e tuí ‘oku makatu‘unga ‘i he ‘ilo totonú, ko e lahi ange ho‘o ako ‘a e Folofola ‘a e ‘Otuá mo e ‘ū tohi Fakatohitapú, ko e faingofua ange ia ke fakatupulekina ‘a e tafa‘aki ko eni ‘o e fua ‘o e laumālie ‘o e ‘Otuá. (Saame 1:2, 3) Vahe‘i ‘a e taimi ke fakalaulauloto ‘i he taimi ‘okú ke ako aí. Ko e fakalaulaulotó ‘e fakatupulekina ai ho‘o hounga‘iá. ‘I he lahi ange ho‘o hounga‘ia kia Sihová, ko e lahi ange ia ho‘o holi ke ngāue‘i ho‘o tuí ‘aki ‘a e lotu kiate ia ‘i he fakataha ‘a e fakataha‘angá pea talaki ho‘o ‘amanakí ki he ni‘ihi kehé. (Hep. 10:23-25) Pehē foki, ‘oku tau fakahaa‘i ‘etau tuí ‘i he‘etau hokohoko atu ke “lotu ma‘u pē ‘o ‘oua ‘e fiu.” (Luke 18:1-8) Ko ia ai, “lotu ma‘u pē” kia Sihova, ‘o falala “‘okú ne tokanga mai” kiate koe. (1 Tes. 5:17; 1 Pita 5:7) ‘Oku ue‘i kitautolu ‘e he tuí ke ngāue, pea ko ‘etau ngāué leva te ne fakaivimālohi‘i ‘etau tuí.​—Sēm. 2:22.

‘I he efiafi ki mu‘a ‘i he‘ene pekiá, na‘e tala ‘e Sīsū ki he‘ene kau ākongá: “Ngāue‘i ‘a e tui ki he ‘Otuá;  ngāue‘i foki ‘a e tui kiate aú.” (Sione 14:1) Ko ia ‘oku fiema‘u ke tau ngāue‘i ‘a e tuí ‘o ‘ikai kia Sihova pē kae pehē foki kia Sīsū. ‘E lava fēfē ke ke ngāue‘i ‘a e tui kia Sīsuú? Tau lāulea angé ki he founga ‘e tolu.

‘Uluakí, vakai ki he huhu‘í ko ha me‘a‘ofa fakafo‘ituitui ‘a e ‘Otuá kiate koe. Na‘e pehē ‘e he ‘apositolo ko Paulá: “‘Oku ou mo‘ui ‘o fakatatau ki he tui ki he ‘Alo ‘o e ‘Otuá, ‘a ia na‘á ne ‘ofeina au peá ne tuku atu ia koe‘uhi ko aú.” (Kal. 2:20) ‘I ho‘o ngāue‘i ‘a e tui kia Sīsuú, ‘okú ke tui fakapapau ai ‘oku kaunga ‘a e huhu‘í kiate koe, ko e makatu‘unga ia ki hono fakamolemole‘i ho‘o angahalá, ‘oatu kiate koe ‘a e ‘amanaki ki he mo‘ui ta‘engatá mo e fakapapau‘i lahi taha ia ‘a e ‘ofa ‘a e ‘Otuá kiate koé. (Loma 8:32, 38, 39; ‘Ef. 1:7) ‘E fakaivimālohi‘i heni koe ke tuku ki he tafa‘akí ‘a e ngaahi ongo‘i ‘ikai lelei fekau‘aki mo koé.​—2 Tes. 2:16, 17.

