1. Ko e hā kuo foaki ‘e Sihova ki he‘ene sevāniti faitōnunga taki taha?

KUO foaki anga-‘ofa ‘e Sihova ha ngafa ki he‘ene sevāniti faitōnunga taki taha ‘i he‘ene fakataha‘angá. Neongo ‘oku kehekehe hotau ngaahi ngafá, ‘oku tau mahu‘inga kotoa pea ‘oku tau fiema‘u ‘a e tokotaha kotoa. ‘Oku tokoni‘i kitautolu ‘e he ‘apositolo ko Paulá ke ‘ilo‘i ‘a e lēsoni mahu‘inga ko ení. Anga-fēfē?

2. Fakatatau ki he ‘Efesō 4:16, ko e hā ‘oku fiema‘u ai ke tau fakamahu‘inga‘i ‘a e tokotaha taki taha pea ngāue fakatahá?

² Hangē ko e konga tohi ‘o e kaveinga ‘o e kupu ko ení, na‘e fakamamafa‘i ‘e Paula he‘ikai lava ha taha ‘o kitautolu ‘o pehē ki ha sevāniti ‘a Sihova “‘Oku ‘ikai te u fiema‘u ‘e au koe.” (1 Kol. 12:21) Kapau ‘oku fiema‘u ke melino ‘a e fakataha‘angá, kuo pau ke tau fakamahu‘inga‘i ‘a e tokotaha taki taha pea ngāue fakataha. (Lau ‘a e ‘Efesō 4:16.) ‘I he taimi ‘oku tau ngāue fā‘ūtaha aí, ‘oku lakalakaimonū ‘a e fakataha‘angá pea langa hake ‘i he ‘ofa.

3. Ko e hā te tau lāulea ki ai ‘i he kupu ko ení?

³ Ko e hā ‘a e ngaahi tafa‘aki ‘e ni‘ihi ‘e lava ke tau fakahāhā ai ‘a e faka‘apa‘apa ki he kau Kalisitiane ‘i he fakataha‘angá? ‘I he kupu ko ení, ‘e lāulea ai ki he founga ‘e lava ke fakahāhā ai ‘e he kau mātu‘á ‘a e faka‘apa‘apa ki honau kaungāmātu‘á. Hokó, te tau lāulea ki he founga ‘e lava ke tau fakahaa‘i kotoa ai ‘oku tau fakamahu‘inga‘i hotau fanga tokoua mo e fanga tuofāfine te‘eki malí. Pea faka‘osí, te tau lāulea ki he founga ‘e lava ke tau fakahaa‘i ai ‘a e hounga‘ia ‘i he fa‘ahinga ‘oku ‘ikai nai ke nau poto lelei ‘i he‘etau leá.

4. Ko e hā ‘a e fale‘i ‘a Paula ‘oku totonu ke muimui ki ai ‘a e kau mātu‘á ‘a ia ‘oku hiki ‘i he Loma 12:10?

⁴ Ko e kau mātu‘a kotoa ‘i he fakataha‘angá ‘oku fakanofo kinautolu ‘e he laumālie mā‘oni‘oni ‘o Sihová. Neongo ia, ko e tokotaha taki taha ‘okú ne ma‘u ‘a e ngaahi me‘a‘ofa mo e malava kehekehe. (1 Kol. 12:17, 18) Ko e ni‘ihi na‘e toki fakanofo nai pea ‘oku ‘ikai ke nau loko taukei. ‘Oku fakangatangata nai ‘a e ni‘ihi ‘e he ta‘umotu‘á mo e mahamahakí. Neongo ia, ‘oku ‘ikai totonu ki ha mātu‘a ke ne vakai ki ha taha hono kaungāmātu‘á peá ne pehē “‘Oku ‘ikai te u fiema‘u ‘e au koe.” ‘I hono kehé, ‘oku totonu ki he mātu‘a taki taha ke ne muimui ki he fale‘i ‘a Paula ‘oku hiki ‘i he Loma 12:10.​—Lau.

