1. Ko e hā ʻa e ʻahiʻahi naʻe fehangahangai mo Siosifá, pea naʻe anga-fēfē ʻene fakafeangaí?

 KO E foha ʻo Sēkope ko Siosifá naʻá ne fehangahangai mo ha ʻahiʻahi faingataʻa. “Ke ke mohe mo au,” ko e lea ange ia ʻa ha fefine kiate ia. Ko e uaifi ia ʻo hono ʻeikí, ʻa Pōtifa. Naʻe fakafisingaʻi ʻe Siosifa ʻene kolé. ʻE fifili nai ha tokotaha ʻi he ʻahó ni, ‘Ko e hā naʻe talitekeʻi ai ʻe Siosifa ʻa e fakatauele ko ení?’ Naʻe lolotonga mavahe ʻa Pōtifa. ʻIkai ko ia pē, ko Siosifá ko ha pōpula ʻi he ʻapí; ʻe lava moʻoni ke ʻai ʻe he fefine ko ení ʻene moʻuí ke faingataʻaʻia ʻi heʻene fakafisingaʻi iá. Neongo ia, naʻe hanganaki fakafisingaʻi ʻe Siosifa ʻene ngaahi feinga kīkīvoí. Ko e hā hono ʻuhingá? Naʻá ne pehē: “ʻE lava fēfē ke u fai ʻa e fuʻu koví ni ʻo u faiangahala moʻoni ai ki he ʻOtuá?”​—Sēn. 39:7-12.

2. Naʻe anga-fēfē hono ʻiloʻi ʻe Siosifa ko e tonó ko ha angahala ia ki he ʻOtuá?

² Naʻe anga-fēfē hono ʻiloʻi ʻe Siosifa ʻe vakai hono ʻOtuá ki he tonó ko ha tōʻonga ʻoku ‘fuʻu kovi’? Ko e Lao ʻa Mōsesé, ʻa ia naʻe kau ai ʻa e fekau māʻalaʻala “Kuo pau ke ʻoua naʻá ke tono,” naʻe toki hiki ia ʻi he taʻu ʻe uangeau ki mui ai. (ʻEki. 20:14) Neongo ia, ko e meʻa naʻe ʻiloʻi ʻe Siosifa fekauʻaki mo Sihová naʻe feʻungaʻānoa ia ke ne mahinoʻi ai ʻa e anga ʻEne ongoʻi fekauʻaki mo e tōʻonga taʻetāú. Ko e fakatātaá, naʻe ʻiloʻi papau ʻe Siosifa naʻe fakataumuʻa ʻe Sihova ʻa e nofo malí ke ʻi he vahaʻa ʻo ha tangata pē ʻe taha mo ha fefine pē ʻe taha. Pea naʻá ne fanongo nai ʻi he tuʻunga ʻe ua naʻe maluʻi ai ʻe Sihova ʻa e ngeia ʻene kui-ua ko Selá ʻi he taimi naʻe mei fakamālohia ai. ʻI ha founga meimei tatau, naʻe kau mai ʻa e ʻOtuá ʻo ne maluʻi ʻa e uaifi ʻo ʻAisaké, ʻa Lepeka. (Sēn. 2:24; 12:14-20; 20:2-7; 26:6-11) ʻI he fakaʻuhinga ʻa Siosifa ʻi he ngaahi meʻa ko iá, naʻá ne ʻiloʻi ʻa e meʻa naʻe totonu mo e meʻa naʻe hala ʻi he vakai ʻa e ʻOtuá. Koeʻuhi naʻe ʻofa ʻa Siosifa ki hono ʻOtuá, naʻá ne  ʻofa foki ʻi he ngaahi tuʻunga māʻoniʻoni ʻa Sihová, pea naʻá ne fakapapauʻi ke pouaki ia.

