Ko e fakalea faka-Hepeluú ‘oku lava ke toe ‘i ai hono ngaahi ‘uhinga. ‘I hono lea‘aki iá, ko e ngaahi me‘a tefito ko ení ‘oku tokoni‘i ai kitautolu ke tau mahino‘i ‘a e fakakaukau totonú:

1. Fakakaukau ki he toenga ‘o e sāmé. Ko e ngāue‘aki ‘o e “pea” ‘i he veesi 12 ‘oku ‘uhinga iá ko e ngaahi tāpuaki ‘oku hoko atu ‘i he veesi 12 ki he 14 ‘oku mahino‘i ko e ‘uhinga ia ki he kau mā‘oni‘oní​—‘a e fa‘ahinga ‘oku nau kole ke ‘fakahaofi pea fakamo‘ui’ kinautolu mei he kau fulikivanú (veesi 11). ‘Oku toe tapua atu ‘a e fakakaukau ko ení ‘i he veesi 15, ‘a ia ‘i he‘ene ‘asi tu‘o ua ai ‘a e fo‘i lea “fiefia ē” ‘oku ‘uhinga iá ki he kakai tatau​—ko e fa‘ahinga “‘a ia ko honau ‘Otuá ‘a Sihová!”

2. Ko e mahino ko ení ‘oku fehoanakimālie ia mo e ngaahi kupu kehe ‘i he Tohi Tapú ‘oku tala‘ofa mai ai ‘a e ngaahi tāpuaki faka‘otua ki he kakai faitōnunga ‘a e ‘Otuá. Ko e saame ko ení ‘oku fakahaa‘i ai ‘a e ‘amanaki makatu‘unga lelei ‘a Tēvita ‘i he hili hono fakahaofi ‘e he ‘Otuá ‘a ‘Isileli mei hono ngaahi filí, te Ne tāpuaki‘i ‘a e kakaí ‘aki ‘a e fiefia mo e lakalakaimonū. (Liv. 26: 9, 10; Teu. 7: 13; Saame 128: 1-6) Ko e fakatātaá, ‘oku fakahaa‘i ‘i he Teutalōnome 28:4: “‘E tāpuekina ‘a ho‘o fānaú mo e fua ‘o ho kelekelé mo e ‘uhiki ‘o ho‘o fanga manú, ‘a ho‘o ‘uhiki‘i pulú mo e sipí.” Ko e mo‘oni, lolotonga ‘a e pule ‘a e foha ‘o Tēvita ko Solomoné, na‘e ma‘u ai ‘e he pule‘angá ‘a e melino mo e lakalakaimonū ta‘ehanotatau. Ko e toe me‘a ‘e taha, ko e ngaahi tafa‘aki ‘o e pule ‘a Solomoné ‘oku fakahaa‘i ai ‘a e pule ‘a e Mīsaiá.​—1 Tu‘i 4:20, 231; Saame 72:1-20.

3. ‘I he fakamulitukú, ko e mahino ko eni fekau‘aki mo e Saame 144 ‘oku ‘ai ai ‘a e sāmé fakakātoa ke hā mahino lelei ange ai ‘a e ‘amanaki kuo fuoloa hono koloa‘aki ‘e he kau sevāniti ‘a Sihová​—ko e tautea‘i faka‘otua ‘o e fulikivanú pea hoko atu ai ‘a e fokotu‘u ma‘u ‘o e melino mo e lakalakaimonū tu‘uloa ki he mā‘oni‘oní.​—Saame 37:10, 11.