KUO faifai ange peá ke ongoʻi naʻe pau ke ke fehangahangai toko taha mo hoʻo ngaahi palopalemá? ʻOku tau lolotonga moʻui ʻi he “ngaahi taimi fakalilifu ʻa ia ʻe faingataʻa ke fekuki mo ia” ʻa ia ʻe lava ke ne ʻai ke tau ongoʻi loto-siʻi mo tuēnoa. (2 Tīm. 3:1) Kae kehe, ʻoku ʻikai fiemaʻu ia ke tau fekuki toko taha pē mo e ngaahi pole ʻi he moʻuí. ʻOku fakamamafaʻi ʻe he Tohi Tapú ʻa e mahuʻinga ʻo hono maʻu ha ngaahi kaumeʻa moʻoni ʻi he “taimi faingataʻá.”—Pal. 17:17.

Naʻe maʻu ʻaonga ʻa e ʻapositolo ko Paulá mei he kaungāmeʻa mo hono ngaahi kaungāfonongá. (Kol. 4:​7-11) ʻI he tuku pilīsone ʻa Paula ʻi Lomá, ko hono ngaahi kaungāmeʻá naʻa nau fakahoko ʻa e ngaahi ngāue naʻe ʻikai malava ke fai ʻe Paulá. Ko e fakatātaá, naʻe tokonaki ʻe ʻEpafalotaito kia Paula ʻa e ngaahi meʻa naʻá ne fiemaʻú ʻa ia naʻe ʻomai mei he fanga tokoua mo e fanga tuofāfine ʻi Filipaí. (Fil. 4:18) Naʻe ʻave ʻe Tikiko ʻa e ngaahi faitohi ʻa Paulá ki he ngaahi fakatahaʻanga kehekehe. (Kol. 4:7) ʻI he poupou ʻa e ngaahi kaungāmeʻa ʻo Paulá, naʻá ne fakahoko ʻene ngāue fakafaifekaú neongo hono tuku pōpula ia ʻi ha falé pe fakamavaheʻi ʻi he pilīsoné. ʻE lava fēfē ke ke hoko ko ha kaumeʻa moʻoni ʻi he ʻahó ni?

ʻOku fakahaaʻi ʻe he ngaahi faʻifaʻitakiʻanga ʻi onopōní ʻa e mahuʻinga ʻo e hoko ko ha kaumeʻa moʻoni. Fakakaukau angé ki ha tuofefine ʻa ia naʻá ne hoko moʻoni ko ha kaumeʻa ʻo Elisabet, ko ha tāimuʻa tuʻumaʻu ʻi Sipeini. ʻI hono ʻiloʻi naʻe kanisā ʻene faʻeé, naʻe ʻave ʻe he tuofefiné kia Elisabet ha ngaahi pōpoaki fakalototoʻa makatuʻunga ʻi he ngaahi veesi Tohi Tapú. “Ko e ngaahi pōpoaki ko ení,” ko e lea ia ʻa Elisabet, “naʻá ne fakaivia au ke u fehangahangai mo e ʻaho taki taha ʻo ʻikai ha ongoʻi tuēnoa.”—Pal. 18:24.

ʻE lava ke tau fakaivimālohiʻi ʻetau kaumeʻa mo e ngaahi kaungātuí ʻaki hono poupouʻi kinautolu ʻi he ngaahi ngāue ʻa e fakatahaʻangá. Ko e fakatātaá, ʻe lava ke ke tala ange ki ha tokoua pe tuofefine taʻumotuʻa te ke ʻave ia ki he fakatahá pe ʻi he ngāue fakafaifekaú? Kapau te ke fai pehē, ʻe ngalingali ange te ke maʻu ai ha fefakalototoʻaʻaki. (Loma 1:12) Kae kehe, ko e kau Kalisitiane ʻe niʻihi ʻoku ʻikai lava ke nau mavahe mei honau ʻapí. ʻE lava fēfē ke tau hoko ko ha kaumeʻa moʻoni kiate kinautolu?

Ko e niʻihi ʻo e ngaahi kaungātuí ʻoku nau mahamahaki pe ʻoku ʻi ai ʻa e ngaahi tuʻunga kehe ʻokú ne taʻofi kinautolu mei hono maʻu ʻa e fakatahá mata ki he mata. Fakakaukau angé ki he faʻifaʻitakiʻanga ʻa David, ʻa ia naʻe maʻu ʻe he kanisā ʻo e lamá. Naʻe faitoʻo kimo ia ʻo laka hake ʻi he māhina ʻe ono. ʻI he lolotonga ʻa e faitoʻó, ko David mo hono uaifí, ʻa Lidia, naʻá na maʻu ʻa e fakatahá fakafou ʻi he ʻinitanetí.

Ko e hā ʻa e poupou naʻá na maʻu mei hona ngaahi kaungāmeʻa ʻi he fakatahaʻangá? ʻI he hili ʻa e fakataha taki taha, ko e niʻihi ʻi he Fale Fakatahaʻangá te nau feinga ke talanoa kia David mo Lidia fakafou ʻi he tā vitioó. ʻIkai ko ia pē, ʻi he taimi naʻe tali ai ʻa  David mo Lidia, naʻá na maʻu ki mui ai ha ngaahi pōpoaki fakalototoʻa mei he ngaahi kaungātuí. Ko e hā ʻa e olá? Naʻe siʻisiʻi ange ai ʻa e ongoʻi tuēnoa ʻa David mo Lidia.