3. Ko e hā te tau lāulea ki ai ʻi he kupu ko ení?

³ ʻOkú ke ʻofa ʻi he māʻoniʻoní? ʻOku ʻikai ha veiveiua ʻoku pehē. Ka ʻoku tau taʻehaohaoa kotoa, pea kapau ʻoku ʻikai ke tau tokanga, ko e vakai ʻa e māmaní ki he māʻoniʻoní ʻe lavangofua ke ne uesia kitautolu. (ʻAi. 5:20; Loma 12:2) Ko ia te tau lāulea ki he ʻuhinga ʻo e māʻoniʻoní pea mo e founga ʻoku tau maʻu ʻaonga mei he ʻofa aí. Te tau lāulea leva ki he sitepu ʻe tolu ʻe lava ke tau fou ai ke fakaivimālohiʻi ai ʻetau ʻofa ki he ngaahi tuʻunga ʻa Sihová.

4. Ko e hā ʻa e fakakaukau hala ʻoku maʻu ʻe he tokolahi fekauʻaki mo e māʻoniʻoní?

⁴ ʻI he taimi ʻoku fakakaukau ai ʻa e kakaí ki ha tokotaha māʻoniʻoni, ko e tokolahi ʻoku nau fakakaukau nai ki ha tokotaha ʻafungi, faifakamaau pe māʻoniʻoni-fakaekita. Ka ʻoku ʻikai ʻaupito saiʻia ʻa e ʻOtuá ʻi he ngaahi ʻulungaanga ko iá. ʻI he taimi naʻe ʻi māmani ai ʻa Sīsuú, naʻá ne fakaangaʻi mālohi ʻa e kau taki lotu ʻi hono ʻahó ʻi hono faʻu pē ʻenau ngaahi tuʻunga ki he māʻoniʻoní. (Tml. 7:16; Luke 16:15) Ko e māʻoniʻoni moʻoní ʻoku ʻikai ʻaupito haʻane tatau mo e māʻoniʻoni-fakaekitá.

5. Fakatatau ki he Tohi Tapú, ko e hā ʻa e māʻoniʻoni? ʻOmai ha fakatātā.

⁵ Ko e māʻoniʻoní ko ha ʻulungaanga fakaʻofoʻofa. Ko hono ʻai mahinó, ʻoku ʻuhinga ia ki hono fai ʻa e meʻa totonú ʻi he vakai ʻa Sihova ko e ʻOtuá. ʻI he Tohi Tapú, ko e foʻi lea ki he “māʻoniʻoní” ʻoku fakahaaʻi ai ʻa e fakakaukau ʻo e moʻuiʻaki ʻa e ngaahi tuʻunga māʻolunga tahá​—ʻa e ngaahi tuʻunga ʻa Sihová. Ko e fakatātaá, naʻe tuʻutuʻuni ʻe Sihova ʻoku totonu ki he kau mēsianití ke nau ngāueʻaki ha “meʻa fakamamafa ʻoku . . . faitotonu.” (Teu. 25:15) Ko e muʻaki foʻi lea faka-Hepelū naʻe liliu ko e “faitotonu” ʻe lava ke toe liliu ia ko e “māʻoniʻoni.” Ko ia ko ha Kalisitiane ʻokú ne loto ke hoko ʻo māʻoniʻoni ʻi he vakai ʻa e ʻOtuá ʻe fiemaʻu ke ne faitotonu fakaʻaufuli ʻi he kotoa ʻene ngaahi ngāue fakapisinisí. Ko ha tangata māʻoniʻoni ʻokú ne ʻofa foki ʻi he fakamaau totonú​—ʻokú ne fehiʻa ke sio ki hono fai ha fakafeangai taʻetotonu ki ha taha. Pea “koeʻuhí ke fakahōifuaʻi kakato” ʻa Sihova, ko ha tokotaha ʻoku māʻoniʻoni moʻoni ʻokú ne fakakaukau ki he anga ʻEne vakai mai ki he ngaahi fili te ne faí.​—Kol. 1:10.