5. ‘Oku anga-fēfē hono fakahāhā ‘e he kau mātu‘á ‘oku nau faka‘apa‘apa‘i honau kaungāmātu‘á, pea ko e hā ‘oku mahu‘inga ai ke nau fai peheé?

⁵ ‘Oku fakahāhā ‘e he kau mātu‘á ‘oku nau faka‘apa‘apa‘i honau kaungāmātu‘á ‘aki ‘enau fanongo lelei kiate kinautolu. ‘Oku mahu‘inga eni tautefito ki he taimi ‘oku fakataha ai ‘a e kulupu ‘o e kau mātu‘á ke lāulea ki ha me‘a mafatukituki. Ko e hā hono ‘uhingá? Fakatokanga‘i ‘a e fakamatala ‘i he Taua Le‘o ‘o Sepitema 1, 1989: “Fakafou mai ‘i he laumālie mā‘oni‘oni, ‘e ‘ilo ‘e he kau mātu‘a ‘e lava ‘e Kalaisi ke ne tataki ‘a e fakakaukau ‘a ha mātu‘a ‘i he kulupu ‘o e kau mātu‘a ke ne ‘ohake ‘a e tefito‘i mo‘oni faka-Tohitapu ‘oku fe‘unga ki ha fa‘ahinga tu‘unga pē pe ki hono fai ha tu‘utu‘uni mahu‘inga. (Ngāue 15:6-15) ‘I he kulupu ‘o e kau mātu‘a ‘oku ‘ikai ha taha ai ‘oku ne ma‘u ‘a e laumālie tāfataha pē.”

6. ‘E lava fēfē ke ngāue fā‘ūtaha ‘a e kau mātu‘á, pea ‘e anga-fēfē ma‘u ‘aonga mei ai ‘a e fakataha‘angá?

⁶ Ko ha mātu‘a ‘okú ne faka‘apa‘apa‘i hono kaungāmātu‘á ‘oku ‘ikai ke ne feinga ma‘u pē ke ‘uluaki lea ‘i he fakataha ‘a e kau mātu‘á. ‘Oku ‘ikai ke ne pule‘i ‘a e fetalanoa‘akí, pea ‘oku ‘ikai ke ne tui ko ‘ene fakakaukaú ‘oku tonu ma‘u pē. ‘I hono kehé, ‘okú ne fakahaa‘i ‘ene fakakaukaú ‘i he anga-fakatōkilalo mo e anga-fakanānā. ‘Okú ne fanongo lelei ki he fakamatala ‘a e ni‘ihi kehé. Ko e me‘a mahu‘inga angé, ‘okú ne vēkeveke ke vahevahe ha tefito‘i mo‘oni Fakatohitapu pea fanongo ki he tataki mei he “tamaio‘eiki anga-tonu mo potó.” (Māt. 24:45-47) ‘I he lāulea  ‘a e kau mātu‘á ki he ngaahi me‘á ‘i ha ‘ātakai ‘ofa mo faka‘apa‘apa, ko e laumālie mā‘oni‘oni ‘o e ‘Otuá ‘e ‘iate kinautolu, pea te ne tataki kinautolu ke fai ‘a e ngaahi fili ke fakaivimālohi‘i ai ‘a e fakataha‘angá.​—Sēm. 3:17, 18.

7. Na‘e anga-fēfē vakai ‘a Sīsū ki he ta‘emalí?

⁷ Ko e fakataha‘anga ‘i he ‘aho ní ‘oku kau ki ai ‘a e ngaahi hoa mali mo e fāmili. Ka, ‘oku kau foki ki ai ‘a e fanga tokoua mo e fanga tuofāfine tokolahi ‘oku te‘eki ke nau mali. ‘Oku totonu ke fēfē ‘etau vakai ki he fa‘ahinga ta‘emalí? Fakakaukau ki he anga ‘o e vakai ‘a Sīsū ki he ta‘emalí. Lolotonga ‘ene ngāue fakafaifekau ‘i he māmaní, na‘e ‘ikai ke mali ‘a Sīsū. Na‘á ne nofo ta‘emali pea tuku taha hono taimí mo e tokangá ki hono vāhenga-ngāué. Na‘e ‘ikai ‘aupito ke ako‘i ‘e Sīsū ko ha fiema‘u pau ia ke mali pe nofo ta‘emali. Neongo ia, na‘á ne pehē ‘e fili ‘a e kau Kalisitiane ‘e ni‘ihi ke nofo ta‘emali. (Māt. 19:11, 12) Na‘e faka‘apa‘apa‘i ‘e Sīsū ‘a e fa‘ahinga ta‘emalí. Na‘e ‘ikai ke ne vakai ki he fa‘ahinga ta‘emalí ‘oku nau mā‘ulalo ange pe ‘oku nau tō mei ha me‘a ‘i he mo‘uí.