ʻE lava ke tau fakakau ʻa e faʻahinga ʻoku toka mohengá ʻi heʻetau ngāue fakafaifekaú? ʻI hono fai ha fanga kiʻi feʻunuʻaki, ʻe lava ke tau fakahāhā ai ʻoku ʻikai ke ngalo ʻiate kitautolu ʻa e faʻahinga ʻoku fehangahangai mo e ngaahi fakangatangata peheé. (Pal. 3:27) Fēfē ke ke vaheʻi ha kiʻi taimi ke faifakamoʻoni mo kinautolu fakafou ʻi he faitohí pe telefoní? Ko e faʻahinga ʻoku toka mohengá ʻe lava nai ke nau kau ki he ngaahi fakataha malangá fakafou ʻi he tā vitioó. Ko David mo Lidia naʻá na houngaʻia ʻi he fokotuʻutuʻu ko ení. ʻOku fakamatala ʻa David, “Naʻa mo e kau fakataha pē mo ʻemau kulupu malangá ʻi ha fetalanoaʻaki nounou mo ha lotu naʻe mātuʻaki fakalototoʻa ia kiate kimaua.” ʻIkai ngata aí, kapau ʻoku malu mo feʻungamālie ʻa e ngaahi tuʻungá ke ke fai pehē, ʻe lava ke ke fokotuʻutuʻu ke ʻave ha ako Tohi Tapu ki he ʻapi ʻo ha tokotaha malanga ʻoku toka mohenga ke fakahoko ai ʻa e akó mei he taimi ki he taimi?

ʻI heʻetau ngāue fakataha mo hotau fanga tokoua mo e fanga tuofāfine ʻoku toka mohengá pea sio tonu ʻi honau ngaahi ʻulungaanga leleí, ʻoku tau toe vāofi ange mo kinautolu. Ko e fakatātaá, ʻi hoʻo kau fakataha mo e kau malanga peheé ʻi he ngāue fakafaifekaú peá ke fakatokangaʻi ʻa e founga ʻoku nau ngāueʻaki pōtoʻi ai ʻa e Folofola ʻa e ʻOtuá ke aʻu ki he loto ʻo ha tokotaha, ʻoku ngalingali ʻokú ke toe ongoʻi ofi ange kiate kinautolu. ʻI hoʻo poupou ki he kaungātuí ʻi he ngaahi ngāue fakalaumālié, ʻe toe fakalahi ange ai ho ngaahi kaungāmeʻá.—2 Kol. 6:13.

Naʻe maʻu ʻe Paula ʻa e fakafiemālie ʻi he lava atu hono kaumeʻa ko Taitusí. (2 Kol. 7:​5-7) Ko e fakamatala ko ʻení ʻokú ne fakamanatu mai kiate kitautolu ʻe lava ke tau tokonaki ʻa e fakafiemālié ʻo ʻikai ngata pē ʻi hono fakahāhā ʻa e kaungāongoʻi ki he faʻahinga ʻoku fiemaʻu tokoní kae toe pehē foki ki he ʻi ai fakataha mo kinautolu ʻo fai ʻa e meʻa te tau malavá ke poupouʻi kinautolu.—1 Sio. 3:18.

Ko hotau fanga tokoua mo e fanga tuofāfine ʻi Lūsiá kuo nau fokotuʻu ha faʻifaʻitakiʻanga lelei ʻi hono fakahāhā ʻa e fepoupouakí. Fakakaukau angé ki he hokosia ʻa Sergey mo hono uaifí, ʻa Tatyana. Hili hono hua ʻe he kau polisí hona ʻapí, naʻe ʻave kinaua ke fakaʻeke. Naʻe ʻuluaki tuku ange ʻa Tatyana peá ne foki ki ʻapi. ʻOku fakamatala ʻa Sergey: “ʻI he aʻu pē [ʻa Tatyana] ki ʻapí, naʻe aʻu atu ha tuofefine loto-toʻa ki homa ʻapí. Naʻe tokolahi ʻa e ngaahi kaungāmeʻa naʻa nau omi ʻo tokoni ke fakamaau homa ʻapaatimení.”

ʻOku toe pehē ʻe Sergey: “Kuó u saiʻia maʻu pē ʻi he Palōveepi 17:​17, ʻa ia ʻoku pehē ai: ‘Ko ha kaumeʻa moʻoni ʻokú ne ʻofa ʻi he taimi kotoa pē pea ko ha tokoua ia ʻoku fanauʻi mai ki he taimi faingataʻá.’ Naʻe toe mohu ʻuhinga ange ʻa e ngaahi lea ko ení kiate au lolotonga ʻa e taimi ko eni ʻo e fakatangá ʻi he ʻikai ke u lava ʻo fekuki toko taha pē. Kuo tokonaki mai ʻe Sihova ʻa e ngaahi kaumeʻa ʻoku nau tuʻu taʻemanavahē ʻi hoku tafaʻakí.” a

ʻI he fakaʻaʻau ke toe faingataʻa ange ʻa e ngaahi tuʻungá, ʻoku tau fiemaʻu ha ngaahi kaungāmeʻa ke falala ki ai. Te tau fiemaʻu lahi ange kinautolu lolotonga ʻa e fuʻu mamahi lahí. Ko ia tau feinga ʻaki hotau kotoá ke hoko ko ha kaumeʻa moʻoni ʻi he taimí ni!—1 Pita 4:​7, 8.