6. Ko e hā ʻoku lava ke tau falala pau ai ki he ngaahi tuʻunga ʻa Sihova ki he tonú mo e halá? (ʻAisea 55:8, 9)

⁶ ʻOku fakamatalaʻi ʻe he Tohi Tapú ʻa Sihova ko e Matavai ia ʻo e māʻoniʻoní. ʻI he ʻuhinga ko iá, ʻoku ui ia ko e “nofoʻanga ʻo e māʻoniʻoní.” (Sel. 50:7) ʻI he tuʻunga ko e Tokotaha-Fakatupú, ko Sihova toko taha pē ʻokú ne maʻu ʻa e totonu ke fokotuʻu ʻa e ngaahi tuʻunga ki he tonú mo e halá. Koeʻuhi ʻoku haohaoa ʻa Sihova, ko ʻene ongoʻi ki he meʻa ʻoku tonú mo e meʻa ʻoku halá ʻoku māʻolunga mamaʻo ange ia ʻi heʻetau vakaí tonu, ʻa ia ʻoku faʻa tākiekina ʻe heʻetau taʻehaohaoá mo e angahalá. (Pal. 14:12; lau ʻa e ʻAisea 55:8, 9.) Neongo ia, koeʻuhi naʻe ngaohi kitautolu ʻi he ʻīmisi ʻo e ʻOtuá, ʻoku malava ke tau moʻui ʻo fehoanaki mo ʻene ngaahi tuʻunga māʻoniʻoní. (Sēn. 1:27) Pea ʻoku tau saiʻia ke fai pehē. Ko ʻetau ʻofa ki heʻetau Tamaí ʻokú ne ueʻi kitautolu ke faʻifaʻitaki kiate ia ʻi he lelei taha ʻo ʻetau malavá.​—ʻEf. 5:1.

7. Ko e hā ʻoku tau fiemaʻu ai ʻa e ngaahi tuʻunga falalaʻangá? Fakatātaaʻi.

⁷ ʻOku tau maʻu ʻaonga mei he pīkitai ki he ngaahi tuʻunga ʻa Sihova ki he tonú mo e halá. ʻOku lava ke ke sio ki hono ʻuhingá? Sioloto atu ki he meʻa ʻe hoko kapau ko e pangikē kotoa ʻoku nau faʻu pē ʻenau ngaahi tuʻunga ki hono fakapapauʻi ʻa e mahuʻinga ʻo e paʻangá pe ko e kautaha langa taki taha ʻoku nau fokotuʻu pē ʻenau ngaahi tuʻunga ki he ngaahi fua ʻoku nau ngāueʻakí. ʻE tupu mei ai ʻa e palopalema lahi. Pea kapau heʻikai muimui ʻa e kau ngāue fakafaitoʻó  ki he ngaahi tuʻunga pau ki hono tokangaʻi ʻa e kau mahakí, ʻe mate nai ʻa e niʻihi. Ko e moʻoni, ko e ngaahi tuʻunga falalaʻangá ʻoku hoko ko ha maluʻi. ʻI he tuʻunga meimei tatau, ko e ngaahi tuʻunga ʻa e ʻOtuá ki he tonú mo e halá ʻokú ne maluʻi kitautolu.

8. Ko e hā ʻa e ngaahi tāpuaki ʻoku fakatatali mai ki he faʻahinga ʻoku nau saiʻia ke fai ʻa e meʻa ʻoku totonú?

⁸ ʻOku tāpuakiʻi ʻe Sihova ʻa e faʻahinga ʻoku nau feinga ke moʻui ʻo fehoanaki mo ʻene ngaahi tuʻungá. ʻOkú ne talaʻofa: “Ko e kau māʻoniʻoní te nau maʻu ʻa e māmaní, pea te nau nofo ai ʻo taʻengata.” (Saame 37:29) ʻE lava ke ke sioloto atu ki he hoko ʻa e faʻahinga ʻo e tangatá ʻo fāʻūtaha, melino mo fiefia ʻi he taimi ʻe muimui ai ʻa e tokotaha kotoa ki he ngaahi tuʻunga ʻa Sihová? ʻOku loto ʻa Sihova ke ke fiefia ʻi he moʻui ko iá. Ko e moʻoni, ko kitautolu taki taha ʻoku tau maʻu ʻa e ngaahi ʻuhinga lelei ke ʻofa ʻi he māʻoniʻoní! ʻE lava fēfē ke tau fakaivimālohiʻi ʻetau ʻofa ki he ʻulungaanga ko ení? Tau lāulea angé ki ha sitepu ʻe tolu ʻe lava ke tau fou ai.