8. Fakatatau ki he 1 Kolinitō 7:7-9, ko e hā na‘e fakalototo‘a‘i ‘e Paula ‘a e kau Kalisitiané ke nau fakakaukau ki aí?

⁸ Hangē ko Sīsuú, na‘e fakahoko ‘e he ‘apositolo ko Paulá ‘ene ngāue fakafaifekaú ‘i he tu‘unga ko ha tokotaha ta‘emali. Na‘e ‘ikai ‘aupito ke ako‘i ‘e Paula ‘oku hala ki ha Kalisitiane ke mali. Na‘á ne ‘ilo‘i ko ha me‘a fakafo‘ituitui ia. Neongo ia, na‘e fakalototo‘a‘i ‘e Paula ‘a e kau Kalisitiané ke nau fakakaukau pe ‘e lava ke nau tauhi kia Sihova ‘i he tu‘unga ta‘emali. (Lau ‘a e 1 Kolinitō 7:7-9.) ‘Oku hā mahino na‘e ‘ikai ke siolalo ‘a Paula ki he kau Kalisitiane ta‘emalí. Ko hono mo‘oní, na‘á ne fili ‘a e talavou ta‘emali ko Tīmoté ke ne tokanga‘i ‘a e ngaahi vāhenga-ngāue mahu‘inga. * (Fil. 2:19-22) ‘Oku hā mahino leva, ‘oku ‘ikai totonu ke tau fakakaukau ‘oku makatu‘unga ‘a e taau lahi ange pe ‘ikai taau ha tokoua kapau ‘oku mali pe ‘ikai mali.​—1 Kol. 7:32-35, 38.

9. Ko e hā ‘e lava ke tau lea‘aki fekau‘aki mo e malí pea mo e ta‘emalí?

⁹ Na‘e ‘ikai ke ako‘i ‘e Sīsū pe ko Paula ko e kau Kalisitiané ‘oku totonu ke nau mali pe nofo ta‘emali. Ko ia, ko e hā ‘e lava ke tau lea‘aki fekau‘aki mo e malí pea mo e ta‘emalí? ‘Oku fakamatala‘i fakalelei ‘i he Watchtower ‘o ‘Okatopa 1, 2012: “Ko hono mo‘oní, ko e [malí mo e ta‘emalí] ‘oku fakamatala‘i ia ko e me‘a‘ofa mei he ‘Otuá. . . . ‘Oku ‘ikai ke vakai ‘a Sihova ki he [ta‘emalí] ko ha me‘a fakamā pe fakamamahi.” ‘I he fakakaukau atu ki hení, ‘oku fiema‘u ke tau faka‘apa‘apa‘i  ‘a e fanga tokoua mo e fanga tuofāfine ta‘emali ‘i he fakataha‘angá.

10. ‘E lava fēfē ke tau fakahāhā ‘a e faka‘apa‘apa ki hotau fanga tokoua mo e fanga tuofāfine ta‘emalí?

