1. Ko e hā na‘e lea‘aki ‘e Sīsū fekau‘aki mo e ngaahi koloa ‘i hēvaní?

‘OKU ‘ikai lava ke tau sio ki he koloa kotoa pē. Ko hono mo‘oní, ko e ngaahi koloa mahu‘inga tahá ‘oku ‘ikai lava ha sio ki ai. ‘I he Malanga ‘i he Mo‘ungá, na‘e lave ‘a Sīsū ki he ngaahi koloa ‘i hēvaní ‘oku mahulu ange ia ‘i he ngaahi koloa fakamatelié. Pea na‘á ne lave ki he mo‘oni‘i me‘a ko ení: “Ko e feitu‘u ‘oku ‘i ai ho‘o koloá, ‘e ‘i ai foki ho lotó.” (Māt. 6:19-21) ‘E ue‘i kitautolu ‘e hotau lotó ke tuli ki he ngaahi me‘a ‘oku tau koloa‘akí pe fakamahu‘inga‘i lahí. ‘Oku tau “fa‘oaki koloa . . . ‘i hēvani” ‘aki hono ma‘u ha hingoa lelei pe fakahōifua ki he ‘Otuá. Na‘e pehē ‘e Sīsū ko e ngaahi koloa ko iá, he‘ikai ‘aupito ke faka‘auha pe kaiha‘asi.

2. (a) Fakatatau ki he 2 Kolinitō 4:17, 18, ko e hā ‘oku ekinaki mai ‘e Paula ke tau tokangataha ki aí? (e) Ko e hā te tau lāulea ki ai ‘i he kupu ko ení?

² ‘Oku ekinaki mai ‘e he ‘apositolo ko Paulá ke “hanganaki fakahangataha hotau matá . . . ki he ngaahi me‘a ‘oku ta‘ehāmaí.” (Lau ‘a e 2 Kolinitō 4:17, 18.) Ko e ngaahi me‘a ta‘ehāmai ko ení ko e ngaahi koloa ia ‘oku kau ai ‘a e ngaahi tāpuaki te tau ma‘u ‘i he māmani fo‘ou ‘a e ‘Otuá. ‘I he kupu ko ení, te tau sivisivi‘i ai ‘a e koloa ta‘ehāmai ‘e fā ‘oku lava ke tau ma‘u ‘aonga mei ai he taimí ni—ko e kaume‘a mo e ‘Otuá, me‘a‘ofa ‘o e lotú, tokoni ‘a e laumālie mā‘oni‘oni ‘o e ‘Otuá mo e poupou fakahēvani ki he‘etau ngāue fakafaifekaú. Te tau toe lāulea ki he founga ‘e lava ke tau fakahaa‘i ai ‘etau hounga‘ia ‘i he ngaahi koloa ta‘ehāmai ko ení.

3. Ko e hā ‘a e koloa ta‘ehāmai mahu‘inga tahá, pea ‘oku malava fēfē ke tau ma‘u iá?

³ Ko e koloa ta‘ehāmai mahu‘inga tahá ko e kaume‘a mo Sihová. (Saame 25:14) ‘Oku malava fēfē ke kaume‘a ‘a e ‘Otuá mo e fa‘ahinga angahala‘ia ‘o e tangatá pea kei mā‘oni‘oni faka‘aufuli pē? ‘Oku lava ke ne fai pehē koe‘uhí ko e feilaulau huhu‘i ‘a Sīsuú  na‘á ne “‘ave ‘a e angahala ‘a māmaní.” (Sione 1:29) Na‘e tomu‘a ‘ilo‘i ‘e Sihova ko ‘ene taumu‘a ke ‘omai ha Fakamo‘ui ki he fa‘ahinga ‘o e tangatá ‘e lavame‘a. Ko e ‘uhinga ia na‘e malava ai ke kaume‘a ‘a e ‘Otuá mo e fa‘ahinga ‘o e tangata na‘e mo‘ui ki mu‘a ke pekia ‘a Kalaisí.—Loma 3:25.

4. ‘Omai ha fakatātā ‘o e ni‘ihi ‘o e kau tangata ki mu‘a ‘i he kau Kalisitiané ‘a ia na‘a nau kaume‘a mo e ‘Otuá.