9. Ko e hā te ne tokoniʻi kitautolu ke ʻofa ʻi he māʻoniʻoní?

⁹ Sitepu 1: ʻOfa ki he Tokotaha ʻokú ne fokotuʻu ʻa e ngaahi tuʻungá. Ke ʻofa ʻi he māʻoniʻoní, ʻoku fiemaʻu ke tau fakatupulekina ʻetau ʻofa ki he Tokotaha ʻokú ne fokotuʻu ʻa e ngaahi tuʻunga ki he tonú mo e halá. Ko e lahi ange ʻetau ʻofa kia Sihová, ko e lahi ange ia ʻetau loto ke moʻui ʻo fehoanaki mo ʻene ngaahi tuʻunga māʻoniʻoní. Ke fakatātaaʻí: Kapau naʻe ʻofa ʻa ʻĀtama mo ʻIvi kia Sihova, heʻikai ʻaupito te na talangataʻa ki heʻene lao fakamaau totonú.​—Sēn. 3:1-6, 16-19.

10. Ko e hā naʻe fai ʻe ʻĒpalahame ke mahinoʻi lelei ange ai ʻa e fakakaukau ʻa Sihová?

¹⁰ Ko hono moʻoní ʻoku ʻikai ke tau loto ke fai ʻa e fehālaaki tatau mo ia naʻe fai ʻe ʻĀtama mo ʻIví. ʻE lava ke tau fakaʻehiʻehi mei hono fai ʻa e meʻa tatau kapau te tau hanganaki ako fekauʻaki mo Sihova, houngaʻia ʻi hono ngaahi ʻulungāngá, pea feinga ke mahinoʻi ʻa e anga ʻene fakakaukaú. ʻI heʻetau fai iá, ko ʻetau ʻofa kia Sihová ʻe tupulaki moʻoni. Fakakaukau kia ʻĒpalahame. Naʻá ne ʻofa moʻoni kia Sihova. Naʻa mo e taimi naʻe faingataʻa ai ke mahinoʻi ʻe ʻĒpalahame ʻa e ngaahi fili ʻa Sihová, naʻe ʻikai ke ne angatuʻu. ʻI hono kehé, naʻá ne feinga ke ʻiloʻi lelei ange ʻa Sihova. Ko e fakatātaá, ʻi hono ʻiloʻi ʻe ʻĒpalahame ʻa e fili ʻa Sihova ke fakaʻauha ʻa Sōtoma mo Komolá, ʻi he kamatá naʻá ne ilifia naʻa tafiʻi atu ʻe he “Fakamaau ʻo māmaní kotoa” ʻa e māʻoniʻoní fakataha mo e fulikivanú. Ka naʻe fakakaukau atu ʻa ʻĒpalahame naʻe hā ngali taʻemalava ke fai peheni ʻa e ʻOtuá, ko ia naʻá ne ʻeke anga-fakatōkilalo kia Sihova ha ngaahi fehuʻi hokohoko. Naʻe tali anga-kātaki ʻe Sihova ʻene ngaahi fehuʻí. Fakaʻosí, naʻe ʻiloʻi ʻe ʻĒpalahame ʻoku sivi ʻe Sihova ʻa e loto ʻo e tangata kotoa pē pea ʻoku ʻikai ʻaupito ke Ne tauteaʻi ʻa e tonuhiá fakataha mo e halaiá.​—Sēn. 18:20-32.