¹⁰ ‘E lava fēfē ke tau fakahāhā ‘a e faka‘apa‘apa ki he ongo‘i mo e tu‘unga ‘oku ‘i ai hotau fanga tokoua mo e fanga tuofāfine ta‘emalí? ‘Oku lelei ke tau manatu‘i ko e ni‘ihi ‘o e kau Kalisitiane ta‘emalí ‘oku nau ‘ai ko ‘enau taumu‘a fakafo‘ituituí ia ke nofo ta‘emali. Ko e kau Kalisitiane ta‘emali ‘e ni‘ihi ‘oku nau loto ke mali, ka ‘oku te‘eki ke ma‘u ‘a e tokotaha totonú. Ka ko e ni‘ihi kuo mate nai honau hoá. Pe ko e hā pē ‘a e tu‘ungá, ‘oku totonu ki he fa‘ahinga ‘i he fakataha‘angá ke nau ‘eke ange ki he kau Kalisitiane ta‘emalí pe ko e hā ‘oku ‘ikai ke nau mali aí pe tala ange te nau tokoni ke kumi hanau mali? Ko hono mo‘oní, ‘e kole atu nai ‘e he kau Kalisitiane ta‘emali ‘e ni‘ihi ‘a e tokoni ko iá. Ka ‘o kapau ‘oku ‘ikai ke nau kole tokoni atu, ‘e fēfē ‘a e ongo‘i hotau fanga tokoua mo e fanga tuofāfine ta‘emalí kapau te tau fai pehē? (1 Tes. 4:11; 1 Tīm. 5:13) Tau lāulea angé ki he fakamatala ‘a hotau fanga tokoua mo e fanga tuofāfine ta‘emali faitōnunga.

11-12. ‘E anga-fēfē nai ‘etau ‘ai ke loto-si‘i ‘a e fa‘ahinga ta‘emalí?

¹¹ Ko ha ‘ovasia sēketi ta‘emali ‘e taha ‘a ia na‘á ne lavame‘a ‘aupito ‘i hono vāhenga-ngāué ‘okú ne ongo‘i ‘oku lahi ‘a e ngaahi ‘aonga mei he nofo ta‘emalí. Neongo ia, na‘á ne fakatokanga‘i ‘e lava ke fakalotosi‘i ‘a e taimi ‘oku ‘eke ange ai ‘e he fanga tokouá mo e fanga tuofāfiné ‘i ha ‘uhinga lelei: “Ko e hā ‘oku ‘ikai te ke mali aí?” Ko ha tokoua ta‘emali ‘okú ne ngāue ‘i ha ‘ōfisi va‘a na‘á ne pehē: “‘I he taimi ‘e ni‘ihi ‘oku ‘ai au ‘e he fanga tokouá mo e fanga tuofāfiné ke u ongo‘i ko e fa‘ahinga ta‘emalí ‘oku nau faka‘ofa. ‘Oku lava ke ‘ai ‘e he me‘á ni ke hoko ‘a e ta‘emalí ko ha kavenga kae ‘ikai ko ha me‘a‘ofa.”

¹² Ko ha tuofefine ta‘emali ‘okú ne ngāue ‘i Pēteli na‘á ne pehē: “Ko e kau malanga ‘e ni‘ihi ‘oku nau pehē ko e kotoa ‘o e kau ta‘emalí ‘oku nau fakasio ha hoa pe ‘oku vakai ‘a e kau ta‘emali kotoa pē ki he ngaahi feohi‘anga kotoa ko ha faingamālie ia ke fakasio ai ha hoa. ‘I ha taimi na‘á ku folau ki ha feitu‘u ‘e taha ko e konga ‘eku vāhenga-ngāué, na‘á ku a‘u atu ‘i he pō na‘e fai ai ha fakataha. Na‘e tala mai ‘e he tuofefine na‘á ku nofo aí ‘oku ‘i ai ha ongo tokoua ‘i he fakataha‘angá ‘oku mau to‘u. Na‘á ne tala mai ‘oku ‘ikai ko ha‘ane faka‘ai‘ai au. Ka ‘i he‘ema hū atu pē ki he Fale Fakataha‘angá, na‘á ne fusi au ki he ongo tokouá. Ko hono mo‘oní, ko ha me‘a fakamā mo‘oni ia kiate kimautolu toko tolu.”