⁴ Fakakaukau angé ki he kau tangata ki mu‘a ‘i he kau Kalisitiané ‘a ia na‘a nau kaume‘a mo e ‘Otuá. Ko ‘Ēpalahame ko ha tangata na‘á ne fakahāhā ‘a e tui tu‘u-ki-mu‘a. Laka hake ‘i he ta‘u ‘e 1,000 hili ‘a e mate ‘a ‘Ēpalahamé, na‘e ui ia ‘e Sihova “ko hoku kaume‘á.” (‘Ai. 41:8) Ko ia na‘a mo e maté he‘ikai lava ke ne fakamavahe‘i ‘a Sihova mei hono ngaahi kaume‘a ofí. ‘Oku mo‘ui ‘a ‘Ēpalahame ‘i he manatu ‘a Sihová. (Luke 20:37, 38) Ko e fakatātā ‘e taha ko Siope. ‘I he ha‘oha‘onga ‘o e kau ‘āngelo ‘i hēvaní, na‘e lea ‘a Sihova mo e tuipau fekau‘aki mo Siope. Na‘e ui ‘e Sihova “ko ha tangata faitotonu mo anga-tonu ia, pea manavahē ki he ‘Otuá mo fakamama‘o mei he me‘a ‘oku koví.” (Siope 1:6-8) Pea na‘e anga-fēfē ongo‘i ‘a Sihova fekau‘aki mo Taniela, ‘a ia na‘á ne tauhi faitōnunga ki he ‘Otuá ‘i ha fonua pangani ‘i he ta‘u nai ‘e 80? Na‘e tu‘o tolu hono fakapapau‘i ange ‘e ha ‘āngelo ki he tangata ta‘umotu‘á na‘á ne “mahu‘inga ‘aupito” ki he ‘Otuá. (Tan. 9:23; 10:11, 19) ‘Oku lava ke tau fakapapau‘i ‘oku holi ‘a Sihova ke a‘u ki he ‘aho te ne fokotu‘u mai ai hono ngaahi kaume‘a ‘ofeina kuo nau maté.—Siope 14:15.

5. Ko e hā e me‘a ‘oku fiema‘u ke hoko ai ‘o kaume‘a ofi mo Sihová?

⁵ ‘Oku toko fiha ‘a e kakai ta‘ehaohaoa he ‘ahó ni ‘oku nau kaume‘a vāofi mo Sihová? ‘Oku toko laui miliona. ‘Oku tau ‘ilo‘i eni koe‘uhi ‘oku tokolahi ‘a e kau tangata, kau fefine mo e fānau takatakai ‘i he māmaní ‘oku nau fakamo‘oni‘i ‘i he‘enau tō‘ongá ‘oku nau loto ke kaume‘a mo e ‘Otuá. ‘Oku “kaume‘a ofi” ‘a Sihova “mo e faitotonú.” (Pal. 3:32) Ko e kaume‘a ko ení ‘oku malava pē koe‘uhi ko ‘enau tui ki he feilaulau huhu‘i ‘a Sīsuú. Makatu‘unga aí, ‘oku faka‘atā ‘e Sihova ke tau fakatapui kiate ia pea hoko ‘o papitaiso. ‘I he‘etau fou ‘i he ngaahi sitepu mahu‘inga ko ení, ‘oku tau kau fakataha ai mo e kau Kalisitiane ‘osi fakatapui mo papitaiso ‘e laui miliona ‘oku nau fiefia ‘i he “kaume‘a ofi” mo e Tokotaha mahu‘inga taha ‘i he ‘univēsí!

6. ‘E lava fēfē ke tau fakahāhā ‘oku tau hounga‘ia ‘i he kaume‘a mo e ‘Otuá?