11. Naʻe anga-fēfē hono fakahāhā ʻe ʻĒpalahame naʻá ne ʻofa kia Sihova pea falala kiate Iá?

¹¹ Naʻe maongo loloto kia ʻĒpalahame ʻene fetalanoaʻaki mo Sihova fekauʻaki mo Sōtoma mo Komolá. ʻOku ʻikai ha veiveiua naʻe toe lahi ange ai ʻene ʻofa mo e fakaʻapaʻapa ki heʻene Tamaí. ʻI he ngaahi taʻu ki mui aí, ko e malava ʻa ʻĒpalahame ke falala kia Sihová naʻe ʻahiʻahiʻi lahi. Naʻe kole ange ʻe Sihova ke ne feilaulauʻi hono foha ʻofeina pē taha ko ʻAisaké. Ka ʻi he taimi ko ení naʻe maheni lelei ange ʻa ʻĒpalahame mo hono ʻOtuá, ko ia naʻe ʻikai ke ne toe ʻeke ha fehuʻi kiate Ia. Naʻe fakapapauʻi pē ʻe ʻĒpalahame ke ne fai ʻa e meʻa naʻe kole ange ʻe Sihova ke ne faí. Neongo ia, sioloto atu ki he mātuʻaki fakamamahi kiate ia ʻene teuteu atu ke fakahoko ʻa e ngāué ni! Kuo pau pē naʻe fakakaukau lahi ʻa ʻĒpalahame ki he meʻa kuó ne ako fekauʻaki mo Sihová. Naʻá ne ʻiloʻi heʻikai ʻaupito fai ʻe Sihova ha meʻa ʻoku taʻemāʻoniʻoni pe taʻeʻofa. Fakatatau ki he ʻapositolo ko Paulá, naʻe ʻiloʻi ʻe ʻĒpalahame ʻe malava ʻe Sihova ke ne fokotuʻu  mai ʻa hono foha ʻofeina ko ʻAisaké. (Hep. 11:17-19) He ko ē, naʻe talaʻofa ʻe Sihova ko ʻAisake te ne hoko ko ha tamai ʻo ha puleʻanga, pea ʻi he taimi ko iá, naʻe teʻeki ʻi ai ha fānau ʻa ʻAisake. Naʻe ʻofa ʻa ʻĒpalahame kia Sihova, ko ia naʻá ne falala ki heʻene Tamaí te ne māʻoniʻoni ʻi heʻene tōʻongá. ʻI he tuí naʻá ne talangofua, neongo naʻe faingataʻa.​—Sēn. 22:1-12.

12. ʻE lava fēfē ke tau faʻifaʻitaki kia ʻĒpalahame? (Saame 73:28)

¹² ʻE lava fēfē ke tau faʻifaʻitaki kia ʻĒpalahame? Hangē ko iá, ʻoku fiemaʻu ke hokohoko atu ʻetau ako fekauʻaki mo Sihová. ʻI heʻetau fai peheé, te tau ʻunuʻunu ofi ange ai kiate ia pea ʻofa lahi ange kiate ia. (Lau ʻa e Saame 73:28.) ʻE akoʻi ai hotau konisēnisí ke tapua atu ʻa e fakakaukau ʻa e ʻOtuá. (Hep. 5:14) Ko hono olá, ʻi he taimi ʻoku feinga ai ha taha ke fakataueleʻi kitautolu ke fai ha meʻa ʻoku hala, te tau fakafisingaʻi ia. Te tau fehiʻa moʻoni ʻi he fakakaukau atu ke fai ha meʻa pē te ne fakamamahiʻi ʻetau Tamaí pea ʻe maumauʻi ai hotau vahaʻangatae mo iá. Ka ko e hā ha toe founga ʻe lava ke tau fakahāhā ai ʻoku tau ʻofa ʻi he māʻoniʻoní?

13. ʻE lava fēfē ke tau tuli ki he māʻoniʻoní? (Palōveepi 15:9)

¹³ Sitepu 2: Ngāue ke fakatupulekina ʻa e ʻofa ki he māʻoniʻoní ʻi he ʻaho taki taha. ʻE lava ke tau fakatupulekina ʻa e ʻofa ki he ngaahi tuʻunga māʻoniʻoni ʻa Sihová fakafou ʻi he feinga hokohoko mo tuʻu maʻu, ʻo hangē pē ko ʻetau feinga ke ʻai ke mālohi hotau uouá. Ko e ngāue ko ení ʻe lava ke ke fai fakaʻaho ia. Ko Sihová ʻokú ne fakaʻatuʻi, pea ʻoku ʻikai ʻaupito ke ne ʻamanekina mai ke tau fai ʻa e meʻa lahi ange ʻi he meʻa ʻoku tau malavá. (Saame 103:14) ʻOkú ne fakapapauʻi mai “ʻokú ne ʻofa ʻi he tokotaha ʻoku tuli ki he māʻoniʻoní.” (Lau ʻa e Palōveepi 15:9.) Kapau ʻoku tau tuli ki ha taumuʻa pau ʻi he ngāue ʻa Sihová, ʻoku tau feinga mālohi ke aʻusia ia. ʻOku pehē pē mo e taimi ʻoku tau tuli ai ki he māʻoniʻoní. Pea ʻe tokoniʻi anga-kātaki kitautolu ʻe Sihova ke fai ha fakalakalaka ʻi he faai atu ʻa e taimí.​—Saame 84:5, 7.