13. Ko e hā ‘a e ngaahi fa‘ifa‘itaki‘anga na‘á ne fakalototo‘a‘i ha tuofefine ta‘emali ‘e taha?

¹³ Ko ha tuofefine ta‘emali ‘e taha ‘okú ne ngāue ‘i Pēteli na‘á ne pehē: “‘Oku ou ‘ilo‘i ‘a e kau tāimu‘a ta‘emali matu‘otu‘a ‘oku nau tu‘u ma‘u, tokangataha, feilaulau‘i-kita mo fiemālie ‘i he‘enau ngāué pea ‘oku nau tokoni lahi ki he fakataha‘angá. ‘Oku nau ma‘u ha vakai mafamafatatau ki honau tu‘unga ta‘emalí, ‘o ‘ikai ke nau ongo‘i mā‘olunga ange koe‘uhi ko ‘enau nofo ta‘emalí pe li‘ekina koe‘uhi ko e ‘ikai ke ‘i ai hanau mali mo ha fāmilí.” Ko e me‘a ia ‘oku faka‘ofo‘ofa ai ha fakataha‘anga ‘i ho‘o ongo‘i ‘oku faka‘apa‘apa‘i mo fakamahu‘inga‘i koe. ‘Okú ke ‘ilo‘i ‘oku ‘ikai ke ke faka‘ofa pe loto-kovi atu ‘a e fanga tokouá pe li‘ekina koe pe fakakaukau ‘okú ke mā‘olunga ange. ‘Okú ke ‘ilo‘i pē ‘oku nau ‘ofa ‘iate koe.

14. ‘E lava fēfē ke tau fakahāhā ‘oku tau faka‘apa‘apa‘i ‘a e fa‘ahinga ta‘emalí?

¹⁴ Ko e fanga tokoua mo e fanga tuofāfine ta‘emalí te nau hounga‘ia kapau te tau fakamahu‘inga‘i kinautolu ‘o makatu‘unga ‘i honau ngaahi ‘ulungaanga leleí kae ‘ikai ko ‘enau ta‘emalí. ‘I he ‘ikai ke tau ongo‘i faka‘ofa‘ia ‘iate kinautolú, ‘oku lelei ke tau hounga‘ia ‘i he‘enau faitōnungá. Ko hono olá, he‘ikai ‘aupito ke ongo‘i ‘e hotau fanga tokoua mo e fanga tuofāfine ta‘emalí ‘oku tau pehē ange: “‘Oku ‘ikai te u fiema‘u ‘e au koe.” (1 Kol. 12:21) ‘I hono kehé, te nau ‘ilo‘i ‘oku tau faka‘apa‘apa‘i mo fakamahu‘inga‘i honau ngafa ‘i he fakataha‘angá.

15. Ko e hā ‘a e ngaahi fe‘unu‘aki kuo fai ‘e he ni‘ihi ke fakalahi ai ‘enau ngāue fakafaifekaú?

¹⁵ ‘I he ngaahi ta‘u ki mui ní, ko e kau malanga tokolahi kuo nau ‘ai ko ‘enau taumu‘á ia ke ako ha lea kehe koe‘uhi ke fakalahi ai ‘enau ngāue fakafaifekaú. Ko hono fai iá ‘oku fiema‘u ki ai ha fe‘unu‘aki. Ko e fanga tokoua mo e fanga tuofāfine ko ení kuo nau mavahe mei he fakataha‘anga na‘a nau ngāue‘aki ai ‘enau lea tu‘ufonuá koe‘uhi ke ngāue ‘i ha fakataha‘anga lea kehe ‘a ia ‘oku lahi ange ai ‘a e fiema‘u ki ha kau malanga ‘o e Pule‘angá. (Ngā. 16:9) Ko ha fili fakafo‘ituitui eni ‘a ia ‘oku fai ‘e he kau Kalisitiane ko ení koe‘uhi ke laka ki mu‘a ai ‘a e ngaahi fiema‘u ‘a e Pule‘angá. Neongo ‘e fiema‘u nai ‘a e ngaahi ta‘u lahi ke nau hoko ai ‘o poto lelei ‘i he lea fo‘ou ko iá, ‘oku nau ‘aonga lahi ki he fakataha‘angá. Ko honau ngaahi ‘ulungaanga leleí mo e taukeí ‘oku fakaivimālohi‘i ai mo ‘ai ke tu‘u ma‘u ‘a e fakataha‘angá. ‘Oku tau fakamahu‘inga‘i ‘a e fanga tokoua mo e fanga tuofāfine feilaulau‘i-kita ko ení!