⁶ ‘E lava fēfē ke tau fakahāhā ‘oku tau koloa‘aki ‘a e kaume‘a mo e ‘Otuá? Hangē ko ‘Ēpalahame mo Siopé, ‘a ia na‘á na nofo‘aki faitōnunga ki he ‘Otuá ‘i he ta‘u ‘e teau tupu, kuo pau ke tau nofo‘aki faitōnunga neongo pe ko e hā hono fuoloa ‘etau tauhi kia Sihova ‘i he fokotu‘utu‘u motu‘a ko ení. Hangē ko Tanielá, kuo pau ke tau fakamahu‘inga‘i ‘etau kaume‘a mo e ‘Otuá ‘o laka ange ia ‘i he‘etau mo‘uí. (Tan. 6:7, 10, 16, 22) ‘I he tokoni ‘a Sihová, ‘e lava ke tau kātekina ha fa‘ahinga ‘ahi‘ahi pē te tau fehangahangai mo ia pea tauhi ma‘u ‘etau kaume‘a vāofi mo iá.—Fil. 4:13.

7. (a) Fakatatau ki he Palōveepi 15:8, ‘oku anga-fēfē ongo‘i ‘a Sihova fekau‘aki mo ‘etau ngaahi lotú? (e) ‘Oku anga-fēfē hono tali ‘e Sihova ‘etau ngaahi lotú?

⁷ Ko ha koloa ta‘ehāmai ‘e taha ko e lotú. Ko e ngaahi kaume‘a vāofí ‘oku nau fevahevahe‘aki ‘enau ngaahi fakakaukaú mo e ongo‘í. ‘Oku pehē mo ‘etau kaume‘a mo Sihová? ‘Io! ‘Oku lea mai ‘a Sihova fakafou ‘i he‘ene Folofolá, pea ‘oku fakae‘a mai ai ‘ene ngaahi fakakaukaú mo e ongo‘í. ‘Oku tau fetu‘utaki mo ia ‘i he lotu, pea ‘oku tau vahevahe kiate ia ‘etau ngaahi fakakaukau mo e ongo‘i loloto tahá. ‘Oku fiefia ‘a Sihova ‘i he fanongo mai ki he‘etau ngaahi lotú. (Lau ‘a e Palōveepi 15:8.) ‘I he tu‘unga ko ha Kaume‘a anga-‘ofa, ko Sihova ‘oku ‘ikai ngata  pē ‘ene fanongo mai ki he‘etau ngaahi lotú ka ‘okú ne toe tali ia. ‘I he taimi ‘e ni‘ihi ‘oku vave ‘a e talí. ‘I he taimi ‘e ni‘ihi ‘oku fiema‘u ke tau hanganaki lotu fekau‘aki mo ha me‘a. Ka, ‘oku lava ke tau tuipau ko e talí ‘e ha‘u ‘i he taimi totonu pea mo e founga lelei tahá. Ko e mo‘oni, ‘e kehe nai ‘a e tali ‘a e ‘Otuá mei he me‘a ‘oku tau ‘amanekiná. Ko e fakatātaá, ‘i he ‘ikai to‘o ha ‘ahi‘ahi, ‘okú ne ‘omai nai ‘a e poto mo e mālohi “ke kātaki‘i ia.”—1 Kol. 10:13.

8. ‘E lava fēfē ke tau fakahaa‘i ‘etau hounga‘ia ‘i he me‘a‘ofa ‘o e lotú?

⁸ ‘E lava fēfē ke tau fakahaa‘i ‘etau hounga‘ia ‘i he me‘a‘ofa mahu‘inga ko eni ‘o e lotú? Ko e founga ‘e taha ko e muimui ki he fale‘i faka‘otua ke “lotu ma‘u pē.” (1 Tes. 5:17) ‘Oku ‘ikai ke fakamālohi‘i kitautolu ‘e Sihova ke lotu. ‘I hono kehé, ‘okú ne faka‘apa‘apa‘i ‘etau tau‘atāina ke filí pea ekinaki mai ke tau “kītaki ‘i he lotu.” (Loma 12:12) Ko ia ‘e lava ke tau fakahaa‘i ‘etau hounga‘iá ‘aki ‘etau lotu ma‘u pē ‘i he ‘aho taki taha. Ko e mo‘oni, ‘oku totonu ke kau ‘i he‘etau ngaahi lotú ‘a e fakahāhā ‘o e fakamālō mo e fakahīkihiki kia Sihova.—Saame 145:2, 3.