14. Ko e hā ʻa e “sifa-fatafata ko e māʻoniʻoní,” pea ko e hā ʻoku tau fiemaʻu ai iá?

¹⁴ ʻOku fakamanatu anga-ʻofa mai ʻe Sihova ko e māʻoniʻoní ʻoku ʻikai ke fakamafasia. (1 Sio. 5:3) ʻI hono kehé, ʻoku hoko ia ko ha maluʻi,  ko ha meʻa ʻoku tau fiemaʻu ʻi he ʻaho kotoa. Manatuʻi ʻa e teunga tau fakalaumālie naʻe fakamatalaʻi ʻe he ʻapositolo ko Paulá. (ʻEf. 6:14-18) Ko e konga fē ʻo e teungá naʻá ne maluʻi ʻa e loto ʻo e sōtiá? Ko e “sifa-fatafata ko e māʻoniʻoní” ʻa ia ʻokú ne fakafofongaʻi ʻa e ngaahi tuʻunga māʻoniʻoni ʻa Sihová. Hangē pē ko hono maluʻi ʻe ha sifa-fatafata ʻa e mafú, ʻoku pehē pē mo e ngaahi tuʻunga māʻoniʻoni ʻa Sihová ʻoku lava ke ne maluʻi ho lotó, ʻa ho tangata ʻi lotó. Ko ia ai, fakapapauʻi leva ko ho teunga taú ʻoku kau ai ʻa e sifa-fatafata ko e māʻoniʻoní!​—Pal. 4:23.

15. ʻE lava fēfē ke ke tui ʻa e sifa-fatafata ko e māʻoniʻoní?

¹⁵ ʻE lava fēfē ke ke tui ʻa e sifa-fatafata ko e māʻoniʻoní? ʻE lava ke ke fai ia ʻaki ʻa e fakakaukau ki he ngaahi tuʻunga ʻa e ʻOtuá ʻi he ngaahi fili ʻokú ke fai ʻi he ʻaho kotoa. ʻI he fili fekauʻaki mo e meʻa ke talanoa ki aí, fasi ke fanongo ki aí, fakafiefia ke sio aí pe ko e ʻū tohi ke laú, ʻuluaki ʻeke hifo: ‘Ko e hā te u fafangaʻaki hoku lotó? ʻE fakahōifua nai ʻa e fakamatala ko ení kia Sihova? Pe ʻoku pouaki ai ʻa e ʻulungaanga taʻetāú, fakamālohí, mānumanú, siokitá​—ʻa e ngaahi meʻa ʻoku vakai ki ai ʻa Sihova ʻoku taʻemāʻoniʻoní?’ (Fil. 4:8) Kapau ko e ngaahi fili ʻokú ke faí ʻoku fehoanaki mo e finangalo ʻo Sihová, te ke fakaʻatā ai ʻene ngaahi tuʻunga māʻoniʻoní ke ne maluʻi ho lotó.

16-17. ʻOku anga-fēfē hono fakapapauʻi mai ʻi he ʻAisea 48:18 ʻe lava ke tau moʻuiʻaki ʻa e ngaahi tuʻunga ʻa Sihová ʻo taʻengata?