16. ‘Oku makatu‘unga ‘i he hā hono sivisivi‘i ‘e he kau mātu‘á pe ‘oku taau ha tokoua ke hoko ko ha mātu‘a pe ko ha sevāniti fakafaifekau?

¹⁶ Ko ha kulupu ‘o e kau mātu‘á he‘ikai ke nau toumoua mei hono fakaongoongolelei‘i ha tokoua ke hoko ko ha mātu‘a pe sevāniti fakafaifekau koe‘uhí pē ko e te‘eki ke ne poto lelei ‘i he lea ‘a e fakataha‘angá. ‘E sivisivi‘i ‘e he kau mātu‘á ha tokoua ‘o makatu‘unga ‘i he ngaahi tu‘unga taau Fakatohitapu ki he kau mātu‘á mo e kau sevāniti fakafaifekaú kae ‘ikai ‘i he‘ene poto lelei ‘i he lea ‘a e fakataha‘anga fakalotofonuá.​—1 Tīm. 3:1-10, 12, 13; Tai. 1:5-9.

17. Ko e hā ‘a e ngaahi fehu‘i ‘e fakakaukau ki ai ‘a e ngaahi fāmili ‘e ni‘ihi ‘i he‘enau hiki ki ha fonua ‘e taha?

¹⁷ Ko e ngaahi fāmili Kalisitiane ‘e ni‘ihi kuo nau hiki ki ha fonua ‘e taha ke kumi hūfanga pe kumi ki ha ngāue. Ko ia ai, ko ‘enau fānaú ‘e ako‘i nai kinautolu ‘i he lea tefito ‘a e fonua ko iá. ‘E fiema‘u foki ki he ngaahi mātu‘á ke ako ‘a e lea tefitó ke lava ‘o nau ma‘u ha ngāue. Kae fēfē kapau ‘oku ‘i ai ha fakataha‘anga pe kulupu ‘i he‘enau lea tu‘ufonuá? Ko fē ‘a e fakataha‘anga ‘oku totonu ke kau ki ai ‘a e fāmilí? Ko e fakataha‘anga ‘i he lea tefito ‘a e fonuá pe ko e fakataha‘anga ‘i he lea tu‘ufonua ‘a e fāmilí?

18. ‘I he fehoanaki mo e Kalētia 6:5, ‘e lava fēfē ke tau fakahāhā ‘a e faka‘apa‘apa ki he fili ‘oku fai ‘e he ‘ulu‘i fāmilí?

¹⁸ Kuo pau ke fili ‘e he ‘ulu‘i fāmilí ‘a e fakataha‘anga ‘e kau ki ai hono fāmilí. Koe‘uhi ko ha me‘a fakafo‘ituitui eni, kuo pau ke ne fakakaukau ki he me‘a ‘e lelei taha ki hono fāmilí. (Lau ‘a e Kalētia 6:5.) ‘Oku fiema‘u ke tau faka‘apa‘apa‘i ‘a e fili ‘oku fai ‘e he ‘ulu‘i fāmilí. Tatau ai pē pe ko e hā ‘ene filí, tau tali ia pea talitali lelei ‘a e fāmilí ko ha konga mahu‘inga ‘etau fakataha‘angá.​—Loma 15:7.