9. ‘Oku anga-fēfē ongo‘i ‘a e tokoua ‘e taha fekau‘aki mo e lotú, pea ko e hā ho‘o ongo‘i fekau‘aki mo iá?

⁹ Ko e fuoloa ange ‘etau tauhi kia Sihová pea hokosia ‘a e ngaahi founga ‘okú ne tali ai ‘etau kolé, ko e lahi ange ia ‘etau hounga‘ia ‘i he lotú. Fakakaukau angé kia Chris, ko ha tokoua kuó ne ngāue taimi-kakato ‘i he ta‘u ‘e 47 kuohilí. “He fakafiefia ē ke vahe‘i ha taimi ‘i he pongipongí ke fakamākukanga ‘i he lotu kia Sihová,” ko ‘ene laú ia. “He fakaivifo‘oú ē ke talanoa kia Sihova ‘i he hopo hake pē ‘a e la‘aá ‘i he hahau ‘o e pongipongí! ‘Oku ue‘i ai au ke u fakamālō kiate ia ki he kotoa ‘ene ngaahi me‘a‘ofá, ‘o kau ai ‘a e monū ‘o e lotú. Pea ‘i he hili ‘a e lotu ‘i he ngata‘anga ‘o e ‘ahó, ko ha me‘a fakafiefia ia ke mohe mo ha konisēnisi ma‘a.”

10. Ko e hā ‘oku totonu ai ke tau koloa‘aki ‘a e laumālie mā‘oni‘oni ‘o e ‘Otuá?

¹⁰ Ko e ivi ngāue ‘o e ‘Otuá ko ha toe me‘a‘ofa ta‘ehāmai ia ‘oku totonu ke tau koloa‘aki. Na‘e ekinaki mai ‘a Sīsū ke tau hanganaki lotu ‘o kole ‘a e laumālie mā‘oni‘oní. (Luke 11:9, 13) Fakafou ‘i he laumālie mā‘oni‘oni ‘o Sihová, ‘okú ne  ‘omai ‘a e mālohi kiate kitautolu—na‘a mo e “mālohi ‘oku mahulu atu ia ‘i he tu‘unga anga-mahení.” (2 Kol. 4:7; Ngā. 1:8) ‘I he tokoni ‘a e laumālie ‘o e ‘Otuá, ‘oku lava ke tau kātekina ha ‘ahi‘ahi pē ‘oku tau fehangahangai nai mo ia.

11. ‘I he founga fē ‘e lava ke tokoni‘i ai kitautolu ‘e he laumālie mā‘oni‘oní?

¹¹ ‘E tokoni‘i kitautolu ‘e he laumālie mā‘oni‘oní ke fakahoko hotau ngaahi vāhenga-ngāue ‘i he ngāue ‘a e ‘Otuá. Ko e laumālie ‘o e ‘Otuá ‘e lava ke ne fakalelei‘i hotau ngaahi talēnití mo e malavá. ‘Oku ‘ai ai ke tau malava ‘o fakahoko hotau ngaahi fatongia faka-Kalisitiané. ‘Oku tau ‘ilo ko e ngaahi ola lelei ‘oku tau ma‘u ‘i he ngāue ‘a e ‘Otuá ‘oku malava pē ia koe‘uhi ko e tokoni ‘a hono laumālié.

12. Fakatatau ki he Saame 139:23, 24, ko e hā ‘e tokoni‘i kitautolu ‘e he laumālie mā‘oni‘oní ke faí?

¹² Ko e toe founga ‘e taha ke tau fakahaa‘i ai ‘oku tau fakamahu‘inga‘i ‘a e laumālie mā‘oni‘oni ‘o e ‘Otuá ko e lotu ke ne tokoni‘i kitautolu ke tau ‘ilo‘i ha fa‘ahinga fakakaukau pe holi fehālaaki ‘i hotau lotó. (Lau ‘a e Saame 139:23, 24.) Kapau te tau fai pehē, ko Sihova, fakafou ‘i hono laumālié, ‘e lava ke ne ‘ai ke tau lāu‘ilo ki ha fakakaukau pe holi fehālaaki. Pea kapau ‘oku tau lāu‘ilo ki ha fakakaukau pe holi fehālaaki, ‘oku totonu ke tau lotu ‘o kole ‘a e laumālie ‘o e ‘Otuá ke ne ‘omai ‘a e mālohi ke taliteke‘i‘aki ‘a e fakakaukau pe holi peheé. Ko ia te tau fakahaa‘i ai ‘oku tau fakapapau‘i ke faka‘ehi‘ehi mei hono fai ha me‘a te ne ta‘ofi ‘a Sihova mei hono tokoni‘i kitautolu ‘aki hono laumālie mā‘oni‘oní.—‘Ef. 4:30.