¹⁶ Kuo faifai ange peá ke hohaʻa pe ʻe lava ke ke moʻuiʻaki ai pē ʻa e ngaahi tuʻunga māʻoniʻoni ʻa Sihová ʻi he ʻaho ki he ʻaho mo e taʻu ki he taʻu? Fakakaukau ki ha talanoa fakatātā ʻoku ngāueʻaki ʻe Sihova, ʻoku maʻu ʻi he ʻAisea 48:18. (Lau.) ʻOku talaʻofa ʻe Sihova ko ʻetau māʻoniʻoní ʻe lava ke “hangē ko e ngaahi peau ʻo e tahí.” Sioloto atu ʻokú ke tuʻu ʻi ha fuʻu matātahi, ʻo sio atu ki he vilo hokohoko mai ʻa e peaú. ʻI he ʻātakai nonga ko iá, te ke hohaʻa naʻa ʻi ai ha ʻaho heʻikai ke toe fasi mai ai ʻa e ngaahi foʻi peaú? ʻIkai! ʻOkú ke ʻiloʻi ko e taʻu ē ʻe laui afe ʻa e fasi ʻa e ngaahi peaú ʻi he matātahi ko iá, pea ʻe pehē ai pē ʻo laui kuonga.

¹⁷ Ko hoʻo māʻoniʻoní ʻe lava ke hangē tofu pē ko e ngaahi peau ʻo e tahí! Anga-fēfē? ʻI he taimi ʻokú ke fai ai ha fili, ʻuluaki fakakaukau ki he meʻa ʻoku loto ʻa Sihova ke ke faí. Pea fai leva ia. Neongo pe ʻoku faingataʻa fēfē ʻa e filí, ko hoʻo Tamai ʻofá te ne ʻi ai maʻu pē ke tokoniʻi koe ke nofoʻaki tuʻu maʻu pea ke ke moʻui ʻi he ʻaho taki taha ʻo fakatatau ki Heʻene ngaahi tuʻunga māʻoniʻoní.​—ʻAi. 40:29-31.

18. Ko e hā kuo pau ai ke tau fakaʻehiʻehi mei hono fakamāuʻi ʻa e niʻihi kehé ʻaki ʻetau ngaahi tuʻungá tonu?

¹⁸ Sitepu 3: Tuku ʻa e faifakamāú kia Sihova. Lolotonga ʻetau feinga mālohi ke moʻuiʻaki ʻa e ngaahi tuʻunga māʻoniʻoni ʻa Sihová, kuo pau ke tau fakaʻehiʻehi mei hono fakamāuʻi ʻa e niʻihi kehé pea hoko ʻo māʻoniʻoni-fakaekitá. ʻI he ʻikai ke siolalo ki he niʻihi kehé ʻo hangē ʻoku tau maʻu ʻa e totonu ke fakamāuʻi kinautolu ʻo makatuʻunga ʻi heʻetau ngaahi tuʻungá tonu, ʻoku tau manatuʻi ko Sihova ʻa e “Fakamaau ʻo māmaní kotoa.” (Sēn. 18:25) Kuo ʻikai ke tuku mai ʻe Sihova ʻa e faifakamāú kiate kitautolu. Ko hono moʻoní, ʻoku fekau mai ʻe Sīsū: “Tuku hoʻomou faifakamāú koeʻuhi ke ʻoua naʻa fakamāuʻi ai kimoutolu.”​—Māt. 7:1. *