Uá, ‘unu‘unu ofi kia Sihova ‘i he lotu ‘o makatu‘unga ‘i he feilaulau ‘a Sīsuú. Koe‘uhi ko e feilaulau huhu‘í, ‘e lava ai ke tau lotu kia Sihova “‘aki ‘a e tau‘atāina ‘o e leá, koe‘uhi ke tau a‘usia ‘a e mēsí pea ma‘u ‘a e ‘ofa ma‘ata‘ataá ke ne tokoni‘i kitautolu ‘i he taimi totonú.” (Hep. 4:15, 16; 10:19-22) Ko e lotú ‘okú ne fakaivimālohi‘i ‘etau fakapapau ke taliteke‘i ‘a e fakatauele ke faiangahalá.​—Luke 22:40.

Tolú, talangofua kia Sīsū. Na‘e tohi ‘e he ‘apositolo ko Paulá: “Ko e tokotaha ‘okú ne ngāue‘i ‘a e tui ki he ‘Aló ‘okú ne ma‘u ‘a e mo‘ui ta‘engatá; ko e tokotaha ‘okú ne talangata‘a ki he ‘Aló he‘ikai te ne ma‘u ‘a e mo‘uí, ka ‘oku nofo ma‘u ‘iate ia ‘a e houhau ‘a e ‘Otuá.” (Sione 3:36) Fakatokanga‘i na‘e fakahoa ‘e Sione ‘a e ngāue‘i ‘a e tuí ki he hoko ‘o talangata‘á. Ko ia ai, ‘okú ke ngāue‘i ‘a e tui kia Sīsuú ‘i he taimi ‘okú ke talangofua ai kiate iá. ‘Okú ke talangofua kia Sīsū ‘aki ‘a e muimui ki he “lao ‘a e Kalaisí,” ‘a ia, ko e kotoa ‘ene akonakí mo e fekaú. (Kal. 6:2) ‘Okú ke talangofua foki kia Sīsū ‘aki ‘a e muimui ki he tataki ‘okú ne tokonaki mai fakafou ‘i he “tamaio‘eiki anga-tonu mo potó.” (Māt. 24:45) ‘I he talangofua kia Sīsuú, te ke ma‘u ai ‘a e mālohi ke kātekina ‘a e ngaahi faingata‘a hangē ha afā.​—Luke 6:47, 48.

‘I he taimi ‘e taha, na‘e kalanga ha tangata kia Sīsū: “‘Oku ou ma‘u ‘a e tuí! Tokoni‘i mu‘a au ‘i he tafa‘aki ‘oku vaivai ai ‘eku tuí!” (Mk. 9:24) Na‘á ne ma‘u ha tui, ka na‘e anga-fakanānā ‘a e tangata ko ení ‘o ne ‘ilo‘i na‘e fiema‘u kiate ia ‘a e tui lahi ange. Hangē ko e tangata ko ení, ko kitautolu kotoa ‘i ha taimi te tau fiema‘u ‘a e tui lahi ange. Pea ko kitautolu kotoa ‘e lava ke tau fakaivimālohi‘i ‘etau tuí he taimí ni. Hangē ko ia kuo tau sio ki aí, ‘oku tau fakaivimālohi‘i ‘etau tuí ‘i he‘etau ako ‘a e Folofola ‘a e ‘Otuá pea fakalaulauloto ki ai, ‘a ia ‘e fakalahi ai ‘etau hounga‘ia kia Sihová. ‘E toe tupu foki ‘etau tuí ‘o mālohi ange ‘i he taimi ‘oku tau kau fakataha ai mo hotau kaungātuí ‘i he lotu kia Sihová, talaki fakahāhā ‘etau ‘amanakí pea kītaki ‘i he lotu. ‘Ikai ko ia pē, ‘i he‘etau fakaivimālohi‘i ‘etau tuí, ‘oku tau ma‘u ai ‘a e pale lahi tahá. ‘Oku enginaki mai ‘e he Folofola ‘a e ‘Otuá: “Si‘i fa‘ahinga ‘ofeina, mou langa hake ho‘omou tui mā‘oni‘oní . . . koe‘uhi ke mou tauhi kimoutolu ‘i he ‘ofa ‘a e ‘Otuá.”​—Sute 20, 21.