13. ‘E lava fēfē ke tau fakaivimālohi‘i ‘etau hounga‘ia ‘i he laumālie mā‘oni‘oní?

¹³ ‘E lava ke tau fakaivimālohi‘i ‘etau hounga‘ia ‘i he laumālie mā‘oni‘oní ‘aki ‘a e fakalaulauloto ki he me‘a kuo fai ‘e he laumālié ‘i hotau taimí. Ki mu‘a ke ‘alu hake ‘a Sīsū ki hēvaní, na‘á ne tala ki he‘ene kau ākongá: “Te mou ma‘u ‘a e mālohi ‘i he ‘alu hifo kiate kimoutolu ‘a e laumālie mā‘oni‘oní, pea te mou hoko ko e kau fakamo‘oni kiate au . . . ki he feitu‘u taupotu taha ‘o e māmaní.” (Ngā. 1:8) Ko e ngaahi lea ko ení kuo fakahoko ia ‘i ha founga fakaofo. ‘I he tokoni ‘a e laumālie mā‘oni‘oní, ko e toko valu mo e konga miliona nai ‘o e kau lotu ‘a  Sihová kuo fakatahataha‘i mei he tapa kehekehe ‘o e māmaní. Pehē foki, ‘oku tau fiefia ‘i ha palataisi fakalaumālie koe‘uhi ‘oku tokoni‘i kitautolu ‘e he laumālie ‘o e ‘Otuá ke fakatupulekina ‘a e ‘ofa, fiefia, melino, kātaki, anga-lelei, lelei, tui, anga-malū mo e mapule‘i-kitá. Ko e ngaahi ‘ulungaanga ko ení ‘oku fa‘u‘aki ia ‘a e “fua ‘o e laumālié.” (Kal. 5:22, 23) He me‘a‘ofa mahu‘inga ē ko e laumālie mā‘oni‘oní!

14. Ko e hā ‘a e poupou ta‘ehāmai ‘oku tau ma‘u ‘i he‘etau kau ki he ngāue fakafaifekaú?

¹⁴ ‘Oku tau ma‘u ‘a e koloa ta‘ehāmai ko e “ngāue fakataha” mo Sihova pea mo e konga fakahēvani ‘o ‘ene kautahá. (2 Kol. 6:1) ‘Oku tau ngāue mo kinautolu ‘i he taimi kotoa ‘oku tau kau ai ‘i he ngaohi ākongá. Na‘e pehē ‘e Paula fekau‘aki mo ia tonu mo e ni‘ihi na‘e kau ‘i he ngāue ko ení: ‘Ko e kau kaungāngāue kimautolu ‘o e ‘Otuá.’ (1 Kol. 3:9) ‘I he‘etau kau ki he ngāue fakafaifekau faka-Kalisitiané, ‘oku tau kaungāngāue foki ai mo Sīsū. Manatu‘i ‘i he hili hono fekau‘i ‘e Sīsū hono kau muimuí ke “ō ‘o ngaohi ko e kau ākonga ‘a e kakai ‘o e ngaahi pule‘anga kotoa pē,” na‘á ne pehē: “‘Oku ou ‘iate kimoutolu.” (Māt. 28:19, 20) Kae fēfē ‘a e kau ‘āngeló? He monū ē ko ia ke tataki ‘e he kau ‘āngeló ‘i he‘etau talaki “‘a e ongoongo lelei ta‘engata . . . ki he fa‘ahinga ‘oku nofo ‘i he māmaní”!—Fkh. 14:6.