19. Ko e hā ‘oku totonu ke fakakaukau mo lotu ‘a e ‘ulu‘i fāmilí fekau‘aki mo iá?

¹⁹ ‘I he tu‘unga ‘e ni‘ihi, ‘e kau nai ‘a e ngaahi fāmilí ki ha fakataha‘anga ‘oku ngāue‘aki ai ‘a e lea tu‘ufonua ‘a e ngaahi mātu‘á, ka ‘oku ‘ikai nai ke poto lelei ‘a e fānaú ‘i he lea ko iá. Kapau ‘oku  tu‘u ‘a e fakataha‘anga ko iá ‘i he feitu‘u ‘oku lea‘aki ai ‘a e lea fakafonuá, ‘e faingata‘a nai ki he fānaú ke nau mahino‘i ‘a e ngaahi fakatahá pea ‘ikai ke nau fakalakalaka fakalaumālie. Ko e hā hono ‘uhingá? Koe‘uhí ‘oku ako nai ‘a e fānaú ‘i ha ‘apiako ‘oku ngāue‘aki ai ‘a e lea fakafonuá kae ‘ikai ko e lea tu‘ufonua ‘enau ngaahi mātu‘á. ‘I he tu‘unga peheé, ‘oku totonu ki he ngaahi ‘ulu‘i fāmilí ke nau fakakaukau mo lotu ki he me‘a ‘oku fiema‘u ke fai ke tokoni‘i ai ‘enau fānaú ke ‘unu‘unu ofi ange kia Sihova mo ‘ene kakaí. ‘E fiema‘u nai ke nau ako‘i ‘enau fānaú ke poto lelei ‘i he‘enau lea tu‘ufonuá pe ko ‘enau fakakaukau ke hiki ki ha fakataha‘anga ‘oku ngāue‘aki ai ‘a e lea ‘oku mahino‘i lelei he‘enau fānaú. Tatau ai pē pe ko e hā ‘a e fili ‘a e ‘ulu‘i fāmilí, ko e fakataha‘anga ‘okú ne fili ke nau kau ki aí ‘oku totonu ke nau faka‘apa‘apa‘i mo fakamahu‘inga‘i ia mo hono fāmilí.

20. ‘E lava fēfē ke tau fakahāhā ‘oku tau faka‘apa‘apa‘i hotau fanga tokoua mo e fanga tuofāfine ‘oku nau ako ha lea fo‘oú?

²⁰ Koe‘uhi ko e ngaahi ‘uhinga kuo tau lāulea mai ki aí, ‘i he ngaahi fakataha‘anga lahi, ‘e ‘i ai ‘a e fanga tokoua mo e fanga tuofāfine ‘oku nau fāinga ke ako ha lea fo‘ou. ‘E faingata‘a nai ke nau fakahaa‘i ‘enau fakakaukaú. Neongo ia, kapau ‘oku tau sio fakalaka atu ‘i he ‘ikai ke nau poto lelei ‘i he leá, te tau vakai ai ki he‘enau ‘ofa kia Sihová mo ‘enau holi ke tauhi kiate iá. ‘I he‘etau vakai ki he ‘ulungaanga faka‘ofo‘ofa ko ení, te tau fakamahu‘inga‘i mo faka‘apa‘apa‘i lahi ai ‘a e fanga tokoua mo e fanga tuofāfine ko ení. He‘ikai ke tau pehē ai ‘‘Oku ‘ikai te u fiema‘u ‘e au kimoutolu’ koe‘uhí pē ko e ‘ikai ke nau poto lelei ‘i he‘etau leá.

21-22. Ko e hā ‘a e monū faka‘ofo‘ofa ‘oku tau ma‘ú?

²¹ Ko hono ma‘u ha ngafa ‘i he‘ene fakataha‘angá ko ha monū faka‘ofo‘ofa ia kuo foaki mai ‘e Sihova. Tatau ai pē pe ko ha tangata pe fefine kitautolu, ta‘emali pe mali, kei si‘i pe ta‘umotu‘a pe ‘oku tau poto lelei ‘i ha lea pe ‘ikai loko poto, ‘oku tau mahu‘inga kia Sihova pea ki he ni‘ihi kehé.​—Loma 12:4, 5; Kol. 3:10, 11.

²² ‘Ofa ke hokohoko atu ‘etau ngāue‘aki ‘a e ngaahi lēsoni faka‘ofo‘ofa kuo tau ako mei he talanoa fakatātā ‘a Paula fekau‘aki mo e sino ‘o e tangatá. ‘I he founga ko iá, te tau vakai ai ki ha ngaahi founga lahi ange ke tau koloa‘aki hotau ngafá pea mo e ngafa ‘o e ni‘ihi kehé ‘i he fakataha‘anga ‘a Sihová.