19. Naʻe anga-fēfē hono fakahāhā ʻe Siosifa naʻá ne falala ki he fakamaau ʻa Sihová?

¹⁹ Tau toe fakakaukau angé ki he faʻifaʻitakiʻanga ʻa e tangata māʻoniʻoni ko Siosifá. Naʻá ne fakaʻehiʻehi mei hono fakamāuʻi ʻa e niʻihi kehé, naʻa mo e faʻahinga naʻa nau ngaohikovia iá. Naʻe ʻohofi ʻa Siosifa ʻe hono fanga tokouá tonu,  fakatau atu ia ko ha pōpula pea fakalotoʻi ʻenau tamaí kuó ne mate. ʻI ha ngaahi taʻu ki mui ai, naʻe toe fakataha ʻa Siosifa mo hono fāmilí. ʻI he taimi ko iá, naʻe hoko ʻa Siosifa ko ha taki māʻolunga he fonuá, naʻe mei lava ke ne fakamāuʻi kakaha hono fanga tokouá pea fai ha sāuni. Naʻe ilifia hono fanga tokouá naʻa fai nai ʻe Siosifa ʻa e meʻa tofu pē ko iá, neongo naʻa nau fakatomala loto-moʻoni ʻi he meʻa naʻa nau faí. Ka naʻe fakapapauʻi ange ʻe Siosifa: “ʻOua ʻe ilifiá. ʻOku ou fetongi koā ʻe au ʻa e ʻOtuá?” (Sēn. 37:18-20, 27, 28, 31-35; 50:15-21) Naʻe tuku anga-fakatōkilalo ʻe Siosifa ʻa e faifakamāú kia Sihova.

20-21. ʻE lava fēfē ke tau fakaʻehiʻehi mei he hoko ʻo māʻoniʻoni-fakaekitá?

²⁰ Hangē ko Siosifá, ʻoku tau tuku ʻa e faifakamāú kia Sihova. Ko e fakatātaá, ʻoku ʻikai ke tau fakahuʻunga ʻoku tau ʻiloʻi ʻa e fakaueʻiloto ki he tōʻonga ʻa hotau fanga tokouá mo e fanga tuofāfiné. ʻOku ʻikai lava ke tau sio ki he lotó; ko Sihova pē ʻokú ne “sivi . . . ʻa e ngaahi fakaueʻilotó.” (Pal. 16:2) ʻOkú ne ʻofa ʻi he faʻahinga kakai kotoa pē, mei he ngaahi puipuituʻa mo e anga fakafonua kehekehe. Pea ʻoku fakalototoʻaʻi kitautolu ʻe Sihova ke “mātuʻaki fakaava atu [hotau] lotó.” (2 Kol. 6:13) ʻOku tau feinga ke ʻofa ki he kotoa ʻi hotau fāmili fakalaumālié, ʻo ʻoua ʻe fakamāuʻi kinautolu.

²¹ ʻOku toe ʻuhinga foki eni ke ʻoua te tau fakamāuʻi ʻa e faʻahinga ʻi tuʻa ʻi he fakatahaʻangá. (1 Tīm. 2:3, 4) Te ke fakamāuʻi ha kāinga ʻoku ʻikai ke tui tatau mo koe, ʻo pehē, “Ko e tangata ko iá heʻikai ʻaupito ke haʻu ia ki he moʻoní”? ʻIkai, ʻe hoko ia ko ha ʻafungi mo e māʻoniʻoni-fakaekita. ʻOku kei ʻoange pē ʻe Sihova “ki he kakai ʻi he feituʻu kotoa pē” ha faingamālie ke nau fakatomala. (Ngā. 17:30) Manatuʻi maʻu pē ko e māʻoniʻoni-fakaekitá ko ha founga ia ʻo e taʻemāʻoniʻoní.

22. Ko e hā ʻokú ke fakapapauʻi ai ke ʻofa ʻi he māʻoniʻoní?

²² ʻOfa ke pouaki ʻe heʻetau ʻofa ʻi he ngaahi tuʻunga māʻoniʻoni ʻa Sihová ʻa e fiefiá pea fakaivia ʻa e niʻihi kehé, ʻo tokoniʻi kinautolu ke nau ʻunuʻunu ofi mai kiate kitautolu pea ki hotau ʻOtuá. ʻOfa ke ʻoua ʻaupito ʻe tuku ʻetau “fiekaia mo fieinua ki he māʻoniʻoní.” (Māt. 5:6) Hoko ʻo fakapapauʻi ʻoku ʻafioʻi ʻe Sihova hoʻo ngaahi feingá pea ʻokú ne fiefia maʻu pē ʻi hoʻo fakalakalaká. ʻI he fakaʻaʻau ke toe fonu ange ʻa e māmani ko ení ʻi he taʻemāʻoniʻoní, hoko ʻo fiemālie! Manatuʻi maʻu pē ʻoku “ʻofa ʻa Sihova ʻi he māʻoniʻoní.”​—Saame 146:8.