15. ‘Omai ha fakatātā Fakatohitapu ‘okú ne fakahaa‘i ‘a e tafa‘aki mahu‘inga ‘o e kau ‘a Sihova ki he‘etau ngāue fakafaifekaú.

¹⁵ ‘I he poupou fakahēvani ko iá, ko e hā kuo lava ‘o fakahokó? ‘I he‘etau tūtuu‘i ‘a e pōpoaki ‘o e Pule‘angá, ‘oku ngangana ‘a e tenga ‘e ni‘ihi ‘i he ngaahi loto ongongofua pea tupu. (Māt. 13:18, 23) Ko hai ‘okú ne ‘ai ke tupu ‘a e tenga ‘o e mo‘oní pea hoko ‘o laku fuá? ‘Oku fakamatala‘i ‘e Sīsū ‘oku ‘ikai lava ha tangata ‘o muimui kiate ia kae ‘oua “kuo tohoaki mai ia ‘e he Tamaí.” (Sione 6:44) ‘Oku ‘omai ‘i he Tohi Tapú ha fakatātā pau ki he me‘á ni. Fakakaukau atu ki he taimi na‘e faifakamo‘oni ai ‘a Paula ki ha kau fefine ‘i tu‘a ‘i he kolo ko Filipaí. Fakatokanga‘i ‘a e me‘a ‘oku lea‘aki ‘e he Tohi Tapú fekau‘aki mo ha taha ‘o kinautolu, ko Litia: “Na‘e mātu‘aki fakaava ‘e Sihova hono lotó ke ne tokanga ki he ngaahi me‘a na‘e lea‘aki ‘e Paulá.” (Ngā. 16:13-15) Hangē ko Litiá, kuo tohoaki mai ‘e Sihova mo ha laui miliona kehe.

16. Ko hai ‘oku totonu ke fakalāngilangi‘i ki ha lavame‘a pē ‘oku tau hokosia ‘i he ngāue fakafaifekaú?

¹⁶ Ko hai ‘oku tuha mo e fakalāngilangí ‘i ha lavame‘a ‘etau ngāue fakafaifekaú? Na‘e tali ‘e Paula ‘a e fehu‘i ko iá ‘i he‘ene tohi ko eni ki he fakataha‘anga Kolinitoó: “Na‘á ku tō ‘e au, na‘e fu‘ifu‘i ‘e ‘Apolosi, ka ko e ‘Otuá na‘á ne hanganaki ‘ai ia ke tupú, ko ia ko e tokotaha ‘oku mahu‘ingá ‘oku ‘ikai ko ia ‘okú ne tō ha me‘á pe ko ia ‘okú ne fu‘ifu‘í, ka ko e ‘Otuá, ‘a ia ‘okú ne ‘ai ia ke tupú.” (1 Kol. 3:6, 7) Hangē ko Paulá, ‘oku totonu ke tau ‘ave ma‘u pē ‘a e fakalāngilangí kia Sihova ki ha lavame‘a pē ‘i he‘etau ngāue fakafaifekaú.

17. ‘E lava fēfē ke tau fakahaa‘i ‘etau hounga‘ia ‘i he “ngāue fakataha” mo e ‘Otuá, Kalaisi mo e kau ‘āngeló?

¹⁷ ‘E lava fēfē ke tau fakahaa‘i ‘etau hounga‘ia ‘i he monū ‘o e “ngāue fakataha” mo e ‘Otuá, Kalaisi mo e kau ‘āngeló? ‘E lava ke tau fai pehē ‘aki ‘a e kumi faivelenga ki he ngaahi faingamālie ke vahevahe atu ‘a e ongoongo leleí ki he ni‘ihi kehé. ‘Oku lahi ‘a e ngaahi founga ke fai ai eni, hangē ko e faifakamo‘oni “‘i he ‘ao ‘o e kakaí pea mei he fale ki he fale.” (Ngā. 20:20) ‘Oku fiefia foki ‘a e tokolahi ‘i he faifakamo‘oni ‘i he founga ‘ikai anga-mahení. ‘I he‘enau fetaulaki mo ha sola, ‘oku nau fakafe‘iloaki anga-fakakaume‘a kiate ia pea feinga ke kamata ha fetalanoa‘aki. Kapau ‘e tali lelei ‘e he tokotahá, ‘oku nau ‘oatu pōto‘i ‘a e pōpoaki ‘o e Pule‘angá.

18-19. (a) ‘Oku anga-fēfē ‘etau fu‘ifu‘i ‘a e tenga ‘o e mo‘oní? (e) ‘Omai ha hokosia ‘oku fakahaa‘i ai ‘a e founga hono tokoni‘i ‘e Sihova ha tokotaha ako Tohi Tapu.

 ¹⁸ ‘I he tu‘unga ko e ‘kaungāngāue ‘o e ‘Otuá,’ ‘oku ‘ikai ngata pē ‘i he‘etau tō ‘a e tenga ‘o e mo‘oní ka kuo pau foki ke tau fu‘ifu‘i ia. ‘I he fakahaa‘i ‘e ha tokotaha ‘a e mahu‘inga‘ia, ‘oku tau fai hotau lelei tahá ke toe foki kiate ia pe fokotu‘utu‘u ha taha ke fetu‘utaki kiate ia ‘i he taumu‘a ke kamata ha ako Tohi Tapu. ‘I he fakalakalaka ‘a e akó, ‘oku tau fiefia ‘i he sio ki he anga ‘o e ngāue ‘a Sihova ‘i he loto mo e fakakaukau ‘a e tokotaha akó.

¹⁹ Tau vakai angé ki ha fakatātā ‘o ha taula fa‘ahikehe ‘i ‘Afilika Tonga, ko Raphalalani. Na‘á ne sai‘ia ‘i he me‘a na‘á ne ako mei he Tohi Tapú. Ka na‘á ne fehangahangai mo ha pole lahi ‘i he taimi na‘á ne lau ai ‘a e me‘a ‘oku lea‘aki ‘i he Folofola ‘a e ‘Otuá fekau‘aki mo e fetu‘utaki mo e kau maté. (Teu. 18:10-12) Faai atu pē, na‘á ne faka‘atā ‘a e ‘Otuá ke ne fakafuo ‘ene fakakaukaú. Pea ko hono olá, na‘á ne ta‘ofi ‘ene ngāue ko ha taula fa‘ahikehé, neongo na‘e ‘uhinga eni ke mole ai ‘ene ma‘u‘anga mo‘uí. Ko Raphalalani, ‘okú ne ta‘u 60 he taimí ni, ‘okú ne pehē: “‘Oku ou fakamālō lahi ki he Kau Fakamo‘oni ‘a Sihová ‘i he‘enau tokoni‘i au ‘i he ngaahi founga lahi, hangē ko hono kumi ‘eku ngāue. Hiliō he me‘a kotoa, ‘oku ou fakamālō kia Sihova ‘i he‘ene tokoni ke liliu ‘eku mo‘uí, ko ia ‘i he taimi ní ‘oku lava ke u kau ‘i he ngāue fakamalangá ko e taha ‘o ‘ene Fakamo‘oni ‘osi papitaisó.”

20. Ko e hā ‘okú ke fakapapau‘i ke faí?

²⁰ ‘I he kupu ko ení, kuo tau lāulea ai ki he ngaahi koloa ta‘ehāmai ‘e fā. Ko e mahu‘inga taha ‘iate kinautolú ko e monū ‘o e hoko ‘a Sihova ko hotau Kaume‘a ofi tahá. ‘Oku ‘ai ai kitautolu ke tau ma‘u ‘aonga mei he ngaahi koloa ta‘ehāmai kehe—ko e fakaofiofi kiate ia ‘i he lotu, hokosia ‘a e tokoni ‘a e laumālie mā‘oni‘oní, pea ma‘u ‘a e poupou fakahēvani ‘i he‘etau ngāue fakafaifekaú. ‘Ofa ke tau fakapapau‘i ke fakaivimālohi‘i ‘etau hounga‘ia ‘i he ngaahi koloa ta‘ehāmai ko ení. Pea ‘ofa ke ‘oua ‘aupito ‘e tuku ‘etau fakamālō kia Sihova ‘i he‘ene hoko ko ha Kaume‘a fakaofó.